Аркадий Лукин

Аркадий Васильевич Лукин 1934 çулхи луш уйăхĕн 17-мĕшĕнче Чăваш Республикин Элĕк районĕнчи Лутра Пакăшра колхозник кил-йышĕнче çуралнă. Вăтам шкултан вĕренсе тухнă хысçăн пĕр çула яхăн колхозра, унтан районти хаçат редакцийĕнче тата комсомол райкомĕнче ĕçленĕ, 1954-1959 çулсенче «Çамрăк коммунист» хаçат редакцийĕнче литература сотрудникĕ, тăлмачă, редакцин яваплă секретарĕ пулнă, ВЛКСМ Тĕп Комитечĕн Мускаври Тĕп шкулĕнче вĕреннĕ.

1959 çул пуçламăшĕнче вăл «Коммунизм ялавĕ» хаçат редакцийĕнче, 1962-1963 çулсенче «Ялав» журнал редакцийĕнче ĕçленĕ. 1965 çулта А.М.Горький ячĕллĕ Литература институчĕ çумĕнчи Литература аслă курсĕнчен вĕренсе тухнă. 1965-1966 çулсенче Чăваш кĕнеке издательствин редакторĕ пулнă. Каярахпа вăл — Чăваш писателĕсен союзĕн правленийĕн литература консультанчĕ, ун хыççăн поэт Чăвашрадио комитетĕнче, «Ялав» журнал редакцийĕнче ĕçленĕ. Ăна 1963 çулта СССР писателĕсен союзĕн членне илнĕ. Вăл 1995 çулхи çу уйăхĕн 12-мĕшĕнче вилнĕ.

А.Лукин ытти халăхсен поэзине чылай куçарнă. Унăн паллăрах кĕнекисем: «Чĕрехĕлхемĕ» (1960), «Манăн çăлтăр» (1962), «Эсĕ пулсан...» (1964), «Тул çути» (1967), «Эпир вĕçме çуралнă» (1968), «Тивлет» (1978), «Çĕр тĕнĕлĕ» (1979), «Ыталатăп, çĕршывăм, сана» (1982), «Сăвăсемпе поэмăсем» (1984), «Ялан санпа, ялан пĕрле» (1995).