Наци вулавӑшӗн сӑнӳкерчӗкӗ

Ҫитес эрнере, утӑ уйӑхӗн 30-мӗшӗнче, Чӑваш Енӗн Наци вулавӑшӗнче Мӗтри Кипекӗн кӗнекине хаклама пуҫтарӑнӗҫ. Унта чӑваш литературине юратакан кашни ҫынах кайма пултарать.

Хатлава пухӑннисем «Паттӑрсем хыпарсӑр ҫухалмаҫҫӗ» кӗнекене хаклӗҫ.

Хӑтлав Чӑваш Республикин Наци библиотекин конференц-залӗнче (119 каб.) иртӗ. Вӑл 11 сехетре пуҫланӗ.

"Контактри" сӑн

Республикӑри «Автоледи» конкурс вӗҫленнӗ, ҫӗнтерӳҫӗсене палӑртнӑ.

Пӗрремӗш вырӑна Екатерина Матвеева йышӑннӑ, иккӗмӗш вырӑна – Марина Васильева, виҫҫӗмӗшӗне — Анастасия Чинаева тата Екатерина Ятрушева. Екатерина Матвеевӑпа Татьяна Петровӑна чи лайӑх пултарулӑх номерӗшӗн уйрӑммӑн палӑртнӑ.

Палӑртса хӑварар: кӑҫал конкурса 30 хӗр-хӗрарӑм хутшӑннӑ, анчах финала 12-шӗ ҫеҫ тухма пултарнӑ.

Чӑваш Енре пурӑнакансем ултавҫӑсен аллине час-часах лекеҫҫӗ. Кӑҫал ҫур ҫулта ҫавна пула пирӗн ентешсем укҫа сахал мар ҫухатнӑ: палламан ҫынсене 531 миллион тенкӗ куҫарса панӑ.

Йӗрке хуралҫисем ултавҫӑсен чи анлӑ сарӑлнӑ схемӑсем пирки каласа кӑтартнӑ.

Палламан ҫынсем ытларах чухне шӑнкӑравласа хӑйсемпе банк ӗҫченӗ тесе паллаштараҫҫӗ, укҫана «хӑрушсӑр счет» ҫине куҫарма ыйтаҫҫӗ. Тепӗр схема – инвестицисем хывса тупӑш илме, суя сайтсенче тавар туянма сӗнеҫҫӗ.

Йӗрке хуралҫисем ҫирӗппӗнех асӑрхаттараҫҫӗ: харпӑр даннӑйсене ют ҫынна пӗлтермелле мар. Смспа килнӗ кода та вӑрттӑнлӑхра тытмалла.

Кирил Степанов архивӗнчи сӑн

Элӗк округӗнче пурӑнакан Кирилл Степанов фермер тата блогер утӑ уйӑхӗн 24-мӗшӗнче Мускавра иртнӗ «Агро-2025» бала хутшӑннӑ. Унта вӑл РФ ял хуҫалӑх министрӗпе Оксана Лутпа сӑн ӳкерӗннӗ.

Ҫак мероприятие РФ Ял хуҫалӑх министерстви йӗркеленӗ. Унта Раҫҫейри аграри университечӗсенче лайӑх вӗренекен студентсем хутшӑннӑ. Чӑваш Енрен 7 ҫамрӑк кайнӑ. Вӗсен йышне Кирилл Степанов та лекнӗ.

chuvashia.sledcom.ru сӑнӳкерчӗкӗ

Шупашкар районӗнчи Мӑн Карачура ялӗнче 54 ҫулхи уйрӑм усламҫӑ килӗнче ӗҫленӗ чухне вилмеллех аманнӑ.

Инкек утӑ уйӑхӗн 22-мӗшӗнче пулса иртнӗ. Вӑл хӑйӗн хуҫалӑхӗнче йывӑс ҫурнӑ. Вута ҫурмалли станокпа ӗҫленӗ чухне асӑрханса ҫитереймен вӑл. Аманса пӗтнӗскер инкек вырӑнӗнчех вилсе кайнӑ.

chuvbook.ru сӑнӳкерчӗкӗ

Чӑваш кӗнеке издательствинче «Алран алла» ярӑмри черетлӗ кӑларӑм пичетленсе тухнӑ. Издательство сайтӗнче Галина Матвеева хыпарлани тӑрӑх, кӗнене тӗрлӗ авторӑн хайлавӗ кӗнӗ.

Ҫак йӗркесен авторӗ ӑнланнӑ тӑрӑх, ҫав шутра Николай Ишентейӗн, Анатолий Хмытӑн, Анатолий Емельяновӑн...

