Чӑваш Республикин Вӗренӳ министерстви чӑваш чӗлхине шкулсенче вӗрентесси питех те аван пулса пынине пӗлтернӗ. Кун пек хурава Шупашкарти шкулсенчен пӗринче чӑваш чӗлхи учителӗнче ӗҫлекен Александр Степанов патне те ярса панӑ.

Александр Марсович пӗлтернӗ тӑрӑх, уйӑх ҫурӑ каялла республикӑри вӗрентекенсем тӳре-шара патне нумай чӗлхеллӗ классем (шкулсем) уҫасси тата вӗсенче чӑваш чӗлхине тарӑннӑн вӗрентесси пирки ҫырнӑ.

«Ну мӗнех, ку ҫырупа килӗшӳллӗн, чӑваш чӗлхипе ҫыхӑннӑ лару-тӑру питӗ аван», — кӑшт тӗлӗнсерех хыпарланӑ Александр Степанов хӑйӗн страницинче.

159 шкулта пуҫламӑш классенче вӗренекенсем пур предмета та (вырӑс чӗлхипе литература вулавӗсӗр, ют чӗлхесемсӗр пуҫне) чӑвашла вӗренеҫҫӗ иккен.

«Чӑннипе каласан, хамӑр республикӑшӑн «савӑнмалли» кӑна юлать. Паллах, ӗненес килет, кун ҫинчен ҫырура каланӑ, ӗҫлӗ ушкӑн хӑйӗн ӗҫне тивӗҫлӗ пурнӑҫласса шанатӑп», — пӗтӗмлетнӗ хастар вӗрентекен.

НТРК сӑнӳкерчӗкӗ

Муркаш тӑрӑхӗнче ҫырла та туса илеҫҫӗ. Республикӑри ҫырла плантацийӗн ҫурри ҫав тӑрӑхра.

Хӑш-пӗр ҫӗрте (сӑмахран, Шупашкар районӗнчи «Прогресс» хуҫалӑхра) ҫак ӗҫе пӑрахӑҫланӑ пулсан Муркаш районӗнчи Мичурин ячӗллӗ агрофирмӑра ку енӗпе паян та ҫине тӑраҫҫӗ.

Темиҫе кун каялла унта хура хурлӑхан татассипе ҫине тӑраҫҫӗ. Предприяти ертӳҫи Борис Михайлов Чӑваш Енӗн Наци телекуравне пӗлтернӗ тӑрӑх, ҫав ҫырлана 100 ытла гектар ҫинче татмалла.

Хуҫалӑхра йӗплӗ хурлӑхан та пур.

«Эткер» сӑнӳкерчӗкӗ

Чӑваш Енре чӑваш ачисен «Эткер» смени черетлӗ хутчен ӗҫлеме тытӑннӑ. Кун пирки Александр Степанов чӑваш чӗлхипе литературин вӗрентекенӗ «Контактра» халӑх тетелӗнчи хӑйӗн страницинче пӗлтернӗ.

«Кӑҫал эпир ӑна Ирпипе, Ирина Диаровӑпа, 10-мӗш хут ирттеретпӗр. Тӗлӗнмелле!!! Тӗрлӗ регионта пурӑнакан чӑваш ачисем Шупашкарта пухӑнса пӗр-пӗринпе пӗр чӗлхе тупса «Чӑваш тӗнчине» туйма тытӑнӗҫ. Шанас килет паллах. Паянхи кун вӗсем пӗр-пӗринпе паллашрӗҫ, юрларӗҫ те ташларӗҫ, хӑйсен тӑван енӗ ҫинчен постер хатӗрлерӗҫ, ыттисене паллаштарчӗҫ», — каласа кӑтартнӑ хастар вӗрентекен хӑйӗн страницинче.

Чӑн та, питех те пӗлтерӗшлӗ ӗҫ туса ирттереҫҫӗ.

«Т Плюсӑн» Мари Элти тата Чӑваш Енри филиалӗн ертӳҫи Сергей Ушаков ӗҫрен каять. Вӑл ҫурлан 1-мӗшӗнче коллективпа сывпуллашса отпуска кайнӑ, тек вӑл ӗҫе тухмӗ.

Ку должноҫре вӑл 2019 ҫулхи ҫӗртме уйӑхӗнченпе ӗҫленӗ. Унччен ҫав организацире тӗп инженер пулнӑ.

Хӑй вӑл – Пермь хулинчен, Пермь крайӗнче тата Ӗренпур облаҫӗнче «Т Плюс» Ушкӑнӑн тӗрлӗ структуринче ӗҫленӗ.

