Хапăлласа кĕтсе илетпĕр

 

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

 

Кĕнекесем

ЛаохКунсем-çулсем... Çулсем-йĕрсем...Хĕрес хывнă хĕвелСăвăсемпе поэмăсемХăмăшлăха путнă кĕмĕл уйăхТантăшсемКайăк тусĕ

Ҫурла уйӑхӗ, ҫӗрле


1-мĕш сыпăк

...Çĕр варринче телефон шăнкравланипе вăранса кайрĕ Платон. Ырра маррине сиссе чĕри сиксе тухасла тапма тытăнчĕ. Вырăн çинчен сиксе тăрса сасă енне ыткăнчĕ арçын.

— Да! — кăшкăрчĕ чĕтрекен аллипе телефон кĕпçине ярса тытса.

— Сирĕн Виталийĕр каллех пăкă пек ӳсĕр килчĕ. Чараймарăм. Гараж алăкне çĕмĕрсе кĕрсех машинапа таçта тухса кайрĕ… — «савăнтарчĕ» кинĕ.

— Хăçан?!

— Пĕр çур сехет кайĕлле.

— Эпĕ мĕн тăваяп вара?! — хăтăрса тăкрĕ кинне вăл. — Ыран ирех ĕçе каймалла. Эсир мана канлĕ çывăрма памастăр. Хăвăрăнне хăвăр пĕлĕр! — çилĕпе вăрчĕ телефон кĕпçине хăй вырăнне.

— Кам вăл? Мĕн пулнă? — илтĕнчĕ тĕттĕмре арăмĕн хăранă сасси.

— Кин шăнкравлать. Витали каллех ĕçнĕ тет. Гаражĕнчен машинине илсе тухса кайнă...

Çĕрĕпе сӳнмерĕ çутă. Ывăлне тарăхнипе пӳртрех сигарет тивертсе ячĕ Платон. Пӳлĕмре унта-кунта уткаларĕ.

«Мĕншĕн сирĕн Виталийĕр? Мĕншĕн ман мăшăрăм темест. Тахçанах çемье çавăрнă ывăлĕшĕн ашшĕпе амăшĕ яваплă-и?» — кинне те тарăхрĕ вăл. — «Хăçанччен çав ăнман ачашăн пăшăрханса пурăнмалла?»

Малалла

Ҫумӑр ташши


Пысăк ялăн çийĕнче

Пысăк пĕлĕт чарăнчĕ,

Унăн йывăр кутамккинчен

Çумăр пĕрчи сапăнчĕ.

Шăпăр-шăпăр юрласа,

Тăпăр-тăпăр ташласа

Ак пĕри çĕре сикет,

Ак теприйĕ сирпĕнет...

Шăппи-шаппи, пăтти-пат,

Çара ури çăтти-çат.

Йывăç тăрри, пӳрт тăрри,

Курăк тăрри, шыв тăрри,

Çумăр пĕрчипе пĕр харăс

Тапăртатса-шапăртатса

Çатăлтатса юлтăр-и?..

Кӑвакал чӗпписен юрри


Нарт-нарт-нарт, нарт-нарт-нарт!

Шурăмпуç шуралчĕ, нарт!

Ĕнтĕ вăхăт выляма,

Васкар халĕ урама.

 

Нарт-нарт-нарт, нарт-нарт-нарт!

Хаваспа утатпăр, нарт!

Килтĕмĕр пĕве хĕрне,

Шыв сапатпăр пĕр-пĕрне!

 

Нарт-нарт-нарт, нарт-нарт-нарт!

Ишнĕ май чăматпăр, нарт!

Выльăпăр пытанмалла,

Хӳререн вăшт тытмалла.

 

Нарт-нарт-нарт, нарт-нарт-нарт!

Каçхи шуçăм çитрĕ, нарт!

Килелле халь каймалла,

Килĕпĕр ыран, калла!

Вӑрӑм мӑйлӑ жираф


Утать кĕллин-келлĕн

Ярапа шлепкеллĕ

Питĕ вăрăм мăйлă жираф.

Ачасем чупаççĕ —

Тĕлĕнсе супаççĕ.

Йытăсем вĕреççĕ: Хав-хав-хав!

 

Жи-жи-жи-жи-жи

Жи-раф...

Питĕ вăрăм мăйлă жираф.

Халăх пăхкалать кăн-кан:

— Ǎçта танккан?

Хĕвĕшет çын ун тавра.

Кăшкăрашрĕ пĕр павра:

— Кай-кай-кай! Вăт тăрнаккай!

 

Африкăран килнĕ

Артист ятне илнĕ —

Çулпала пырать жираф.

Гастроле вăл тухнă,

Тус-юлташсем пухнă,

Тум-юмлавĕ унăн — пысăк лав!

 

Жи-жи-жи-жи-жи

Жи-раф...

Питĕ вăрăм мăйлă жираф.

Вăл утать юрласа,

Хăйне хăй ырласа:

- Хĕвеле чуп тăвап питĕнчен!

Çăлтăрсем пуçтарап тĕм çинчен.

 

Юрататăп эп пурнăçа,

Шав шанатăп шеп ăнăçа.

Шăрăх çĕртен килтĕм,

Халăх пилне илтĕм,

Сирĕн çĕрсем тăрăх

Халь утатăп йăрă.

Чаплă артист эпĕ!

Паллă артист эпĕ.

 

Халăх тăрать хапхасем патĕнче,

Çăварне карса тĕлĕнет;

- Ах, тĕнче!

Мĕн катемпийĕ ку?! Ай, тур-тур!!

Малалла

Кӗвӗ


Асанне-çăлкуç кĕсле калать,

Курăк-кинеми такмак калать,

Шăпăр янратать мучи йăмра

Савнă ялăмри пĕр айлăмра.

