cap.ru сайтри сӑн

Чӑваш Республикинче таса шыв ӗҫмелли виҫҫӗмӗш ҫӑла хӑтлӑх кӗртнӗ. Халхинче —Шупашкар округӗнчи Шемшер ялӗнче.

Ҫак ялта хӑтлӑлатнӑ хыҫҫӑн «Шӗнерпуҫ ҫӑлкуҫне» уҫнӑ. Ку проекта пурнӑҫлама 2 миллион тенкӗ тӑкакланӑ. Укҫа-тенкӗ «Ҫӑлкуҫсене упра» ыркӑмӑллӑх сертифкачӗсене сутнӑ хыҫҫӑн пулнӑ.

Ҫӑлкуҫ Йӑршшу юханшывӗ хӗрринче Успени чиркӗвӗнчен инҫех мар вырнаҫнӑ. Ӗлӗк кунта кӳршӗ ялсем тата Шупашкар хулинчи ҫынсем шыв ӑсма ҫуренӗ. Анчах пурӑна киле унта пымалли ҫул та, ҫӑлкуҫ хӑй те кивелнӗ. Халӗ вара унта хӑтлӑ картлашка тӑрӑх анма пулать, ҫавӑнтах илемлӗ вырӑн тунӑ.

Халӗ ҫывӑхри ялсем пӗр чӑрмавсӑрах ҫӑлкуҫри таса шыва ӗҫсе рехетленме пултараҫҫӗ.

Яндекс Карты сайтри сӑн

Ҫитес ҫул ҫуркунне Ҫӗнӗ Шупашкар хулинчи Тӗкӗрҫ ращинчи зоопаркра арӑслана курма май пулӗ. Ҫапла пӗлтернӗ «Тӗкӗрҫ ращи» АУ директорӗ Валерий Андреев «Грани» хаҫата.

Вӑл интервьюра зоопарк валли арӑлсан туянма ӗмӗтленнине каланӑ. «Паллах, ку ӗҫ хӑвӑрт пулмасть, анчах йӑлтах пурнӑҫланасса шанатӑр. Ахӑртнех, ҫуркунне тӗлне», — тенӗ Валерий Андреев.

Хальхи вӑхӑтра зоопарк йӗркелӳ ыйтӑвӗсене татса парать, тӗрлӗ инстанципе калаҫса татӑлать, ҫавӑн пекех арӑслан валли вольер хатӗрлет.

Раща директорӗ пӗлтернӗ тӑрӑх, ҫывӑх вӑхӑтра зоопарк тата ытти чӗрчунпа пуянланӗ: попугайсем, макакӑсем, носуха илсе килӗҫ.

«Контактри» сӑн

Чӑваш Республикин чысӗшӗн ӑмӑртакан Камилла Нелюбова Раҫҫей Гран-прийӗн тапхӑрӗнче каллех ҫӗнтернӗ. Тӗрух палӑртар: Гран-при — пӗр ҫинче эрешлесе ярӑнас енӗпе пПтӗм Раҫҫейри пысӑк ӑмӑртусен серийӗ. Ҫак сезонра Камиллӑшӑн ку иккӗмӗш ылтӑн медаль!

Турнирӑн тӑваттӑмӗш тапхӑрӗнче Камилла кӗске тата иреклӗ программӑсенче 217,06 балл пухнӑ. Шел те, иреклӗ программӑра виҫҫӗллӗ аксель ӑнман. Ҫавӑнпа вӑл, ахӑртнех, пӗрремӗш вырӑна тухасса кӗтмен те, ҫамрӑк спортсменка йӑнӑшшӑн питӗ пӑшӑрханнӑ.

Баллсене пӗлтернӗ хыҫҫӑн пурпӗрех ҫӗнтернине пӗлсен Камилла куҫҫульне аран тытса чарнӑ

cap.ru сайтри сӑн

Пӑрачкав округӗнчи Анастасово ялӗнче вӑрҫӑра вилнӗ салтаксене халалласа Ӗмӗр сӳнми ҫулӑм ҫутнӑ.

Тӑван ҫӗршывӑн Аслӑ вӑрҫи вӑхӑтӗнче кӳршӗ Коровино тата Бахмутово ялӗсенчен 900 ытла ҫын фронта кайнӑ, вӗсенчен 437-шӗ каялла таврӑнайман.

