Етӗрне хулинче икӗ машина ҫапӑнсан виҫӗ ҫын аманнӑ.

Инкек раштав уйӑхӗн 20-мӗшӗнче 16 сехет тӗлӗнче хулари Октябре 50 ҫул урамри 27-мӗш ҫурт тӗлӗнче пулса иртнӗ.

Малтанласа палӑртнӑ тӑрӑх, «Kia Sorento» автомобиль умри машинӑран иртсе каяс тенӗ чухне сулахаялла пӑрӑнакан «ВАЗ-2112» автомбиль ҫине пырса кӗнӗ. ВАЗӑн 44 ҫулти водителӗ тата икӗ хӗрарӑм-пассажир аманнӑ.

«Kia Sorento» машина рулӗ умӗнче 21 ҫулти хӗр пулнӑ.

forum.na-svyazi.ru сайтран илнӗ сӑнӳкерчӗк

Шупашкарти Денис Иванов AI-фильмсен Прагӑра иртнӗ фестивалӗнче ҫӗнтернӗ.

Алексей Радченко журналист пӗлтернӗ тӑрӑх, Денис Иванов калаҫтаракан, шӑв-шав ҫӗклекен реклама роликӗсем ӳкерме ӑста. Вӑл «Интеллектуальный фильм» студие ертсе пырать. Студи чылай ҫул актерсене явӑҫтарса кӑткӑс постановкӑсемлӗ кино ӳкернӗ. Кун валли профессилле оборудованипе усӑ курнӑ.

Нумаях пулмасть Денис Прагӑра иртнӗ пӗтӗм тӗнчери «CIAIFF» фестивальте ҫӗнтернӗ. Шупашкар арҫыннин «Generate» ӗҫӗ «Чи лайӑх камит» номинацире парнене тивӗҫнӗ. Ку фильм — кӗске метрлӑ нейрокино. Ӑна искусство интеллекчӗпе усӑ курса хатӗрленӗ.

38 ҫулти Денис Иванов — режиссёр, сценарист тата «Sifkino» видеостудие йӗркелекенӗ. ЧПУра экономика енӗпе аслӑ пӗлӳ илнӗ хыҫҫӑн пурнӑҫне пачах урӑх енӗпе, режиссурӑпа, ҫыхӑнтарнӑ. Видеопроизводствӑра 2016 ҫултанпа тӑрӑшать.

forum.na-svyazi.ru сайтран илнӗ сӑнӳкерчӗк

Ҫӗнӗ Шупашкарта вырнаҫнӑ «Химпром» предприятие ҫӗнӗ пуҫлӑх ертсе пыма тытӑннӑ.

2022 ҫулхи утӑ уйӑхӗнченпе унта директор пулса Хусанта ҫуралнӑ Дмитрий Колчин тӑрӑшнӑ. Анчах кӑҫалхи кӗркунне вӑл ӗҫрен пӑрахса кайнӑ. Халӗ Колчин Питӗрти «СВЕЗА-ЛЕС» йывӑҫ тирпейлекен компание ертсе пырать-мӗн.

«Группа Оргсинтез» тулли мар яваплӑ обществӑн директорсен канашӗ «Химпром» обществӑн управляющи директорӗ пулма Андрей Еремеева шаннӑ. Вӑл пуҫлӑх пуканне раштав уйӑхӗн 15-мӗшӗнче йышӑннӑ.

Андрей Еремеев Пермь тӑрӑхӗнчен. Химик профессиллӗскер ҫак енӗпе тӗрлӗ ҫӗрте ӗҫленӗ.

ҪҪХПИ тунӑ сӑн

Етӗрне округӗнче ҪҪХПИ экипажӗ ватӑ хӗрарӑма пулӑшнӑ: вӗсем ӑна каҫхине киле ҫитерсе янӑ.

ҪҪХПИ инспекторӗсем каҫхине ҫул хӗррипе пыракан кинемее курсан чарӑннӑ. Ватӑ хӗрарӑмӑн тумӗ ҫинче тӗттӗмре ҫутатакан хатӗр пулман, сӗм каҫхине вӑл утни лайӑх курӑнман та.

Инспекторсем кинемее тӗттӗмре ҫул хӗррипе пыни хӑрушӑ пулнине ӑнлантарнӑ, кайран вӗсем ӑна хӑйсен машинипе киле ҫитиех леҫсе янӑ.

Владимир Михайловӑн халах тетелӗчи страницинчен илнӗ сӑнӳкерчӗк

Красноармейски тӑрӑхӗнчи чӑваш хастарӗсем Нестер Янкас музейне уҫма ӗмӗтленеҫҫӗ. Анчах ку енӗпе хӑш-пӗр чӑрмав пур иккен.

Красноармейскинчи культура ҫуртӗнче нумаях пулмасть Нестер Янкас ячӗллӗ культурӑпа искусство тата литература пӗрлӗхӗн пӗтӗмлетӳллӗ ларӑвӗ иртнӗ. Унта пӗрлӗх ертӳҫи Иван Прокопьев 2025 ҫулта туса ирттернӗ ӗҫсем ҫинчен каласа кӑтартнӑ.

