Чӑваш вӗрентӳ ӗҫӗнче кун пек уҫҫӑн калаҫнине пӗрле пӑхни тахҫантанпах пулманччӗ-ха. Лару-тӑрӑва тимлесе асӑрхаканӗ те кутемӗн сахалланса юлнӑ-тӑр. Олег Прокопьевӑн «Лайӑх ҫынсем тата лайӑх ыйтусем - Хорошие люди и хорошие вопросы: статьясем, очерксем, интервьюсем, калав» кӗнекине (Ш., 2026, 376 с.) вара ыйтӑва хӑюллӑн лартма пултарнӑ пулӑм темелле, ӑна вӗрентӳпе сапӑрлӑхра тӑрӑшакан кашниех - хӑйне чӑваш тесе шутлакан, ача-пӑча ӳстерекен ҫын - уҫса пӑхса калле-малле шутламаллах.

Кӗнекен уйрӑм палӑртнӑ умсӑмахӗ ҫук. Ун вырӑнне пӗтӗмлетӳллӗ ыйтусене шӗкӗлчесе ҫырнӑ «Паянхи Изабелла яла юраттӑр тесен…» (ялти шкулсен ырри-нушине ҫӗршыври тӗслӗхсем урлӑ кӑтартаканскер) тата ӑс-тӑн енчен кая юлса пыракан ачасене сапӑрлассине халалланӑ «Хӑйсем телейлине ӑнлаччӑр» статьясене вырнаҫтарнӑ. «Халӑх шкулӗ» журналӑн тӗп тӗременӗнче нумайранпа ӗҫлекен журналист Олег Прокопьев – сӑвӑсемпе юратнӑ поэзирен пӑрӑнсах - чунра капланса ҫитнӗ хӑйӗн тӗслӗхӗсене тата нумай-нумай вӗрентекен шухӑшне пӗрлештерме пултарнӑ.

Малалла...

«Контактри» сӑн

Улатӑр округӗнче пурӑнакан Прошенковсем туй тунӑранпа 50 ҫул ҫитнине паллӑ тунӑ.

Анатолий Александровичпа Татьяна Федоровна пӗрлешнӗ хыҫҫӑн икӗ ывӑл ҫуратса ӳстернӗ, Улатӑр округӗнчех пурӑннӑ. Халӗ вӗсем 5 мӑнукӗсемшӗн савӑнаҫҫӗ.

Анатолий Александровичпа Татьяна Федоровна пӗр-пӗрне шкулта чухнех палланӑ. Татьяна шкул хыҫҫӑн Шупашкарти суту-илӳ училищине вӗренме кӗнӗ, Анатолий Улатӑрти вӑрман-техника техникумӗнче ӑс пухнӑ. Ҫав тапхӑрта вӗсем пӗр-пӗрин патне ҫыру ҫырнӑ, сайра хутра кӑна тӗл пулнӑ.

Кайран хӗр каччӑна салтакран таврӑнасса икӗ ҫул кӗтнӗ. Вӑл таврӑнсанах ҫамрӑксем туй кӗрлеттернӗ.

Хӑйсем каланӑ тӑрӑх, 50 ҫулта вӗсем пӗр-пӗрне ӑнланма, хисеплеме хӑнӑхнӑ.

«На связи» форумри сӑн

Ҫӗнӗ ҫул ҫывхарни календарь ҫинче кӑна мар, хула урамӗсенче те паллӑ. Шупашкар хулинче Республика тӳремӗнче тӗп чӑрӑша лартма тытӑннӑ.

Республика тӳремӗнчи чӑрӑш – республикӑри чи ҫӳлли, вӑл 25 метр тӑршшӗ. Унӑн тимӗр каркасӗ ҫине 3 пин ытла турат ҫирӗплетеҫҫӗ.

Аса илтерер: ҫак чӑрӑша 2015 ҫулта туяннӑ. Теттесемпе пӗрле кун валли хула хыснинчи 6,6 миллион текне тӑкакланӑ.

Сӑмах май, пӗлтӗр чӑрӑша чӳк уйӑхӗн 19-мӗшӗнче лартма тытӑннӑ. Кӑҫал вара – самай иртерех.

Аса илтерер: Шупашкарти кӳлмекре «Тухья» арт-объекта юпа уйӑхӗн вӗҫӗнчех пуҫтарма тытӑнни пирки унччен сайтра пӗлтернӗччӗ.

