https://t.me/pg21ru сӑнӳкерчӗкӗ

Чӑваш актерӗ Пӗрремӗш канала хӑй ҫинчен каласа кӑтартнӑ. Владимир Тяптушкин хӑй ӳкерӗннӗ «Ландыши» (18+) сериал тата хӑй калӑпланӑ сӑнар пирки «Доброе утро» (6+) кӑларӑмра каласа кӑтартнӑ.

Актер сериалти тӗп сӑнарсенчен пӗрне калӑпланӑ. Вӑл вылякан Демьян – начар ҫын, вӑл тӗп сӑнарсене пурӑнма кансӗрлет. Владимир каласа кӑтартнӑ тӑрӑх, малтан унӑн геройӗ хӑй мӗн хӑтланнине ӑнланмасть, юрату мӗнне те пӗлмест, Катьӑна хӑй юратса пӑрахнине те ӑнланмасть.

Актера хӑй калӑпланӑ сӑнар килӗшет. Вӑл Демьян татӑклӑ утӑм тума пултаракан ҫын пулнӑшӑн та ӑна килӗштерет.

«Ачалӑхӑм ман лайӑх иртнӗ. Эпӗ Чӑваш Енре ҫуралса ӳснӗ. Унти хамӑн тусӑмсене, атте-аннене салам калатӑп», – тенӗ чӑваш актерӗ.

https://t.me/pg21ru сӑнӳкерчӗкӗ

Чӑваш Енре тӗрмере ларакан пӗр ҫынна хваттер панӑ. Тӳрех палӑртар: кирпӗч шутлама ӑсатнисене хваттер пама тытӑнман-ха.

Юсанмалли 1-мӗш колонире ларакан ҫамрӑк арҫын тӑлӑх пулнӑ. Тӑлӑхсене хваттер памалли саккун пуртан вӑл та ӑна илме черете тӑнӑ. Ҫавна май патшалӑхӑн ӑна хваттер памалла пулнӑ.

Каччӑ темле усал ӗҫ туса юсанмалли колоние лекнӗ. Хваттер илме черет ҫитсен ӑна хваттер уҫҫине тӗрмере панӑ. Унтан тухсан вӑл ҫӗнӗ хваттере кӗрсе пурӑнма пултарӗ.

Юсанмалли 1-мӗш колони, сӑмах май каласан, Шупашкарта, Лапсар проездӗнче вырнаҫнӑ. Асӑннӑ колони федерацин хысна учрежденийӗ шутланать. Унӑн пуҫлӑхӗ пулса 2024 ҫулхи ҫу уйӑхӗнченпе Вадим Гурьев ятлӑ ҫын тӑрӑшать.

Типшӗм Сашук страницинчен илнӗ сӑнӳкерчӗк

Леонид Фадеева Шупашкар районӗнче пурӑнакансем аван пӗлеҫҫӗ. Атӑльялӗнче 1939 ҫулта ҫуралнӑскер Раҫҫей Писательсен союзӗн членӗ пулнӑ. Специальноҫпа вӑл вара – агроном. Ахаль агроном та мар, Чӑваш Республикин тава тивӗҫлӗ агрономӗ. Чӑваш патшалӑх ял хуҫалӑх институтӗнчен вӗренсе тухнӑ. Бригадирта, колхоз председателӗнче, совхоз директорӗнче, КПСС райкомӗнче йӗркелӳ пайӗн инструкторӗнче, Чӑваш Енӗн Ял хуҫалӑх министерствинче пай пуҫлӑхӗнче, министр ҫумӗнче ӗҫленӗ.

Сӑвӑ ҫырма ачаранпах пуҫланӑ. Унӑн сӑввисене чӑваш композиторӗсем юрра хывнӑ.

Леонид Фадеева хӑйӗн сӑввисене кӗнекен те пичетлесе кӑларнӑ: 1999 ҫулта – «Пурӑнар-и, тусӑм, юратса» ятпа пичетлесе кӑларнӑ, «Пурнӑҫ ҫулӗ» ятпа – 2001 ҫулта.

Дмитрий Моисеев страницинчен илнӗ сӑнӳкерчӗк

Шупашкара кӑҫал та Ҫӗнтерӳ пуйӑсӗпе килсе ҫитнӗ. Вӑл «шухӑшсен авӑрне путарать, чуна асаплантарать... », — хыпарланӑ Чӑваш Енӗн медиацентрӗн директорӗ Дмитрий Моисеев.

