vk.com/chuv_kray сӑнӳкерчӗкӗ

Килес ҫултан пирӗн республикӑра тухтӑрсене искусство интеллекчӗ диагноз лартма пулашма тытӑнӗ.

Унӑн тӗп тӗллевӗ — рентген, МРТ, КТ ӳкерчӗкӗсене тишкересси. Искусство интеллекчӗ врач вырӑнне ӗҫлемӗ, анчах ӑна пулӑшӗ тесе пӗлтереҫҫӗ.

Ҫӗнӗлӗхе пурнӑҫа кӗртме хӑватлӑ серверсемпе видеокартӑсем туянӗҫ.

Искусство интеллекчӗ тухтӑрсен ӗҫне ҫӑмӑллатасса тата ҫын епле чирпе чирлине тӗрӗс палӑртасса шанаҫҫӗ.

vk.com/tsur21 сӑнӳкерчӗкӗ

Туссем, эсир налук тӳлеме манса кайман-и? Ӑна тӳлеме банк тӑрӑх ҫӳремелле мар. Налук тӳлекенӗн уйрӑм пӳлӗмӗ тата Патшалӑх пулӑшӑвӗн порталӗ урлӑ онлайн мелпе самантрах тӳлеме пулать.

Аса илтерер: ҫынсен раштав уйӑхӗн 1-мӗшӗччен НДФЛ, пурлӑх, ҫӗр тата транспорт налукӗсене тӳлемелле.

Вӑхӑтра татӑлмасан раштав уйӑхӗн 2-мӗшӗнчен пени шутласа пама тытӑнӗҫ. Унсӑр пуҫне налукҫӑсем парӑмӑн 20 проценчӗ таран штраф та хурса пама пултараҫҫӗ. Ҫын ятарласа тӳлемесен 40 процент таран та штрафлӗҫ.

«Контактра» халӑх тетелӗнчи сӑн

Шӑмӑршӑ округӗнче пурӑнакан Мироновсем пӗрлешнӗренпе ҫур ӗмӗр ҫитнӗ. Вӗсем ылтӑн туйне паллӑ тунӑ.

Нина Михайловнӑпа Николай Александрович ҫур ӗмӗр каялла паллашнӑ та 1975 ҫулхи чӳк уйӑхӗнче туй тунӑ. Виҫӗ ача ӳстернӗ вӗсем. Халӗ пилӗк мӑнукӗпе савӑнса пурӑнаҫҫӗ.

Николай Александрович – ӗҫ ветеранӗ. Нина Михайловна вырӑнти хӑйтытӑмлӑхра тата почтӑра ӗҫлесе хисепе тивӗҫнӗ.

«Контактра» халӑх тетелӗнчи сӑн

Чӑваш Енри поварсем Чулхулара иртнӗ «Шефсем – ӗҫре» кулинари ӑмӑртӑвӗнче ҫӗнтернӗ. Унта Мускав, Владимир облаҫӗсенчи тата Атӑлҫи тӑрӑхӗнчи регионсенчи командӑсем хутшӑннӑ.

Пирӗн республика чысне Александр Гониашвили шеф-повар, Алексей Шугуров су-шеф тата Даниил Кван кондитер хӳтӗленӗ. Вӗсем жюри членӗсене хӑйне евӗр тата тутлӑ апатпа тӗлӗнтернӗ. Ҫапла майпа 1-мӗш вырӑн йышӑннӑ.

Поварсем ҫитес ҫул Пӗтӗм Раҫҫейри «CHEF A LA RUSSE» кулинари конкурсне хутшӑнӗҫ.

Ҫӗнӗ Шупашкарти 37 ҫулти арҫын ҫухалнӑ. Ҫамрӑк арҫынна «Лиза Алерт» шырав отрячӗн хастарӗсем шыраҫҫӗ.

Арҫын чӳк уйӑхӗн 19-мӗшӗнче таҫта ҫӗтнӗ. Шӑпах ҫав кунтанпа вӑл ӑҫтине пӗлмеҫҫӗ.

Ҫухалнӑ арҫын 165 см тӑршшӗ, вӑтам пӳ-силлӗ, ҫӳҫӗ ҫырӑ тӗслӗ, куҫӗ сӑрӑрах симӗс тӗслӗ. Вӑл тӗксӗм кӑвак спорт шӑлаварӗпе, ҫавӑн тӗслӗ курткӑпа, хура кроссовкипе пулнӑ.

Ҫамрӑксен театрӗн сӑнӳкерчӗкӗ

Ӗнер, чӳк уйӑхӗн 21-мӗшӗнче, Чӑваш патшалӑх ҫамрӑксен театрӗн артистки, Чӑваш Республикин культурӑн тава тивӗҫлӗ ӗҫченӗ Елизавета Шайдукова 90 ҫул тултарнӑ.

