Чӑваш Енӗн ШӖМӗн сӑнӳкерчӗкӗ

Шӑмӑршӑ районӗнчи пӗр ялта пурӑнакан 55 ҫулти лесник вӑрман каснӑ.

Полицие трактор рулӗ умӗнче пулнӑ ҫынна тата трактор ҫинчи пассажирсене илсе пынӑ. Вӗсен йывӑҫ касма документсем пулман.

Арҫын 17 чӗрӗ тата хӑрнӑ 1 йывӑҫа касма хушнӑ. Ҫапла вӑл ҫутҫанталӑка ҫур миллиона яхӑн тенкӗлӗх тӑкак кӳнӗ.

Халӗ вӑрманҫӑ тӗлӗшпе пуҫиле ӗҫ пуҫарнӑ. Йывӑҫ каснӑшӑн унччен ӑна икӗ хутчен явап тыттарнӑ, анчах ӑна пӗрех вӑрманта ӗҫлеме чарман.

Муркаш районӗнчи прокуратура ачасем валли чарӑну тума хистенӗ.

Калайкассинчи вӑтам шкул умӗнче автобус кӗтсе тӑма ятарлӑ вырӑн пулман. Юр-ҫумӑр ҫунӑ чухне автобус кӗтсе тӑма пушшех те япӑх.

Прокуратура шкул умӗнче чарӑну туса пама хистенине кура халӗ район администрацийӗ ӑна вырнаҫтарнӑ.

Чӑваш Республикин ВКри хӑйӗн пабликӗнче вырнаҫтарнӑ сӑнӳкерчӗк

Паян, ҫурла уйӑхӗн 26-мӗшӗнче, паллӑ ентешӗмӗр, спортсмен, Олимпиада Иванова, 55 ҫул тултарнӑ.

Олимпиада Владимировна 1970 ҫулхи ҫурла уйӑхӗн 26-мӗшӗнче Ҫӗрпӳ районӗнчи Мӑнҫут ялӗнче ҫуралнӑ. Шупашкарта Ардалион Игнатьев ячӗллӗ спорт шкулӗнче, И.Я. Яковлев ячӗллӗ Чӑваш патшалӑх педагогика институтӗнче физвоспитани факультетӗнче вӗреннӗ.

Спортри утӑма вӑл Шупашкарта уҫӑлнӑ спорт профилӗллӗ шкул-интерната (халӗ вӑл вӗренӳ заведенийӗ Шупашкарти Олимп резервӗллӗ училище шутланать) вӗренме кӗнинчен пуҫланӑ. Йӗлтӗрпе чупма юратнӑ пулин те ҫӑмӑл атлетика секцине лекнӗ, унта ӑна хӑвӑрт утассине хӑнӑхма, ҫав енӗпе тӑрӑшма сӗннӗ. Икӗ эрне тренировка ирттернӗ хыҫҫӑнах вӑл республика чемпионки пулса тӑнӑ. Унтан Раҫҫейри ӑмӑртусенче ҫӗнтернӗ. Кайран XXVIII XXVIII Ҫуллахи олимп вӑййинче кӗмӗл призер пулса танӑ, унсӑр пуҫне вӑл — тӗнче чемпионики тата рекордсменки.

dzen.ru сайтри сӑн

Чӑваш Енре пилотсӑр вӗҫекен аппарат тапӑннине сӑн тата видео ӳкерме чарӗҫ. Ку йышӑнӑва оперштаб ларӑвӗнче тунӑ.

Инкеклӗ лару-тӑру министерстви ӑнлантарнӑ тӑрӑх, беспилотник тапӑннине, ӑна персе антарнине, вӑл ӳксен мӗн пулнине сӑн тата видео ӳкерме, ҫакна тӗнчен тетелне кӑларма юрамасть. Ҫакна информаци тӑшман патне ан ҫиттӗр тесе тӑваҫҫӗ.

Йӗркене пӑсакансене административлӑ майпа явап тыттарӗҫ. Чи пысӑк штраф виҫи 300 пин тенкӗпе танлашать.

forum.na-svyazi.ru сӑнӳкерчӗкӗ

Пӑрачкавра та Вилӗмсӗр ҫулӑм ҫунма пуҫланӑ. Ӑна Тӑван ҫӗршывӑн аслӑ вӑҫинче пуҫ хунисене асра тытса лартнӑ мемориалта авӑн уйӑхӗн 23-мӗшӗнче чӗртнӗ.

Вӑрҫа ҫав тӑрӑхри 8 519 ҫын тухса кайнӑ, 5 230-шӗ каялла таврӑнайман.

Мемориала 1967 ҫултах уҫнӑ. Ӑна газификацилеме халӗ 83 метр тӑршшӗ газ пӑрӑхӗ хунӑ.