«Шупашкара тӑваттӑмӗш хут килнӗ Ҫӗнтерӳ пуйӑсӗнче иккӗмӗш хут пулса куртӑм. Интерактивлӑ кураври экспонатсем, наушникри Лидия ятлӑ машинистӑн калаҫӑвӗ чуна пӑлхатаҫҫӗ, Тӑван ҫӗршывӑн Аслӑ вӑрҫи вӑхӑтӗнче пирӗн мӑн асаттесемпе мӑн асаннесем тӳснӗ нушана лайӑхрах пӗлме-туйма май параҫҫӗ. Хӑш-пӗр вакунри лару-тӑрӑва курсан куҫҫуль те капланать.

Ҫитӗнекен ӑру Ҫӗнтерӳ пуйӑсӗпе паллашни уйрӑмах вырӑнлӑ. Ачасемпе ҫамрӑксен историе, паллах, пӗлмелле», — тесе пӗтӗмлетнӗ Дмитрий Андреевич унта пулса курнӑ хыҫҫӑн халӑх тетелӗнчи хӑйӗн страницинче.

«Контактри» сӑн

Чӑваш Енри орнитолог, биолог, педагог тата общество ӗҫченӗ Альберт Ластухин хӑй ӳкернӗ картинӑсен куравне йӗркеленӗ. Вӑл «Мӗн пур ҫын – пӗртӑван» ятлӑ.

Экспозицире 100 ытла портрет: Раҫҫейри, Азири, Африкӑри, Ҫурҫӗр тата Кӑнтӑр Америкӑри ҫынсен сӑнӗсем. Альберт Ластухин тӗрлӗ халӑх культурипе, йӑли-йӗркипе ҫывӑхрах паллашас тесе тӗнче курса ҫӳренӗ. Ҫак картинӑсене вӑл шӑпах ҫулҫӳревсемпе экспедицисем вӑхӑтӗнче ӳкернӗ.

«Эпӗ кашни портретра ҫын мӗнле пӑхнине тата унӑн чунне уҫса кӑтартма тӑрӑшрӑм», — тенӗ Альберт Ластухин. Унӑн шухӑшӗпе, ҫак курав шкул ачисемшӗн пӗлтерӗшлӗ: вӑл туслӑх пӗр-пӗрне хисепленинчен пуҫланнине ӑнланма май парать.

Куравпа Шупашкарти Халӑхсен туслӑхӗн ҫуртӗнче пуш уйӑхӗ вӗҫӗччен паллашма пулать.

cheb.ru сайтри сӑн

Ыран, пуш уйӑхӗн 4-мӗшӗнче, Шупашкар хулинче йӑлана кӗнӗ «Ҫӗрулми – 2026» курав ӗҫлеме тытӑнӗ.

Кӑҫалхипе виҫҫӗмӗш хут ӗнтӗ вӑл МТВ-центрта иртӗ. Курав унта 5-мӗш хутра пулӗ. Ҫавӑн пекех хальхинче тепӗр вырӑн пулӗ: «Пехет» агромаркет. Вӑл Шупашкарти «Каскад» суту-илӳ центрӗнче вырнаҫнӑ. Икӗ ҫӗрте те вӑрлӑх ҫӗрулми туянма май пулӗ. МТВ-центр патӗнчи парковкӑра шатер та вырнаҫтарӗҫ, унта тата ҫӗрулми сутӗҫ.

Кӑҫал курава Раҫҫейри 18 регионти 78 организаци хутшӑнма палӑртнӑ. Малтанлӑха пӗлтернӗ тӑрӑх, хамӑр патри тата ют ҫӗршывсен селекцийӗнчи 15 сорта хӑтлӗҫ.

Хӑнасем валли программа пуян: ҫӗрулмин тӗрлӗ сортӗнчен хатӗрленӗ 100 ытла ҫимӗҫе тутанса пӑхма май пулӗ. Ҫавӑн пекех республикӑри «Ҫӗрулми УЯВ» конкурса хутшӑннӑ ӳкерчӗксен куравӗ ӗҫлӗ.

Етӗрне округӗнчи хӑйне евӗр ӑстасем, ашшӗпе ывӑлӗ, пусма татӑкӗсенчен тӗлӗнмелле илемлӗ картинӑсем ӑсталаҫҫӗ. Ашшӗн ӗҫӗсенче ӑс-хакӑл тата йӑла-йӗрке туйӑнать, ывӑлӗ вара ҫӗнӗлӗхсем шырани курӑнать. Иккӗшӗн ӗҫӗсем вара – хӑйне евӗр пӗр тӗнче.

