cap.ru сайтри сӑн

Чӑваш Республикине тин кӑна 12 автобус илсе килнӗ. Кун пирки ЧР Транспорт министертви пӗлтерет.

Кӑҫал республика хушма НефАЗ 16 пысӑк атобус туяннӑ. Кун валли 242,95 миллион тенкӗ тӑкакаланӑ.

ЧР Транспорт министерстви пӗлтернӗ тӑрӑх, юпа уйӑхӗн вӗҫлениччен республикӑна тепӗр тӑватӑ автобус кӳрсе килӗҫ. Вӗсем те пысӑк класлисем пулӗҫ.

Сӑмах май, унччен республикӑна 27 НефАЗ илсе килнӗ. Вӗсенчен ытларахӑшӗ халӗ «Шупашкар – Ҫӗнӗ Шупашкар» маршрут ҫинче ӗҫлет.

2027 ҫулта пысӑк класлӑ 30 автобус, вӑтам класлӑ 10 автобус тата пӗчӗк класлӑ 1 автобус илсе килӗҫ. 2028 ҫулта вара Чӑваш транспорт управленийӗ тепӗр пысӑк класлӑ 53 автобуспа пуянланӗ.

Шупашкарти Павел Михайлов Китайра тайцзицюань енӗпе иртнӗ уҫӑ чемпионатра ҫӗнтернӗ.

Турнир Китайри Ханьдан хулинче иртнӗ уйӑхрах иртнӗ иккен, анчах кун пирки МИХсем паян ҫеҫ пӗлтернӗ.

Ӑмӑрту авӑн уйӑхӗн 19-24-мӗшӗсенче пулса иртнӗ. Унта Китайри тата тӗнчери 20 ҫӗршыври спортсмен хутшӑннӑ. Пурӗ 1400 ҫын. Павел Михайлов хутшӑннӑ ушкӑнра 17 спорстмен ӑмӑртнӑ. Чӑваш Енри кунг-фу ӑсти Китайри спортсменсене ҫӗнтернӗ. Унччен чӑваш спорстменӗ 35 хутчен тренировка ирттернӗ. 2018 ҫултанпа вӑл тайцзи енӗпе тӗнчери паллӑ грандмастер Чэн Дун Фэн патӗнче вӗренет. Унччен арҫын тӗнчери ӑмӑртусенче виҫӗ хутчен ҫӗнтернӗ, Раҫҫейре вара кунг-фу енпе виҫе хутчен чемпион ятне тивӗҫнӗ.

Шупашкарта арҫын кунг-фу шкулне ертсе пырать. Ачасем ҫапӑҫма вӗренеҫҫӗ, аслисем — сывлӑх гимнастикине.

Андрей Попов архивӗнчи сӑн

Чӑваш патшалӑх оперӑпа балет театрӗн директорӗнче ӗҫленӗ Андрей Попов паянтан ЧР культура министрӗн ҫумӗнче вӑй хума тытӑнӗ. Хушӑва ЧР правительствин председателӗ Сергей Артамонов алӑ пуснӑ.

Андрей Попов Чӑваш патшалӑх оперӑпа балет театрне 4 ҫул ҫурӑ ертсе пынӑ. Шӑпах ҫавӑн чухне театр «Атӑл Опера» ята илнӗ. Кӑҫал ҫурла уйӑхӗн 7-мӗшӗнче вӑл директортан кайнӑ, Перьмри академи Театр-Театрӗнче аталану директорӗнче вӑй хума тытӑннӑ. Вӑл хӑй те – Пермь тӑрӑхӗнчен, карьерине унта пуҫланӑ.

Нумаях пулмасть, юпа уйӑхӗн 27-мӗшӗнче, Андрей Попов халӑх тетелӗнчи страницинче Пермьри театртан каяссине пӗлтернӗ. Чӑваш Ене ӗҫлеме килнӗ вӑл ав.

cheb-centr.soc.cap.ru сӑнӳкерчӗкӗ

Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрта выртакан тӑванӗсене пӑхакансене ҫак ӗҫе тӗрӗс пурнӑҫлама вӗрентеҫҫӗ.

Вырӑнпа выртакан ҫынна пӑхасси пӗртте ҫӑмӑл мар. Ҫипуҫне ылмаштарса тӑхӑнтартмалла, вырӑн таврашне улӑштарса памалла, кӗлетки шӑтса каясран асӑрхаса тӑмалла. Вырӑн ҫине тӑратса лартнӑ чух пилӗксӗр те тӑрса юлӑн.

