Сӗнтӗрвӑрринчи мурал. Регина Антонова тунӑ сӑн

Аслӑ Ҫӗнтерӳ пулнӑранпа 80 ҫул ҫитнӗ май Шупашкарта, Сӗнтӗрвӑрринче ҫӗнӗ муралсем ӳкереҫҫӗ.

Сӗнтӗрвӑрринчи Николаев урамӗнчи 87-мӗш «а» ҫурт стени ҫине Ирӗке кӑларнӑ салтак палӑкне ӳкереҫҫӗ. Унӑн оригиналӗ Берлинта вырнаҫнӑ.

Шупашкарта ака уйӑхӗн пуҫламӑшӗнче «Ҫӗр Аннемӗр чӗнет!» палӑка ӳкерме пуҫланӑ. Вӑл Воробьев композиторсен урамӗнчи 5-мӗш ҫурт стени ҫинче пулӗ.

Ольга Туркайӑн "Контактра" страницинчен илне сӑнӳкерчӗк

Чӑваш Енӗн Наци вулавӑшӗнче тӑван чӗлхене вӗрентекенсен пысӑк форумӗ иртнӗ.

Ольга Туркай радиожурналист пӗлтернӗ тӑрӑх, мероприяти вӑхӑтӗнче Наци библиотеки йӗркелесе ирттернӗ «Тӑван сӑмах» вулакансен аудиокӗнеке конкурс ҫӗнтерӳҫисене чысланӑ. «Республика шайӗнче иртнӗ конкурса 90 яхӑн ҫын хутшӑнчӗ. Пиллӗк номинаципе ҫӗнтерӳҫӗсене палӑртрӑмӑр. Ӑста вулакансем нумай пулчӗҫ. Тӗлӗнмелле пултаруллӑ халӑх пирӗн! Ҫакӑн пек кирлӗ, лайӑх конкурс ирттернӗшӗн Наци библиотекин ӗҫченӗсене пысӑк тав!» — хыпарланӑ Ольга Туркай.

morgau.cap.ru сӑнӳкерчӗкӗ

Иртнӗ эрнере, ака уйӑхӗн 24-мӗшӗнче, Муркашри культура ҫуртӗнче «Муркаш» фольклор коллективӗн 25 ҫулхине уявланӑ. Коллектива Чӑваш Республикин культурӑн тава тивӗҫлӗ ӗҫченӗсем А.В. Аникин, Ф.Ф. Григорьева, С.А. Каликов ертсе пыраҫҫӗ.

Чӑваш халӑх юррине ламран лама парса хӑварассипе йыш пысӑк тӳпе хывать. Асӑннӑ ансамбльтен ача-пӑчан «Шӑнкӑрав» тата «Шӑпчӑк» ансамблӗсем йӗркеленсе кайнӑ.

Юбилейпа саламлама Йӗпреҫ районӗнчи «Ахах», Шупашкарти «Эткер», Мари Элти «Мырылтенӑ, кушталтенӑ» ансамбльсем пырса ҫитнӗ. Унсӑр пуҫне Муркаш тӑрӑхӗнчи «Тӑванлӑх», «Екрем», «Хавас» ансамбльсем те саламланӑ.

«Контактри» сӑн

Ӗнер Шупашкар округӗнчи М-7 ҫул ҫинче патрульпе пост службин инспекторӗсем ватӑ арҫынна асӑрханӑ. Вӑл шӑнса кӳтнӗ, хӑй ӑҫтине ӑнланман. 88 ҫултискер аран калаҫнӑ.

Юрать-ха, ун ҫумӗнче паспорт пулнӑ. Ҫапла вӑл ӑҫта пурӑннине пӗлнӗ. Полици капитанӗ Артем Петров тата Руслан Пыркин лейтенант ватӑскере машинӑна лартса вӗри чей ӗҫтернӗ. Калаҫнӑ май вӗсем ҫакна пӗлнӗ: старик масар ҫине арӑмӗн вилтӑпри ҫине кайнӑ. Анчах тӗттӗмленнӗ те вӑл ҫулран аташса кайнӑ.

Инспекторсем ватӑскере киле йӗркеллех илсе ҫитернӗ.

cap.ru сайтри сӑн

ЧР Элтеперне Олег Николаева Узбекистанра чӑваш юррипе кӗтсе илнӗ. Карши университетӗнчи студентсем аякри хӑнасем валли чӑваш юррине шӑрантарнӑ.

Тӗлпулура ҫыхӑнӑва ҫирӗплетесси пирки калаҫнӑ. Уйрӑмах вӗренӗве тимлӗх уйӑрнӑ. Палӑртмалла: хальхи вӑхӑтра Чӑваш Енре Узбекистанри 150 яхӑн студент ӑс пухать. Малашне ҫамрӑксемпе улшӑнма, квотӑсем хатӗрлеме палӑртнӑ.

Чӑваш Ен делегацийӗ ҫӗвӗ фабрикине, газохими заводне тата «Uzbekistan GTL» завода ҫитсе курнӑ. Икӗ ен пирӗн технологисем вӗсен производствине мӗнле ҫӗнетме пултарнине сӳтсе явнӑ.

Паян республикӑн кашни округӗнчех тенӗ пек юр ҫунӑ. Сивӗ ҫанталӑк вӑраха тӑсӑлӗ-и? Синоптиксем мӗн каланине тишкерер.

