Пуш уйӑхӗн 25-мӗшӗнче Кемӗрте хӑрушӑ пушар пулнӑ хыҫҫӑн Раҫҫейӗпех пушар хӑрушсӑрлӑхне тӗрӗслеҫҫӗ. Ултавҫӑсем тӗлӗрмеҫҫӗ: ҫакӑнпа усӑ курса пуясшӑн.

Ака уйӑхӗн 6-мӗшӗнче Канаш хулинче палламан ҫын вырӑнти хӑна ҫурчӗн директорӗ патне шӑнкӑравланӑ та хӑйӗнпе пушар инспекцийӗн ӗҫченӗ тесе паллаштарнӑ. Унтан вӑл 20 пин тенкӗпе пушар хӑрушсӑрлӑхӗн докуменчӗсене хатӗрлесе пама шантарнӑ. Директор ырӑ мар сиснӗ те кун пирки полицие пӗлтернӗ.

Палӑртмалла: ку Чӑваш Енре пӗртен-пӗр тӗслӗх мар. Халӗ лару-тӑрӑва тӗпчеҫҫӗ.

Аса илтерер: Кемӗрте суту-илӳ центрӗ ҫуннӑ, унта 64 ҫын вилнӗ. Инкек хыҫҫӑн Раҫҫейри суту-илӳ центрӗсене тата ытти учреждение тӗрӗслеме пуҫланӑ.

Питӗрте Пӗтӗм Раҫҫейри «Раҫҫейри шкул умӗнхи чи лайӑх 100 учреждени» конкурса пӗтӗмлетнӗ. Унта Шупашкарти ача пахчи палӑрнӑ.

Конкурс лауреачӗсен йышне ҫӗршыври 5 ача пахчи кӗнӗ. Вӗсен йышне Шупашкарти 19-мӗш ача пахчи кӗнине палӑртма питӗ кӑмӑллӑ. Ӑна «Раҫҫейри чи лайӑх патшалӑх ача пахчи» ят панӑ.

Жюрире Федераци Канашӗн ӑслӑлӑх, вӗренӳ, культура тата информаци политикин комитечӗн, Патшалӑх Думин вӗренӳ комитечӗн тата ытти ведомство элчисем пулнӑ. Вӗсем Шупашкарти 19-мӗш ача пахчи шкул умӗнхи ачасен вӗренӗвӗн аталанӑвне пысӑк тӳпе хывнине палӑртнӑ.

«ТурСтат» аналитика агентстви Раҫҫейри ҫак ҫуркунне пулакан культура мероприятийӗсен танлаштарӑмне хатӗрленӗ. Чи лайӑх 10 мероприяти йышне Шупашкарта йӗркеленекен Пӗтӗм тӗнчери балет фестивалӗ те кӗнӗ.

Чӑваш Енӗн культура министерстви пӗлтернӗ тӑрӑх, ҫак йыша Мускаври «Мускав ҫуркунни A Cappella» фестиваль, Питӗрти «Dance Open» балет фестивалӗ, «Клинри ҫуркунне» юрӑ-кӗвӗ фестивалӗ, Мускав облаҫӗнчи «Красногорский», Ленинград облаҫӗнчи «Литературӑпа кино» кинофестивальсем, Пенза облаҫӗнчи «Ылтӑн провинци» театр фестивалӗ, Челябинск облаҫӗнчи «Уралти искусствӑсен эрни» курав, Тамбов облаҫӗнчи С.В. Рахманинов ячӗллӗ музыка фествивалӗ, Шупашкарти М.Д. Михайлов ячӗллӗ балет фестивалӗ тата Чулхула облаҫӗнчи «Чӗресен кӗвви» бард-фестиваль кӗнӗ.

Палӑртса хӑварар, Шупашкарти фестиваль ака уйӑхӗн 12-22-мӗшӗсенче иртет. Ҫав вӑхӑтра «Жизель», «Золушка» «Ромео и Джульета», «Весна священная», «Жар-птица» тата «Чиполлино» балетсене кӑтартӗҫ. Унсӑр пуҫне гала-концерт та пулӗ.

Ҫӗрпӳ районӗнчи Апакассинчи «Шуҫӑм» вокал ансамблӗ «Шетмӗпе Ҫавал кӗввисем» фестивальтен хавхаланса таврӑннӑ.

