Синоптиксем пӗлтернӗ тӑрӑх, пуш уйӑхӗн сивӗ тата юрлӑ пулӗ. Ҫапах 2008 тата 2013 ҫулсенчи пекех сивӗ пулмӗ. Ун чухне вӑтам температура 8-9 градус сивӗ пулӗ.

Пуш уйӑхӗнче вӑтам температура 6,5 градуспа танлашӗ. Нӳрӗк ытти чухнехинчен кӑшт нумайрах пулӗ. Ҫил ытларах ҫурҫӗр енчен вӗрӗ.

Пӗрремӗш декадӑра циклон хуҫаланӗ. Шупашкарта юр хулӑнӑшӗ 20 сантиметртан иртӗ.

Пушӑн юлашки кунӗсенче ҫуркуннехи ҫанталӑк ҫитӗ.

«Лиза Алерт» архивӗнчи сӑн

Канаш хулинче нарӑсӑн 15-мӗшӗнче ҫухалнӑ арҫынна шыраҫҫӗ. Унтанпа вӑл киле таврӑнман.

Ефимов Александр Ефимович 1953 ҫулта ҫуралнӑ. Вӑл 167 сантиметр ҫӳллӗш, вӑтам кӗлеткеллӗ, ҫӳҫӗ ҫырӑ, куҫӗ хӑмӑр. Ҫав кун мӗн тӑхӑнни паллӑ мар.

Ҫак арҫынна куракансене пӗр тӑхтамасӑр шӑнкӑравласа пӗлтерме ыйтаҫҫӗ: 8 800 700-54-52 (Раҫҫейре тӳлевсӗр). Е шырав инфоргӗпе Викторийӑпа (Искрич) ҫыхӑнмалла: 89876687081.

www.cap.ru сӑнӳкерчӗкӗ

Шупашкарта куҫ микрохирургийӗн музейне уҫасшӑн. Вӑл С.Н. Фёдоров академикӑн «Куҫ микрохирургийӗ» МНТКн Шупашкарти филиалӗнче пулӗ. Музея уйрӑм вырнаҫнӑ нумай ӗҫ пурнӑҫлакан ҫуртра уҫӗҫ.

Музей уҫас пирки Чӑваш Енӗн экономика аталанӑвӗн тата пурлӑх хутшӑнӑвӗсен министрӗ Дмитрий Краснов телеграм-каналта пӗлтернӗ.

Асӑнна филиал — пысӑк шайри офтальмологи пулӑшӑвӗ кӳрекен ҫӗршыври тӗп центрсенчен пӗри. Пӗлтӗр унта 38 пин ытла операци тунӑ. Филиал 37 ҫул хушши ӗҫленӗ вӑхӑтра филиал тухтӑрӗсем пулӑшнипе 900 пин ытла ҫын лайӑхрах курма пуҫланӑ.

Дмитрий Краснов шухӑшланӑ тӑрӑх, микрохирурги музейӗ туристсене те илӗртме пултарӗ. Космонавтика тата трактор историйӗн музейӗсенчен халӑх татӑлмасть-ҫке.

culture.cap.ru сӑнӳкерчӗкӗ

Пуш уйӑхӗн 2-мӗшӗнче К.В. Иванов ячӗпе хисепленекен Чӑваш академи драма театрӗнче Василиса Петрован юбилей каҫӗ иртӗ. Мероприяти 18 сехетре пуҫланӗ.

Василиса Петрова — Чӑваш Республикин культурӑн тава тивӗҫлӗ ӗҫченӗ. Вӑл 1960 ҫулхи пуш уйӑхӗн 2-мӗшӗнче Етӗрне районӗнчи Ванькушкӑнь ялӗнче ҫуралнӑ. 1983 ҫулта Мускаври Пӗчӗк театр ҫумӗнчи М.С. Щепкин ячӗллӗ Аслӑ театр училищинчен вӗренсе тухнӑ. Унтанпа Чӑваш патшалӑх академи драма тетарӗнче ӗҫлет.

pchd21.ru сӑнӳкерчӗкӗ

Паян, нарӑс уйӑхӗн 26-мӗшӗнче, Василий Эктел ҫуралнӑранпа 75 ҫул ҫитрӗ.

Вӑл — художник, чӑваш писателӗ, литература критикӗ, СССР Писательсен союхӗн членӗ, Чӑваш Республикин культурӑн тава тивӗҫлӗ ӗҫченӗ, «Тӑван Атӑл» журнал премийӗн лауреачӗ. Пултарулӑх ҫулӗн малтанхи тапхӑрӗнче лирика сӑввисемпе историпе философи поэмисем ҫырнӑ. Унсӑр пуҫне публицистикӑпа тата прозӑпа та ӗҫленӗ.

Вӑл Елчӗк районӗнчи Лаш Таяпа ялӗнче ҫуралса ӳснӗ. Учительте, Елчӗк районӗн архитекторӗнче, Шупашкарти электроаппарат завочӗн художникӗнче, Чӑваш телекуравӗнче, «Ялав» тата «Пике» журналсен редакцийӗсенче ӗҫленӗ. Ҫӗнӗ ӗмӗр пуҫламӑшӗнче республикӑри Профессионал писательсен фондне тата «Калем» издательствӑна ертсе пынӑ.

