culture.cap.ru сӑнӳкерчӗкӗ

Чӑваш Енри аслӑ шкулсенче, колледжсенче, шкулсенче 58 ют ҫӗршывран килнӗ 4 пине яхӑн ҫамрӑкпа ача-пӑча вӗренет. Кун пирки республикӑн вӗренӳ министрӗн ҫумӗ Максим Гришин Нацисемпе конфессисем хушшинчи канашӑн ларӑвӗнче пӗлтернӗ.

Студентсене илсен пирӗн патӑмӑра ытларах Индинчен, Туркменистанран, Ирантан, Мароккаран, Египетран тата ытти хӑш-пӗр ҫӗршывран килеҫҫӗ. 2700 ытла ҫамрӑк Чӑваш патшалӑх университетӗнче вӗренет.

pravdapfo.ru сӑнӳкерчӗкӗ

Шупашкар хулин пуҫлӑхӗн ҫумӗсене ҫирӗплетнӗ. Архитектура тата градостроительство енӗпе Яков Михайлов ҫине тӑрӗ, социаллӑ ыйтусемшӗн Людмила Маркова яваплӑ пулӗ. Кун пирки Шупашкар хулин пуҫлӑхӗн тивӗҫне пурнӑҫлакан Станислав Трофимов ӗнерхи планеркӑра пӗлтернӗ.

Яков Михайлов хулари Калинин районӗн администрацийӗн пуҫлӑхӗнче 11 ҫул тӑрӑшнӑ. Людмила Маркова вара хула администрацийӗнче культура тата туризма аталантарас енӗпе ӗҫлекен управление 2013 ҫултанпа ертсе пынӑ.

Ҫул-йӗрпе патруль службин архивӗнчи сӑн

Улатӑрта Ҫул-йӗрпе патруль службинин испекторӗсем ҫул ҫинче «шестерка» пынине курсан ӑна чарма шутланӑ. Анчах водитель чарӑнма мар, пушшех те хытӑрах кайма пуҫланӑ.

Инспекторсем ун хыҫҫӑн 2 ҫухрӑм хӑваланӑ. Громкоговорительпе каласан тин водитель чарӑннӑ. Медосвидетельствовани вӑл ӳсӗр пулнине палӑртнӑ.

Ку кӑна мар-ха. «Шестерка» учетран илнӗскер, тимӗр-тӑмӑра янӑскер пулнӑ иккен. Унӑн номерӗ те пулман. Машинӑна ятарлӑ стоянкӑна ӑсатнӑ. Каччӑ тӗлӗшпе вара административлӑ ӗҫсем пуҫарнӑ.

«Контактри» сӑн

Вӑрнарсем ентешлӗх уявне пухӑннӑ. Уяв Шупашкарта Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче иртнӗ.

«Туслӑх» ентешлӗх уявне пултарулӑх коллективӗсем тата Вӑрнар округӗнчи артистсем хутшӑннӑ, юрӑ-ташӑпа савӑнтарнӑ. Сӑра вӗретекенсен конкурсне хутшӑннисем ҫак ӗҫмене мӗнле хатӗрленине кӑтартнӑ. Жюри пайташӗсем сӑра пахалӑхне, рецептне, тутине пахаланӑ.

Тепӗр конкурс сӗтел хитре хатӗрлесси пулнӑ. Территори пайӗсем хӑнасене наци апат-ҫимӗҫӗпе хӑналанӑ.

online.cap.ru сӑнӳкерчӗкӗ

Чӑваш Енре килес ҫул тематикине суйлаҫҫӗ. Уншӑн эсир те сасӑлама пултаратӑр. Вӑл вӑхӑта нумай илмест — пурӗ те 1 минут ҫеҫ кирлӗ.

Сасӑлас тесен online.cap.ru сайта кӗмелле.

Пӗтӗмпе пилӗк тематика сӗннӗ: Халӑхсен туслӑхӗн ҫулталӑкӗ, Пултарулӑхпа аталану ҫулталӑкӗ, Пӗрлӗхпе пӗр шухӑшлӑх ҫулталӑкӗ, Ҫемье хаклӑхӗн ҫулталӑкӗ, Йӑлана кӗнӗ пахалӑх ҫулталӑкӗ.

t.me/gibdd121 сӑнӳкерчӗкӗ

Ӗнер, чӳк уйӑхӗн 24-мӗшӗнче, Шупашкарта хӗрарӑм-водитель хӗрачана машинӑпа таптаса кайнӑ.

Кӑнтӑрла иртни 2 сехет тӗлӗнче тӑххӑрмӗш класс хӗрачи Рождественски урамран Ярославль урамне каҫма тӑнӑ. Ҫав вӑхӑтра ун ҫине 40 ҫулти водитель «Jeep Cherokee» машинӑпа пырса кӗнӗ. Хӗрача ҫуран ҫӳрекенсене каҫмалли вырӑнпа утса пынӑ.

