Ял хуҫалӑх предприятийӗсене тупӑшлӑ ӗҫлеме ҫӑмӑл мар тесен те йӑнӑш мар пулӗ. Ҫанӑ тавӑрса тӑрӑшсан та тепӗр чух шӑрӑх ҫанталӑк тухӑҫ шайне чакарма пултарать. Ӳсентӑранпа пӗрлех выльӑх-чӗрлӗх отрасльне аталантаракансен ку енчен шанчӑклӑрах. Ҫакӑн пирки иртнӗ эрнере ЧР Ял хуҫалӑх министерствин анлӑ коллегийӗнче те палӑртрӗҫ.

Ларӑва хутшӑннӑ Михаил Игнатьев Элтепер ҫӗрулмипе ӗҫлеме шикленнине хурласа калаҫрӗ. «Брянск облаҫӗ ҫулталӑкне 1,5 миллион тонна ытла туса илет. Эпир миллион тоннӑна ҫитме ҫеҫ ӗмӗтленетпӗр. Шикленетпӗр: пӗрре — лартатпӑр, тепре — лартмастпӑр. Лартмалла кӑна та мар, ҫуса хутаҫа тултарма тытӑнмалла. Брянск кӗпӗрнаттӑрӗ 10 ҫул каялла пирӗн патра Уй-хир кунӗнче пулнӑччӗ, пирӗн технологисемпе паллашнӑччӗ. Вунӑ ҫулта унта пирӗнтен иртсе кайрӗҫ. Федераци сечӗсен лавккисенче те паян Брянск ҫӗрулмине сутаҫҫӗ», — хастартарах пулма чӗнсе каларӗ Элтепер.

Хуласене тишкерекен республикӑри комисси канашлать

Чӑваш Енри тӑватӑ хула Раҫҫейри конкурса хутшӑнать. Вӗсем хӑтлӑ хула хӑтлӑхне йӗркелекенсен конкурсӗнче тупӑшӗҫ. Кашниех хӑйсен уйрӑм территорийӗсене тӑратнӑ.

Чӑваш Енӗн Строительство, архитектура тата ҫурт-йерпе коммуналлӑ хуҫалӑх министерствинче асӑннӑ конкурса материалсене суйласа илекен ведомствӑсен хушшинчи комисси ларӑвӗ иртнӗ. Строительство министрӗ Алексей Грищенко конкурса тӑратнӑ ӗҫсемпе паллаштарнӑ.

Улатӑр, Канаш, Ҫӗмӗрле хулисем хулисем 20 пинтен пуҫласа 50 пин таран ҫын пурӑнакан хуласен хушшинче тупӑшӗҫ, Улатӑр — 10 пин ҫын таран пурӑнаканнисен йышӗнче.

Улатӑр хули «Алатырь – белгорючь камень» текен территорие конкурса тӑратнӑ, Канаш — хулари культура керменӗн ҫуллахи паркне, Ҫӗмӗрле — хулари культурӑпа кану паркне, Етӗрне — Комсомольски урама.

Тӗнче тетелӗ пулӑшнипе наркотик сутакансем те пур. Иртнӗ ҫул ҫав меслетпе 160 ҫын наркопреступлени тунӑ. Ҫулталӑк хушшинче тӗнче тетелӗнчи 10 лавкка ӗҫне чарса лартнӑ. Хайхисем наркотика пирӗн республикӑра тата кӳршӗ регионсенче сарнӑ.

Массӑллӑ информаци хатӗрӗсен ӗҫне Роскомнадзорӑн Чӑваш Енри управленийӗ тӗрӗслесе тӑрать-ха. Паян пирӗн республикӑра 120 МИХа шута илнӗ. Информаци технологийӗсем, массӑллӑ информаци хатӗрӗсем тата массӑллӑ коммуникацисем ҫинчен калакан саккунсене палӑртсан надзор органӗ ҫийӗнчех явап тыттарать.

Паянхи кун Чӑваш Енре, сӑмах май, периодика пичет кӑларӑмӗсем — 68, электрон периодика тата сеть кӑларӑмӗсем — 33, телеканалсем — 3, радиоканалсем — 1, тӗнче тетелӗнчи информаципе телекоммуникаци сечӗсем шутланакан, анчах МИХ евӗр регистрациленмен сайтсем — 15.

