Culture.cap.ru сӑнӳкерчӗкӗ

Пӗлтӗр 100 ҫул тултарнӑ Чӑваш патшалӑх юрӑпа ташӑ ансамблӗ ҫав датӑна халалланӑ программӑпа пӗлтӗр 9 хулара пулнӑ.

Концерт учрежденийӗнче пӗлтернӗ тӑрӑх, театрализациленӗ гастроль программипе Екатеринбург, Тӗмен, Нефтеюганск, Нижневартовск, Сургут, Ханты-Мансийск, Пермь, Мускав тата Чулхула хулисенче пулнӑ.

Ҫӗнӗ ҫул хыҫҫӑн ҫанталӑк ӑшӑтсах ячӗ. Ӗнер каҫхине Шупашкарта термометр 2,1 градус ӑшӑ кӑтартнӑ. Ку – ҫӗнӗ рекорд. 2007 ҫулта та ҫапла ӑшӑ пулнӑ. Ун чухне хӗллехи ҫанталӑк кӑрлачӑн виҫҫӗмӗш декадинче кӑна хуҫаланма тытӑннӑ. Кӑҫал та кӑнтӑр-хӗвелтухӑҫ енчи районсенче юр ирӗлсе пӗтнӗпе пӗрех.

Синоптиксем пӗлтернӗ тӑрӑх, ҫанталӑк сивӗтме тытӑнӗ. Кӗҫӗр термометр 4-9 градус «минус» кӑтартма пуҫлӗ. Ҫил лӑпланӗ. Кӑнтӑр-хӗвелтухӑҫ округсенче юр ҫӑвӗ.

Ыран чылай округра юр ҫӑвӗ. Кӑрлачӑн 5-6-мӗшӗченче те юр пулӗ, ҫил-тӑман та вӗтерӗ.

Тунтикун 4-9 градус сивӗ пулӗ, 13-18 градус сивӗ пек туйӑнӗ. Раштав умӗн ҫӗрле 7-12 градус таран сивӗтӗ. Кӑрлачӑн 8-мӗшӗнче йӗпе юр ҫӑвӗ. Кӗҫнерникун ҫил вӑйланӗ. Каллех ӑшӑтӗ – шӑматкунччен.

Малтанлӑха пӗлтернӗ тӑрӑх, кӑрлачӑн иккӗмӗш ҫурринче кӑна юр ҫӑвӗ, шартлама сивӗ килӗ.

ШӖМ архивӗнчи сӑн

Ӗнер, кӑрлачӑн 2-мӗшӗнче, Канаш хулинче лавккана Хӗл мучи тумне тӑхӑннӑ арҫын кӗнӗ те лавкка хуҫине персе пӑрахнӑ. Унччен маларах лавкка хуҫи Хӗл мучипе селфи ӳкерӗннӗ. Кайран Хӗл мучи тумӗ айӗнчен пистолет кӑларса сентре патӗнче тӑракан 54-ри арҫынна персе пӑрахнӑ та тухса тарнӑ.

Арҫынна Росгварди ӗҫченӗсем Канаш округӗнчи пӗр ялта тытса чарнӑ. Малтанлӑха пӗлтернӗ тӑрӑх, тытса чарнӑ арҫын лавкка хуҫине парӑмшӑн вӗлернӗ.

Лидия Филиппова страницинчен илнӗ сӑнӳкерчӗксемпе усӑ курнӑ

Паян, кӑрлач уйӑхӗн 3-мӗшӗнче, чӑваш тӗнчи хӑйӗн мухтавлӑ икӗ ентешпе сывпуллашӗ. Кун пирки Лидия Филиппова журналист халӑх тетелӗнчи хӑйӗн страницинче пӗлтернӗ.

Вӗсем — Иван Дубанов тата Валерий Лаврентьев. Иван Степанович — учитель, географ, краевед. 20 ытла кӗнеке авторӗ. Валерий Лаврентьев — радиоинженер, офицер, физик, математик.

kostroma.mk.ru сайтри сӑн

Республикӑра 2025 ҫулӑн пӗрремӗш кунӗнче, кӑрлач, уйӑхӗн 2-мӗшӗнче, 18 ача кун ҫути курнӑ.