Красноармейски район администрацийӗ, Чӑваш Енри композиторсен ассоциацийӗ, Красноармейски районӗнчи Нестӗр Янкас ячӗллӗ культура, литература тата ӳнер пӗрлӗхӗ фестивале иртнӗ уйӑхрах ирттернӗ-ха. Ырӑ хыпара апакассисем ӗнер ҫеҫ пӗлтернӗ.

«Шетмӗпе Ҫавал кӗввисем» фестивале РСФСР халӑх артисчӗ, РСФСР искусствӑсен тава тивӗҫлӗ ӗсченӗ, СССР преми лауреачӗ Федор Лукин композитор ҫуралнӑранпа 105 ҫул ҫитнине халалланӑ. Унта Йӗпреҫ, Комсомольски, Ҫӗрпӳ, Муркаш тата Красноармейски районӗнчи ушкӑнсем хутшӑннӑ.

Апакассинчи «Шуҫӑм» вокал ансамблӗ (ертӳҫи — В. Парфенов) «Чи лайӑх юрлакан — вокал ансамблӗ» номинацире пӗрремӗш вырӑн йышӑннӑ. В. Парфенов, И. Павлова, Вера Алексеева юрланине «Вокал ансамблӗсем, трио» номинацире чи лайӑххи тесе йышӑннӑ.

Чӑваш Енре ҪҪХПИн икӗ стационар посчӗ уҫӑлнӑ. Вӗсене хальхи стандартсемпе килӗшсе тӑмалла тунӑ.

ЧР ШӖМӗ пӗлтернӗ тӑрӑх, постсем Шупашкар ҫывӑхӗнче уҫӑлнӑ. Вӗсем «Атӑл» М-7 тата «Вятка» ҫулсем ҫинче вырнаҫнӑ. Ҫул-йӗрпе патруль службин 14 инспекторӗ ҫӗнӗ постсенче талӑкӗпех дежурствӑра тӑрӗҫ.

Стационар пунктсенче ҫулпа пыракан транспорт правилӑсене пӑснине палӑртмашкӑн мӗнпур япала пур. Постра, шалта, инспекторсем пӳрне йӗрӗсене илме пултарӗҫ. Ку, тӗслӗхрен, шыраври парӑмҫӑсене тытса чарма май парать.

Чӑваш Енри таксистсен ҫынсене ҫул ҫӳревшӗн терминал урлӑ тӳлеме майсем туса памалла. Унсӑр пуҫне ҫӑмӑл машинӑна ахаль транспортран уйӑрмашкӑн сӑрлама, ятарлӑ паллӑсемпе, хатӗрсемпе тивӗҫтерме тивӗ. Ҫакӑн пирки Чӑваш Енӗн Транспорт министерстви ҫӗнӗ саккун проектӗнче ҫырнӑ.

«Мой город Чебоксары» (чӑв. «Ман хула Шупашкар») портал хыпарланӑ тӑрӑх, ҫынсене таксипе илсе ҫӳрекенсен машина салонӗнче ҫул ҫӳревшӗн электронлӑ майпа тӳлеме май паракан терминала саккунра палӑртнипе килӗшӳллӗн вырнаҫтармалла. Ку транспотӑн сарӑ тӗслӗ пулмалла, машинӑн айккинче таксие палӑртакан ӳкерчӗклӗ йӗр (сӑнӳкерчӗкри пек), ҫийӗнче хӗрлӗ сарӑ тӗслӗ хунар пулмалла, ҫав хунарӑн ҫула тухнӑ чухне ҫутӑлмалла.

Палӑртса хӑвармалла, саккун проектне йышӑнсан малашне республикӑра такси шутне те тӗрӗслесе тӑрӗҫ. Енчен те вӗсен хисепӗ 3 пин те 500 машинӑран иртсен ыттисен пассажирсене илсе ҫӳрес тесен аукцион витӗр тухса ирӗк илме тивӗ.

Шкул ачисен чӑваш чӗлхипе литературине вӗренес кӑмӑлне ҫӗклес, чӑваш халӑхӗн историйӗпе культурине тӗпчес енӗпе пултаруллӑ ачасене тупса палӑртас тӗллевпе Ҫӗрпӳ районӗнче наци культурин «Туслӑх хӗлхемӗ» фестиваль иртнӗ.

Асӑннӑ фестивале районти шкул ачисем, 1-4-мӗш классенче вӗренекенсем хутшӑнчӗҫ.

