cap.ru сайтри сӑн

Паян республикӑна беспилотниксем тапӑнсан 1 ҫын аманнӑ. Кун пирки ЧР Сывлӑх сыхлавӗн министерстви пӗлтерет.

Тухтӑрсем унӑн сывлӑхне вӑтам йывӑр пек хаклаҫҫӗ. Пациент пульницӑра, унӑн пурнӑҫӗшӗн хӑрушлӑх ҫук.

Аса илтерер: паян ирхине Шупашкара тата Шупашкар округӗнчи Явӑш ялне беспилотниксем вӗҫсе килнӗ.

Паян ирхине Шупашкара тата Шупашкар округӗнчи Явӑша беспилотниксем вӗҫсе килнӗ.

Чӑваш Ен Элтеперӗ Олег Николаев хӑйӗн телеграм-каналӗнче малтанах 2 беспилотник пирки хыпарланӑ. 7 сехет иртсен тӗп хулари ҫӗнӗ кӑнтӑр районне тепре вӗҫсе килнине пӗлтернӗ.

Малтанлӑха пӗлтернӗ тӑрӑх, аманнисем ҫук.

Вырӑнта ятарлӑ службӑсем ӗҫлеҫҫӗ. Хальлӗхе хӑрушлӑх режимне пӑрахӑҫламан, асӑрханмалла.

«Контактри» сӑн

Канаш округӗнчи Яманкассинче пурӑнакан Олег Сергеев кашни ҫулах кайӑксемпе чӗрчунсемшӗн тӑрӑшать — вӗсем валли сырӑшсем ӑсталать.

Вӑл сырӑшсем ӑсталама питӗ ӑста. Вӗсене хӑмаран касса кӑларса питӗ илемлӗ тӑвать. Нумаях пулмасть Олег Сергеев вӑрманти пакшасене тутлӑ апатпа сӑйлас тенӗ. Вӑл хӑй ӑсталанӑ ҫӗнӗ сырӑша мӑйӑр хунӑ та ӑна хырлӑхра ҫакса хӑварнӑ.

Сӑмах май, Олег Сергей общество ӗҫӗсенче те маттур. Вӑл — ял старости.

«Контактри» сӑн

Улатӑр округӗнче ҫак кунсенче ҫур ӗмӗр пӗрле пурӑнакан Анатолипе Валентина Батмановсене чысланӑ.

Вӗсен юратӑвӗ Мордва Республикинчи Урусово ялӗнче пуҫланнӑ. Анатолий Андреевич салтакран таврӑнсан ашшӗ-амӑшӗпе пӗрле Валентинӑна ҫураҫма кайнӑ.

Батмановсем икӗ хӗр ҫуратса ӳстернӗ. Халӗ виҫӗ мӑнукӗпе савӑнса пурӑнаҫҫӗ.

culture.cap.ru сӑнӳкерчӗкӗ

Чӑваш Енӗн Наци вулавӑшӗн «Кӗмӗл ӗмӗрӗ» галереийнче «Бичурин и мы: диалог времён» (чӑв. Бичурин тата эпир: ӗмӗрсен диалогӗ) курав уҫӑлнӑ.

Унта Чӑваш Енри, Питӗрти, Китайри художниксен ӗҫӗсем вырӑн тупнӑ. Вӗсем — Бичурин ячӗллӗ пӗтӗм тӗнчери пӗрремӗш пленэра хутшӑннӑ ӑстасем.

Иакинф архимандрит Раҫҫейре китаеведение пуҫарса яраканни. Вӑл Шупашкар районӗнчи Шӗнерпуҫ ялӗнче ҫуралнӑ.

forum.na-svyazi.ru сайтран илнӗ сӑнӳкерчӗк

Чӑваш Енре пурӑнакан кашни ҫын уйӑхсерен вӑтамран 30-шер пин тенкӗ ытларах укҫа тӑкаклать.

Потребительсен тӑкакӗ енӗпе пирӗн республика рейтингра 58-мӗш вырӑнта.