ҪҪХПИ тунӑ сӑн

Паян Шупашкар хулинчи Афанасьев урамӗнче «Лада Калина» 17 ҫулти студента ҫапса кайнӑ. Патшалӑх автоинспекцийӗ пӗлтернӗ тӑрӑх, ӑна пульницӑна илсе кайнӑ.

Авари паян кӑнтӑрла Афанасьев урамӗнчи 7-мӗш ҫурт патӗнче пулнӑ. Малтанлӑха палӑртнӑ тӑрӑх, «Лада Калина» водителӗ, 1952 ҫулта ҫуралнӑ арҫын, светофор ҫук ҫӗрте «зебра» урлӑ каҫма тӑнӑ ҫамрӑк ҫине пырса кӗнӗ. Каччӑ техникумра вӗренет.

Каччӑна васкавлӑ медпулӑшупа пульницӑна илсе кайнӑ. Малтанлӑха палӑртнӑ тӑрӑх, унӑн пуҫӗ суранланнӑ.

Халӗ йӗрке хуралҫисем ку тӗслӗх тӗлӗшпе тӗрӗслев ирттереҫҫӗ.

cap.ru сайтри сӑн

Паян Чӑваш Республикинправительствинче каллех пӗчӗк улшӑнусем пулнӑ, ку кадрсене пырса тивет.

ЧР ял хуҫалӑх министрӗн пӗрремӗш ҫумне палӑртнӑ. Хушӑва республика премьер-министрӗ Сергей Артамонов алӑ пуснӑ. Документра палӑртнӑ тӑрӑх, ку пукана Ольга Кудрявцева йышӑннӑ. Унччен вӑл ял хуҫалӑх министрӗн ҫумӗ пулнӑ.

Ольга Кудрявцева министр ҫумӗнче 4,5 ҫул каялла ӗҫлеме пуҫланӑ. Унччен вӑл ҫак ведомствӑрах ял территорийӗсен аталанӑвӗн пайӗн пуҫлӑхӗ пулнӑ.

Сӑмах май, унччен ял хуҫалӑх министрӗн пӗрремӗш ҫумӗ пулнӑ Инна Волкова ку должноҫрен юпа уйӑхӗн 20-мӗшӗнче кайнӑ, апаянхи кун ЧР Экономика министерствине ертсе пырать.

Халӗ ял хуҫалӑх министрӗн Андрей Макушевӑн икӗ ҫум: Ольга Кудрявцева тата Анатолий Такмаков.

ЧР Строительство министерствин хула канашӗ Кӳкеҫри мастер-плана тӗплӗнрен туса ҫитерме сӗннӗ. Кунта сӑмах Шоссе тата Шуршӑл урамӗсен хушшинчи территори пирки сӑмах пырать.

Разработчиксене тата Шупашкар округӗн администрацине санитари-хӳтӗлев чиккисене лайӑхрах палӑртма, М-7 ҫул хӗррипе шавран хӳтӗлекен хатӗрсем вырнаҫтарасси тата ытти пирки лайӑхрах шухӑшласа сӗннӗ.

Архитектура тӗлӗшпе хула канашӗ вӑтам ҫӳллӗш ҫуртсем, хушма парковкӑсем тума сӗннӗ.

Патӑрьел округӗнче авалхи ҫил арманне 1 тенкӗпе сутса янӑ. 19-мӗш ӗмӗрӗн вӗҫӗнчи-20-мӗш ӗмӗр пуҫламӑшӗнчи палӑк регион пӗлтерӗшлӗ культура палӑкӗ шутланать.

Унччен Кӗҫӗн Патӑрьел ялӗнчи авалхи ҫил арманне ҫӗнетме инвестор шыранӑ, мӗншӗн тесен 33 тӑваткал метр лаптӑклӑ арман питӗ кивӗ. Суту тунӑ хыҫҫӑн культура еткерлӗхне 1 тенкӗпе туянакан тупӑннӑ. Ҫапла вӑл ӑна ҫӗнетӗ те ҫаврӑнӑша кӗртӗ.

Реставрацие 2028 ҫулхи раштав уйӑхӗн 31-мӗшӗччен туса пӗтермелле. Реставраторсен армана асӑрханса юсамалла, таврари территорие хӑтлӑлатмалла. Реставраци вӗҫленсен объекта ҫӗнӗ туризм маршрутне кӗртӗҫ.