Асӑннӑ центрта ӗҫлекенсем пӑхакан ҫыннӑн сывлӑхӗ малти вырӑнта пулмалла тесе калаҫҫӗ. Мӗншӗн тесен пӑхаканни те хавшасан халсӑр ҫынна кам пӑхӗ?

Социаллӑ центрти Тренировка хваттерӗнче выртакансен тӑванӗсене ҫывӑх ҫыннисене тӗрӗс пахма вӗрентеҫҫӗ. Центрта ҫеҫ мар, киле тухса ҫӳресе те.

Тӗпленрех ыйтса пӗлес тесен 50‑00‑94 номерлӗ телефонпа шӑнкӑравламалла.

Гича чат сӑнӳкерчӗкӗ

Япала хакланать тенинчен тӗлӗнме пӑрахрӑмӑр пулӗ ӗнте. Халӗ тата ют ҫӗршыври маркетлплейссен таварӗ хакланса каяссине пелтереҫҫӗ. Ҫакӑ хушма хакран налук тӳлеттерме пуҫланипе ҫыхӑнӗ. Налук виҫи 22 процентпа танлашать.

Саккун проектне РФ Патшалӑх Думин депутачӗсем пӗрремӗш вулавпа йышӑннӑ та ӗнтӗ.

Налук ют ҫӗршыври лапамсенчи мӗнпур тавара пырса тивет, налук хак ҫумне хушӑнать.

Кун пек саккун йышӑннине тӳре-шарапа депутатсем халӑхшӑн. тӗрӗсрех каласан, хамӑр матри лавккасемшӗн тӑрӑшнипе сӑлтавлаҫҫӗ-мӗн. Раҫҫейри магазинсемпе ют ҫӗршыври маркетплейссене ӗҫлеме пӗр пек услови туса парас теҫҫе иккен. Сӑмах май каласан, маркетплейссенче хамӑр ҫӗршыври хӑш-пӗр тавар ют ҫӗршыври ҫавӑн йышши тавартан хаклӑрах тӑнине эсир те сиснӗ-тӗр.

pogoda21.ru сӑнӳкерчӗкӗ

Синоптиксене ӗненсен тепӗр эрнерен пирӗн республикӑра хӗл ларӗ. Ун чухне юр ҫӑвӗ.

Паянхи кун вара чӑннипех илемлӗ те кӗркуннехи пек мар. Кӑҫал юпа уйӑхӗ ахаль те тӗлӗнсе каймалла хитре те типӗ тӑчӗ. Ун пекки 1987 ҫулта пулнӑ иккен. Анчах ун чухне пӗтӗмпе 6 кун уяр пулнӑ, кӑҫалхи юпа уйӑхӗ хӗвеллӗ те уяр кунпа пӗрмаях савӑнтарчӗ. Сывлӑш температури енчен кун пек ӑшӑ юпа уйахӗ 1974 ҫулта пулнӑ иккен.

Ҫитес эрнере атлантика циклонӗн атомосфера фрончӗ улшӑнӗ. Ҫавна май юнкунпа кӗҫнерникун ҫумӑр ҫӑвӗ. Эрнекун вара йӗпе юр ҫума пуҫлӗ. Шӑматкун вара ҫӗре юр хуплама пултарасси пирки асӑрхаттараҫҫӗ. Ку вӑл синоптиксене ӗненсен. Тепӗр чухне вӗсем каласа хунӑ пек пулмасть, ҫӑвӑнпа та пурӑнсан курӑпӑр.

«Контактри» сӑн

Вӑрнар округӗнчи Туҫи Ҫамрӑс ялӗнче пурӑнакан Анастасия Якимова 101-мӗш ҫуралнӑ кунне паллӑ тунӑ.

Унӑн ҫамрӑклӑхӗ Тӑван ҫӗршывӑн Аслӑ вӑрҫи вӑхӑтӗнче иртнӗ, ҫапах вӑл йывӑрлӑхра та пурнӑҫпа савӑнма пӗлнӗ. Анастасия Якимовна ялти ытти ҫынпа пӗрле вӑрмана вутӑ хатӗрлеме кайнӑ, Сӑр юханшывӗ ҫывӑхӗнче окоп та чавнӑ.

Йывӑр ӗҫлени унӑн сывлӑхне витӗм кӳнӗ, унӑн куҫӗ япӑх курма пуҫланӑ. Ҫапах ҫакӑ ӑна ӗҫлеме чӑрмантарман.

Анатстасия Якимовнӑна ҫуралнӑ кунпа саламлатпӑр!

