Нарӑс уйӑхӗнче ЧР Элтеперӗ Олег Николаев хӑйӗн пресс-секретарьне Борис Краснова ӗҫрен яни пирки пӗлтернӗччӗ. Кайран вӑл И.Я.Яковлев ячӗллӗ ЧППУра студентсене вӗрентни пирки хыпар пулчӗ. Халӗ Борис Краснов Мускавра ӗҫлет, ҫарпа спорт хатӗрленӗвӗн тата ҫамрӑксене патриотлӑх воспитанийӗ паракан «Воин» центрӑн пресс-службине ертсе пырать.

Сӑмах май, «Воин» центра Раҫҫей Президенчӗ пуҫарнипе йӗркеленӗ. Ку программа хальхи вӑхӑтра 21 регионта ӗҫлет, ҫав йышра Чӑваш Ен те пур.

Олег Николаевӑн вара хальлӗхе пресс-секретарь ҫук. Элтепер администрацийӗ ку должноҫе ҫын шырани пирки «Раҫҫейри ӗҫ» портала хыпар панӑ. Пресс-секретаре 127-142 пин тенкӗ шалу шантараҫҫӗ.

Чӑваш Енри шалти ӗҫсен министрне 62 ҫулти Виктор Шметкова отставкӑна янӑ. Ӑна урӑх ӗҫе куҫарнӑ. Малашне вӑл РФ ШӖМӗн Ҫурҫӗр-Кавказ округӗнчи транспорт управленине ертсе пырӗ. Хушӑва Раҫҫей Президенчӗ Владимир Путин ака уйӑхӗн 25-мӗшӗнче алӑ пуснӑ.

Виктор Шметков пирӗн республикӑри ШӖМе 2019 ҫултанпа ертсе пынӑ Унччен вӑл ШӖМӗн Волгоград облаҫӗнчи управлени пуҫлӑхӗн ҫумӗ пулнӑ. Шметков умӗн пирӗн республикӑра Сергей Неяскин шалти ӗҫсен министрӗ пулнӑ.

Чӑваш Енӗн Экономика министерствин сӑнӳкерчӗкӗ

Чӑваш Ен республикӑмӑр туристсене мӗнпе илӗртме пултарни ҫинчен Китайра каласа кӑтартнӑ. Пекин хулинче пӗтӗм тӗнчери China Outbound Travel & Tourism Market курав иртет. Чӑваш Ен те унта хутшӑнать.

Курава 70 ҫӗршыври туризм отраслӗн 20 пине яхӑн специалисчӗ, эксперчӗсем пуҫтарӑннӑ иккен. Чӑваш Енпе Раҫҫейӗн Discover Russia стенчӗ патӗнче паллашма май туса панӑ. Кун пирки республикӑн Экономика министерстви пӗлтернӗ.

Чӑваш кӗнеке издательствинче Валентин Константиновӑн кӗнеки пичетленсе тухнӑ.

Вӑл «Ют ҫын ачи» ятлӑ. Кӗнекери хайлавсене икӗ ушкӑна пайласа вырнаҫтарнӑ.

Пӗрремӗшӗ, «Тӗрӗслӗх пурах тӗнчере» ятлӑ. Унта вулакана шухӑшлаттаракан, тавлаштаракан хайлавсем кӗнӗ. Иккӗмӗш ярӑмра – шӳтлӗ хайлавсем.

Палӑртса хӑварар: Валентин Константинов – журналист, ҫыравҫӑ, хальхи вӑхӑтра Куславкка районӗн хаҫачӗн тӗп редакторӗнче ӗҫлет.

Сӗнтӗрвӑрринчи мурал. Регина Антонова тунӑ сӑн

Аслӑ Ҫӗнтерӳ пулнӑранпа 80 ҫул ҫитнӗ май Шупашкарта, Сӗнтӗрвӑрринче ҫӗнӗ муралсем ӳкереҫҫӗ.

Сӗнтӗрвӑрринчи Николаев урамӗнчи 87-мӗш «а» ҫурт стени ҫине Ирӗке кӑларнӑ салтак палӑкне ӳкереҫҫӗ. Унӑн оригиналӗ Берлинта вырнаҫнӑ.

Шупашкарта ака уйӑхӗн пуҫламӑшӗнче «Ҫӗр Аннемӗр чӗнет!» палӑка ӳкерме пуҫланӑ. Вӑл Воробьев композиторсен урамӗнчи 5-мӗш ҫурт стени ҫинче пулӗ.

Ольга Туркайӑн "Контактра" страницинчен илне сӑнӳкерчӗк

Чӑваш Енӗн Наци вулавӑшӗнче тӑван чӗлхене вӗрентекенсен пысӑк форумӗ иртнӗ.

