«Контактри» сӑн

Красноармейски округӗнчи Григорьевсем пӗрлешнӗренпе 70 ҫул ҫул ҫитнӗ. Ҫемье ҫак пулӑма паллӑ тунӑ.

Вӗсем мӗн ачаранах пӗрле ӳснӗ: пӗр класра вӗреннӗ, унтан иккӗшӗ те педагогика институтӗнче пӗлӳ илнӗ. Мира Никандровна шкулта физикӑпа математика предмечӗсене вӗрентнӗ, «Халӑх вӗрентӗвӗн отличникӗ» ята илнӗ. Валериян Григорьевич вара вырӑс чӗлхин учителӗ пулнӑ, кайран – парти ӗҫченӗ.

forum.na-svyazi.ru сӑнӳкерчӗкӗ

Шупашкарти ҫамрӑк стоматолог 3 миллиона яхӑн тенкӗсӗр тӑрса юлнӑ.

25-ри хӗр-стоматолог патне «Раҫҫӗй Почтинчен» текен ҫын шӑнкӑравланӑ. Вӑл ӑна йӑнӑшпа налук уведомленийӗ ярса панине пӗлтернӗ, патшалӑх пулӑшӑвӗсен порталӗнче мессенджер урлӑ регистрациленсе йӑнӑша тӳрлетме ыйтнӑ.

Стоматолог ултавҫӑсем ҫынсене шӑнман пӑрпа лартса ямалли ҫӗр тӗрлӗ меслет пӗлнине тӗшмӗртнӗ пулин те хӑйӗн патне шӑнкӑравлакан каланине итленӗ.

Кӗҫех ун патне патшалӑх пулӑшӑвӗсен порталне Украинӑри номерпе кӗни пирки хыпрлакан ҫыру электрон почтӑпа ҫитсе выртнӑ. Пӑлханса ӳкнӗ хӗрарӑм электрон ҫырура кӑтартнӑ «техслужба» номерӗпе шӑнкӑравланӑ та ӑна кредит илсе укҫана шанчӑклӑ счет ҫине куҫарса яма ӳкӗте кӗртнӗ. Пӗр кунта мар, темиҫе куна тӑсӑлнӑ ҫак пӑтӑрмах.

Стоматолог ҫапла майпа кредит илнӗ укҫана та (ӑна вӑл автомобиль салука хывса илнӗ), хӑй пухнине те, пурӗ 2,9 миллион тенке ултавҫӑсене куҫарса панӑ.

never.pnzreg.ru сайтран илнӗ сӑнӳкерчӗк

Пенза облаҫӗнчи Неверкино районӗнчи Бикмурзино ялӗнче чӑваш таврапӗлӳҫисен слечӗ иртнӗ. Ӑна Зинаида Чайко, Олег Жемчугов тата ял ҫыннисем тӑрӑшнипе йӗркеленӗ. Кун пирки «Хыпар» хаҫат пӗлтернӗ.

Слета Тольятти, Чӗмпӗр тата Шупашкар хулисенчи таврапӗлӳҫӗсем пырса ҫитнӗ. Вӗсене вырӑнти хастар Михаил Щербаков «Илем» туризм сукмакӗпе паллаштарнӑ.

«Слета хутшӑннисене чӑваш-апат-ҫимӗҫӗпе сӑйланӑ. Вӗсем салма яшки, ҫичӗ тӗрлӗ кӗрперен пӗҫернӗ пӑтӑ, хуплу, чӑкӑт, килте вӗретнӗ сӑрана тутанса пӑхнӑ», — тесе ҫырнӑ хӑйӗн хыпарӗнче Валентина Петрова.

Людмила Михуткина ветерансен хушшинче иртнӗ ӑмӑртуран виҫӗ медальпе таврӑннӑ.

Хӗрлӗ Чутай округӗнчи спортсменка Беларуҫ Республикинче ҫӑмӑл атлетика енӗпе иртнӗ чемпионатра тупӑшнӑ.

Вӑл 75-79 ҫулсенчи хӗрарӑмсен йышӗнче ӑмӑртнӑ.

Пирӗҫ ентеш пьедесталӑн чи ҫӳлти картлашки ҫине виҫӗ хутчен тӑнӑ. Вӑл 100 метр чупса, сӑнӑ ывӑтса тата 5 пин метра хӑвӑрт утса ҫӗнтернӗ.

culture.cap.ru сӑнӳкерчӗкӗ

Нумаях пулмасть Шупашкарти ӳнер музейӗнче унтан кӑҫал вӗренсе тухнисене чысланӑ. Пурӗ 59 ҫамрӑк дизайнерпа художник дипломне илнӗ.

Дипломлӑ специалистсене саламлама республикӑн культура министрӗн ҫумӗ Татьяна Казакова пырса ҫитнӗ. Пиллӗкпе ҫеҫ вӗреннисене вӑл дипломсемпе хавхалантарнӑ.

Училище директорӗ Владимир Ануфриев саламлан, ӳнер училищине ан манса кайӑр, килсех ҫӳрӗр тесе чӗнсе каланӑ май такӑр ҫул суннӑ.

culture.cap.ru сӑнӳкерчӗкӗ

Шупашкарти «Радуга» (чӑв. Асамат кӗперӗ) культурӑпа курав центрӗнче Людмила Лоскутова уйрӑм ҫын коллекцийӗнчи картинӑсен «Вернисаж души» (чӑв. Чун вернисажӗ) куравӗ уҫӑлнӑ. 

