Чӑваш Республикинчи ҫӑмрӑк шахматист Тунисра иртнӗ Пӗтӗм тӗнчери турнирта малти вырӑна йышӑннӑ.

Чӑваш Республикин шахмат шкулӗн воспитанникӗ Владислав Михайлов «Sahel International Chess Festival 2026» шахмат турнирӗнче 8 ҫул тултарман ачасен хушшинче вӑй виҫнӗ. Ӑмӑрту Монастир хулинче юпа уйӑхӗн 24-мӗшӗнчен пуҫласа чӳк уйӑхӗн 1-мӗшӗччен иртнӗ.

Ҫамрӑк спортсменшӑн ку – дебют. Тӗнче шайӗнчи ӑмӑртӑва вӑл пӗрремӗш хут хутшӑннӑ. Владислав асбсолютлӑ турнирта хӑйӗнчен аслӑрах 66 спортсмен хушшинче 19-мӗш вырӑн йышӑннӑ.

Прокуратура архивӗнчи сӑн

Шупашкар хулинче 11 ҫулти арҫын ача канализаци люкне кӗрсе ӳкнӗ. Ку ӗнер, юпа уйӑхӗн 31-мӗшӗнче, 17 сехет те 40 минутра «Ҫӗнӗ хула» микрорайонта пулса иртнӗ.

Виҫӗ арҫын ача урамра уҫӑлса ҫӳренӗ. Пӗри хӑмасемпе витнӗ люк патне пынӑ та хӑмана ҫӗкленӗ, унтан люк виткӗчӗ ҫине пуснӑ та аялалла персе аннӑ. Ача аманнӑ, ӑна тухтарсем медпулӑшу панӑ. Унӑн пурнаҫӗ хӑрушлӑхра мар.

Тӗрӗслев акӑ мӗн палӑртнӑ: тимӗр виткӗчӗн хӗрри ҫӗмрӗк пулнӑ, ҫавӑнпа ӑна йывӑҫ палетӑпа витнӗ. Калинин районӗн прокуратури лару-тӑрӑва уҫӑмлатма тата коммуналлӑ службӑсене ӗҫне хак пама тӗрӗслев пуҫарнӑ.

Сӑмах май, пӗр уйӑх каялла Шупашкарта Максим Горький проспектӗнчи 28-мӗш ҫурт патӗнче 8 ҫулти хӗрача уҫӑ люка кӗрсе ӳкнӗ.

«Т Плюс» архивӗнчи сӑн

Шупашкар хулинче «ЭнергосбыТ Плюсӑн» Чӑваш Енри тата Мари Элти филиалӗ суд приставӗсемпе, ҪҪХПИ инспекторӗсемпе пӗрле рейд ирттернӗ. Рейд вӑхӑтӗнче вӗсем 2396 автомобиль хуҫин коммуналлӑ ресурссемшӗн парӑмсем пуррипе ҫуккине тӗрӗсленӗ.

Ҫапла 25 водителӗн ӑшӑшӑн тата ӑшӑ шывшӑн тӳлемен счетсем пуррине тупса палӑртнӑ. Суд приставӗсем 8 машинӑна арестленӗ. 17 водитель парӑма вырӑнтах татнӑ, пӗтӗмпе вӗсем 387 пин тенкӗ тӳленӗ.

Тӗрӗслеве «Ҫул-йӗр приставӗ» комплекс камерисем пулӑшнипе ирттернӗ. Вӗсем автомобиль номерне парӑмҫӑсен базипе танлаштараҫҫӗ. Машина хуҫине парӑма татма 10 кун параҫҫӗ. Вӑхӑтра тӳлемесен транспорта хаклава тӑратаҫҫӗ. Кун хыҫҫӑн ӑна парӑма татмашкӑн сутма пултараҫҫӗ.

Ҫул-йӗрпе патруль службин архивӗнчи сӑн

Эрнекун, юпа уйӑхӗн 30-мӗшӗнче, каҫхине Канаш хулинче ҫул-йӗрпе патруль службин инспекторӗсем «Лада Калина» машинӑна чарнӑ. Салонра 8-мӗш класра вӗренекен 7 ача пулнӑ, водителӗ те – ҫав шутрах.