Вилӗмсӗр ҫулӑм пирӗн республикӑра ҫапла вара 13 ҫӗрте ҫунать: Шупашкарти «Ҫӗнтерӳ» мемориал паркӗнче тата 1-мӗш масар ҫинчи тӑванла вил тӑпри ҫинче, Канашра, Кӳкеҫре, Ҫӗрпӳре, Патӑрьелте, Красноармейскинче, Шӑмӑршӑра, Етӗрнере, Куславкка районӗнче уҫнӑ Сӑр чиккине чавнисене асра тытса уҫна мемориалта, Шупашкар районӗнчи Урай Макаҫра.

Чӑваш патшалӑх академи драма театрӗн сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗ черетлӗ сезона ҫитес уйӑхра, авӑнӑн 11-мӗшӗнче, уҫӗ. Ун чухне Ф. Павлов пьеси тӑрӑх лартнӑ «Ялта» спектакле кӑтартӗҫ.

Театрти ҫӗнӗ хыпарсемпе учреждени директорӗ Елена Николаева «Время СВОих» программӑна хутшӑнакан Андрей Удиковпа тӗл пулсан паллаштарнӑ.

«Чеб.ру» сайтри сӑн

ЧР Цифра министерстви Чӑваш наци телерадиокомпанийӗ валли директор шырать. Ҫавна май конкурс ирттерессине пӗлтернӗ.

Документсене аванӑн 11-мӗшӗччен йышӑнаҫҫӗ. Унта хутшӑнаканӑн аслӑ пӗлӳ пулмалла, кунсӑр пуҫне ертӳҫӗ доожноҫӗнче 5 ҫултан сахал мар ӗҫлемелле.

Телерадиокомпани ҫулталӑк ытла ӗнтӗ директорсӑр. Унччен ку должноҫре Алексей Гурьянов ӗҫленӗ. Пӗлтӗр ҫу уйӑхӗнче вӑл ЧР цифра министрӗн ҫумӗ пулса тӑнӑ.

Дина Александрова архивӗнчи сӑн

Чӑваш Ен спортсменки Дина Александрова марафонра пурне те парӑнтарса финиша пӗрремӗш ҫитнӗ.

Марафон Исландин тӗп хулинче Рекъявикире иртнӗ. 33 ҫулти Дина 42,2 ҫухрӑма 2 сехет те 35 минут та 51 ҫеккунт кӑтартупа вӗҫленӗ. Ку — Рекъявикири марафон трасси ҫинчи ҫӗнӗ рекорд.

Палӑртса хӑварар: Дина Александрова Шупашкарта ҫуралса ӳснӗ, вӑл Олимп резервӗсен 8-мӗш спорт шкулӗнче ӑсталӑхне туптанӑ, унтан Курск хулинче тренировкӑсем тума пуҫланӑ та 2 ҫухрӑмлӑ дистанцире Раҫҫей чемпионки пулса тӑнӑ.

«Контактри» сӑн

Улатӑр хулинче ҫуралса ӳснӗ Артемий Репкин подполковник параатлетика енӗпе иртнӗ Пӗтӗм тӗнчери ҫар спорчӗн канашӗн чемпионатӗнче палӑрнӑ. Тупӑшу Эквадорта пулнӑ. Пирӗн ентеш диск ывӑтассинче ӑмӑртнӑ, вӑл спортӑн ку тӗсӗнче кӗмӗл медаль ҫӗнсе илнӗ.

Сӑмах май, Артемий Репкин ятарлӑ ҫар операцине хутшӑннӑ, унта йывӑр аманнӑ. Сипленсе вӑй пухнӑ хыҫҫӑн вӑл спортзала занятитисене ҫӳреме пуҫланӑ. Хальхи вӑхӑтра вӑл Чӑваш Енри ҫар комиссарӗн пулӑшуҫинче ӗҫлет.

stihi.ru сайтри сӑн

Синоптиксем ҫуллан юлашки эрни мӗнле пулассине пӗлтернӗ. Ҫанталӑк ӑшӑ тӑрӗ. Паян кӑнтӑрла хыҫҫӑн тата каҫхине каллех ҫумӑр ҫӑвӗ.

Ытларикун уяртӗ. Юнкун вара каллех ҫумӑрлӑ ҫанталӑк таврӑнӗ. Шӑматкун та, ахӑртнех, ҫумӑр ҫӑвӗ. Вырсарникун ӑшӑ та хӗвеллӗ ҫанталӑк тӑрӗ. Кӑнтӑрти районсенче термометр 30 градус патнеллех кӑтартӗ.

Ку эрнере вӑтамран 17-22 градус ӑшӑ пулӗ. Анчах анӑҫ енчен вӗрекен ҫил вӑйланнине пула кӗрхи пек тумланма тивӗ.

Малтанлӑха пӗлтернӗ тӑрӑх, авӑн уйӑхӗн пуҫламӑшӗ те лайӑх ҫанталӑкпа савӑнтарма пултарӗ.