"Котактри" сӑн

15 ҫулти Ольга Перепелкина урамра пынӑ чухне пӗр хӗрача тӑрук ӳксе хускалми пулнине асӑрхасан ӑна пӗр тӑхтамасӑр пӗрремӗш медпулӑшу кӳме тытӑннӑ, васкавлӑ медпулӑшу чӗннӗ.

Ольга ҫынна пӗрремӗш медпулӑшу мӗнле памаллине лайӑх пӗлет. Вӑл - «Воин» центр курсанчӗ. «Паллах, ку манекенпа тренировка ирттернинчен йывӑртарах пулчӗ. Анчах шухӑшлама вӑхӑт ҫуккине ӑнланатӑп», - тенӗ Ольга. Тухтӑрсем киличчен 3 минут маларах хӗрача куҫне уҫса сывласа янӑ.

Ольгӑшӑн тактика медицини питӗ интереслӗ. Вӑл шкулта ку енӗпе вӗренӳ проектне те пуҫарнӑ. Унӑн команди пӗрремӗш медпулӑшу парас енӗпе регион шайӗнче иртнӗ чемпионатра пӗрремӗш вырӑн йышӑннӑ. Ольга халӗ Рязаньти сывлӑш десанчӗн училищине е Ҫар-космос академине вӗренме кӗмешкӗн ӗмӗтленет.

Раҫҫей Президенчӗн Владимир Путинӑн Атӑлҫи округӗнчи полномочиллӗ представителӗн ҫумӗ пулма пирӗн ентеше шаннӑ. Вӑл – Александр Тихонов.

Александр Тихонов Елчӗк районӗнче ҫуралнӑ. Вӑл ҫӗнӗ должноҫра чи малтан ятарлӑ ҫар операцине хутшӑнакансене тата вӗсен ҫемйисене пулӑшассипе ҫыхӑннӑ ыйтусемпе ӗҫлесшӗн.

Палӑртмалла: Александр Тихонов – Паттӑрлӑх орденӗн кавалерӗ. Вӑл ятарлӑ ҫар операцине, ҫӗршыв Президенчӗн пуҫарӑвӗпе йӗркеленӗ «Геройсен вӑхӑчӗ» программӑна хутшӑннӑ.

"Контактри" сӑн

Ҫӗмӗрле округӗнче Сӑр юханшывӗ урлӑ каҫмалли хӗллехи кӗпере уҫнӑ. Вӑл Чӑваш Енпе Чулхула облаҫне ҫыхӑнтарӗ.

Унӑн тӑршшӗ – 150 метр тӑршшӗ.

Кӗпер тӑрӑх сехетре 10 ҫухрӑм хӑвӑртлӑхпа ҫӳреме юрать.

Сӑмах май, ытти ҫул кӗпере раштав уйӑхӗнче уҫнӑ. Кӑҫал вара ку ӗҫ вӑраха тӑсӑлнӑ.

chuvbook.ru сӑнӳкерчӗкӗ

Чӑваш кӗнеке издательствинче типографире Владимир Степановӑн «Ӑннӑ та ӑнман кун» кӑларӑмӗ пичетленсе тухнӑ. Ольга Австрийская автор хыпарланӑ тӑрӑх, аслӑ классенче вӗренекенсем валли хатӗрленӗскерне пӗр калав кӗнӗ. Унӑн алҫырӑвӗ ачасемпе ҫамрӑксем валли чӑвашла ҫырнӑ произведенисен 2024 ҫулхи конкурсӗнче ҫӗнтернӗ. Кӗнекен редакторӗ – Ольга Иванова. Тиражӗ – 1000 экземпляр.

Владимир Степанов 1962 ҫулхи нарӑс уйӑхӗн 8-мӗшӗнче Патӑрьел районӗнчи Упамса ялӗнче ҫуралнӑ. И.Н. Ульянов ячӗллӗ Чӑваш патшалӑх университетӗнче вӗреннӗ. Ҫӗрпӳри «Октябрь ҫулӗ» хаҫатра, каярах «Халӑх шкулӗ», «Лик Чувашии», «Самант» журналсенче ӗҫленӗ. 2017 ҫултанпа Чӑваш кӗнеке издательствинче тӑрӑшать, 2023 ҫултанпа – тӗп редакторта.

chuvbook.ru сӑнӳкерчӗкӗ

Чӑваш кӗнеке издательствинче «Чӑваш ҫыравҫисем – фронтра. Чувашские писатели – на фронте» кӑларӑмӑн 1-мӗш кӗнеки кун ҫути курнӑ. Ӑна Эвелина Малеева, Ольга Федорова, Татьяна Захарова тата Алексей Кузьмин пухса хатӗрленӗ, ӳнерҫи – Дмитрий Литаврин.

