forum.na-svyazi.ru сӑнӳкерчӗкӗ

Чӑваш Енӗн митрополитечӗ Савватий Шупашкарта православи музейӗ уҫасшӑн. Ун валли Чӑваш Ен митрополийӗ хулари Воробьев композиторсен урамӗнчи 14-мӗш ҫурта пӑхса хунӑ. 1840-мӗш ҫулта хӑпартса лартнӑ ҫав ҫуртра хӑй вӑхӑтӗнче Тӗн училищи пулнӑ.

Иртнӗ ӗмӗрӗн 90-мӗш ҫулӗсен вӗҫӗнче республика ҫурта «Автоматизированные системы» тулли мар яваплӑ обществӑна 2025 ҫул вӗҫӗччен усӑ курма панӑ иккен. Вӑл ҫуртра халӗ пекарня, стриптиз-бар таранах пур.

Чӑваш Ен митрополийӗ ҫурта тавӑрасшӑн, унта православи музейӗ уҫасшӑн. Савватий пачӑшкӑ РФ Патшалӑх Думин депутатӗнчен Анатолий Аксаковран пулӑшу ыйтнӑ.

goodfon.ru сайтри сӑн

«Ҫанталӑк 21» сайт пӗлтернӗ тӑрӑх, ку эрнере шартлама сивӗ таврӑнӗ. Эрне пуҫламӑшӗнче циклон хуҫаланӗ, 2-5 сантиметр хулӑнӑш юр ҫӑвӗ. Хальлӗхе ҫанталӑк ӑшӑ тӑрӗ. Ыран 4-9 градус сивӗ пулӗ.

Кӗҫнерникун юр ҫума чарӑнӗ, сивӗтме пуҫлӗ: термометр 10-15 градус сивӗ кӑтартӗ. Ҫӗрле шартлама сивӗ пулӗ. Канмалли кунсенче Шупашкарта термометр 25-30 градус сивӗ кӑтартӗ, округсенче – 35 градус сивӗ.

Анчах хӗвел кунсерен ҫӳлерех хӑпарса пырӗ, ҫавна май унӑн ӑшши ытларах туйӑнӗ: ҫӗрле 30 градус сивӗ пулӗ, кӑнтӑрла вара – 20.

Малтанлӑха пӗлтернӗ тӑрӑх, шартлама сивӗ тунтикунччен пулӗ, кайран вара юр ҫума пуҫлӗ.

Инкеклӗ лару-тӑру министерстви тунӑ сӑн

Паян ҫӗрле, ҫур ҫӗр ҫитеспе, Ҫӗнӗ Лапсарти кайӑк-кӗшӗк фабрикинче пушар алхасма пуҫланӑ.

Пушар самай сарӑлнӑ, 2100 тӑваткал метр лаптӑк ҫинче алхаснӑ. Ҫулӑма сӳнтерес ҫӗре 69 ҫӑлавҫӑ, 20 техника хутшӑннӑ.

Инкеклӗ лару-тӑру министерстви малтанлӑха пӗлтернӗ тӑрӑх, предприяти ӗҫченӗсем шар курман.

«Контактра» халӑх тетелӗнчи сӑн

Шупашкарта пурӑнакан Сергей Самбулаткин карҫинккасем, тӗрлӗ япала ҫыхма ӑста. Унӑн ӗҫӗсене ярмӑрккӑсемпе фестивальсенче курма пулать. Вӑл регион тулашӗнче иртекеннисене те хутшӑнать.

Ку ӗҫпе вӑл 20 ҫул ӗнтӗ аппаланать. Малтанах Сергей Петрович Чӑваш Енри ӑстасем патӗнче вӗреннӗ, халӗ хӑй те – профессионал: ку ӑсталӑха ҫамрӑксене те вӗрентет. Унӑн вӗренекенӗсен хушшинче хӑлха япӑх илтнипе аптӑракансем те пур.

1905 ҫулта Н.А. Бобровников Патша манифесчӗ пирки текст кӑларнӑ, унта чӑвашсене Патшалӑх думине юрӑхлӑ ҫынсене суйлама чӗнсе каланӑ. 120 ҫул ытла унтанпа иртнӗ. Апла пулин те вӑл вӑхӑтри текст стилистики питӗ кӑсӑклӑ. Хӑй текстпа эсир Наци вулавӑшӗн сайтӗнче паллашма пултаратӑр.

Орфографи

Чи малтанах орфографие пӑхса тухар. Чӑн та, вӑл вӑхӑтра ҫирӗп орфографи правили пулман, ҫавна май йӑнӑшсем чылай тӗл пулаҫҫӗ. Ку кӗнекесене те вӑл вӑхӑтра наборласа ҫапнӑ — ҫакӑ та йӗр хӑварнӑ. Калӑпӑр, пӗр вырӑнта «кӗперне» тесе ҫырнӑ, тепӗр вырӑнта — «кӗпӗрне».

Халь эпир «уес» тесе ҫырма хӑнӑхнине «уяс» (уйас) тенӗ, ҫапла май вулама йывӑр «Хусан уйасин» (Хусан уесӗн) пулса тухнӑ.