Куракансене унта Чӑваш Енри паллӑ ӳнер ӑстисен живопись тата графика ӗҫӗсемпе, пурӗ 80 картинӑпа, паллаштараҫҫӗ. Унта Николай Карачарсков, Николай Овчинников, Виктор Немцев, Анатолий Рыбкин, Раиса Терюкалова, Нина Алимасова, Станислав Воронов, Анатолий Силов тата ытти художник, пурӗ 33 ҫыннӑн, ӗҫӗсем пур.

Тӑван тӑрӑхӗн ытарайми илемӗпе хавхаланнӑ Людмила Лоскутова ҫав картинӑсене 40 ҫул ытла пухса пынӑ.

Вера Иванова сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта Марина Назарова ҫемье психологӗпе час-часах тӗлпулусем йӗркелеҫҫӗ. Вӑл унта тӑрӑшакан социаллӑ ӗҫченсемпе те, специалистсемпе те курса калаҫнӑ. Паян вара вал учреждени ҫумӗнчи уйлӑхра канакан ачасемпе тӗлпулу ирттернӗ.

Марина Геннадьевна шухӑшланӑ тӑрӑх, пурнӑҫра пулса иртекен пӗр пулӑм та ытахальтен мар. Ҫынна кӳрениччен хамӑр утӑмӑра тишкермелле. Ҫынна тав тума е унран каҫару ыйтма пӗлни те калама ҫук пӗлтерӗшлӗ. Ачасем те унӑн сӑмахне чунтан итленӗ.

cap.ru сайтри сӑн

Ҫулталӑк пуҫланнӑранпа республикӑра ҫул-йӗр ҫинчи аварире 33 тискер чӗр чун вилнӗ. Ҫапла пӗлтерет ЧР Ҫут ҫанталӑк министерстви.

Ҫав йышра 19 пӑши, 13 хир качаки, пӗр хир сысни. Сунар инспекторӗсем ӑнлантарнӑ тӑрӑх, ҫулла тискер чӗр чунсем машина айне лекес хӑрушлӑх уйрӑмах пысӑкланать. Хальхи вӑхӑтра вӑрманта хӑйсем тӗллӗн пурӑнма хӑнӑхман ҫамрӑк пӑши нумай, вӗсем час-часах ҫул ҫине тухаҫҫӗ. Кунсӑр пуҫне чӗр чунсем шӑна-ӳпре тапӑннипе те вӑрмантан тухса тараҫҫӗ.

Водтелӗн ҫапса кайнӑ чӗр чуншӑн штраф тӳлеме тивӗ: пӑшишӗн — 80, хир качакишӗн — 40, хир сыснишӗн — 30, мулкачшӑн — 1 пин тенкӗ.

cap.ru сайтри сӑн. Сӑнӳкерчӗкре — Эльвира Платонова

Ҫемье тата юратупа шанчӑклӑх кунӗ умӗн республикӑри 50 ҫултан кая мар пӗрле пурӑнакан мӑшӑрсене чысласси йӑлара. Кӑҫал 7 мӑшӑра «Юратупа шанчӑклӑхшӑн» орденне парӗҫ.

Ҫак йышра — Красноармейски округӗнчи Геннадипе Галина Ивановсем тата Владимирпа Галина Филипповсем, Куславкка тӑрӑхӗнчи Евграфипе Людмила Ивановсем, Пӑрачкав округӗнчи Владимирпа Валентина Кулясовсем, Улатӑр округӗнчи Александрпа Лидия Маланьинсем, Елчӗк тӑрӑхӗнчи Петрпа Зоя Поповсем, Хӗрлӗ Чутай округӗнчи Геннадипе Нина Ухлиновсем.

Ҫавӑн пекех 5 ача ҫуратнӑ икӗ хӗрарӑма амӑшӗн мухтавӗн «Анне» паллине чыслӗҫ. Ӑна Хӗрлӗ Чутай округӗнчи Эльвира Платонова тата Куславкка тӑрӑхӗнчи Екатерина Шильгачева тивӗҫнӗ.

РФ Ӗслев министерстви пӗлтернӗ тарах, кӑҫал Ҫӗнӗ ҫул хыҫҫӑн 2 эрнене яхӑн канӑпӑр. Канмалли кунсем раштав уйӑхӗн 31-мӗшӗнчен пуҫласа карлачӑн 11-мӗшӗччен пулӗҫ. Ҫапла 12 кун ӗҫе тухмалла мар.

Ҫулталӑк тӑршшӗпе 3 куна тӑсӑлакан кану кунӗсем 5 хутчен пулӗҫ: кӑрлач уйӑхӗнче Тӑван ҫӗршыв хӳтӗлевҫин явӗнче, пуш уйӑхӗнче Пӗтӗм тӗнчери хӗрарӑмсен кунӗнче, ҫу уйӑхӗнче Ҫуркуннепе Ӗҫ тата Ҫӗнтерӳ кунӗсенче, ҫӗртме уйӑхӗнче Раҫҫей кунӗнче.

Ку – малтанлӑха палӑртнӑ календарь. Хальлӗхе ӑна ҫирӗплетмен.