«Ҫамрӑксен хаҫачӗн» архивӗнчи сӑн

«Ҫамрӑксен хаҫачӗ» йӗркелесе янӑ ырӑ йӑлана малалла тӑсать: «Поэзи баттлӗ» конкурс кӑҫал та иртӗ. Ӑна кӑларӑм кун ҫути курма тытӑннӑранпа 100 ҫул тултарнине халаллаҫҫӗ. Поэзи тупӑшӑвӗ пуш уйӑхӗн 28-мӗшӗнче, эрнекун, Шупашкарти Пичет ҫуртӗнче (И.Яковлев проспекчӗ, 13-мӗш ҫурт) пулӗ.

Хаҫат вулаканӗсене, чӑваш поэзине юратакансене унта хутшӑнма чӗнеҫҫӗ. Заявкӑсене пуш уйӑхӗн 26-мӗшӗччен йышӑнаҫҫӗ. Конкурса хутшӑнас тесен чӑвашла 5 сӑвӑран кая мар вӗренмелле. Хӑвӑр ҫырнӑ сӑвӑсене те калама юрать.

Жюри членӗсем ӑсталӑха, хайлава илемлӗ вуланине, хӑйне евӗрлӗхе хаклӗҫ. Конкурса хутшӑнакансене сертификатпа хавхалантараҫҫӗ. Ҫӗнтерӳҫе вара парнепе чыслаҫҫӗ. Кунсӑр пуҫне ятарлӑ парне выляттараҫҫӗ. Заявкӑсене ҫак номерпе йышӑнаҫҫӗ: 8-967-470-13-38.

Сӑн ӳкерчӗкре: пӗлтӗрхи конкурс ҫӗнтерӳҫи — Элӗк округӗнчи Чӑваш Сурӑм шкулӗнче вӗренекен Семен Семенов.

Геннадий Исаков тунӑ сӑн

Ӗнер, пушӑн 10-мӗшӗнче, Чӑваш Енре сӑвӑрсем вӑраннӑ. Ҫак пулӑма Геннадий Исаков биолог сӑн ӳкерсе халӑх тетелӗнчи хӑйӗн страницине выранҫтарнӑ.

Сӑвӑрсем вӑранни – ҫуркунне ҫитнин палли. Пӗлтӗр ҫак чӗрчунсене пушӑн 19-мӗшӗнче асӑрханӑ, 2023 ҫулта – пушӑн 12-мӗшӗнче. Сӑвӑрсем ытти чух та шӑпах ҫак вӑхӑтра, пушӑн 12-30-мӗшӗсенче, вӑранаҫҫӗ.

Сӑмах май, Шупашкарта кураксене те асӑрханӑ «Погода 21» проект авторӗ Владимир Михайлов пӗлтернӗ тӑрӑх, кӑҫал ҫуркунне 3 эрне маларах килмелле.

minec.cap.ru сӑнӳкерчӗкӗ

Пӗлтӗр пирен республикӑри хӑна ҫурчӗсем, хотселсем, халӑха вырнаҫтармалли ытти организаци 3 миллиард тенкӗ ытла ӗслесе илнӗ. Кун пек цифрӑна республикӑн экономика аталанӑвӗн тата пурлӑх хутшӑнӑвӗсен министрӗ Дмитрий Краснов Чӑваш Енре глэмпингсем тӑвассине халалланӑ пресс-конференцире асӑнса хӑварнӑ.

Министр шухӑшланӑ тӑрӑх, укҫа нумайрах ӗслесе илни республикӑна туристсем ытларах килнипе ҫыхӑннӑ. 2024 ҫулта гостиницӑсем, хостелсем тата санаторисем 475 пин ытла хӑнана йышӑннӑ.

"Контактри" сӑн

Ӗнер каҫхи 8 сехетре Патӑрьел муниципалитет округӗнчи Тури Туҫа ялӗнче ҫынна машина ҫапса хӑварнӑ. Шел те, вилмеллех.

Ҫак арҫын Елчӗк округӗнчи Кушкӑ ялӗн ҫынни пулни паллӑ. Ӑна ҫапса хӑварнӑ водитель вырӑнтан тарса ҫухалнӑ.

minec.cap.ru сӑнӳкерчӗкӗ

Пирӗн республикӑри патшалӑх служащийӗсем валли ҫӗнӗ вӗренӳ порталӗ ӗҫлеме тытӑннӑ. Унта тӳре-шара хӑйӗн професси шайне ӳстерме пултарӗ.

