«За рулем» порталти сӑн

Елчӗк округӗнче пурӑнакансем Чӑваш Ен прокурорӗ Эдуард Гиматов патне йышӑнӑва кайсан тин хӑйсене тахҫантанпах канӑҫ паман ыйтӑва уҫӑмлатнӑ. Кун хыҫҫӑн «Елчӗк – Курнавӑш» ҫула юсама тытӑннӑ.

Тӗрӗслев ирттерсен ҫул ҫинче чӑнах та шӑтӑк-путӑк нумай пулнине палӑртнӑ. Кун хыҫҫӑн прокуратура вырӑнти администраци тӗлӗшпе представлени ҫырнӑ. Ҫапла пӑр вырӑнтан тапраннӑ: ҫула саплама тытӑннӑ. Ку ӗҫе «Эльбрус» тулли мар яваплӑ общество пурнӑҫланӑ.

Подрядчик ӗҫе палӑртнӑ вӑхӑтран маларах вӗҫленӗ. Анчах тӗрӗсленӗ те – асфальт пӗр вырӑнта 5 см мар, 4,8 см кӑна пулнӑ. Прокуратура ыйтнипе ҫулӑн ҫак пайне йышӑнассине вӑхӑтлӑха чарса лартнӑ.

cap.ru сайтри сӑн

Чӑваш Енре пурӑнакансем этнографи диктантне ҫырма чӗнеҫҫӗ. Акци чӳк уйӑхӗн 1-8-мӗшӗсенче иртӗ.

Диктанта икӗ мелпе ҫырма пулать: ятарлӑ лапама ҫите е онлайн мелпе. Иккӗмӗш варианта суйласан национальнаяполитика.рф сайта кӗмелле.

Шупашкарта диктанта Чӑваш наци музейӗнче (чӳкӗн 1-мӗшӗнче 11 сехетре), Туслӑх ҫуртӗнче (чӳкӗн 5-мӗшӗнче 11 сехетре) ҫыртарӗҫ. Онлайн мелпе диктант ҫыракансене сертификата тӳрех параҫҫӗ. Пӗтӗмлетӗве вара раштавӑн 12-мӗшӗнче тӑвӗҫ.

Палӑртса хӑвармалла: пӗлтӗр акцие Чӑваш Енре пурӑнакан 26 649 ҫын хутшӑннӑ.

culture.cap.ru сӑнӳкерчӗкӗ

Чӑваш Енри «Янтал» ушкӑн Пензӑран лауреат ячӗпе таврӑннӑ. Асӑннӑ хулара «Песни родной стороны им. А.Г. Тархова» (чӑв. А.Г. Тархов ячӗллӗ тӑван тӑрӑх юррисем) регионсем хушшинчи фестиваль-конкурс иртнӗ.

Унта 800 ытла хӑнапа 100 ытла коллектив пуҫтарӑннӑ. Чӑваш Ен чысне унта Шупашкарти музыка училищин «Янтал» фольклор ушкӑнӗ хутшӑннӑ. Ушкӑна Чӑваш Енӗн тава тивӗҫлӗ культура ӗҫченӗ Людмила Петухова Григорий Салюков хормейстер ертсе пырать. Коллектив 1 степеньлӗ лауреат ятне тивӗҫнӗ. Никита Арсентьев вара конкурс дипломанчӗ пулса тӑнӑ.

Яндекс сӑнӳкерчӗкӗ

Иркутскра хамӑр ҫӗршывра туса кӑларнӑ пассажирсене турттармалли иккӗмӗш самолёт пуҫласа сывлӑша ҫӗкленнӗ.

«МС-21» лайнер бортӗнче хамӑр ҫӗршывра туса кӑларнӑ тытӑмсене тата «ПД-14» двигательсене тӗрӗсленӗ. Кун пирки «Ростех» патшалӑх корпорацийӗн пресс-служби пӗлтернӗ.

Самолёт 1 сехете яхӑн вӗҫнӗ. Хамӑр ҫӗршывра туса кӑларнӑ тытӑмсем ҫав вӑхӑтра йӗркеллӗ ӗҫленӗ.

chuvbook.ru сӑнӳкерчӗкӗ

Чӑваш кӗнеке издательствинче Тимӗр Алюш Валин «Нарпике ӑраскалӗ» романӗ 1 пин экземпляр тиражпа пичетленсе тухнӑ. Кӗнекери ӗҫсем 1900–2023 ҫулсенче пулса иртеҫҫӗ.

Издательствӑра пӗлтернӗ тӑрӑх, Тимӗр Алюш Вали — Валентина Кириллова. 2023 ҫулта Чӑваш кӗнеке издательствинче унӑн «Сас пачӗ ывӑлӑм» кӑларӑмӗ кун ҫути курнӑ.

Валентина Алексеевна 1963 ҫулхи авӑн уйӑхӗн 23-мӗшӗнче Комсомольски районӗнчи Нӗркеҫ ялӗнче ҫуралнӑ. 1982 ҫулта тӑван районӗнчи хаҫатра ӗҫлеме пуҫланӑ. И.Н. Ульянов ячӗллӗ Чӑваш патшалӑх университечӗн историпе филологи факультетӗнче вӗреннӗ. Кайран Елчӗк район хаҫатӗнче тивӗҫлӗ канӑва тухичченех тӑрӑшнӑ.

Альбина Юрату халӑх тетелӗнчи страницинчен, news.myseldon.com тата gov.cap.ru сайтран илнӗ сӑнӳкерчӗксемпе усӑ курса хатӗрленӗ Таисия Ташней коллаж

Ачасемпе ҫамрӑксем валли чӑвашла ҫыракан авторсене тупса палӑртма тата хавхалантарма пирӗн республикӑра ҫулсерен конкурс ирттереҫҫӗ. Халӗ кӑҫалхине пӗтӗмлетнӗ.