Иван тата Михаил Семеновсен ӗҫӗсемпе унччен Етӗрне округӗнчи Тури Ачак музейӗнче паллашма май пулнӑ. Халӗ вара Шупашкарта та курав уҫӑлӗ. Вӑл Хальхи искусствӑсен центрӗнче (Президент бульварӗ, 1/15-мӗш ҫурта) пуш уйӑхӗн 15-мӗшӗччен ӗҫлӗ, «Семеновсен пусмаран хатӗрленӗ живопиҫӗ» ятлӑ пулӗ.

Курав ыран, пуш уйӑхӗн 4-мӗшӗнче, 16 сехетре уҫалӗ. Унта тӳлевсӗрех кӗртеҫҫӗ.

cap.ru сайтри сӑн

Шупашкарти тухтӑрсем ӑнсӑртран уксус ӗҫнӗ 70 ҫулти хӗрарӑмӑн пурнӑҫне ҫӑлнӑ. Ӑна пӗр тӑхтамасӑр Шупашкарти Васкавлӑ медпулӑшу пульницине илсе ҫитернӗ.

Хӗрарӑмӑн сывлӑхӗ йывӑр пулнӑ: ҫӑварӗ, апат ҫулӗ пиҫсе кайнӑ. Ҫакӑ йӑлтах – пӗр апат кашӑкӗ 70 процентлӑ уксус ӗҫнӗшӗн. Ку ӑнсӑртран пулса иртнӗ, хӗрарӑм каланӑ тӑрӑх, вӑл ӑна пӗлмесӗр ӗҫнӗ.

Тухтӑрсем пӗр тӑхтамасӑр пациентӑн пурнӑҫӗшӗн кӗрешме тытӑннӑ: хырӑмлӑхне тасатнӑ, интенсивлӑ инфузиллӗ терапи тунӑ. Кун хыҫҫӑн хӗрарӑмӑн сывлӑхӗ палӑрмаллах лайӑхланнӑ.

«Контактри» сӑн

Чӑваш Республикинче тепӗр кинемей пӗр ӗмӗр чиккинчен каҫнӑ. Ҫак кунсенче Елчӗк округӗнче пурӑнакан Антонина Капсулова 101 ҫул тултарнӑ.

Антонина Михайловна Патреккел ялӗнче ҫуралса ӳснӗ. Шӑпи ҫӑмӑл килмен: вӑл пӗчӗк чухне тӑлӑха юлнӑ, 5 ҫулта чухне ӑна ҫывӑх тӑванӗсем усрава илнӗ. Вӑрҫӑ пуҫланнӑ чухне Антонина 16 ҫулти хӗр пулнӑ. Унӑн ӗҫ биографийӗ колхозри ӗҫпе ҫыхӑннӑ, унта вӑл рабочи пулнӑ.

1943 ҫулта Антонина Михайловна кӳршӗ ялти, Аслӑ Елчӗкри, каччӑпа Василипе ҫемье ҫавӑрнӑ. Анчах пурнӑҫ урапи каллех чӑхӑмланӑ: Антонина 42 ҫулта чухне упӑшки вилнӗ, вӑл пӗчӗк ачасемпе юлнӑ. Ҫапах хуҫӑлса ӳкмен – 8 ывӑлне ура ҫине тӑратнӑ.

Халӗ унӑн ҫемйи пысӑк: ачисем, мӑнукӗсем, кӗҫӗн мӑнукӗсем савӑнтараҫҫӗ.

«Контактра» халӑх тетелӗнчи сӑн

Чӑваш Енри актер, Елчӗк районӗнчи Аслӑ Таяпа ялӗнче ҫуралса ӳснӗ Владимир Тяптушкин, паян Пӗрремӗш каналти «Доброе утро» кӑларӑма хутшӑннӑ. Вӑл тӳрӗ эфирта пулнӑ.

Владимир кӑларӑмра «Ландыши. Такая, нежная любовь» телесериала мӗнле ӳкерни, хӑйӗн Демьян сӑнарӗ мӗнле ҫурални пирки каласа кӑтартнӑ, кулиса хыҫӗнчи самантсене те аса илнӗ.

Палӑртса хӑварар: пӗлтӗр Владимир Тяптушкин «Кинопоиск» платформӑра «Ландыши. Такая, нежная любовь» сериалта Демьян рольне калӑпланӑшӑн ТОП-10 актерсен йышне кӗнӗ.

Эсир паян ирхине эфира курса ӗлкӗреймен-и? Ҫак каҫӑпа курма пултаратӑр: https://www.1tv.ru/shows/dobroe-utro/nashi-gosti/vladimir-tyaptushkin-o-filme-landyshi-dobroe-utro-fragment-vypuska-ot-02-03-2026.