Ольга Туркай радиожурналист пӗлтернӗ тӑрӑх, мероприяти вӑхӑтӗнче Наци библиотеки йӗркелесе ирттернӗ «Тӑван сӑмах» вулакансен аудиокӗнеке конкурс ҫӗнтерӳҫисене чысланӑ. «Республика шайӗнче иртнӗ конкурса 90 яхӑн ҫын хутшӑнчӗ. Пиллӗк номинаципе ҫӗнтерӳҫӗсене палӑртрӑмӑр. Ӑста вулакансем нумай пулчӗҫ. Тӗлӗнмелле пултаруллӑ халӑх пирӗн! Ҫакӑн пек кирлӗ, лайӑх конкурс ирттернӗшӗн Наци библиотекин ӗҫченӗсене пысӑк тав!» — хыпарланӑ Ольга Туркай.

morgau.cap.ru сӑнӳкерчӗкӗ

Иртнӗ эрнере, ака уйӑхӗн 24-мӗшӗнче, Муркашри культура ҫуртӗнче «Муркаш» фольклор коллективӗн 25 ҫулхине уявланӑ. Коллектива Чӑваш Республикин культурӑн тава тивӗҫлӗ ӗҫченӗсем А.В. Аникин, Ф.Ф. Григорьева, С.А. Каликов ертсе пыраҫҫӗ.

Чӑваш халӑх юррине ламран лама парса хӑварассипе йыш пысӑк тӳпе хывать. Асӑннӑ ансамбльтен ача-пӑчан «Шӑнкӑрав» тата «Шӑпчӑк» ансамблӗсем йӗркеленсе кайнӑ.

Юбилейпа саламлама Йӗпреҫ районӗнчи «Ахах», Шупашкарти «Эткер», Мари Элти «Мырылтенӑ, кушталтенӑ» ансамбльсем пырса ҫитнӗ. Унсӑр пуҫне Муркаш тӑрӑхӗнчи «Тӑванлӑх», «Екрем», «Хавас» ансамбльсем те саламланӑ.

«Контактри» сӑн

Ӗнер Шупашкар округӗнчи М-7 ҫул ҫинче патрульпе пост службин инспекторӗсем ватӑ арҫынна асӑрханӑ. Вӑл шӑнса кӳтнӗ, хӑй ӑҫтине ӑнланман. 88 ҫултискер аран калаҫнӑ.

Юрать-ха, ун ҫумӗнче паспорт пулнӑ. Ҫапла вӑл ӑҫта пурӑннине пӗлнӗ. Полици капитанӗ Артем Петров тата Руслан Пыркин лейтенант ватӑскере машинӑна лартса вӗри чей ӗҫтернӗ. Калаҫнӑ май вӗсем ҫакна пӗлнӗ: старик масар ҫине арӑмӗн вилтӑпри ҫине кайнӑ. Анчах тӗттӗмленнӗ те вӑл ҫулран аташса кайнӑ.

Инспекторсем ватӑскере киле йӗркеллех илсе ҫитернӗ.

cap.ru сайтри сӑн

ЧР Элтеперне Олег Николаева Узбекистанра чӑваш юррипе кӗтсе илнӗ. Карши университетӗнчи студентсем аякри хӑнасем валли чӑваш юррине шӑрантарнӑ.

Тӗлпулура ҫыхӑнӑва ҫирӗплетесси пирки калаҫнӑ. Уйрӑмах вӗренӗве тимлӗх уйӑрнӑ. Палӑртмалла: хальхи вӑхӑтра Чӑваш Енре Узбекистанри 150 яхӑн студент ӑс пухать. Малашне ҫамрӑксемпе улшӑнма, квотӑсем хатӗрлеме палӑртнӑ.

Чӑваш Ен делегацийӗ ҫӗвӗ фабрикине, газохими заводне тата «Uzbekistan GTL» завода ҫитсе курнӑ. Икӗ ен пирӗн технологисем вӗсен производствине мӗнле ҫӗнетме пултарнине сӳтсе явнӑ.

Паян республикӑн кашни округӗнчех тенӗ пек юр ҫунӑ. Сивӗ ҫанталӑк вӑраха тӑсӑлӗ-и? Синоптиксем мӗн каланине тишкерер.

Кӗҫӗр сивӗ пулӗ-ха, теромометр 3 таран градус сивӗ кӑтартӗ. Ыран вара майӗпен ӑшӑтма тытӑнӗ, вырӑнӑн-вырӑнӑн ҫумӑр ҫӑвӗ. Ытларикун каҫхине тата юнкун ҫумӑрлӑ тата ҫиллӗ ҫанталӑк пулӗ. Ҫил ҫу уйӑхӗн 1-мӗшӗнче кӑна лӑпланӗ. Анчах ун чухне каллех шӑнтма тата юр ҫума пултарать. Кӑнтӑрла ҫанталӑк лайӑхланӗ.

Ҫу уйӑхӗн 2-мӗшӗ ҫумӑрлӑ пулӗ, термометр 7-12 градус кӑна ӑшӑ кӑтартӗ. Ҫу уйӑхӗн 3-4-мӗшӗсенче тинех ӑшӑтӗ, термометр 14-19 градус кӑтартӗ. Шӑматкун хӗвел тухӗ, вырсарникун хушӑран ҫумӑр ҫӑвӗ.

Малтанлӑха пӗлтернӗ тӑрӑх, ҫу уйӑхӗн 8-мӗшӗнчен ӑшӑ та хӗвеллӗ ҫанталӑк хуҫаланма тытӑнӗ.