Ҫак кунсенче пирӗн ҫӗршыв Аслӑ Ҫӗнтерӗве тунӑранпа 80 ҫул ҫитнине кӗтсе илме хатӗрленет. Шупашкарта та тӗрле шайри тӳре-шара ветерансем патне ҫитсе вӗсене уявпа саламлать, парнепе хавхалантарать.

Хӗрлӗ Чутай районӗнчи Хыркасси ялӗнче 1926 ҫулхи пуш уйӑхӗнче ҫуралнӑ, халӗ Шупашкрата пурӑнакан Иван Петрова та саламланӑ. Ун патне хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем пырса ҫитнӗ.

Сӑмах май каласан, унччен Иван Афанасьевич, ытти ветеран евӗрех, Ҫӗнтерӗве халалласа республикӑра пӗр хутчен паракан 20 пин тенкӗ укҫана тивӗҫнӗ тата федераци шайӗнчи 80 пин тенке.

glava.cap.ru сӑнӳкерчӗкӗ

Чӑваш Енӗн Правительствин тунтикунсерен иртекен ларӑвӗнче хальхинче кадрсене хатӗрлес ыйтӑва сӳтсе явнӑ. Специалистсене 2026 ҫулта тӗллевлӗ вӗрентме заказсене ҫу уйӑхӗн 14-мӗшӗччен тӑратмалла иккен. Кун пирки республика Элтеперӗ Олег Николаев палӑртса хӑварнӑ. Вӑл сывлӑх сыхлавӗпе вӗрентӗве тата экономикӑн тӗрлӗ секторӗнче кадр кадрсем пирки паянах шухӑшламаллине аса илтерсе хӑварнӑ.

Ака уйӑхӗн 28-мӗшӗ тӗлне 98 организацирен 253 тӗллевлӗ вырӑн пирки заявка хатӗрленӗ. Верену сферинчисем уйрӑмах хастар пулнӑ (74 организаци, 148 вырӑн), промышленность — (8 организаци, 53 вырӑн), ял хуҫӑлӑхӗ (10 организаци, 28 вырӑн), сывлӑх сыхлавӗ (2 организаци, 19 вырӑн).

Ӗнер тата паян республикӑра ӑшӑ, анчах ҫиллӗ. Синоптиксем пӗлтернӗ тӑрӑх, кӗҫӗр тата ыран ирхине ҫумӑр ҫӑвӗ, вырӑнӑн-вырӑнӑн – вӑйлах. Аслати авӑтма пултарать.

Уяв кунӗсенче ҫанталӑк кӑшт уҫӑрах пулӗ, кӑнтӑрла 10-15 градус кӑна ӑшӑ пулӗ. Ҫу уйӑхӗн 8- тата 11-мӗшӗсенче ҫумӑр ҫӑвӗ, ҫил лӑпланӗ. Ҫу уйӑхӗн 12-мӗшӗнче чи сивӗ кун пулӗ. Ҫу уйӑхӗн 14-мӗшӗнченпе 20 градус ӑшӑ хуҫаланма тытӑнӗ.

Мальвина Петрова архивӗнчи сӑнӳкерчӗк

Шупашкарти Анастасия Красильникова 10 километра чупассипе Хусанти марафонта ылтӑн медале ҫӗнсе илнине эпир унччен пӗлтернӗччӗ-ха. Пӗтӗм Раҫҫейри ӑмӑртӑва Чӑваш Енри Мальвина Петрова та хутшӑннӑ.

Хусанта ҫу уйӑхӗн 3-4-мӗшӗсенче иртнӗ ӑмӑртӑва 35 пине яхӑн ҫын хутшӑннӑ.

Чӑваш хӗрарӑмӗ 35-39 ҫулсенчи спортсменсем хушшинче 1-мӗш вырӑн йышӑннӑ.

21.мвд.рф сӑнӳкерчӗкӗ

Чӑваш Енри пӗр ҫын масар ҫинчи картана вӑрланӑ.

Чӑваш Енӗн Шалти ӗҫсен министерствинче пӗлтернӗ тӑрӑх, ӑна пӗри вил тӑпри ҫине тимӗр карта тытма ыйтнӑ. Лешӗ тепӗр вил тӑпри ҫинчен куҫарса кайнӑ.