Полицейскисем каланӑ тӑрӑх, вӗсем водитель ытла ҫамрӑк курӑннӑран машинӑна чарнӑ. Йӑнӑшман вӗсем: руль умӗнче 13 ҫулти арҫын ача ларнӑ. Ҫӳллӗрех курӑнас тесе вӑл ача-пӑча кресли ҫине вырнаҫнӑ.

Малта унӑн тантӑшӗ ларнӑ, хыҫалта вара водительпе пӗр класра вӗренекен 5 хӗр вырнаҫнӑ. Вӗсем хулари парка ярӑнма кайма тухнӑ-мӗн. Ҫамрӑк водитель каникулта ҫапла майпа пӗр класра вӗренекен хӗрсене тӗлӗнтерме шухӑшланӑ иккен.

Машина хуҫин 30 пин тенкӗ штраф тӳлеме тивӗ. Ҫамрӑк водителе вара явап тыттараймӑн – вӑл 13-ре кӑна, административлӑ майпа 16 ҫултан кӑна явап тыттараҫҫӗ.

«Контактри» сӑн

Тӗлӗнмелле хитре мӑшӑр вӗсем — Улатӑр районӗнче пурӑнакан Храмовсем.

Александр Валерьевичпа Галина Григорьевна хӑйсен халӑхӗн, чӑвашсен, йӑли-йӗркине питӗ хисеплеҫҫӗ. Вӗсен хӑйсен ҫемйинчи йӑласене те тытса пыраҫҫӗ вӗсем. Храмовсем кирек мӗнле уяв пулсан хӑнана чӑваш тумне тӑхӑнса каяҫҫӗ.

Храмовсен – виҫӗ ывӑл: Валерий, Сергей тата Даниил. Ҫак ҫемье ытти национальноҫсен йӑли-йӗркине те ҫав тери хисепленине палӑртать. Акӑ Сергейӑн мӑшӑрӗн йӑхӗнче белорус тата тутар тымарӗсем пур. Вӑл упӑшкин ашшӗ-амӑшӗн тӑванӗсемпе те наци уявӗсенче савӑнма пӗлет.

Ҫитес эрнере пилӗк кун ӗҫлекенсемшӗн хушма канмалли кун пулӗ. Ку чӳк уйӑхӗн 4-мӗшӗнче Халӑхсен пӗрлӗхӗн кунне паллӑ тунипе ҫыхӑннӑ.

Кӑҫал Халӑхсен пӗрлӗхӗн кунӗ юнкуна лекет. Ҫавна май эрнере пилӗк кун ӗҫлекенсем ҫав кун канӗҫ. Уяв умӗнхи ӗҫ кунӗ, чӳк уйӑхӗн 3-мӗшӗ, пӗр сехет кӗскерех пулӗ.

Сӑмах май, уявпа ҫыхӑннӑ ҫитес канмалли кун Раҫҫейре пурӑнакансене раштав уйӑхӗн 31-мӗшӗнче, Ҫӗнӗ ҫулта, кӑна кӗтет. Шӑпах ун чухне хӗллехи каникул пуҫланӗ. Вӑл 2027 ҫулхи кӑрлач уйӑхӗн 10-мӗшӗччен тӑсӑлӗ.

cap.ru сайтри сӑн

Чӑваш Республикине тин кӑна 12 автобус илсе килнӗ. Кун пирки ЧР Транспорт министертви пӗлтерет.

Кӑҫал республика хушма НефАЗ 16 пысӑк атобус туяннӑ. Кун валли 242,95 миллион тенкӗ тӑкакаланӑ.

ЧР Транспорт министерстви пӗлтернӗ тӑрӑх, юпа уйӑхӗн вӗҫлениччен республикӑна тепӗр тӑватӑ автобус кӳрсе килӗҫ. Вӗсем те пысӑк класлисем пулӗҫ.

Сӑмах май, унччен республикӑна 27 НефАЗ илсе килнӗ. Вӗсенчен ытларахӑшӗ халӗ «Шупашкар – Ҫӗнӗ Шупашкар» маршрут ҫинче ӗҫлет.

