medcentr-sitimed.ru сайтри сӑн

Кӑҫалхи 44-мӗш эрнере Чӑваш Республикинче ОРВИпе чирленӗ 4536 тӗслӗхе шута илнӗ. Ку, малтанхи эрнепе танлаштарсан, 5,9% сахалрах.

Халӗ те унчченхи пекех, ачасем ытларах чирлеҫҫӗ. Чирлисен йышӗнче вӗсем – 66%. Ҫапах иртнӗ эрнерипе танлаштасан, ачасем чирлесси кӑштах чакнӑ.

Лайӑх хыпар та пур: республикӑра ОРВИпе тата гриппа чирлес шай эпидпорогран 2,1 хут пӗчӗкрех. Аптӑраса ӳкнисенчен нумайӑшӗ — Шупашкар хулинчен. Кунта пӗр эрнере 3187 ҫын чирленӗ. Ҫапах эпидпорогран пӗчӗкрех ку. Иртнӗ эрнере гриппа чирленӗ 2 ҫынна кӑна шута илнӗ.

Аса илтерер: республикӑра ОРВИпа грипран прививка тӑвасси малалла пырать. Юпа уйӑхӗн 30-мӗшӗ тӗлне Чӑваш Енри 338 пин ытла ҫынна вакцинациленӗ. Ку – халӑхӑн 30 проценчӗ.

cap.ru сайтри сӑн

Чӳк уйӑхӗн 3-мӗшӗнче Пӑрачкавра Тӑван ҫӗршывӑн Аслӑ вӑрҫинче пуҫ хунӑ Владимир Ильич Шишкинӑн ӳт юлашкине пытарнӑ. Вӑл Ржев ҫывӑхӗнчи ҫапӑҫура вилнӗ.

Владимир Шишкин 1906 ҫулта Пӑрачка районӗнчи Семеновское ялӗнче ҫуралнӑ. Фронта ӑна Мускав ҫар комиссариачӗ урлӑ илсе кайнӑ. Вӑл стрелоксен 316-мӗш дивизийӗнче стрелоксен 1073-мӗш полкӗнче ҫапӑҫнӑ, 1942 ҫулхи ҫурла уйӑхӗн 24-мӗшӗнче пуҫ хунӑ. 1944 ҫулхи ҫурла уйӑхӗн 20-мӗшӗнче ӑна «Паттӑрлӑхшӑн» медальпе чыслама йышӑннӑ.

Чылай ҫул вӑл тӑванла вилтӑпри ҫинче пытарнӑ салтак пек шутланнӑ. Анчах ӑна Мускав тата Мускав облаҫӗнчи «Сокол» шырав отрячӗн боецӗсем тупнӑ.

cheb-centr.soc.cap.ru сайтран илнӗ сӑнӳкерчӗк

Паян, чӳк уйӑхӗн 4-мӗшӗнче, Шупашкарта пурӑнакан Зинаида Кузьмина 102 ҫул тултарнӑ.

Зинаида Сергеевна Ҫӗрпӳ районӗнчи Туҫа ялӗнче ҫуралнӑ. Унӑн ялти ачалӑхӗ танташӗнчен нимпех те уйрӑлса тӑман. Пӗчӗклех ӗҫе хӑнӑхтарнӑ, яшлӑхӗ вӑрҫӑ ҫулӗсемпе пӗр килнӗ.

Шкулта вӗренсе тухсан вӑл Ҫӗрпури училищӗне вӗренме кайса кӗнӗ, ҫӗвӗҫ профессине алла илсен районти ҫӗвӗ фабрикинче ӗҫленӗ. Ку професси пӗр вырӑнта хускалмасӑр ларса ӗҫлеме, тимлеме пулма хӑнахтарать.

1963 ҫулта вара вӑл упӑшкипе Шупашкара куҫса килнӗ. Хулара ҫамрӑк хӗрарӑм ача пахчинчи кӗҫӗн воспитателе вырнаҫнӑ.

Шел те, пурнӑҫӗ ҫӑмӑлах пулман унӑн. Тӑватӑ ачаллӑ хӗрарӑм упӑшкисӗр тӑрса юлнӑ, халӗ унӑн ачисем те вилсе пӗтнӗ ӗнтӗ. Кинемей паян мӑнукӗн ывӑлӗпе Борис Михайловичпа пурӑнать.

«Контактра» халӑх тетелӗнчи сӑн

Патӑрьел округӗнчи Туҫари вӑтам шкулта вӗренекен 15 ҫулти Эльвина Сафина армрестлинг енӗпе пулнӑ тӗнче первенствинче ылтӑн медаль ҫӗнсе илнӗ. Ӑмӑрту Индири Нью-Делире иртнӗ.

Эльвина 10-мӗш класра вӗренет. Вӑл тӑватӑ ҫул ӗнтӗ Ильфак Алеев тренер патӗнче ӑсталӑхне туптать. Индире хӗр 60 килограмм тайманнисен виҫе категорийӗнче вӑй виҫнӗ.