Пӑтӑрмах пирки ака уйӑхӗн вӗҫӗнче 61 ҫулти хӗрарӑм пӗлтернӗ.

Улатӑрти 33 ҫулти арҫынна пӗрисем тимӗр карта тытма пӗлтӗрхи ҫурла уйӑхӗнче ыйтнӑ. Унччен судпа айӑпланнӑ арҫын тепӗр ҫӗртен куҫарса кайса вырнаҫтарнӑ.

21.мвд.рф сӑнӳкерчӗкӗ

Украинӑри Днепропетровск облаҫӗнче ҫуралнӑ арҫын 2017 ҫулхи кӑрлач уйӑхӗнче Раҫҫей гражданинӗ пулса тӑнӑ. Вӑл Шупашкарта тӗпленнӗ, кунта регистрациленнӗ.

Кӑҫалхи ҫуркунне Раҫҫейӗн Федеарцин хӑрушсӑрлӑх службин ӗҫченӗсем 34-ри ҫӑв арҫын ҫӗршыва хирӗҫле ӗҫ тунине пӗлтернӗ. Ҫавна май унӑн Раҫҫей гражданствине, унӑн пирӗн ҫӗршывра тата ют ҫӗршывра уса курма май паракан паспорчӗсене пӑрахӑҫланӑ. Кунсӑр пуҫне ӑна Шупашкарти пропискӑсӑр та хӑварӗҫ.

cap.ru сӑнӳкерчӗкӗ

Шупашкарти Анастасия Красильникова 10 километра чупассипе Хусанти марафонта ылтӑн медале ҫӗнсе илнӗ. Пӗтӗм Раҫҫейри ӑмӑртура Михаил Кузнецов тренерӑн вӗренекенӗ 10 ҫухрӑма 32 минут та 29 ҫеккунтра чупса тухнӑ.

Анастасия Красильникова 3 пин километра чупассипе — ҫамрӑксем хушшинче Раҫҫейӗн рекордсменки.

«Ирхине ҫумӑр ҫӑватчӗ, кайран вӑл чарӑнчӗ, чупма ҫӑмӑл пулчӗ, ҫил те вӑйлӑ марччӗ», – каласа кӑтартна спорстменка.

vk.com/mintrud_21 сӑнӳкерчӗкӗ

Каҫал тӑрӑхӗнче пурӑнакан Сергей Леонтьевялта ӗҫлеме яланах ӗмӗтленнӗ. Ялти хуҫалӑха патшалӑх укҫипе, социаллӑ контракт йӗркипе, аталантарма май пуррине пӗлсен ҫамрӑк арҫын хытах ҫунатланнӑ.

Социаллӑ контаркта ала пуснӑ хыҫҫӑн панӑ укҫапа вӑл 15 вӑкӑр туяннӑ.

«Выльах-чӗрлех ӗрчеетссипе ҫине тӑма эпӗ унчченех ӗмӗтленнӗ», — каласа кӑтартнӑ Сергей.

"Контактри" сӑн

Олимп резервӗсен 3-мӗш спорт шкулӗнче ӑсталӑхне туптакан Савелий Фролов триатлон енӗпе иртнӗ Раҫҫей ӑмӑртӑвӗнчен ылтӑн медальпе таврӑннӑ.

Вӑл 13-14 ҫулсенчи спортсменсемпе «дуатлон-спринт» дисциплинӑра ӑмӑртнӑ. Вӑл 25:42 кӑтартупа пурне те парӑнтарса пьедесталӑн ҫӳлти картлашки ҫине хӑпарнӑ.

Палӑртса хӑварар: Савелий Фролов Сергей Сусметов тренер патӗнче ӑсталӑхне туптать.

«Контактри» сӑн

Шупашкарта «Чӑваш Ен мисне» суйланӑ. Кӑҫал 30-мӗш хут иртнӗ конкурсра тӗп хулари 4-мӗш гимназине ӑс пухакан Влада Комарова ҫӗнтернӗ.

Ӑна коронӑна пӗлтӗр «Чӑваш Ен мисӗ» ята тивӗҫнӗ Алла Кадеева панӑ. Конкурса курма тата унта хутшӑнакансене хавхалантарма 2023 ҫулти «Чӑваш Ен мисӗ» тата пӗлтӗр «Тӗнче уҫлӑхӗн мисӗ» ята тивӗҫнӗ Валентина Алексеева та килнӗ.