Ку проекта «Ниме – халӑх бюджечӗ» программӑпа килӗшӳллӗн пурнӑҫланӑ. Ӗмӗр сӳнми ҫулӑма Шупашкар хулинчен, Мухтав Монументӗнчен, илсе килнӗ. Пӑрачкав округӗнчи Анастасово ялӗнче ӑна Пӗтӗм Раҫҫейри «Ҫӗнтерӳ ҫулӑмне упратпӑр» акципе килӗшӳллӗн ҫутнӑ.

Сӑмах май, кӑҫал Пӑрачкав округӗнче «Ниме – халӑх бюджечӗ» программӑпа килӗшӳллӗн 70 проекта пурнӑҫа кӗртнӗ, пӗтӗмпе – 163,6 миллион тенкӗлӗх. Пилӗк проекчӗ вӑрҫӑ астӑвӑмӗпе ҫыхӑннӑ. Кожевенное, Семеновское, Никулино ялӗсенче палӑксене юсанӑ, Напольное, Анастасово ялӗсенче вара Ӗмӗр сӳнми ҫулӑма ҫутма мемориасем патне газ илсе пынӑ.

Ку эрнере ҫанталӑк мӗнле пулӗ? «Ҫанталӑк 21» портал мӗн ҫырнине тишкерер.

Ҫитес талӑксенче республикӑра хушӑран ҫумӑр, юрлӑ кӗрпе ҫума пултарать. Ҫӗрлесерен тата ирсерен тӗтре карса илӗ. Юнкун тата кӗҫнерникун кӑшт уяртӗ.

Кӗҫнерникун ҫӗрле йӗпе юр ҫӑвӗ. Шӑматкун ҫумӑрлӑ пулӗ, термометр 6-8 градус ӑшӑ кӑтартӗ. Атмосфера пусӑмӗ тӑрук улшӑнса тӑнипе ҫил вӑйланӗ. Вырсарникун ҫумӑр та, юр та ҫумӗ, ҫил лӑпланӗ.

Малтанлӑха пӗлтернӗ тӑрӑх, ҫитес эрнере типӗ, сивӗрех ҫанталӑк пулӗ. Виҫҫӗмӗш декада пуҫламӑшӗнче кӑна ҫумӑр ҫӑвӗ.

ҪҪХПИ тунӑ сӑн

Ҫӗрпӳ округӗнче электросамокатпа пыракан арҫын фура айне пулса вилнӗ.

Авари ӗнер, чӳк уйӑхӗн 7-мӗшӗнче, 17 сехетре «

«Атӑл» М-7 автоҫул ҫинче 693-мӗш ҫухрӑмра, Йӗкӗрвар ялӗ ҫывӑхӗнче пулнӑ. Малтанлӑха пӗлтернӗ тӑрӑх, ҫурмаприцеплӑ «МАН» фура ҫулпа хирӗҫ пыракан электросамокат ҫине пырса кӗнӗ. Арҫын йывӑр сурансене пула ҫавӑнтан, авари вырӑнӗнче, вилнӗ.

Фура рулӗ умӗнче 1991 ҫулта ҫуралнӑ арҫын ларнӑ.

Халӗ йӗрке хуралҫисем ку аварие тӗпчеҫҫӗ. Фура водителӗ тӗлӗшпе уголовлӑ ӗҫ пуҫарнӑ.

Прокуратура архивӗнчи сӑн

Паян Ҫӗнӗ Шупашкар хулинче ҫыранран Ҫавал юханшывне ӳкнӗ машинӑна кӑларнӑ. Салонра 5 ҫамрӑк пулнӑ, вӗсен виллисене пуринне те тупнӑ.

Виҫҫӗшне шывра тупнӑ, тепӗр иккӗшӗ машина салонӗнче пулнӑ. Прокуратура пӗлтернӗ тӑрӑх, 3 каччӑпа 2 хӗр чӳкӗн 6-мӗшӗнче ҫухалнӑ. Тепӗр кунхине 22 ҫулти водителӗн ашшӗ-амӑшӗ полицие кайнӑ. Вӗсене 1 кун ҫурӑ шыранӑ, кайран проектор йӗрӗпе вӗсем Ҫавал юханшывӗ патне пырса тухнӑ. Кун хыҫҫӑн Инкеклӗ лару-тӑру министерствин водолазӗсем 3-4 метр тарӑнӑшӗнче путнӑ «Нивӑна» тупнӑ.