Шупашкарта пурӑнакан пенсионера хваттер укҫине икӗ ҫӗрте харӑс тӳлеттернӗ. Ҫакна Чӑваш Ен прокуратурин тӗрӗслевӗ вӑхӑтӗнче палӑртнӑ. Ҫурт-йӗрпе коммуналлӑ хуҫалӑха тытса тӑракан икӗ управляющи компание укҫа тӳленӗ ватӑ вӗсенчен пӗринчен, «Камал» ятлинчен, укҫана каялла шыраса илме хӑтланнӑ-ха. Анчах усси пулман.

Ватӑ аптӑраса ларман — Шупашкар хулинчи Калинин районӗнчи прокуратурӑна ҫул тытнӑ. Унта вӑл хваттер укҫине «ПИК-»1 тата «Камал» управляющи компанисене тӳленине ӑнлантарса панӑ, укҫана каялла шыраса илес кӑмӑллине пӗлтернӗ.

Ватӑ хыпарлани тӑрӑх надзор органӗ тӗрӗслев пуҫарнӑ. Пенсионер сӑмахӗ тӳрре килнӗ. Халӗ прокуратура ватта хӳтӗлесе суда тавӑҫпа тухнӑ. Унта «Камал» предприятирен 2 пин шыраса илме ыйтнӑ.

Ака уйӑхӗн 1-мӗшӗнче ҫурхи призыв пуҫланать. Хальхинче Чӑваш Енрен 1400 каччӑ салтака каймалла. Тӳрех палӑртса хӑвармалла: 2018 ҫулта Тӗп ҫар округӗ палӑртнӑ плана 100 проценчӗпех пурнӑҫланӑ.

Пӗлтӗр республикӑран 2684 ҫын ҫара кайнӑ (ҫурхи призывра – 1359, кӗрхи призывра 1325). Кашни пиллӗкмӗш призывникӑн аслӑ пӗлӳ пулнӑ, 13 проценчӗ ҫар учӗт специальноҫӗсемпе вӗреннӗ.

Хальхи призывра та, ЧР Элтеперӗн администрацийӗн пресс-служби пӗлтернӗ тӑрӑх, норма палӑртнӑ. Чӑваш Енрен кӑҫал 1398 ҫын ҫара каймаллине палӑртнӑ.

Суд приставӗсен федераци службин Чӑваш Енри управленине 32 ҫулти арҫын ӗҫе кӗме пынӑ. Хайхискер приставра ӗҫлесшӗн пулнӑ, анчах унӑн хӑйӗн те парӑмсем пур иккен. Ҫакна тӗрӗслев тупса палӑртнӑ.

Ҫак арҫыннӑн 9 ҫулти ывӑлӗ пур, уншӑн алимент тӳлемелле. Анчах арҫын укҫана вӑхӑтра паман, парӑм 100 пин тенкӗрен те иртнӗ. Ун тӗлӗшпе административлӑ ӗҫ пуҫарнӑ, арҫынна суда илсе ҫитерме хӑтланнӑ. Анчах вӑл миравай судья патне кайма килӗшмен – полици чӗннӗ, пристав ӗҫ вырӑнӗпе ытлашши усӑ курнӑн туйӑннӑ.

Ҫапах арҫынна суд участокне илсе ҫитернӗ, унта ӑна 50 сехет ӗҫлеттермелле тесе йышӑннӑ.

Паян, пуш уйӑхӗн 26-мӗшӗнче, Чӑваш Республикин Патшалӑх Канашӗн экономика политикин, агропромышленость комплексӗпе экологи енӗпе ӗҫлекен комитечӗн пуҫлӑхӗ Игорь Моляков ҫак тивӗҫрен хӑтарма ыйтса ҫырнӑ. Кун пирки «Правда ПФО» интернет-кӑларӑм хыпарлать.

Хайхи ҫӑлкуҫ пӗлтернӗ тӑрӑх, «Тӗрӗслӗхшӗн Раҫҫей» парти интересӗсене республика парламентӗнче хӳтӗлекен «халӑх тарҫи» комитет пуҫлӑхӗнчен кӑрма ыйтса заявлени ҫырса панӑ. Ҫапла майпа Чӑваш Енӗн Патшалӑх Канашӗнче кашни фракциренех пӗр пайташа та пулин должность памаллине шута илсе Игорь Моляков тивӗҫӗсене малашне Сергей Семенов депутат пурнӑҫласа пырӗ.

Палӑртса хӑварни вырӑнлӑ пулмалла, ҫитес вӑхӑтрах Чӑваш Республикин Патшалӑх Канашӗн черетлӗ сиссийӗ пулӗ.