Шăп ларатăп йăпануллăн киленсе,

Çаврăм-çаврăм юрă-кĕвĕ вĕренсе

Пулӑ ҫурӑмӗ


Францире вăрçă валли укçа-тенкĕ пухма ĕççыннисем çине ӳкекен налогсемпе штрафсене ӳстереççĕ. (Хаçатсенчен.)

 

ПАЛУБА ÇИНЕ АН СУРĂР.

БОРТ ХЫÇНЕЛЛЕ НИМĔН ТЕ АН ПĂРАХĂР.

ИТЛЕМЕСЕН ШТРАФ ТӲЛЕТТЕРЕÇÇĔ.

 

Çапла çырса çапнă 3-мĕш класăн палуби çине. Çырнин айĕнче яках мар тумланнă Галопен ларать, вобла çиет, пĕлĕт çинелле пăха-пăха илет. Пĕлĕтрен аялта, Галопенран инçетре мар — пĕрремĕш класс палуби — пассажирсем уçăлса çӳреççĕ. Унта çырса çапни те çук, мĕншĕн тесен пĕрремĕш класшăн укçа тӳленĕ çынна кирек мĕн тума та ирĕк. Капитан пултăрĕпе паллашас кăмăлу пулсан — паллаш, яра пар; палуба çине сурас кăмăл пулсан — сурах, чару çук.

Лара парать çапла Галопен пĕлĕтелле пăхкаласа, канлĕн. Унччен те пулмин пĕлĕтрен аялта — пĕрремĕш класăн палуби çинчен Галопенăн кĕçĕн пуçлăхĕн кӳлепи курăнса каять. Унпа юнашар хĕрарăм тăрать, те ют çыннăн, те хăйĕн арăмĕ.

— А, Галопен, сывах-и?

Галопенăн çăварĕ пушă мар, халĕ çеç чăмлама тытăннă вобла калаçма май памасть.

Мĕн тумалла-ха?

Хăйĕнчен аслăрах çынна делопроизводитель пулса ĕçлекен Галопенăн тутлă сăмах каламалла, анчах çавна тума пыр урлă выртнă вобла çурăмĕ чăрмантарать. Сурса кăларас — палуба çине сурма хушман, вырăн çук. Алпа кăларма аван мар, килĕшмест, хăйне хăй тыткалама пĕлмест ку, тейĕç.

Малалла

Садикра


Эпĕр, пĕчĕк ачасем,

Садика çӳретпĕр:

Чăвашла та вырăсла

Калаçма пĕлетпĕр,

Такăнмасăр вулама

Вĕренсе çитетпĕр.

«Атте, анне, папа, мама», —

Тесе çыру çыратпăр,

«Пĕрре, иккĕ, виççĕ, тваттă,

Раз, два, три, четыре, пять», —

Чип-чиперех шутлатпăр.

Часах шкула каятпăр,

Часах пысăк пулатпăр.

«Йӑлт ӗнерхилле...»


Йăлт ĕнерхилле.

Çумăр, юр, шевле...

(Эп сана... — кул-кул! —

ю-у-...)

Пат.

Пат. Пат.

Улма тăкăнать.

Ĕнтĕ сывă пул.

Юл...

Эп каям. Пĕччен.

Çумăр кӳллинчи

Ман сăнпа калаç,

юл-т-аш...

Асаилӳччен!

Çумăр шăниччен!

Маншăн кĕр ăшши.

Тумласен ташши —

ю...л...аш...ки...

Жираф


Жираф утса çӳрет мăнаçлă,

Чăмлать вăл çулçă ирлĕ-каçлă

Вăл халь чи модăллă чĕрчун -

Вегетарианец! Ырă чун!

 

Вăл тăнăç кăмăллă, хаваллă,

Хăватлă та ачаш, хаваслă —

Тытса çурмасть никам хăмне

Тăрантарасшăн хырăмне.

 

Илемлĕ, вăрăм мăйлăскер,

Хеветлĕ, çутă ăслăскер

Лаша, ĕне, слон евĕрех

Вăл халăхшăн ĕçлесшĕнех...

 

Унпа тăвасчĕ килĕшӳ —

Пулатчĕ ырă илĕшӳ.

Унпа хитрен калаçмалла,

Вара иленĕ вăл алла.

 

Ǎна ăс памалла кăштах,

Ĕçе вăл пуçăнĕ вăштах.

Эп жирафа вĕрентĕп хам —

Унпа пĕрле ĕçе тухам!

 

Жираф — чăн пулăшуçă пулĕ —

Çынсем патне выртать ун çулĕ.

Пуçтарĕ çимĕç — ананас —

Хăнале манпала сана.

Кирлӗ ӗҫ


Сĕрĕп пудра сăмсине,

Турăп çăмлă хӳрине —

Пуçлăх евĕр ман кушакăм,

Пысăк ĕçлĕх пуçлĕ, акă.

 

Телевизора кĕç ларăп —

Кушака сăмах эп парăп.

Çĕн программа «Кушак çурчĕ»

Тĕнчипех ачасем курччăр.

 

Çĕн хушу кăларăп йăпăрт —

Ашшĕ-амăш итлĕç шăпăрт:

Пухăнса пурте пĕрле

Юрлĕç «мяу-мям!» çĕрле.

 

Кушакпа — хам тусăмпа

Çĕнĕ, вирлĕ пусăмпа

Тăвăпăр эпир сĕнӳ —

Пĕтĕм тĕнчене Чĕнӳ:

 

— Пур кушак çурисене

Йышăнăр çемьесене.

Килсĕр-çуртсăрри ан пултăр —

Телейпе кашни чун тултăр.

■ Страницăсем: 1 2 3 4 5 ... 722