Фестиваль номинацийӗсем ҫаксем пулчӗҫ: «Сӑмах илемӗ», «Чӑваш вӑййи», «Янра, чӑваш юрри», «Чӑваш ташши», «Чӑваш апачӗ». Ҫӗрпӳ районӗнче пултаруллӑ ача-пӑча нумай пулнине фестиваль аван кӑтартса пачӗ.

Анатолий Аксаков Инстаграма лартнӑ сӑн ӳкерчӗк.

Мӑнкун валли Иерусалимри Христос чӗрӗлӗвӗн чиркӗвӗнчен сӑваплӑ ҫулӑма пирӗн республикӑна илсе килнине Чӑаш халӑх сайчӗ пӗлтернӗччӗ-ха. Унта кӑҫал та, пӗлтӗрхиллех, Раҫҫей Федерацийӗн Патшалӑх Думин депутачӗ, «Тӗрӗслӗхшӗн Раҫҫей» партин ертӳҫи Анатолий Аксаков кайма пултарассине хыпарланӑччӗ.

Чӑаш халӑх сайчӗ йӑнӑшман иккен. Паян ирпе Анатолий Аксаков Инстаграмра сӑн ӳкерчӗк вырнаҫтарнӑ. «Внуково» аэропотра, Израиле вӗҫсе каяс умӗн. Семёнов Сергей Палыч Сӑваплӑ ҫулӑм патне пуҫласа каять», — ҫырса хунӑ РФ Патшалӑх Думин депутачӗ.

Аса илтерер, Анатолий Аксаков — «Тӗрӗслӗхшӗн Раҫҫей» партин ертӳҫи. Чӑваш Енӗн Патшалӑх Канашӗн депутачӗ Сергей Семенов та асӑннӑ партире тӑрать.

Сар.ru сӑнӗ

Раҫҫей Шалти ӗҫсен министерствин Шупашкар хулинчи управленине паянтан ҫӗнӗ пуҫлӑх ертсе пырӗ. Ку пукана Владимир Хориков полковник йышӑннӑ.

Раҫҫей ШӖМӗн Шупашкарти управленийӗ пӗлтернӗ тӑрӑх, хулари йӗрке хуралҫисене ҫӗнӗ пуҫлӑхпа Чӑваш Енӗн шалти ӗҫсен министрӗн ҫумӗ Александр Смирнов паллаштарнӑ. Ҫак должноҫа йышӑниччен 50 ҫулти Владимир Хориков Коми Республикин йӗрке хуралӗнче ҫулталӑк вӑй хунӑ, ҫынна хирӗҫле тунӑ преступленисене уҫса паракан уйрӑм пуҫлӑхӗн ҫумӗ пулнӑ. Унччен малтан вара тӑван тӑрӑхӗнче — Мари Республикинче — тимленӗ. 1991 ҫулта Йошкар-Олари шалти ӗҫсен управленийӗн уголовлӑ шырав уйрӑмӗн оперуполномоченнӑйне вырнаҫнӑ та Мари Эл йӗрке хуралӗнче иртнӗ ҫулхи пуш уйӑхӗччен тӗрлӗ должноҫра тӑрӑшнӑ.

Суд йышӑнӑвне пурнӑҫлакан приставсем Вӑрмар районӗнчи арҫынран сунарҫӑ пӑшалне туртса илнӗ. Хайхискер банк умӗнче пысӑк парӑма кӗнӗ. Кун пирки «Мой город Чебоксары» (чӑв. «Ман хула Шупашкар») портал хыпарлать.

Суд приставӗсен федераци службин Чӑваш Енри управленийӗ пӗлтернӗ тӑрӑх, суд приставӗсем патне банк умӗнче 180 пин тенкӗ парӑма кӗнӗ арҫын тӗлӗшпе пуҫарнӑ ӗҫ ҫитнӗ. Ҫавна пурнӑҫласа приставсем ухтару тунӑ, кивҫенрен тухайман арҫыннӑн килӗнче пулнӑ пӑшала туртса илнӗ. Пакунлисем ӑна вырӑнти полици уйрӑмне управа панӑ.

Палӑртса хӑвармалла, халӗ специалистсем пӑшал хакне палӑртаҫҫӗ. Енчен те парӑмҫӑ банка укҫа хывмасан хайхи пӑшала аукцион ирттерсе сутӗҫ, укҫине вара банка куҫарса парӗҫ.