Чӑваш Республикинчи спортсменка питӗ ӑста ӑмӑртнӑ. Тупӑшу тӑршшӗпех вӑл хӑйӗнпе тупӑшакансене ҫӗнтермешкӗн шанчӑк хӑварман. Экспертсем те унӑн ӑсталӑхне, ку нумай ҫул тӑрӑшса тренировка тунин кӑтартӑвӗ пулнине палӑртнӑ.

Палӑртса хӑварар: Раҫҫей спортсменӗсем ӑмӑртура Раҫҫей ялавӗпе тата ҫӗршывӑн пӗрлештернӗ командин тумӗпе пулнӑ. Ҫӗнтерӳҫӗсем валли Раҫҫей гимнӗ янӑранӑ.

Виталий Михайлов страницинчен илнӗ сӑнӳкерчӗк

Паян, чӳк уйӑхӗн 3-мӗшӗнче Станислав Михайловӑн (Юхтар) ҫуралнӑ кунӗ. Вӑл 1960 ҫулта Ҫӗрпӳ районӗнчи Вӑрӑмҫут ялӗнче ҫуралнӑ.

Станислав Николаевич — живопись ӑсти, график, педагог, Раҫҫей Федерацийӗн художниксен союзӗн членӗ, Чӑваш художникӗсен союзӗн членӗ. 2023 ҫулта ӑна Чӑваш Республикин халӑх художникӗ ята панӑ. 1992 ҫулта вӑл Нестер Янкас премине, 1993 ҫулта Ҫеҫпӗл Мишши премине тивӗҫнӗ.

Чӑваш патшалӑх педагогика институтӗнчен 1983 ҫулта вӗренсе тухнӑ. Унта вӑл ӳнерпе графика факультетӗнче вӗреннӗ.

1983-1998 ҫулсенче тӗрлӗ шкулта учитель, директор пулса тӑрӑшнӑ.

Хӑйӗн ӳнер пултарулӑхӗнче вӑл чӑваш мифологийӗпе архаика культурине тӗпе хурать. Вӑл, сӑмахран, Геннадий Айхи, Ҫеҫпӗл Мишши, Марина Карягина сӑввисене сӑнӳкерчӗксемпе илемлетнӗ.

cap.ru сайтри сӑн

Республикӑри клиника офтальмологи пульницине 35 ҫулти арҫын пулӑшу ыйтма килнӗ. Вӑл квадроциклпа ярӑннӑ чухне ҫил вӑйлӑ вӗрнӗ те куҫӗнче тӑрук пӗҫертме тытӑннӑ.

Малтанах арҫын тусан кӗнӗ тесе шухӑшланӑ, куҫне шывпа ҫунӑ. Анчах пӗҫертме чарӑнман, каҫ енне куҫҫуль юхма пуҫланӑ. Арҫын вӑхӑта сая яман – офтальмолог патне кайма шухӑшланӑ.

Светлана Иванова тухтӑр куҫне пӑхсан унта темӗнле япала пуррине асӑрханӑ. Конъюктив ҫумне хурт-кӑпшанкӑн ҫунатти ҫыпӑҫса ларнӑ иккен. Ӑна асӑрханса кӑларнӑ, пациента малалла сипленме эмелсем ҫырса панӑ. Ҫавӑн пекех арҫынна квадроциклпа ярӑннӑ чухне малашне хӳтӗлев куҫлӑхне тӑхӑнма сӗннӗ.

Юпа уйӑхӗн 31-мӗшӗнче «Мерчен» вокал ансамблӗнче юрланисем тӗл пулнӑ. Кун пирки Каҫал тӑрӑхӗнчи чӑваш хастарӗ Виталий михайлов халӑх тетелӗнчи хӑйӗн страницинче хыпарланӑ.

«Мерчен» вокал ансамблӗнче юрланисем Шупашкарти "Юлташ" кафере пуҫтарӑннӑ. Асӑннӑ пултарулӑх ушкӑнӗ И.Н.Ульянов ячӗллӗ Чӑваш патшалӑх университечӗн историпе филологи факультечӗ тата обществӑлла профессийӗсен факультечӗ ҫумӗнче йӗркеленнӗ. Унта хӗрарӑмсен тата арҫынсен ушкӑнӗсем пулнӑ. Ансамбль 1972 ҫултанпа ӗҫленӗ.

Маларах эпир асӑнса хӑварнӑ Виталий Михайлов пӗлтернӗ тӑрӑх, ансамбль юррисем халӗ те Чӑваш радиопа телевидени фондӗнче упранаҫҫӗ.