Халӗ кун тӗлӗшпе пуҫиле ӗҫ пуҫарнӑ. РФ Следстви комитечӗн Чӑваш Енри следстви управленийӗ пуҫиле ӗҫе тӗпчӗ.

Анна Егорова страницинчен илнӗ сӑнӳкерчӗк

Пирӗн республикӑра «Тавах, аннеҫӗм!» акци иртет. Ӑна Амӑшӗн кунне халалласа Чӑваш Республикин Вӗренӱ институчӗ йӗркеленӗ.

Унта чӳк уйӑхӗн 2-30-мӗшӗсенче хутшӑнма пулать.

Аслӑ шкулӑн ӗҫченӗ Анна Егорова халӑх тетелӗнчи хӑйӗн страницинче пӗлтернӗ тӑрӑх,

Акци чӑвашла калаҫакан кирек кам валли те: анне ҫинчен сӑвӑ вуласа е юрӑ юрласа видео ҫине ӳкерсе илмелле те #таваханнеҫӗм хештегпа «Контактра» хутшӑну тетелӗнчи «Чӑваш чӗлхи – чӗкеҫ чӗлхи» (vk.com/club201526545) ушкӑна е Интернетри ытти хутшӑну тетелӗсене (социаллӑ сетьсене) #таваханнеҫӗм, #спасибомама хештегсемпе вырнаҫтармалла.

Приставсен архивӗнчи сӑн

Комсомольский округӗнче суд приставӗ парӑмҫӑ патне килнӗ те унӑн пурнӑҫне ҫӑлнӑ.

Шалти службӑн аслӑ прапорщикӗ Алексей Ефремов шалти службӑн лейтенанчӗпе Алсу Шейгереевӑпа парӑмҫӑ патне килне пынӑ. Алӑкран шаккасан никам та уҫман. Анчах вӑл кӑштах уҫӑ пулнӑ.

Вӗсем пӳртре вӗрекен чейник сасси пулнине илтнӗ, сывлӑшра газ тата тӗтӗм шӑрши сарӑлнине туйнӑ. Приставсем шала кӗнӗ те газ плити ҫутӑ пунине, ун ҫинче чейник ларнине курнӑ. Шыв вӗресе пӗтнӗ.

Алексей Ефремов часрах газа хупнӑ, ҫапла вӑл пушар тухасран ҫӑлнӑ. Кил хуҫи арҫынни вара ҫав вӑхӑтра питӗ вӑйлӑ ҫывӑрнӑ, чейникри шыв вӗресе пӗтнине туйман та.

Приставсем ҫав вӑхатра ҫав вырӑнта пулни пысӑк инкек тухасран сыхланӑ.

Патшалӑх автоинспекцийӗ тунӑ сӑн

Чӑваш Республикинче тепӗр авари пулнӑ. Хальхинче — «Ҫӗрпӳ – Чӗмпӗр – Яманчӳрел» ҫул ҫинче.

Авари чӳк уйӑхӗн 6-мӗшӗнче 23 сехет те 8 минутра пулнӑ. Малтанлӑха палӑртнӑ тӑрӑх, 17 ҫулти водитель ВАЗ-2107 руле итлеттереймен те ҫул ҫинче тухса кайса йывӑҫ ҫине пырса тӑрӑннӑ.

Каччӑна пульницӑна илсе кайнӑ, унӑн сулахай ури хуҫӑлнӑ. Кайран тӗрӗслев вӑхӑтӗнче ҫакна палӑртнӑ: руль умӗнче Тутарстан каччи ларнӑ, унӑн водитель прави пулман. Ку кӑна мар, «семерка» ҫине суя номерсем ҫыпӑҫтарнӑ.

Халӗ Патшалӑх автоинспекцийӗ ку авари тӗлӗшпе тӗрӗслев ирттерет.