Хытах аманнӑ 15 ҫулти хӗрачана васкавлӑ пулӑшу машинипе пульницӑна илсе кайнӑ.

Инкек вӑхӑтӗнче хӗрарӑм-водитель урах пулнӑ.

Канашра Тутарстанри пенсионера суд тӑвӗҫ. Ҫав ҫын пуйӑсра тепӗр ҫыннӑн телефонне вӑрланӑ.

Пӑтӑрмах пӗлтӗрхи ҫу уйӑхӗнче пулса иртнӗ. «Мускав – Екатеринбург» пуйӑсра Екатеринбургра пурӑнакан 69 ҫулти хӗрарӑмӑн телефонӗ ҫухалнӑ. Вӑл ӑна сӗтел ҫине хунӑ, ҫиелтен хутаҫпа витнӗ. Ҫывӑрса вӑраннӑ хыҫҫӑн телефон ҫуккине асӑрхасан тепӗр номерпе хӑйӗн телефонӗ ҫине шӑнкӑравланӑ, анчах телефона сӳнтерсе хума ӗлкӗрнӗ пулнӑ.

Телефона Тутарстанра пурӑнакан 65 ҫулти арҫын вӑрланӑ иккен.

Федерацин налук службин Чӑваш Енри управленийӗ йӗркеленӗ «Эпӗ те налук тӳлекен пулӑп» конкурса Чӑваш Енри 51 шкултан 128 ача хутшӑннӑ. Палӑртма питӗ кӑмӑллӑ: ҫак йышран вуннӑшӗ иккӗмӗш тапхӑра лекнӗ.

Жюри хӑтлавсене хакласа ҫӗнтерӳҫӗсене палӑртнӑ. Пӗтӗмлетӳ тӑрӑх, конкурсра 1-мӗш вырӑна Максим Моряков (Тӑвайри П.Х.Бухтулов ячӗллӗ шкул), 2-мӗш вырӑна Георгий Малайкин (Шупашкарти 4-мӗш гимнази), 3-мӗш вырӑна Мария Моисеева (Шупашкарти 24-мӗш шкул) тухнӑ.

Ҫӗнтерӳҫӗсене Раҫҫейри налук органӗсен ӗҫченӗсен кунне халалланӑ уявра чыслӗҫ.

Чӳкӗн 28-мӗшӗнче Чӑваш патшалӑх гуманитари ӑслӑлӑхӗсен институтӗнче «Хальхи информаци обществинчи чӑваш чӗлхи тата пуплев культури» ятпа регионсем хушшинчи ӑслӑлӑхпа ӗҫлӗх конференцийӗ иртӗ. Мероприятие Петӗр Яккусен чӑваш чӗлхи тӗпчевҫи, сӑвӑҫ тата тӑлмач ҫуралнӑранпа 75 ҫул ҫитнӗ тӗле йӗркеленӗ.

Конференцийӗн тепӗр пайне пирӗн «Чӑваш халӑх сайчӗ» кӑҫал 20 ҫул тултарнине халалланӑ. Аса илтеретпӗр, унӑн ҫуралнӑ кунӗ 2005 ҫулхи авӑнӑн 7-мӗшӗ шутланать. Унтанпа ҫирӗм ҫул иртрӗ. Хальхи вӑхӑтра сайт чӑвашла тата ытти чӗлхесемпе тухакан массӑллӑ информаци хатӗрӗ пек ӗҫлет. Унсӑр пуҫне «Чӑваш халӑх сайтӗнчен» уйрӑлса тухса Чӑваш чӗлхи лабораторийӗ аталанать, вӑл чӑваш чӗлхипе хальхи вӑхӑтра усӑ курассине ҫӑмӑллатма тӑрӑшать.

Конференцие кӳршӗллӗ республикӑри ҫынсем килме палӑртнӑ, вӗсем хӑйсен опычӗпе паллаштарӗҫ. «Медиауҫлӑхри чӑваш чӗлхи» пайра цифра тапхӑрӗнче чӗлхепе ҫыхӑннӑ ыйтусене сӳтсе явӗҫ.

«Контактри» сӑн

Йӗпреҫ округӗнчи Чӑваш Тимеш ялӗнче пурӑнакан Лариса Анисимова Пӗтӗм Раҫҫейри «Раҫҫейӗн ылтӑн пылӗ» конкурса хутшӑнса палӑрнӑ. Вӑл «Ҫӑка пылӗ» номинацире иккӗмӗш вырӑн йышӑннӑ.

Лариса 10 ҫул ытла ӗнтӗ вӑрманти утарта вӗлле хурчӗсем тытать. Ӗҫчен хӗрарӑм хӗлле Мускавра пурӑнать, ытти вӑхӑтра тӑван ялӗнче ӗҫлет.

Ҫакна та палӑртмалла: вӑл иртнӗ уйӑхра Мускавра иртнӗ «АпиДар» конкурсра иккӗмӗш вырӑна тивӗҫнӗ.