Тепӗр вырӑн: «школа», «больница» сӑмахсем. 1905 ҫулсенче ку сӑмахсене чӑвашлатса ҫитереймен ӗнтӗ, ҫавӑнпа та вӗсене ҫапла ҫырнӑ. Пӗтӗмлетсе каласан, 1920–1930-мӗш ҫулсенче сӑмахсене ытла та чӑвашлатнишӗн ятланӑ пулин те вӗсен ӗҫӗ чӑваш ҫырулӑхне витӗм кӳнӗ-кӳнех.

Лексика

Усӑ куракан сӑмахсем те кӑсӑклӑ: мальен, кайьен.

Малалла...

cap.ru сайтри сӑн

Кӑрлачӑн 16-мӗшӗнче, Артист кунӗ умӗн, К.В.Иванов ячӗллӗ Чӑваш патшалӑх драма театрӗнче ҫак уява паллӑ тунӑ.

Унта театр, филармони, Чӑваш патшалӑх академи юрӑпа ташӑ ансамблӗн, капелла артисчӗсем пухӑннӑ. Уяв умӗн Театр ӗҫченӗсен пӗрлӗхӗн пайташӗсем театр искусствине халалланӑ артистсене аса илнӗ, Богдан Хмельницкий урамӗнчи Мухтав аллейине ҫитсе вӗсен вилтӑприсем ҫине чечексем хунӑ.

ЧР культура министрӗ Светлана Каликова чи лайӑх артистсене патшалӑх наградисем панӑ. Чӑваш патшалӑх юрӑпа ташӑ ансамблӗн артисчӗсем хаваслӑ юрӑсемпе савӑнтарнӑ.

«Про Город» телеграм-каналӗнчен илнӗ сӑн

Нумаях пулмасть Шупашкар хула администрацийӗ чи лайӑх дворниксене чысланӑ, ҫав йышра Тамара Тарасова та пулнӑ.

Тамара Львовна 65 ҫулта, вӑл Шупашкарта дворникре ӗҫлет. Ку профессире 17 ҫул тӑрӑшать. Тамара Львовна кашни ир ӗҫе Муркаш округӗнчи Мӑн Сӗнтӗртен килет.

«Мана килӗшет хамӑн ӗҫ. Эпӗ профессионал пуль ӗнтӗ. Эпӗ пӑхса тӑракан ҫуртсенче лайӑх ҫынсем пурӑнаҫҫӗ, мана хисеплеҫҫӗ», – тет вӑл.

«Контактра» халӑх тетелӗнчи сӑн

Чӑваш Ен спортсменки, Лана Прусакова фристайлҫӑ, Швейцарире иртекен ӑмӑртӑва хутшӑнать.

Лана унта Тӗнче кубокне ҫӗнсе илессишӗн тупӑшать.

Ӑмӑрту ҫак кунсенче Лакс хулинче иртет. Унта лайӑх кӑтартусем ҫӗнсе илнӗ спортсменсен кӑҫал хӗллехи Олимп вӑййисене хутшӑнма май килӗ. Вӑл вара нарӑсӑн 6-22-мӗшӗсенче Италири Милан тата

Кортина-д’Ампеццо хулисенче иртӗ.

cap.ru сайтри сӑн

Пӗлтӗр республикӑри ял хуҫалӑх организацийӗсем теплицӑра 32 пин тонна пахча ҫимӗҫ тата салат туса илнӗ. ЧР Ял хуҫалӑх министерстви пӗлтернӗ тӑрӑх, ку планпа пӑхса хунинчен 10 процент нумайрах. Хӑяр – 19,5 тонна, помидор – 12,5 пин тонна, салат 0,054 пин тонна туса илнӗ.

Республикӑра помидор-хӑяр теплицӑра ытларах туса илекенсем ҫаксем: «Новочебоксарский» теплица комплексӗ тата «Ольдеевский» агрофирма. Иккӗшӗ те Шупашкар округӗнче вырнаҫнӑ. Вӗсем Чӑваш Енре пурӑнакансене хӑяр-помидорпа тивӗҫтереҫҫӗ. Кунсӑр пуҫне хӑйсен продукцине 20 ытла региона ӑсатаҫҫӗ.

Пӗлтӗртенпе вара Етӗрне округӗнчи «Позитив» тулли мар яваплӑ общество салат ӳстерме пуҫланӑ.

https://t.me/pso_impuls21 телеграм-каналти сӑн

Кӑрлачӑн 10-мӗшӗнче Тӑвай округӗнчи Сӑхӑтпуҫ ялӗнче 39 ҫулти арҫын ҫухалнӑ. Ӑна тупнӑ. Анчах, шел те, вӑл чӗрӗ мар — шӑнса вилнӗ.

Арҫын килтен кӑрлачӑн 10-мӗшӗнче тухса кайсан таврӑнман. Ӑна шырама пуҫланӑ. Тепӗр виҫӗ кунран ӑна «Импульс» отряд хастарӗсем шырама килнӗ. Тӑванӗсем каланӑ тӑрӑх, арҫын нимпе те чирлемен. Вӑл Чечня вӑрҫинче пулнӑ, ҫавӑн кӑна сывлӑхне витӗм панӑ-мӗн.

Арҫынна шыранӑ чухне ялти камерӑсене те пӑхнӑ. Вӑл хӑш еннелле кайнине палӑртсан ҫавӑнта шыранӑ. Унӑн виллине ял хӗрринче юр ӑшӗнче тупнӑ.