Ыран, пушӑн 27-мӗшӗнче, Пӗтӗм тӗнчери театр кунӗ. Ҫак уявра республикӑра «Чӗнтӗрлӗ чаршав» конкурса пӗтӗмлетесси йӑлана кӗнӗ. Кӑҫал ӑна 20-мӗш хут йӗркелӗҫ.

Йӑлана кӗнӗ тӑрӑх, республикӑри ултӑ театр малтанхи ҫулхи икӗ премьерӑна конкурса тӑратать: ачасем тата аслисем валли хатӗрленӗ постановкӑсене. Кӑҫал пур театр та икӗ ӗҫ тӑратман. Экспертсем Чӑваш патшалӑх академи драма театрӗн «Как Данила счастье искал» юмахне, «Анисса» драмине, Чӑваш патшалӑх ҫамрӑксен театрӗн «Аленький цветочек» тата «Юратупа курайманлӑх» постановкисене, Пукане театрӗн «Муму» тата «Сказка о рыбаке и рыбке» ӗҫӗсене, Сӑнав театрӗн «И такое бывает» ӗҫне, Чӑваш патшалӑх оперӑпа балет театрӗн «Аттила» балетне, Вырӑс патшалӑх драма театрӗн «Темные аллеи» постановкине хаклӗҫ. Вӗсем конкурса тӑратнӑ ӗҫсене тӑватӑ кун пӑхнӑ.

Лауреатсене ыран Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче чыслӗҫ.

Ӗнер кунӗпех йӗпе юр ҫунӑран ҫул-йӗр ҫинче чӑрмавсем те сиксе тухнӑ. М-7 ҫулӑн пӗр пайне хупни пирки хыпарланӑччӗ.

Паян республикӑри ҫулсем ҫинче шуҫлак. Уйрӑмах – ирхине. Ҫавӑнпа водительсене асӑрхануллӑ пулма ыйтаҫҫӗ.

Ҫапах пӑтӑрмахсӑр пулман паян. Ирхине «Вятка» ҫул ҫинче, Кӳкеҫ поселокӗнчен инҫех мар, авари пулнӑ: йывӑр тиевлӗ машинӑпа ҫӑмӑл машинӑпа ҫапӑннӑ.

Малтанлӑха пӗлтернӗ тӑрӑх, «ВАЗ-2114» рулӗ умӗнче ларакан 45 ҫулти водитель транспорт хирӗҫ килекен ҫул ҫине тухса «Скания» бензовозпа ҫапӑннӑ. Пысӑк машина кюветалла чӑмнӑ, пӗчӗк машинӑна та пӗрле сӗтӗрсе кайнӑ.

«Вунтӑваттӑмӗш» рулӗ умӗнче ларнӑ водитель тата 43 ҫулти пассажирка ҫавӑнтах вилнӗ. Бензовоз водителӗ аманман. Фура тиевпе пыман, пушах пулнӑ.

Сар.ru сӑнӗ

Шупашкарта совет тапхӑрне халалласа виҫӗ пайран тӑракан музей комплексӗ хута янӑ. Ӑна «СССРта туса кӑларнӑ» ят панӑ. Кун пирки «Мой город Чебоксары» портал хыпарлать.

Хайхи ҫӑлкуҫ пӗлтернӗ тӑрӑх, пӗрремӗш уйрӑм музейпе пӗр ятлӑ. Унта совет тапхӑрӗнче ҫынсем йӑлара мӗнпе усӑ курнипе паллашма пулать. Иккӗмӗшӗнче Шупашкар хули пирки тӗплӗнрех пӗлме, виҫҫӗмӗшӗнче Ҫӗмӗрле районӗнчи Тури Кӑмаша ялӗн историйӗпе паллашма май пур. 200 ытла тӑваткал метр йышӑнакан музейри экспонатсен пысӑк пайне Тури Кӑмашари «Сувар» социаллӑ пурнӑҫпа культура центрӗнчи музейрен куҫарса килнӗ. Кунта халӗ Совет Союзӗнчи шкул ачин тетрачӗсемпе, парттисемпе, патефонпа, пир станокӗпе, купӑспа, чӑваш хресченӗн килти япалисемпе паллашма пулать. Экспонатсенчен чи пӗлтерӗшлисем — 1954 ҫулти электрочейник тата телефон аппарачӗсем.