Кӗҫӗр сивӗ пулӗ-ха, теромометр 3 таран градус сивӗ кӑтартӗ. Ыран вара майӗпен ӑшӑтма тытӑнӗ, вырӑнӑн-вырӑнӑн ҫумӑр ҫӑвӗ. Ытларикун каҫхине тата юнкун ҫумӑрлӑ тата ҫиллӗ ҫанталӑк пулӗ. Ҫил ҫу уйӑхӗн 1-мӗшӗнче кӑна лӑпланӗ. Анчах ун чухне каллех шӑнтма тата юр ҫума пултарать. Кӑнтӑрла ҫанталӑк лайӑхланӗ.

Ҫу уйӑхӗн 2-мӗшӗ ҫумӑрлӑ пулӗ, термометр 7-12 градус кӑна ӑшӑ кӑтартӗ. Ҫу уйӑхӗн 3-4-мӗшӗсенче тинех ӑшӑтӗ, термометр 14-19 градус кӑтартӗ. Шӑматкун хӗвел тухӗ, вырсарникун хушӑран ҫумӑр ҫӑвӗ.

Малтанлӑха пӗлтернӗ тӑрӑх, ҫу уйӑхӗн 8-мӗшӗнчен ӑшӑ та хӗвеллӗ ҫанталӑк хуҫаланма тытӑнӗ.

alikov.cap.ru сӑнӳкерчӗкӗ

Элӗкри литературӑпа таврапӗлӳлӗх музейӗнче Иван Яковлев ҫуралнӑ куна халалласа «Янра, чӑваш чӗлхи!» мероприяти ирттернӗ.

Мероприятие Элӗкри ИЯ. Яковлев ячӗлӗ вӑтам шкулта вӗренекенсем, Элӗкри ача-пӑча ӳнер шкулӗн баянисчӗ Владимир Терентьев тата вырӑнти тӗрӗҫӗсем хутшӑннӑ.

Пухӑннисене музей директорӗ Ольга Алексеева саламланӑ, Иван Яковлевӑн пуян эткерлӗхне тата чӗлхине пысӑка хурса хакламаллине палӑртса хӑварнӑ. Музей специалисчӗ Светлана Железнова чӑваш тӗррипе паллаштарнӑ. Ачасем музейра ӗслекен «Чӑваш тӗрри – чи илемли» куравпа паллашма пултарнӑ.

Унтан ачасем чӑвашсен тӗрлӗ вӑййине вылянӑ тата «Линька- линька» ташланӑ.

Кораккассинчи Людмила Андреева ӑста хӑйӗн сӑввине вуласа панӑ.

yaltch.cap.ru сӑнӳкерчӗкӗ

Раҫҫей Федерацийӗн Геройӗ Н.А.Петров ячӗллӗ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне халалласа уяв иртнӗ. Кун пирки асӑннӑ тӑрӑхӑн сайтӗнче хыпарланӑ.

Уяв шкул директорӗн Л.Н.Васильеван саламӗпе пуҫланнӑ. Вӑл тӑван чӗлхене юратма, хамӑр чӑваш пулнипе мӑнаҫланма чӗнсе каланӑ.

Уявра тӗрлӗ юрӑ-кӗвӗ янӑранӑ. 1 «б» класра вӗренекен Екатерина Чернова юрлакан юрра куракансем уйрӑмах тӑвӑллӑн алӑ ҫупса йышӑннӑ, хӗрсен илемлӗ ташши те куракансене килӗшнӗ.

Кӑҫал Аслӑ Ҫӗнтерӗве тунӑранпа 80 ҫул ҫитнӗ май вӗренекенсем хӑйсем ҫырнӑ сӑввисене вуланӑ.

chwom.rchuv.ru сайтран илнӗ сӑнӳкерчӗк

Чӑваш чӗлхи кунӗнче Муркашра «Пӗчӗк Нарспи» конкурс иртнӗ. Ӑна унта ҫулсерен йӗркелеҫҫӗ.

Хальхинче конкурса 4-10 ҫулсенчи 29 хӗрача хутшӑннӑ. Вӗсем хӑйсен тӗрлӗ енлӗ пултарулӑхне кӑтартса панӑ. Вӗсене районти культура тата архив ӗҫӗн пайӗн пуҫлӑхӗ Л.А. Рыжкова саламланӑ.

«Пӗчӗк Нарспи»-2025 ята «Солнышко» (чӑв. Пӗчӗк хӗвел) 3-мӗш ача пахчинчи Анна Кожевникова ҫӗнсе илнӗ.

yaltch.cap.ru сӑнӳкерчӗкӗ

Г.Н.Волков ячӗллӗ Аслӑ Елчӗкри пӗтӗмӗшле пӗлӳ паракан вӑтам шкулта Чӑваш чӗлхи кунне тивӗҫлипе уявланӑ. Мероприятие Надежда Хушкина вӗрентекен уҫнӑ. Вӑл чӑваш чӗлхи пуян та илемлӗ, янӑравлӑ та ҫепӗҫ, паха та асамлӑ пулнине; Иван Яковлев ячӗ чӑваш халӑхӗшӗн яланах хисеплӗ те чыслине, унӑн чапӗ халӑх хушшинче паянхи кун та иксӗлменнине мӑнаҫланса палӑртса хӑварнӑ.

Елчӗк районӗн сайтӗнче хыпарлана тӑрӑх, ачасем чӑваш писателӗсем ҫырнӑ сӑвӑсене илемлӗ каласа итлекенсене савӑнтарнӑ. Ҫӗнтерӗве 80 ҫул ҫитнине халалласа Петӗр Хусанкайӑн «Мунча шӑрши» сӑвви тӑрӑх лартнӑ инсценировка лартнӑ.