Ҫак кунсенче Китай тата Узбекистан хӗрӗсем Чӑваш Енпе паллашнӑ. И.Я.Яковлев ячӗллӗ Чӑваш патшалӑх педагогика университечӗн ҫуллахи шкулӗнче Китайран тата Узбекистанран килнӗ ҫамрӑксем вырӑс чӗлхине вӗренеҫҫӗ. Пушӑ вӑхӑтра вара вӗсем Чӑваш Енпе паллашаҫҫӗ.

Тӗслӗхрен, ют ҫӗршывран килнӗ пикесене тӗрлеме вӗрентес тӗллевпе ӑсталӑх класӗ йӗркеленӗ. Унсӑр пуҫне вӗсене вырӑс кухнин апачӗсене пӗҫерме хӑнӑхтарнӑ.Хӗрсем Муркаш округӗнчи страус фермине кайса курнӑ, Ильинкӑри чи ватӑ юман патӗнче пулнӑ, Александр Невский ячӗллӗ чиркӗве те ҫитсе килнӗ.

cap.ru сайтри сӑн

Республикӑра велосипедпа пыракан ҫын ҫырмана чӑмнӑ та каялла тухайман. Кун пирки ҫӑлав службине ҫурла уйӑхӗн 1-мӗшӗнче 21 сехет те 27 минутра пӗлтернӗ.

1987 ҫулта ҫуралнӑ арҫын велосипедпа вӑрманта пынӑ. Анчах руле итлеттереймен те ҫырмана чӑмнӑ. Вӑл сулахай аллине амантнӑ та хӑй тӗллӗн унтан тухайман.

Ҫӑлавҫӑсем вырӑна ҫитсе ӑна пӗрремӗш медпулӑшу панӑ, унтан ҫырмаран илсе тухса васкавлӑ медпулӑшу машини таран илсе ҫитернӗ.

«Российская газета» архивӗнчи сӑн

Шупашкарӑн ҫуралнӑ кунне «Иванушки International» ушкӑн килӗ. Раҫҫейри ҫак паллӑ ушкӑнӑн концертне августӑн 17-мӗшӗнче 21 сехетре Хӗрлӗ тӳремре курма май пулӗ.

Сӑмах май, кӑҫал Шупашкар хули 556 ҫул тултарать. Пӗлтӗр Хула кунӗнче Шаман килнӗччӗ. Ӑна 20 миллион тенкӗ тӳленӗ. Кунсӑр пуҫне сценӑна тара илме тата монтаж тума тепӗр 10 миллион тенкӗ тӑкакланӑ.

За рулём сайтри видеоран илнӗ сӑнӳкерчӗк

Алькешра чикансемпе таксист хушшинче тавлашу сиксе тухнӑ. Ку пӑтӑрмахпа ҫыхӑннӑ лару-тӑрӑва епле тӗпченине халӗ РФ Следстви комитечӗн ертӳҫи Александр Бастрыкин сӑнаса тӑрӗ.

Таксире ача кӳми пулманран таксист ачаллӑ пассажирсене лартса кайма килӗшмен-мӗн. Унтан чикансен йышлӑ ушкӑнӗ водительпе вӑрҫӑнма тапранса кайнӑ. Таксист вырӑнтан хускалса кайнӑ чухне ҫын ҫине пырса кӗнӗ, ун урлӑ каҫса кайнӑ. Кайран чикансем машинӑна таптаса пӗтернӗ, водителе хӗненӗ.

«Урал сасси» хаҫат сӑнӳкерчӗкӗ

Пушкӑртстанри Давлекан районӗнчи Кузьминовка ялӗ 100 ҫулхине уявланӑ. Унта ял ҫыннисем ҫеҫ мар, тӳре-шара та, артистсем те пуҫтарӑннӑ.

«Урал сасси»

хаҫат пӗлтернӗ тӑрӑх, Давлекан ҫӗрӗ ҫинче пӗр ӗмӗр каялла Кузьминовка ятлӑ ял йӗркеленнӗ. Ӑна пуҫарса яраканӗ Иван Тарасов шутланать. Ял хӑвӑрт ӳсме пуҫланӑ. Кунта Чуюнчӑ-Николаевка ялӗнчи ҫемьесем те куҫса килнӗ. Кузьминовкӑра пурӑнакансенчен ытларах пайӗ мӑкшӑсемпе чӑвашсем пулнӑ.

Олег Николаевӑн Телеграм-каналӗнчи видеоран илнӗ скриншот

Канашри «Вокзал нашей жизни» (чӑв. Пирӗн пурнӑҫри вокзал) краеведени музейне юсаса ҫӗнетнӗ. Ку хыпара республика Элтеперӗн Олег Николаевӑн Телеграм-каналӗнче пӗлтернӗ.

Музей ҫӗнӗ тематика залӗсемпе тата хальхи вӑхӑтри интерактивлӑ технологисемпе пуянланнӑ — унта ҫынсем тӗрлӗ вӑхӑтра пулса кураяҫҫӗ.