2027 ҫулта пысӑк класлӑ 30 автобус, вӑтам класлӑ 10 автобус тата пӗчӗк класлӑ 1 автобус илсе килӗҫ. 2028 ҫулта вара Чӑваш транспорт управленийӗ тепӗр пысӑк класлӑ 53 автобуспа пуянланӗ.

Шупашкарти Павел Михайлов Китайра тайцзицюань енӗпе иртнӗ уҫӑ чемпионатра ҫӗнтернӗ.

Турнир Китайри Ханьдан хулинче иртнӗ уйӑхрах иртнӗ иккен, анчах кун пирки МИХсем паян ҫеҫ пӗлтернӗ.

Ӑмӑрту авӑн уйӑхӗн 19-24-мӗшӗсенче пулса иртнӗ. Унта Китайри тата тӗнчери 20 ҫӗршыври спортсмен хутшӑннӑ. Пурӗ 1400 ҫын. Павел Михайлов хутшӑннӑ ушкӑнра 17 спортсмен ӑмӑртнӑ. Чӑваш Енри кунг-фу ӑсти Китайри спортсменсене ҫӗнтернӗ. Унччен чӑваш спортсменӗ 35 хутчен тренировка ирттернӗ. 2018 ҫултанпа вӑл тайцзи енӗпе тӗнчери паллӑ грандмастер Чэн Дун Фэн патӗнче вӗренет. Унччен арҫын тӗнчери ӑмӑртусенче виҫӗ хутчен ҫӗнтернӗ, Раҫҫейре вара кунг-фу енпе виҫӗ хутчен чемпион ятне тивӗҫнӗ.

Шупашкарта арҫын кунг-фу шкулне ертсе пырать. Ачасем ҫапӑҫма вӗренеҫҫӗ, аслисем — сывлӑх гимнастикине.

Андрей Попов архивӗнчи сӑн

Чӑваш патшалӑх оперӑпа балет театрӗн директорӗнче ӗҫленӗ Андрей Попов паянтан ЧР культура министрӗн ҫумӗнче вӑй хума тытӑнӗ. Хушӑва ЧР правительствин председателӗ Сергей Артамонов алӑ пуснӑ.

Андрей Попов Чӑваш патшалӑх оперӑпа балет театрне 4 ҫул ҫурӑ ертсе пынӑ. Шӑпах ҫавӑн чухне театр «Атӑл Опера» ята илнӗ. Кӑҫал ҫурла уйӑхӗн 7-мӗшӗнче вӑл директортан кайнӑ, Пермьри академи Театр-Театрӗнче аталану директорӗнче вӑй хума тытӑннӑ. Вӑл хӑй те – Пермь тӑрӑхӗнчен, карьерине унта пуҫланӑ.

Нумаях пулмасть, юпа уйӑхӗн 27-мӗшӗнче, Андрей Попов халӑх тетелӗнчи страницинче Пермьри театртан каяссине пӗлтернӗ. Чӑваш Ене ӗҫлеме килнӗ вӑл ав.

cheb-centr.soc.cap.ru сӑнӳкерчӗкӗ

Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрта выртакан тӑванӗсене пӑхакансене ҫак ӗҫе тӗрӗс пурнӑҫлама вӗрентеҫҫӗ.

Вырӑнпа выртакан ҫынна пӑхасси пӗртте ҫӑмӑл мар. Ҫипуҫне ылмаштарса тӑхӑнтартмалла, вырӑн таврашне улӑштарса памалла, кӗлетки шӑтса каясран асӑрхаса тӑмалла. Вырӑн ҫине тӑратса лартнӑ чух пилӗксӗр те тӑрса юлӑн.

Асӑннӑ центрта ӗҫлекенсем пӑхакан ҫыннӑн сывлӑхӗ малти вырӑнта пулмалла тесе калаҫҫӗ. Мӗншӗн тесен пӑхаканни те хавшасан халсӑр ҫынна кам пӑхӗ?

Социаллӑ центрти Тренировка хваттерӗнче выртакансен тӑванӗсене ҫывӑх ҫыннисене тӗрӗс пӑхма вӗрентеҫҫӗ. Центрта ҫеҫ мар, киле тухса ҫӳресе те.

Тӗплӗнрех ыйтса пӗлес тесен 50‑00‑94 номерлӗ телефонпа шӑнкӑравламалла.