Чӑваш Ен Элтеперӗ Олег Николаев Правительство ҫуртӗнчи тунтикунхи канашлура палӑртса хӑварнӑ тӑрӑх, ӗҫ вырӑнӗсене хамӑр ҫӗршыври программӑсем ҫине куҫараҫҫӗ. Ку вӑл патшалӑх тата муниципалитет шайӗнче ӗҫлекен 4700 ытла ҫынна пырса тивӗ.

Кӑрлач уйӑхӗ тӗлне республикӑри 1271 ӗҫ вырӑнӗнчен 641-шне «Windows» операци тытӑмӗнчен хамӑр ҫӗршыври программистсем шухӑшласа кӑларнӑ «Astra Linux» программа ҫине куҫарнӑ.

Ҫӗнӗ вӗренӳ порталӗ «Astra Linux» тата «P7-Офис» программӑсемпе ӗҫлеме вӗрентет.

"Контактри" сӑн

Артем Дзюба – чӑваш тымарӗллӗ футболист. Вӑл Раҫҫей футбол историйӗнче чи лайӑх бомбардир пулса тӑнӑ – карьеринче чи нумай гол кӗртсе рекорда ҫӗнетнӗ.

Ку ҫитӗнӳ «Крылья Советов» командӑна хирӗҫ вылянӑ Раҫҫей премьер-лигинче палӑрнӑ. Унта Артем 9-мӗш минутра гол кӗртнӗ. Ҫапла вӑл ку таранччен 234 гол кӗртсе Александ Кержаковран та ирттернӗ.

"Контактри" сӑн

Шупашкарта пурӑнакан Наталия Давигора декрет отпускӗнче чухне хӑйне евӗр илемлӗ парнесем хатӗрлеме тытӑннӑ. Вӗсем – стразӑсемпе капӑрлатнӑ япаласем.

Пурӑна киле унӑн чун киленӗҫӗ тупӑш паракан ӗҫе ҫаврӑннӑ. Халӗ вӑл парнесем хатӗрлет: телефон чехолӗнчен пуҫласа почта ещӗкӗсем таранах. Наталтия уйӑхра

100 пин тенкӗ таран ӗҫлесе илет.

Патшалӑх автоинспекцийӗн сайтӗнчи сӑн

Ӗнер Йӗпреҫ округӗнче 9-мӗш класра, вӗренекен хӗр машина айне пулнӑ. Ӑна 21 ҫулти водитель ҫапса кайнӑ.

Ку Пысӑк Упакасси ялӗ ҫывӑхӗнче каҫхи 6 сехет ҫурӑра пулнӑ. Хура тумланнӑ хӗр велосипедпа пынӑ, тӗттӗмре ҫутатакан хатӗр пулман. Водитель каланӑ тӑрӑх, вӑл ӑна асӑрхаса ӗлкӗреймен. Аманнӑ хӗре пульницӑна илсе кайнӑ.

"Контактри" сӑн

Вӑрнарта Светлана Давыдова хӑйӗн куравне йӗркеленӗ, ӑна «Хӗрарӑмӑн чун киленӗҫӗ» ят панӑ.

Светлана поселокри Йӑла ҫуртӗнче ӗҫленӗ, машинӑпа хитре япаласем ҫӗленӗ. Мӑшӑрӗпе 4 ача ӳстернӗ, халӗ 8 мӑнукӗпе савӑнса пурӑнать. Анчах алӑ ӗҫӗ ӑна паянхи кун та кӑсӑклантарать. Унӑн ӗҫӗсемпе куравра паллашма пулать.

Пэчворк техникипе ҫӗленӗ вырӑн ҫиттисем тӗлӗнмелле хитре. Вӗсенче сюжетлӑ картинӑсене те асӑрхама пулать.

Пуш уйӑхӗ лайӑх ҫанталӑкпа савӑнтарать, уйӑх пуҫламӑшӗ нормӑран 5 градус ӑшӑрах пулнӑ.

Анчах синоптиксем кӗҫех хӗвел пӗлӗтсен хыҫне пытанассине пӗлтерӗҫҫӗ.

Ыран ҫил вӑйланӗ, кӑнтӑр енчен вӗрӗ. Юнкун хушӑран кӑна ҫумӑр ҫӑвӗ, кӗҫнерникун вара – вӑйлӑрах. Ҫӗрле тата эрнекун ӑшӑ килӗ, 12-17 градус таран ӑшӑтӗ. Анчах эрнекун ҫӗрле сивӗтӗ те шӑматкун цӗпе юр ҫӑвӗ. Вырсарникун ҫӗр каллех шуралӗ.

Малтанлӑха пӗлтернӗ тӑрӑх, ҫитес эрне пуҫламӑшӗнче хӗвеллӗ сивӗ ҫанталӑк пулӗ. Анчах нумайлӑха мар, кӗҫех ӑшӑтӗ.