"Контактри" сӑн

Чӑваш Ен спортсменки Татьяна Александрова хӗллехи ишев енӗпе иртнӗ Пӗтӗм Раҫҫейри ӑмӑртура тӑватӑ ылтӑн медаль ҫӗнсе илнӗ.

Тупӑшу Калининград облаҫӗнчи Славск хулинче иртнӗ. Татьяна 25,50, 100 тата 200 метра ирӗклӗ майпа ишсе финиша чи малтан ҫитнӗ.

Ӑмӑртӑва Раҫҫейри 40 хулари, Латвири тата Беларуҫри 150 ытла спортсмен хутшӑннӑ. Спортсменсем уҫӑ бассейнра 5 градус ӑшӑ шывра ишнӗ.

"Контактри" сӑн

Шупашкарти Эгер бульварӗнче пурӑнакан хӗрарӑмӑн хваттерӗнчен лайӑх мар шӑршӑ тухнӑ, кӳршисем куншӑн ҫӑмхаласа ывӑннӑ. Приставсем те ку ыйтупа ӗҫленӗ. Хваттере дезинфекци тумалла пулнӑ. Анчах хӗрарӑм

ниепле те хушнине пурнӑҫламан.

Приставсем тинех ӑна хваттере ҫӳп-ҫапран тасаттарнӑ. Хӗрарӑм административлӑ майпа явап тыттарасран хӑранӑ ахӑртнех.

Ульяновск облаҫӗн чӑвашӗсем хӑйсен тӑван чӗлхепе тухса тӑракан пӗртен-пӗр „Канаш“ хаҫачӗ тухма тытӑннӑранпа 35 ҫул ҫитнине анлӑн палӑртрӗҫ. „Киндяковка“ Культура керменӗнче ҫӳллӗ шайра иртрӗ.

- Паян коллектив питӗ пӗчӗк, виҫӗ ҫынран кӑна тӑрать пулин те, Иван Яковлевӑн халалӗнчи „Эпӗ туса пӗтереймен ӗҫсене эсир туса пӗтерӗр“ девиза тӗпе хурса ӗҫленипе эпир кашни эрнере 8 страницӑллӑ, илемлӗ тӗслӗ хаҫата вулакан патне вӑхӑтра ҫитеретпӗр, Ульяновск облаҫӗн летопиҫне ҫырса пыратпӑр.

Пӗр сывлӑшпа сывлакан, пӗр тӗллевпе ӗҫлекен, маттур та пултаруллӑ ҫынсем, чӑн-чӑн профессионалсем вӗсем, манӑн ӗҫтешӗмсем Ирина Данилова яваплӑ секретарь тата пай пуҫлӑхӗ Елена Алексеева. Облаҫри тӗрлӗ ял-хулана ҫитсе пиншер ҫын шӑпипе тата чӑваш мероприятийӗсемпе паллаштарать вулаканӑмӑрсене Елена Геннадиевна.

Ирина Николаевна ҫав материалсене вырӑнлӑ лартма, илемлетме маҫтӑр. Хӑй те ятарлӑ пӗр страница илсе пырать. Пысӑк тав вӗсене, ҫавӑн пек йывӑр лава туртса пынӑшӑн, - палӑртрӗ хӑйӗн сӑмахӗнче тӗп редактор Елена Николаевна Мустаева.

Малалла...

Шупашкарта пурӑнакан пӗр хӗр ашшӗ-амӑшне йыта туянса парас тенӗ. Хайхисем Лабрадор ӑратлӑ йытта килӗштернӗ.

31 ҫулти учитель йытӑ ҫуришӗн 15 пин те 200 тенке куҫарса панӑ. Пӗлтерӗве хӗрарам мессенджерсенчен пӗринче асӑрханӑ.

Йытта сутаканни пӗртен пӗр ҫурӑ тӑрса юлнине пӗлтернӗ. Ӑна туянас тесен транспорт тӑкакне те саплаштармалла тесе каланӑ.

Хӗрарӑм укҫана куҫарса панӑ та йыта ҫуриллӗ пулайман.

kremlin.ru сайтри сӑн

Тӑван ҫӗршыв хӳтӗлевҫин кунӗ умӗн Чӑваш Енре ҫуралса ӳснӗ Андрей Буйлова РФ Президенчӗ Владимир Путин Раҫҫей Геройӗн ятне панӑ.

Андрей Александрович – генерал-майор, Ҫӗнӗ Шупашкарта ҫуралса ӳснӗ, Суворов ҫар училищинче ӑс пухнӑ. Халӗ вӑл мотострелоксен Александрийск 15-мӗш уйрӑм гварди бригадин командирӗ.

Ентешӗн бригадинчи 9 ҫар ҫынни, ҫав шутра командир та, Раҫҫей Геройӗн ятне тивӗҫнӗ.