Кӗнеке ятне Николай Ишентейӗн повеҫне тӗпе хурса «Пурлак кукаҫи пуянлӑхӗ» ят панӑ.

pravdapfo.ru сайтран илне сӑнӳкерчӗк

Канашри «Хуҫалӑхпа эксплуатаци служби» унитарлӑ пердприяти ертӳҫи шанӑҫран тухнӑ. Ҫавна пула ӑна ӗҫрен хӑтарнӑ. Кӑлтӑка прокуратура тӗрӗслевӗ вӑхӑтӗнче тупса палӑртнӑ.

Муниципалитетӑн хысна учрежденийӗн директорӗ 2023 тата 2024 ҫулсенче илнӗ тупӑш, пурлӑх пирки пӗлтермен.

Коррупцие хирӗҫ тӑрассипе ҫыхӑннӑ саккуна пӑхӑнманшӑн прокуратура вырӑнти администрацие асӑннӑ пуҫлӑха ӗҫрен кӑларма ыйтса асӑрхаттару хучӗ ӑсатнӑ.

forum.zarulem.ws сайтран илнӗ сӑнӳкерчӗк

Ӗнер, утӑ уйӑхӗн 24-мӗшӗнче, Канашра икӗ ача маршрутка урапи айне пулнӑ.

Улттӑмӗш класра вӗренекен икӗ арҫын ача ҫуран ҫӳрекенсене касмалли вырӑнтан, анчах светофор ҫук ҫӗртен, каҫма тӑнӑ. Ачасем электросамокатпа пулнӑ. Вӗсем маршрутка урапи айне лекнӗ.

Арҫын ачасенчен пӗри суранланнӑ, тепри урине хуҫнӑ.

Инекек вӑхӑтӗнче маршруткӑра ҫынсем пулман. Транспорт техникӑна юсаттарма кайма тухнӑскер пулнӑ.

Жанна Рябцева Телеграм-каналта вырнаҫтарнӑ сӑнӳкерчӗк

Чӑваш Ен те Атӑла сыватмалли федераци программине хутшӑнни пирки эпир унччен пӗлтернӗччӗ-ха. Ҫавна май регионта тасатмалли сооруженисем тумалла. Ӑна 2024 ҫулхи чӳк уйӑхӗнчех хута ямалла пулнӑ. Анчах ӗҫ паян кун та тӑрать.

Регионсенче тасатмалли сооруженисене тӑвас ӗҫе ҫирӗп тӗрӗслесе тӑракан РФ Патшалах Думин депутачӗ Жанна Рябцева Шупашкарти «Ҫӗнӗ хула» микрорайонти туса пӗтермен сооруженисен сӑнӳкерчӗке Телеграмри хӑйӗн каналӗнче вырнаҫтарнӑ.

Объекта тума хыснаран 336,1 миллион тенкӗ уйӑрнӑ, ӗҫ графикран 177 кун юлса пырать. Унсӑр пуҫне сооружение туса 100 миллиона яхӑн нумайрах укҫа кирлӗ теҫҫӗ-мӗн. «2024 ҫулхи утӑ уйӑхӗнче эпир пӗрремӗш хут тӗрӗсленӗ хыҫҫӑн объекта пуҫласа юхтарса кайнӑ. Халӗ, хӑвӑрах куратӑр, ҫӗнӗрен тума ансатрах», – тесе палӑртнӑ Жанна Рябцева.   

Чӑваш Ен ертӳҫисем объекта 2026 ҫулсӑр та туса пӗтереймессине пӗлтернӗ-мӗн.

cnnturk.com сайтри сӑн

Пӗлӗшне вӗри шывпа сапнӑ, унтан ун ҫине чейник ывӑтнӑ. Кун пек пӑтӑрмах Красноармейски округӗнче 2024 ҫулхи утӑ уйӑхӗнче пулнӑ.

Хӗрарӑм пӗлӗшне кӗвӗҫнӗ те вӗсем хирӗҫме пуҫланӑ. Ҫавӑн чухне хӗрарӑм ҫиллине чараймасӑр арҫынна вӗри шывпа сапнӑ, унтан чейнике те ун еннелле ывӑтнӑ. Арҫыннӑн кӑкӑрӗ, сывлав органӗсен тӗлӗнчи ӳчӗ пиҫсе кайнӑ. Шел те, вӑл реанимацире вилнӗ.

Хӗрарӑм судра явап тытнӑ. Анчах вӑл айӑпне йышӑнман. Вӑл чейникре сивӗ шыв пулнӑ тесе шухӑшланӑ-мӗн. Суд ӑна 1 ҫуллӑха ирӗксӗр хӑварма йышӑннӑ.