Асӑннӑ театрта Елизавета Федоровна 1959 ҫулта ӗҫлеме пуҫланӑ. Вӑл ҫулсене театрта йывӑр вӑхӑт тесе палӑртаҫҫӗ. Ун чухне учрежденири вырӑс труппине пӗтернӗ. Елизавета Шайдукова театрти 16 артистран пӗри пулнӑ.

https://t.me/gibdd121 сайтри сӑн

Патшалӑх автоинспекцийӗн ӗҫченӗ Никита Черноносов отпускра чухне ӳсӗр водителе тытса чарнӑ.

Чӳк уйӑхӗн 16-мӗшӗнче каҫхине полици лейтенанчӗ Стрелоксен 324-мӗш дивизийӗн урамӗнчи кафе умӗнче арҫын тайкаланса машина патне пынине, руль умне ларнине курнӑ. Вӑл тусӗпе Михаил Максимовпа пӗрле ун хыҫҫӑн кайнӑ. Светофор тӗлӗнче вӗсем ӑна хӑваласа ҫитнӗ.

Полицейски водителе чарсан хӑйӗнпе паллаштарнӑ. Анчах арҫын тытнӑ та вырӑнтан хускалса тарнӑ. Эгер бульварӗнчи 33-мӗш ҫурт картишӗнче водитель машинӑна хӑварса ҫуран тарма хӑтланнӑ. Анчах Никита Черноносов ӑна тытса чарнӑ та ӗҫтешӗсене вырӑна чӗнсе илнӗ.

Чӑваш Енӗн Культура министерствин сӑнӳкерчӗкӗ

Чӳк уйӑхӗн 26-мӗшӗнче пирӗн республикӑра Чӑваш тӗррин кунне уявлаҫҫӗ. Ҫавна май республикӑн Культура министерстви кӑҫал та ҫав кун ӗҫе е вӗренме чӑваш тӗрриллӗ ҫипуҫпа, эрешпе кайма сӗнет.

Сӑнӳкерчӗксене сайтсенче тата халӑх тетелӗсенче вырнаҫтарма, вӗсене #Деньчувашскойвышивки2025, #наработусвышивкой, #научебусвышивкой хештгесемпе палӑртмалла.

«Ӗҫе е вӗренме чӑваш тӗррипе» акцие пирӗн республикӑра 2023 ҫултанпа ирттереҫҫӗ.

«Контактри» сӑн

Чӑваш Ене савӑнӑҫлӑ хыпар ҫитнӗ: библиотекарь Раҫҫей конкурсӗн лауреачӗ пулса тӑнӑ.

Канаш округӗн тӗп библиотекин пай ертӳҫи Людмила Чебукова «Ҫулталӑк библиотекарӗ — 2025» конкурс премине тивӗҫнӗ. Палӑртса хӑвармалла: пултарулӑх тупӑшӑвӗ хӗрӳ иртнӗ. Унта тӗрлӗ регионти вулавӑшсенче ӗҫлекен 413 ҫын хутшӑннӑ. Вӗсенчен 11-шӗ вара сумлӑ наградӑна тивӗҫнӗ, кунсӑр пуҫне палӑрнӑ ҫак 11 библиотекаре ятарлӑ премипе хавхалантарнӑ.

culture.cap.ru сӑнӳкерчӗкӗ

Паян, чӳк уйӑхӗн 21-мӗшӗнче, Чӑваш Енӗн Наци вулавӑшӗнче Надежда Кириллован «Чун ыратӑвӗ» кӗнекине хаклама пуҫтарӑнӗҫ.

Надежда Мефодьевна – Чӑваш Енӗн тава тивӗҫлӗ артистки, педагог, публицист, драматург тата республикӑн театр ӳнерӗн тӗпчевҫи. Чӑваш академи драма театрӗнче вӑл 30 ҫул ӗҫленӗ. Спектакльсенче вылянипе пӗрлех хӑйӗн пултарулӑхне сценарист тата режиссёр пулса та кӑтартнӑ.

Надежда Кириллован ҫӗнӗ кӗнеки XX ӗмӗрти культурӑпа ӳнерти ӗҫченсемпе паллаштарать, ҫав шутра – Ираида Петрова-Нарс тата Геннадий Айхи писательсемпе, Виталий Соломин, Вера Кузьмина тата Владимир Бурмистров артистсемпе, Геннадий Волков этнопедагогпа, Иосиф Дмитриев режиссёрпа, Станислав Кошкин художникпа тата ыттисемпе.