Раҫҫейре пурӑнакансен тӑкакӗ иртнӗ ҫул 12.2 процент ӳснӗ — кашни ҫын тӑкак вӑтамран 48,8 пин тенке ларать. Ҫав шутран 35 пин тенки тавар туянма каять. Тӗрлӗ пулӑшушӑн тӳлеме 11,4 пин тенкӗ тӑкаклаҫҫӗ, килте мар чух апатланма 2,4 пин тенкӗ тухса каять.

Инкеклӗ лару-тӑру министерстви тунӑ сӑн

Шупашкарти общежитире кӗҫӗр пушар алхаснӑ. Инкек Ильбеков урамӗнчи общежитире пулнӑ.

Ҫӗрле подъездра упранакан япаласем ҫунма тытӑннӑ. Тӗтӗм-сӗрӗм хӑвӑрт сарӑлнӑран ҫынсем урама тухса ӗлкӗреймен.

Вырӑна ҫӑлавҫӑсем ҫитнӗ. Вӗсем 10 ҫынна урама тухма пулӑшнӑ. Телее, никам та шар курман.

Пушара ҫур сехетрен сӳнтернӗ. Ҫулӑм 7 тӑваткал метр лаптӑк ҫинче алхаснӑ.

Прокуратура архивӗнчи сӑн

Республикӑра юр йывӑрӑшне пула каллех ҫурт тӑрри ишӗлнӗ. Хальхинче – Сӗнтӗрвӑрри хулинче.

Ку паян Курчатов урамӗнчи 7-мӗш ҫуртра пулнӑ. Унта пӗтӗмпе – 19 хваттер. Вӗсем сиенленмен.

Халӗ ҫурт тӑрринче юртан тасатаҫҫӗ, ун хыҫҫӑн юсав ӗҫӗсене пуҫӑнмалла – ҫапла пӗлтерет Чӑваш Ен прокуратури. Ку тӗслӗх тӗлӗшпе тӗрӗслев иртӗ – ҫурт тӑрринче камӑн тасатмалла пулнине тупса палӑртӗҫ, явап тыттарӗҫ.

Ӗнер каҫ енне асар-писер тӑман тапранса кайнине пула Шупашкартан самолётсем те вӗҫсе каяйман. Ҫак йӗркесен авторӗ пӗлнӗ тӑрӑх, Мускава каймалли икӗ рейс та ҫула тухайман.

Сургутран Шупашкара вӗҫсе килсе Минеральные Воды хулине 20 сехет те 50 минутра каяканнине темиҫе хутчен те урӑх вӑхӑта куҫарнӑ. Кайран вара паян ирхине 8 сехетре ҫула тухассине пӗлтернӗ.

Авиакомпани ҫынсене каҫхи апатпа (бургерпа) тивӗҫтернӗ, хулари хӑна ҫурчӗсене вырнаҫтарса тухнӑ. Унта трансфер йӗркеленӗ. Самолет паян кӑнтӑрла иртсен ҫеҫ ҫула тухнӑ.

«Контактри» сӑн

Вӑрнар округӗнчи Ярмушкара ҫуралса ӳснӗ спортсменка Надежда Лаврентьева Абу-Дабире иртнӗ «Open Masters Games» пӗтӗм тӗнчери ӑмӑртуран 5 медальпе таврӑннӑ.

Тупӑшу ҫӑмӑл атлетикӑпа ветерансен хушшинче иртнӗ. Пирӗн ентеш эстафетӑра — «ылтӑн», 10 пин метра чупса — «бронза», тӗрлӗ дистанцие хӑвӑрт утса виҫӗ «кӗмӗл» ҫӗнсе илнӗ.

Палӑртма кӑмӑллӑ: Надежда Алексеевна 3 пин ҫухрӑма хӑвӑрт утса хӑйӗн рекордне ҫӗнетнӗ: кӑтарту 20 ҫеккунт лайӑхланнӑ.