МАХри "Россия 24/7" каналти сӑнӳкерчӗк

Пирӗн ҫӗршывра пурӑнакансем пирус туртакан кӳршисене суда пама пуҫланӑ. Пурте мар-ха. Анчах хӑшӗсем ӳркенмесӗрех суда ҫитеҫҫӗ. Кун пирки МАХри «Россия 24/7» каналта пӗлтернӗ.

Нумай хваттерлӗ ҫуртсенче пурӑнакан ҫынсене пирус туртакан кӳршӗсем, чӑнах та, самай канӑҫсӑрлантараҫҫӗ. Уйрӑмах ҫуркуннерен пуҫласа кӗркунне ҫитиччен. Ун чухне чылайӑшӗ хваттер чӳречине уҫӑ тытать. Балкон ҫинче пирус туртса тӑрсан тӗтӗм-сӗрӗм тӳрех хваттере кӗрет. Кил хуҫинне ҫеҫ мар, ыттисенне те.

Пирус туртакан кӳршӗсем пирки калакан ӗҫе маларах судсем ҫулталӑкра пӗр хутчен пӑхса тухнӑ пулсан, халӗ судсем ун пек ӗҫе уйӑхсерен пӑхса тухаҫҫӗ иккен.

Пирус туртакан кӳршӗсене суд пускилӗсене кӑмӑл-сипет тӗлӗшӗнчен сиен кӳнӗшӗн явап тыттарать.

usinsk-r11.gosweb.gosuslugi.ru сайтри сӑн

Ҫӗнӗ Шупашкар хулинче пурӑнакан арҫын ют ҫӗршывран иномарка туянас тенӗ те шӑнман пӑр ҫинче ларса юлнӑ.

«Фольксвагенпа» ярӑнасси пулман – вӑл ултавҫӑсен тӗлне лекнӗ. 53 ҫулти арҫын кӑҫал ҫӗртме уйӑхӗнче мессенджерта Ервопӑран машина илсе килессипе ӗҫлекен ушкӑна тупнӑ. Машинӑсем Раҫҫейринчен чылай йӳнӗ пулни те илӗртнӗ ӗнтӗ ӑна.

Арҫын 2023 ҫулта туса кӑларнӑ «Фольксвагена» туянма палӑртнӑ. Куншӑн 1 миллион та 400 пин тенкӗ тӳлеме хатӗр пулнӑ. Каҫӑ ҫине пусса вӑл «менеджерпа» ҫыхӑннӑ, лешӗ килӗшӳ тума пуҫланӑ. Автомобиле бронь тума депозит тума ыйтнӑ. Анчах банк операцие пурнӑҫлама хирӗҫленӗ. Кун хыҫҫӑн ултавҫӑсем ӑна Мускава кайса укҫана почта урлӑ яма хушнӑ.

Авӑн уйӑхӗн 24-мӗшӗнче арҫын Мускава кайса 370 пин тенкӗ куҫарнӑ, координатор каланипе почта ӗҫченне ку тӑван валли тесе суйнӑ. Кун хыҫҫӑн унӑн электронлӑ почтине килӗшӳ килнӗ, машинӑна транспортировкӑна янине каланӑ.

Машина килмелли кун вӑл каллех Мускава кайнӑ. Анчах ӑна машина тытӑнса тӑни пирки пӗлтернӗ. Пӑтӑрмахсем сиксе ан тухччӑр тесе тата укҫа куҫарма хушнӑ. Кайран «сутуҫӑ» тӗрлӗ сӑлтав тупса татах, татах укҫа куҫарттарнӑ.

Малалла...

cap.ru сайтри сӑн

Шупашкарти строительство тата хула хуҫалӑхӗн техникумӗ 100 ҫулхи юбилейне паллӑ тунӑ. ЧР Элтеперӗ Олег Николаев коллектива сумлӑ юбилейпе саламланӑ. Вӑл хӑй вӑхӑтӗнче ҫак техникум студенчӗ пулнӑ.

100 ҫулта техникум 40 пин специалистра хатӗрленӗ. Вӗсен аллипе хальхи Шупашкара, микрорайонсене, шкулсене, пульницӑсене тата республикӑри промышленность предприятийӗсене тунӑ. Олег Алексеевич вӑтам професси пӗлӗвӗ ҫӳлелле хӑпарнине палӑртнӑ. Юлашки 5 ҫулта ун валли 7 миллиард ытла тенкӗ уйӑрнӑ, 135 мастерскойпе лабораторие ҫӗнетнӗ.

Уявра юбилей ячӗпе техникум коллектине ЧР Элтеперӗн Тав хутне панӑ. Ҫавӑн пекех унта ӗҫлекен хӑш-пӗр преподавателе нумай ҫул тӳрӗ кӑмӑлпа вӑй хунӑшӑн чысланӑ.