Шкул ҫулне ҫитмен тата кӗҫӗн классенче вӗренекен ачасем валли ҫырнӑ ӗҫсенчен Анна Тумаланован «Пӗчӗк Кулян пысӑк тӗллевӗсем» алҫырӑвне тӳресем пысӑк хак панӑ май ку ӗҫшӗн автора 50 пин тенкӗ преми тивӗҫӗ.

Вӑтам шкул ҫулӗнчи ачасем валли шӑрҫаланӑ «Ылтӑн ҫулҫӑ» ӗҫпе Сергей Павлов палӑрнӑ. Ӑна 75 пин тенкӗ преми парӗҫ. Аслӑ классенче вӗренекен ачасем валли хайланӑ ӗҫсенчен Ольга Фёдорован «Таврӑнсамччӗ каялла» алҫырӑвне ҫитекенни пулман. Ӑна та 75 пин тенкӗпе хавхалантарӗҫ.

Ҫӗнтерӳҫӗ-алҫырусене ҫитес ҫул кӗнекен пичетлесе кӑларӗҫ.

Ку эрне вӑрӑм пулӗ: 6 кун ӗҫлемелле. Ку Халӑх пӗрлӗхӗн кунне паллӑ тунипе ҫыхӑннӑ. Ҫакӑ эрнере 5 кун ӗҫлекенсене пырса тивет. Вӗсен шӑматкун та, чӳк уйӑхӗн 1-мӗшӗнче, ӗҫе тухмалла. Уяв умӗнхи кун пулӗ вӑл, ҫавна май ӗҫ вӑхӑчӗ 1 сехет кӗскелӗ.

Кун хыҫҫӑн 3 кун кантарӗҫ: вырсарникун, тунтикун тата юнкун (чӳкӗн 2-4-мӗшӗсенче).

petkrep.ru сайтри сӑн

Ҫӗрпӳ округӗнчи хӗрарӑм сывлӑхӗ хавшасан ӑрӑмҫӑ патне кайнӑ та шар курнӑ, аяк пӗрчине хуҫнӑ. Кайран вӑл ҫав ӑрӑмҫӑран суд урлӑ 100 пин тенкӗ шыраса илнӗ.

Ку 2024 ҫулхи ҫурла уйӑхӗнче пулнӑ. Сеансра ӑрӑмҫӑ унӑн ҫурӑмӗ тӑрӑх утма, аякран аяк ҫине ҫавӑрма тытӑннӑ. Хӗрарӑм темӗн ыратнине туйсан чарӑнма ыйтнӑ. Унтан сеансшӑн укҫа тӳленӗ те тухса кайнӑ.

Каярахпа пульницӑра вӑл аяк пӗрчи хуҫӑлнине пӗлнӗ. Судра ӑрӑмҫӑ айӑпне йышӑнман. Ҫапах суд хӗрарӑм енче пулнӑ.

«Контактри» сӑн

Вӑрнар округӗнчи Кивҫурт Енӗш ялне белоруссем килнӗ. Ахальтен мар. Ку ялта Совет Союзӗн Паттӑрӗ Степан Илларионов ҫуралса ӳснӗ. Ӑна Беларуҫри Бешенкович районӗнчи Галыни ялӗнче тӑванлӑх масарӗ ҫинче пытарнӑ. Ҫакӑ ҫыхӑнтарать икӗ яла.

Белоруссем Паттӑрӑн ятне асра татса Астӑвӑм скверӗнче чечек хунӑ, ҫавӑн пекех Степан Илларионовичӑн музей-ҫуртне кӗрсе курнӑ.

Чӑваш кӗнеке издательствин сӑнӳкерчӗкӗ

Чӑваш кӗнеке издательстви виҫӗ ҫул ӗнтӗ чӑвашла роман ҫыракансен конкурсне ирттерет. Унта суйласа илнӗ чи лайӑх ӗҫе кайран кун ҫути кӑтартаҫҫӗ.

Пӗлтӗрхи конкурсра Ангелина Павловскаян «Ҫутӑ ӗмӗт ҫунатлӑ» алҫырӑвӗ мала тухнӑ. Халӗ ӑна Чӑваш кӗнеке издательстви кун ҫути кӑтартнӑ.

Ангелина Павловская 1939 ҫулхи кӑрлач уйӑхӗн 31-мӗшӗнче Вӑрмар районӗнчи Пӗчӗк Енкасси ялӗнче ҫуралнӑ. Ҫӗрпӳри библиотекарьсем хатӗрлекен техникумра, И. Я. Яковлев ячӗллӗ Чӑваш патшалӑх педагогика институчӗн филологи факультетӗнче вӗреннӗ. Куславкка районӗнчи Карачри вӑтам шкулта вырӑс чӗлхи учителӗ, Куславккара комсомол райкомӗнче 1-мӗш секретарьте, унтан Шупашкарти Мускав районӗнчи ҫутӗҫ пайӗн инспекторӗнче ӗҫленӗ, Шупашкарти 45-мӗш шкулта, 1-мӗш гимназире ачасене вырӑс чӗлхипе литературине вӗрентнӗ.

Малтанхи тӗрленчӗкӗсем «Пионер сасси» хаҫатра, «Хатӗр пул» журналта пичетленнӗ, «Ярӑм-ярӑм явӑнать тӗтре» повеҫӗ 1983 ҫулта «Ялав» журналта кун ҫути курнӑ.