Татьяна Молокова архивӗнчи сӑн

Чӑваш наци телерадиокомпанийӗ валли тинех директор тупнӑ. Ку должноҫе Татьяна Молокова йышӑннӑ. Хушӑва паян республика премьерӗ Сергей Артамонов алӑ пуснӑ.

Татьяна Кирилловна – 51 ҫулта. Вӑл И.Н.Ульянов ячӗллӗ ЧПУн филологи факультетне пӗтернӗ. Журналист карьерине 1996 ҫулта «Чувашское агентство сообщений» ЗАОра пуҫланӑ. Кайран «Вырӑнти телевиденире», «Канал 5 плюсра», «Советская Чувашия» хаҫатра ӗҫленӗ. Чӑваш наци телерадиокомпанийӗнче 2012 ҫултанпа ӗҫлет.

Сӑмах май, НТРКн ҫулталӑк ҫурӑ ӗнтӗ директор пулман. Унччен ку должноҫре Алексей Гурьянов ӗҫленӗ. Халӗ вӑл – цифра аталанӑвӗн министрӗн ҫумӗ.

fnpk82new.ru сайтри сӑн

Ҫӗнӗ Шупашкарти прокуратура рабочие хӳтеленӗ. Кун хыҫҫӑн кӑна арҫынна ӗҫпе тивӗҫтерекен организаци 150 пин тенкӗ тӳленӗ.

Тӗрӗслев хыҫҫӑн ҫакна палӑртнӑ: кӑҫал ҫӗртме уйӑхӗнче арҫын ӗҫре суранланнӑ, кун хыҫҫӑн чирлесе кайнӑ. Надзор ведомстви унӑн прависене хӳтӗлесе, кӑмӑл-сипет тӗлӗшӗнчен сиен кӳнӗшӗн укҫа шыраса илес тесе суда тавӑҫ тӑратнӑ.

Ӗҫпе тивӗҫтерекен организаци суд пуличчен кӗтсе тӑман – ыйтӑва татса парас тесе вӑл ӗҫре шар курнӑ арҫынна 150 пин тенкӗ тӳленӗ.

Пирӗн ҫӗршывра кӑҫал Ҫӗршыв хӳтӗлевҫин ҫулталӑкӗ тесе йышӑнни пирки Чӑваш халӑх сайчӗ унччен темиҫе хутчен те пӗлтернӗччӗ.

Пирӗн ҫӗршывра ҫар мухтавӗн тата тепӗр кунӗ пулӗ. Кун пирки ҫӗршыв Президенчӗ Владимир Путин алӑ пуснӑ. Вӑл уяв ака уйӑхӗн 9-мӗшӗнче пулӗ. Ӑна Кенигсберга паттӑрла хӳтӗлесе хӑварнине халалланӑ.

Галина Махмутова страницинчен илнё сӑнӳкерчӗк

Чӳк уйӑхӗн 15-мӗшӗнче «Парне» фольклор ансамблӗ фольклор коллективӗсен «Сӑрпа Ҫавал ҫаврисем» республикӑри фестиваль-конкурсне хутшӑннӑ. Кун пирки Галина Махмутова халӑх тетелӗнчи хӑйӗн странцинче пӗлтернӗ.

Фестиваль Вӑрнар районӗнчи Уйкас Кипекри культура ҫуртӗнче иртнӗ. Унта тури чӑвашсен юрри-кӗввипе паллаштарнӑ. Мероприятие вирьял-чӑвашсен фольклорпа этнографи культурине, юррипе ташшине сарас тӗллевпе ирттернӗ иккен.

Культура министерствин сӑнӳкерчӗкӗ

Раҫҫейри художниксен союзӗн пайташне Сергей Плешкова «Чӑваш Республикин культурӑн тава тивӗҫлӗ художникӗ» ят панӑ.

Сергей Плешков Шупашкарта 1955 ҫулта ҫуралнӑ. Вӑл – скульптор-анималист. Богородскри техника училищинчен вӗренсе тухнӑ. 1979 ҫулта Чӑваш Енри художниксен союзӗн художество фондӗнче художник-оформительте ӗҫлеме пуҫланӑ. Тӗрлӗ конкурса хутшӑннӑ, хӑйӗн ӗҫӗсен куравне те йӗркеленӗ.

https://vk.com/wall-152987812_91433 пабликран илнӗ сӑӳкерчӗк

Чӑваш Енри хӗрарӑмсем илем конкурсне хутшӑннӑ. «Миссис Чувашия 2025» (чӑв. Чӑваш Ен миссисӗ 2025) ят панӑскере илемпе амӑшлӑхӗн республикӑри конкурсӗ тенӗ.

Ку конкурсра 52 ҫулти хӗрарӑм, Ирина Николаева, ҫӗнтернӗ. Вӑл тӗп титула тата кӑшӑла тивӗҫнӗ.

Вице-миссис ята харӑсах иккӗн ҫӗнсе илнӗ. Вӗсем — Ирина Суворова тата Анастасия Карсакова.

Куракансене килӗшнӗ хӗрарӑм — Юлия Крылова, миссис-карат – Зинаида Раймова.