Янкасри ача сачӗ пулнӑ ҫурт (халӗ унта вулавӑш иккен) ҫумӗнче Нестер Янкас поэтӑн музейне йӗркелесси пирки сӑмах хускатнӑ май вӑл поэт ҫуралнӑ кун тӗлне (вӑл 1909 ҫулхи нарӑс уйӑхӗн 20-мӗшӗнче ҫуралнӑ) ҫак музее уҫма ӗмӗтленнине пӗлтернӗ. Ӑна тума материалсем ҫитменни чарса тӑрать-мӗн.

Кирилл Степанов архивӗнчи сӑн

Элӗк округӗнчи блогер тата ҫамрӑк фермер Кирилл Степанов каллех ҫитӗнӳ тунӑ. Хальхинче вӑл «Время молодых» проектра «АгроЛидер» номинацире 2-мӗш вырӑн йышӑннӑ.

Ку проекта Мускаври «Раҫҫей» наци центрӗнче пӗтӗмлетнӗ. Чыслава Раҫҫейри тӗрлӗ кӗтесри 1600 ытла ҫамрӑка чӗннӗ. Вӗсен йышӗнче ҫамрӑксен юхӑмӗсен лидерӗсем, усламҫӑсем, регионсенче ҫамрӑксен политикине аталантаракан специалистсем пулнӑ.

Палӑртса хӑварар: хальхи вӑхӑтра Кирилл Таиландра канать. Кун пирки вӑл халӑх тетелӗнчи страницинче пӗлтернӗ. «Икӗ ҫул пӗр канмасӑр ӗҫленӗ, акӑ халӗ пӗрремӗш отпуск. Таиланд. Аннеҫӗм, тавах, хуҫалӑх санӑн шанчӑклӑ аллунта», — тесе ҫырнӑ Кирилл.

Виталий Михайлов страницинчен илнӗ сӑнӳкерчӗк

Нестер Янкас ячӗллӗ пӗрлӗх 2025 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. ҫакӑн пек пӗлтернӗ пӗрлӗх ертӳҫин ҫумӗ Виталий Михайлов халӑх тетелӗнчи хӑйӗн страницинче.

Ӗҫсене 2026 ҫулхи нарӑс уйӑхӗн 20-мӗшӗччен йышӑнӗҫ. Сӑмах май каласан, Нестер Янкас поэт ҫуралнӑранпа 117 ҫул ҫитет. Уяв ячӗпе Красноармейски Культура ҫуртӗнче лауреатсен пысӑк концерчӗ пулӗ тата ҫӗнӗ лауреатсене чыслӗҫ.

«Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх та пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти пултарулӑх ӗҫӗсемпе савӑнтарнӑ ентешӗмӗрсем хутшӑнасса шанатпӑр эпир», — тесе хыпарланӑ эпир маларах Виталий Михайлов.

Виталий Михайлов страницинчен илнӗ сӑнӳкерчӗк

Янкас ячӗллӗ литературӑпа искусство тата культура пӗрлӗхӗн «Чӑвашлӑха аталантарнӑшӑн» медалӗпе кӑҫал

Нумай ҫул хушши муниципалитетӑн хӑй тытӑмлӑх органӗсенче тӳрӗ кӑмӑлпа тӑрӑшса ӗҫленӗшӗн Яманакри вулавӑш ӗҫченне Галина Ефимовӑна чыслама йышӑннӑ.

Медале ӑна «нумай ҫул хушши муниципалитетӑн хӑй тытӑмлӑх органӗсенче тӳрӗ кӑмӑлпа тӑрӑшса ӗҫленӗшӗн, округри культурӑпа искусствӑна аталантарас ӗҫре уйрӑмах палӑрнӑшӑн, тӑван тавралӑх туризмӗпе тараватлӑх сферине аталантарнӑшӑн, вырӑнти шыв арманӗн кун-ҫулне упраса туристсем валли пуян информациллӗ экскурсисем ирттернӗшӗн» парас тенӗ.

vk.com/club211725618 сӑнӳкерчӗкӗ

Ҫак эрнере Чӑваш Енри ҫыравҫӑсем ҫулталӑкри отчет пухӑвне пуҫтарӑннӑ. Унта Раҫҫейри писательсен союзӗн регионти уйрӑмӗн правленийӗн председателӗ Сергей Павлов отчет туса панӑ.

Сергей Лукиянович туса ирттернӗ ӗҫсем пирки каласа кӑтартнипе пӗрлех тивӗҫӗ те паха литература хайлавӗсем пирки чарӑнса тӑнӑ май лайӑх тӗслӗхсене асӑнса хӑварнӑ.

«Контактра» халӑх тетелӗнчи сӑн

Ҫак кунсенче Патӑрьел округӗнчи Ясная Поляна поселокне газ кӗртнӗ.

«Шупашкарти Газпром распределение» специалисчӗсем 6,8 ҫухрӑм тӑршшӗ газопровода хурса пӗтернӗ ӗнтӗ, ҫавӑн пекех 26 ҫурт патне газопровод-вводсем тунӑ. Чи малтан газ магистралӗпе Федоровсен ҫуртне ҫыхӑнтарнӑ.