Хапăлласа кĕтсе илетпĕр

 

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

 

Кĕнекесем

Ĕмĕр сакки сарлака. 5-мĕш кĕнекеÇăлтăрчăксемХĕрес хывнă хĕвелПирвайхи юратуПурнӑҫ утравӗсемПахчапа мунча хуҫиАслă халал

Эмел


Амăш ĕçтересшĕн

Павăла эмел:

«Ĕç те — час вăй илĕн

Тет сана хĕвел».

 

Кантăкран шаккарĕ

Уçă çил ăна:

«Выляма чĕнетĕп

Сывалсан кăна».

 

Павлăн вылямашкăн

Пит каяс килет.

Йӳçĕ-çке эмелĕ —

Вăл çавах ĕçет.

Ташă


Алла-аллăн тытăнса

Тăтăмăр карталанса.

Ташă кĕвви калатпăр,

Пурте алă çупатпăр.

 

Харсăр ташăçă, Кĕçтук,

Ташлама часрах эс тух.

Кĕç сан хыççăн эпĕр те

Ташша тухăпăр пурте.

 

Пит аван ташлать Кĕçтук.

Эх, унран маттурри çук!

Алă çупăр харăсрах.

Ташлăр пурте хавасрах.

Тилĕ


— Тиллит-тиллит тилĕ тус,

Ăçта каян, тилĕ тус?

— Васкап эпĕ ялалла,

Манăн чĕпсем тытмалла.

 

— Ах! Пĕлмен-çке халиччен

Эсĕ усал иккенне.

Эп систереп сан çинчен

Хамăр касри вĕшлене.

Мĕншĕн тутлă?


Мĕншĕн тутлă пан улми,

Мĕншĕн тутлă çĕр çырли,

Мĕншĕн тутлă хурлăхан?

Хамăр лартса тунăран,

Хĕвел тĕслĕ пулнăран.

Чие кайăкĕ


Вăхăт тупсан, май пулсан

Эп сада кĕреп кăна —

Асăрхать мана, чунтан

Ятлама вăл тытăнать:

— Тин-тин-тин, — тет, —

тин-тин-тин,

Килтĕн эсĕ тин-тин-тин!..

 

Пуринчен те иртерех

Эп тухап хăш чух сада —

Мухтамасть вăл пурпĕрех,

Темшĕн вăл ятлать татах:

— Тин-тин-тин, — тет, —

тин-тин-тин,

Килтĕн эсĕ тин-тин-тин!..

Сар автан


Пĕр ирхине автанран

Ыйтать пĕчĕк шăллăм ман:

— Ки-ки-ри-кук сар автан,

Мĕншĕн хытă авăтан?

 

— Çĕнĕ вите шур чултан

Туса пачĕç, — тет автан, —

Çавăнпа та эп паян

Савăнатăп пур чунтан!

Сăпка юрри


Пепкеме,

Чĕппĕме —

Ыйхине,

Тутлине.

Сарă уйăх хăпарать,

Йăлтăр-йăлтăр курăнать.

 

Улмине,

Хĕрлине —

Ачине,

Танине.

Пĕр сас-чӳ çук таврара,

Çывăр канлĕ сăпкара.

Тĕлĕкре

Тӳпере

Эс вĕçен,

Хĕпĕртен.

Сывлăш уçă, тап-таса, —

Ярăн хыттăн талпăнса.

 

Юррине,

Хитрине —

Пепкеме,

Чĕппĕме.

Çывăр, чунăм, çут ирччен,

Пӳрте шуçăм кĕриччен.

Хĕл çывхарать


Таврана халь ыйхă пусрĕ,

Тĕлĕреççĕ йывăçсем.

Шурă хурăн пуçне усрĕ —

Тек юрламĕç шăпчăксем.

 

Шухă çил тытса лăскарĕ,

Хĕрхенмерĕ хурăна.

Çăкасем патне васкарĕ —

Чарма çук халь тек ăна.

 

Ир енне çĕркаç тăм ӳкрĕ,

Ĕшнери çут сак çине.

Шăрчăк тус та шăнса кӳтрĕ,

Сисрĕ хĕл çывхарнине.

Ыйхă чăпти


Вăхăт чупать малалла,

Кĕçех çитет кăнтăрла.

Пĕр Петĕр çеç ыйхăран

Халиччен те вăранман.

 

— Тăр, — тет ашшĕ ачине, —

Тăр, — тет ыйхă чăптине.

Хĕвел кулать тӳпере,

Вăл та: «Тăр», — тет Петĕре.

Ма йĕртетĕн?


Тимуш темшĕн юратмасть,

Теттесене упрамасть.

Вăл мулкача аллинчен,

Шур упана уринчен

Тапса туртать, хĕрхенмест,

Мĕн тунине хăй пĕлмест.

— Тимуш, мĕншĕн çĕмĕрен,

Теттесене ма йĕртен?

■ Страницăсем: 1 2 3 4 5 6 7 8 ... 717