Чи пӗрремӗш ҫуралнӑ пепке – арҫын ача, вӑл –Ҫӗмӗрлерен. Кӑрлачӑн 1-мӗшӗнче пӗтӗмпе 9 хӗрача тата 9 арҫын ача кун ҫути курнӑ.

Кӑҫал чи малтан ҫуралнӑ ачасене тата вӗсен амӑшӗсене ЧР Элтеперӗ Олег Николаев хӑйӗн телеграм-каналӗнче саламланӑ, пепкесене сывлӑхлӑ ӳсме суннӑ.

Хӗрлӗ Чутай округӗнчи Ҫӗнӗ Атикассинче пурӑнакан Клавдия Ижетникова 101-мӗш ҫуралнӑ кунне паллӑ тунӑ.

Вӑл ача чухне вӗрентекен пулма ӗмӗтленнӗ. Ӗмӗтне пурнӑҫланӑ. Анчах 1942 ҫулта вӑл хӑйӗн ирӗкӗпе фронта кайнӑ. Унта аманнӑ, киле кӑкӑр тӗлӗнчи виҫӗ ванчӑкпа таврӑннӑ. Кун хыҫҫӑн Клавдия шкулта ачасене малалла вӗрентнӗ.

Паянхи кун Клавдия Гавриловна виҫӗ ачипе, ултӑ мӑнукӗпе, 11 кӗҫӗн мӑнукӗпе савӑнса пурӑнать.

"Контактри" сӑн

Елчӗк округӗнчи Ҫуткӳл ялӗнче пурӑнакан Леонтьевсем пӗрлешнӗренпе 70 ҫул ҫитнӗ. Леонид Александровичпа Августа Васильевна ӗмӗр тӑршшӗпех тӑван ялӗнче пурӑнаҫҫӗ. Иккӗшӗ те колхозра ӗҫленӗ.

Вӗсем 6 ача ҫуратса ура ҫине тӑратнӑ. Валентина, Светлана, Людмила тата Любомир ҫемйисемпе Шупашкарта пурӑнаҫҫӗ. Мария Ташкентра тӗпленнӗ, Владимир – Мускавра.

Леонтьевсем телейлӗ ҫемье вӑрттӑнлӑхӗпе палланнӑ: юратса, килӗштерсе пурӑнмалла.

Чӑваш Ен Правительстви килти чӗрчунсене регистрацилемелли тата уҫӑлтарса ҫӳремелли правилӑна улӑштарнӑ. Килти чӗрчунсен удостоверенийӗсенче унӑн хуҫин ИННӗ вырӑнне паспортри даннӑйӗсене кӑтартӗҫ. Йытӑсемпе кушаксен хуҫисене уҫӑмлатни чӗрчунсем ҫухалсан вӗсене тупма ҫӑмӑл пулӗ.

Кандинский нейросеть сӑнӳкерчӗкӗ

Шупашкарти банксенчен пӗринче ӗҫлекен 20 ҫулти хӗр ултавҫӑсен аллине ҫакланнӑ. Банкра кивҫен илнӗ 600 пин тенке вӑл банкомат урлӑ куҫарса янӑ. Асӑннӑ банкомата вырнаҫтарнӑ суту-илӳ центрӗнче ултавҫӑсенчен асӑрханма чӗнсе калакан кӳлепе те вырнаҫтарнӑ.

Халӗ хӗрӗн уйӑхсерен 20-шер пин тенкӗ кредит тӳлесе пыма тивӗ. Пӗтӗмпе 7 ҫул. Ытларах та илесшӗн пулнӑ та, анчах тепӗр икӗ банкра ӑна вӑл илме ӗмӗтленнӗ 800 пин тенке паман.

Раштав уйӑхӗ нормӑран ӑшӑрах пулнӑ. Кӑрлач уйӑхӗ мӗнлерех килӗ?

Синоптиксем пӗлтернӗ тӑрӑх, кӑрлач варринче сивӗтӗ. Уйӑх варринче нормӑпа килӗшӳллӗн ӑшӑтӗ, юр самай ҫӑвӗ. Юр хулӑнӑшӗ 30 сантиметра ҫитӗ.

Кӑрлачӑн пӗрремӗш декадинче ҫанталӑк улшӑнса тӑрӗ, ҫавна май ҫул ҫинче пӑрлак пулӗ, пӑрлӑ ҫумӑр

та ҫума пултарӗ.