Ансамбле малтан Тамара Муцырева ертсе пынӑ. Ун хыҫҫӑн ертсе пыракансем улшӑннӑ. Музыка училищинче вӗренекен студентсем те ертсе пынӑ. Каярахпа ҫав училищӗре вӗрентекен Илья Сакмаров ертӳҫӗ ансамбле фольклор ҫине куҫарса янӑ. Ҫитес ҫул ансамбль йӗркеленнӗренпе 55 ҫул ҫитӗ.

ҪҪХПИ тунӑ сӑн

Ҫанталӑк сивӗтрӗ, ирсерен ҫулсем шуҫлак. Ҫавна май, шел те, республикӑра паян ҫул-йӗр ҫинче аварисем пулнӑ. Пӗтӗмпе – 3 авари, пӗр ҫын вилнӗ, тӑваттӑн аманнӑ.

Пӗрремӗш авари ирхи 5 сехетре Йӗпреҫ округӗнчи Шӑрттан ялӗ патӗнче пулнӑ. «Рено» водителӗ, 1977 ҫулта ҫуралнӑ арҫын, шуҫлак ҫул ҫинче руле итлеттереймен та кювета чӑмнӑ. 1986 ҫулта ҫуралнӑ пассажир аманнӑ.

Ири 6 сехетре Куславкка округӗнчи «Атӑл – Куславкка» автоҫул ҫинче «Гранта» ҫул ҫинчен тухса кайса йывӑҫа пырса тӑрӑннӑ. Арҫын пуҫ ыратать тесе тухӑрсенчен пулӑшу ыйтнӑ.

Виҫҫӗмӗш авари 6:40 сехетре Канаш округӗнчи Анат Сурӑм ялӗ патӗнче, А-151 ҫул ҫинче, пулнӑ. Маланлӑха палӑртнӑ тӑрӑх, «Форд» рулӗ умӗнче ларнӑ 33 ҫулти хӗрарӑм шуҫлак ҫул ҫинче руле итлеттереймен, отбойник ҫине ҫапӑннӑ хыҫҫӑн ҫул ҫинче тӑракан «Гранта» ҫине пырса кӗнӗ. «Гранта» водителӗ, 1954 ҫулта ҫуралнӑ арҫын, вырӑнта вилнӗ.

ҪҪХПИ тунӑ сӑн

Паян Йӗпреҫ округӗнче М-12 федераци ҫулӗ ҫинче йывӑр тиевлӗ машина ҫаврӑнса ӳкнӗ. ЧР ШӖМӗ пӗлтернӗ тӑрӑх, халӗ унта Мускав еннелле каякан ҫул пӳлӗннӗ.

Авари паян кӑнтӑрла хыҫҫӑн 661-мӗш ҫухрӑмра пулнӑ. Федераци ҫулӗ ҫинче йывӑр тиевлӗ машина Мускав хули еннелле кайнӑ чухне ҫаврӑнса ӳкнӗ, ҫапла вӑл икӗ еннелле каймалли ҫула та хупласа хунӑ. Ҫакна пула машинӑсем икӗ еннелле те ҫӳреймен.

Йывӑр тиевлӗ машина водителӗ аманнӑ, ӑна пульницӑна илсе кайнӑ. Халӗ ку ӗҫ-пуҫа йӗрке хуралҫисем уҫӑмлатаҫҫӗ.

Хальхи вӑхӑтра пӗр еннелле каякан ҫула уҫнӑ: машинӑсем Мускав еннелле ҫӳреме пултараҫҫӗ.

ШӖМ архивӗнчи сӑн

ЧР ШӖМӗн кинологи службин центрӗ икӗ нимӗҫ овчарки валли ҫӗнӗ хуҫа шырать. Йытӑ ҫурисем Норд тата Нэнси ятлӑ.

Вӗсем службӑра пулма суйлав витӗр тухман. Анчах вӗсем ҫемйен шанчӑклӑ тусӗсем пулма пултараҫҫӗ. Йытӑ ҫурисен амӑшӗ – нимӗҫ овчарки Тирада. Вӑл кӑҫал пуш уйӑхӗнче 7 ҫура тунӑ. «Декрет отпускӗнчен» тухсан Тирада полицейскисене ҫухалнӑ икӗ велосипеда тупма пулӑшнӑ. Ҫурасен ашшӗ – Бай йытӑ. Халӗ вӑл – ветеран, ШӖМӗн Ҫӗмӗрлери уйрӑмӗнче службӑра тӑнӑ, вӑрӑсене, машина хӑваласа таракансене шыраса тупма пулӑшнӑ.

Норпа Нэнси халӗ – 7 уйӑхра. Вӗсене сирӗн хӑвӑр пата илес килет-и? Ҫак номерпе шӑнкӑравлӑр: 8 (8352) 66-42-12.

Аса илтерер: нумаях пулмасть кинологи центрӗ тивӗҫлӗ канӑва тухнӑ нимӗҫ овчарки Титан-Кронос валли хуҫа шыранӑ. Ӑна Шупашкар районӗнчи Хыркассинчи нумай ачаллӑ ҫемье илсе кайнӑ.