Виталий Михайлов страницинчен илнӗ сӑнӳкерчӗк

Красноармейскинсе Чӑваш Республикин тава тивӗҫлӗ вӗрентекенӗн, Нестер Янкас ячӗллӗ преми лауреачӗн Николай Кривошеев педагогӑн, художникӑн тата ал ӑстин пултарулӑх каҫӗ иртнӗ.

Мероприятие вырӑнти вулавӑшра йӗркеленӗ. Вӑл ӗнер, чӳк уйӑхӗн 5-мӗшӗнче, иртнӗ.

Вырӑнти хастар Виталий Михайлов халӑх тетелӗнчи хӑйӗн страницинче пӗлтернӗ тӑрӑх, «ҫитӗнекен ҫамрӑк ӑрӑва ӳнерпе ал ӑсталӑх ӗҫне ӑнӑҫлӑ та тухӑҫлӑ хӑнӑхтарнӑшӑн, ачасен пултарулӑхне аталантарас енӗпе ырӑ тӗслӗх парса пысӑк ҫитӗнӳсем тунӑшӑн, обществӑлла ӗҫре хастар пулнӑшӑн тата ҫуралнӑранпа 65 ҫул ҫитнӗ май Пӗтӗмӗшле вӑтам пӗлӳ паракан Трак шкулӗнче вӑй хуракан Н.В. Кривошеева Нестер Янкас ячӗллӗ пӗрлӗхӗн «Чӑвашлӑха аталантарнӑшӑн» медалӗпе чыслама йышӑннӑ. Чыслава округ администацийӗн пуҫлӑхӗ Павел Семенов, унӑн ҫумӗ, вӗренӳ пайӗн пуҫлӑхӗ Вера Игнатьева, шкул директорӗ Алексей Васильев тата ӗҫтешсем, вӗрентекенсем, обществӑлла хастарсем хутшӑннӑ, ырӑ сӑмах каласа саламланӑ».

Следстви комитечӗ тунӑ сӑн

Паян, чӳк уйӑхӗн 5-мӗшӗнче, Шупашкар округӗнчи Пикшик ялӗнче пӗвере арҫын виллине тупнӑ. Вӑл 48 ҫулта пулнӑ.

Ҫакӑ паллӑ: вӑл ҫав кун вӗрсе хӑпартнӑ кимӗпе пулӑ тытма кайнӑ.

Инкеклӗ лару-тӑру министерствин Чӑваш Енри Тӗп управленийӗ пӗлтернӗ тӑрӑх, арҫыннӑн кӗлетки ҫинче пусмӑрласа вӗлернӗ йӗрсем ҫук. Халӗ суд-медицина экспертизине тума палӑртнӑ.

РФ Следстви комитечӗн Чӑваш Енри следстви управленийӗн следователӗсем ӗҫ-пуҫа уҫӑмлатаҫҫӗ. Тӗрӗслев хыҫҫӑн йышӑну тӑвӗҫ.

cheb-centr.soc.cap.ru сӑнӳкерчӗкӗ

Этемӗн кунҫулӗ тӗрлӗрен. Шупашкарта пурӑнакан Анастасия Шорникова паян, чӳк уйӑхӗн 5-мӗшӗнче, 103 ҫул тултарнӑ.

Анастасия Михайловна хулари 23-мӗш шкулта ӗҫленӗ. Учитель профессине суйласа илнӗскер вӑй питти ҫулӗсене юратнӑ ӗҫре тӑрӑшса ирттернӗ. Пӗтӗмпе 50 ҫула яхӑн!

Тӗлӗнмелле пек те, анчах кун хыҫҫӑн кун, чӗрӗк хыҫҫӑн чӗрӗк, вӗренӳ ҫулӗ хыҫҫӑн черетле ҫул иртнӗ. Ҫав вӑхӑтра программӑсем, учебниксем ылмашнӑ. Анастасия Михайловна вара ачасене вӗрентессишӗн ҫеҫ мар, вӗсене ырӑ ҫын тӑассишӗн те тӑрӑшнӑ. Ӑна «Халӑх вӗрентӗвӗн отличникӗ» ят та панӑ. Вӑл хулари Депутатсен пухӑвне те суйланнӑ.

Унӑн вӗренекенӗсем юратнӑ учительне яланах асра тытнӑ, шкул пӗтерсен темиҫе ҫултан та ун патне пырса ҫӳренӗ, ӑна ырӑ сӑмахпа аса илсе тав тунӑ. Халӗ ӗнтӗ кинемей урама тухса ҫӳремест, хваттерте ҫеҫ ерипен уткаласа ҫӳрет.