Марина Карягина страницинчен илнӗ сӑнӳкерчӗк

Чӑваш академи драма театрӗнче иртекен «Чӗкеҫ» фестивале хутшӑнакансем СССР халӑх артисчӗ Вера Кузьмина ҫуралса ӳснӗ тӑрӑхра, Тӑвай районӗнчи Енӗш Нӑрваш ялӗнче, пулнӑ. Марина Карягина журналист ӗнер халӑх тетелӗнчи хӑйӗн страницинче пӗлтернӗ тӑрӑх, унта тараватлӑ ентешӗсем хӑнасене мухтавлӑ артист ҫинчен каласа панӑ, театр тӗпелӗнчи экспонатсемпе паллаштарнӑ.

Каҫхине Тӑвайри культура ҫуртӗнче Алтай Республикинчен килнӗ этноансамбль концерт кӑтартнӑ. «Алтай халӑх музыка инструменчӗсен сассинче пирӗн тахҫанхи несӗлсен ахрӑмӗ илтӗнет. Карланкӑран тухакан саспа юрласа пурин кӑмӑлне те ҫавӑрнӑ артистсене чылайччен хыттӑн алӑ ҫупса тав турӗҫ куракансем», — пӗлтернӗ маларах асӑннӑ ҫӑлкуҫ.

Ун хыҫҫӑн Чӑваш патшалӑх академи драма театрӗн артисчӗсем «Карчӑксем качча каяҫҫӗ» камит кӑтартнӑ.

И.В.Сухарева-Саригель

Чӳк уйӑхӗн 16-мӗшӗнче, аслӑ Ҫеҫпӗлӗмӗр ҫуралнӑ кун, Чӑваш Республикинчи Ҫеҫпӗл Мишши фончӗн Халӑхсем хушшинчи Ҫеҫпӗл Мишши ячӗллӗ премийӗн 2025 ҫулхи лауреачӗсем паллӑ пулчӗҫ.

Вӗсем — Чӑваш патшалӑх культурӑпа ӳнер институчӗн гуманитари кафедрин профессорӗ, истори наукисен докторӗ Ирина Витальевна Сухарева-Саригель («Чӑвашлӑха аталантарассишӗн нумай ҫул ҫине тӑрса тухӑҫлӑ ӗҫленӗшӗн, наукӑра, юрӑ-кӗвӗ ӳнерӗнче пысӑк ҫитӗнӳсем тунӑшӑн») тата Санкт-Петербургри чӑвашсен Наципе культура автономийӗн предселателӗ, Чӑваш Республикин культура тава тивӗҫлӗ ӗҫченӗ Валериан Анатольевич Гаврилов («Чӑвашлӑха аталантарас тӗлӗшпе нумай ҫул тухӑҫлӑ ӗҫленӗшӗн, тӗрлӗ ҫулсенче Мурманск облаҫӗнче тата Санкт-Петербургри чӑвашсен пӗрлӗхӗсене ӑнӑҫлӑ ертсе пынӑшӑн»).

И.В.Сухарева-Саригель 1969 ҫулта Пушкӑртстанри Аурказӑ районӗнчи Накатак ятлӑ ялта ҫуралнӑ, хальхи вӑхӑтра Шупашкарта пурӑнать, Чӑваш патшалӑх культурӑпа ӳнер институтӗнче вӑй хурать.

В.А. Гаврилов 1962 ҫулта Чӑваш Республикинчи Вӑрмар райӗнӗнчи Пысӑк Енкасси ялӗнче тӗнчене килнӗ, нумай ҫул Мурманскра ӗҫлесе пурӑннӑ, юлашки ҫулсенче Санкт-Петербургра пурӑнать, Чӑваш Енпе тачӑ ҫыхӑну тытать.

Малалла...

ҪҪХПИ тунӑ сӑн

Улатӑрта пурӑннӑ упӑшкипе арӑмӗн Волгоград облаҫӗнчи хӑрушӑ аварире пурнӑҫӗ татӑлнӑ.

Авари ӗнер ирхине 4 сехет ҫурӑра пулнӑ. Малтанлӑха пӗлтернӗ тӑрӑх, «Киа Рио» ҫӑмӑл машина водителӗ дистанцие пӑхӑнман, йывӑҫ тиенӗ «Мерседес» прицепӗ айне кӗрсе кайнӑ.

Кун хыҫҫӑн ҫӑмӑл машина тата прицеп ҫунма тытӑннӑ. «Киа Рио» водителӗ тата унта пулнӑ икӗ пассажир васкавлӑ медпулӑшу киличчен вилнӗ.

Халӗ ӗҫ-пуҫа уҫӑмлатаҫҫӗ.

Инкеклӗ лару-тӑру министерстви тунӑ сӑн

Паян ирхине Ҫӗнӗ Шупашкарта Совет урамӗнчи 27-мӗш ҫуртра, общежитире, пушар тухнӑ. Пушарнӑйсем 4 ҫын пурнӑҫне ҫалнӑ.

Ирхи 6 сехет ҫурӑра пӳлӗм хуҫи, хӗрарӑм, ӗҫе кайнӑ, электричествӑпа ӑшӑтакан кӑмакана ҫутса хӑварнӑ. Унӑн 12-ри ывӑлӗ вара ӑшӑнас тесе тата электроплита ҫутнӑ. Арҫын ача тӗтӗм шӑршипе вӑранса кайнӑ та кӳршисем патне чупнӑ.

Пушарнӑйсем 3-мӗш хутри чӳречерен арҫын ачана тата арҫынна эвакуациленӗ. Тепӗр икӗ ҫынна ҫӑлав хатӗрӗсемпе усӑ курса урама кӑларнӑ.

Малтанлӑха пӗлтернӗ тӑрӑх, пушар электросеть авариллӗ режимра ӗҫленине пула тухнӑ.