Кӗнеке издательствинче пӗлтернӗ тӑрӑх, кӗнекене ҫӗнтерӗве ҫывхартма пулӑшнӑ чӑваш писателӗсемпе Чӑваш ҫӗрӗ ҫинче ҫуралса ӳснӗ вырӑсла ҫыракан калем ӑстисене кӗртнӗ. «Кӑларӑм вӗсен пурнӑҫӗпе тата пултарулӑхӗпе паллаштарать, унта вӑрҫӑ темипе хайланӑ произведенисене кӗртме тӑрӑшнӑ. Пӗрремӗш кӗнекене поэзи тата проза жанрӗпе ҫырнӑ хайлавсем кӗнӗ», — хыпарланӑ кӗнеке издательствинче. Авторсене алфавит йӗркипе вырнаҫтарнӑ.

2-мӗш кӗнекене проза тата драматурги жанрӗсемпе ҫырнӑ хайлавсем кӗрӗҫ.

cap.ru сайтран илне сӑнӳкерчӗк

Кӑрлач йӑхӗн 31-мӗшӗнче Чӑваш тӗррин музейӗнче Анастасия Андреева тӗрӗҫе асра тытса «Вышивка длиною в жизнь» (чӑв. Ӗмӗре пына тӗрӗ) курав уҫӑлӗ.

Анастасия Андреева «Паха тӗрӗ» фирмӑра ӗҫлесе ӗмӗрленӗ. 2021 ҫулта вӑл Шупашкар районӗн тӗрленӗ карттине хатӗрлеме хутшӑннӑ, тепӗр ҫулхине — Раҫҫейӗн тӗрленӗ карттине.

«Пӗлтӗр эпир Анастасия Васильевнӑпа унӑн 65 ҫулхине халалланӑ курава уҫассине сӳтсе явма тытӑннӑччӗ. Анчах вӑл пурнӑҫран пӗлтӗрхи раштав уйӑхӗн 15-мӗшӗнче уйрӑлса кайрӗ», – каласа кӑтартнӑ Чӑваш тӗррин музейӗн заведующийӗ Надежда Сельверстрова.

cheb-centr.soc.cap.ru сӑнӳкерчӗкӗ

Пирӗн республикӑра пурӑнакан вӑрҫӑ ветеранӗсене Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халалласа кӑларнӑ юбилей медалӗсем пама пуҫланӑ. Паян ӑна Шупашкарта пурӑнакан Надежда Лабузова тивӗҫнӗ.

Ун патӗнче паян хула пуҫлӑхӗ Владимир Доброхотов тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ Светлана Милкина пулнӑ.

Надежда Лабузова 1936 ҫулта Смоленск тӑрӑхӗнче ҫуралнӑ. Хӑйсен ялне нимӗҫсем ярса илнине те вӑл аван астӑвать. Шупашкара Костромари технологи институтӗнчен вӗренсе тухнӑ хыҫҫӑн Шупашкара направленипе килнӗ. Кунти пир-авӑр комбинатӗнче ӗҫлесе ӗмӗрленӗ.

"Контактри" сӑн

Чӑваш «моржӗсем» Выкса хула округӗнче иртнӗ уҫӑ чемпионатра палӑрнӑ. Вӗсем ишсе 11 медаль 7 кубок ҫӗнсе илнӗ. Унсӑр пуҫне команда эстафетӑра 2 кубока тивӗҫнӗ.

Андрей Гориянов тата Андрей Чекменев ирӗклӗ ишсе ылтӑн медале тивӗҫнӗ. Александра Мудрая ылтӑн тата икӗ кӗмӗл медаль илнӗ. Татьяна Александрова вара икӗ ылтӑн тата 1 пӑхӑр медаль ҫӗнсе илнӗ. Михаил Андронов пӗрремӗш вырӑна ҫӗнсе илнисӗр пуҫне «Ҫӗнтерӳ патне талпӑннӑшӑн» наградӑна тивӗҫнӗ.

Чӑваш Енӗн пӗрлештернӗ команди эстафетӑра кӗмӗл медаль тата команда кубокне илнӗ.

culture.ru сайтри сӑн

Шупашкарта пурӑнакан 35 ҫулти хӗрарӑм криптовалютӑпа ӗҫлесе илес тенӗ те ултавҫӑсен аллине лекнӗ. Хӑй – хулари предприятире касса уйрӑмӗнче ӗҫлекенскер.

Вӑл юпа уйӑхӗнче паллашу сайтӗнче арҫынпа ҫырӑнма пуҫланӑ. Лешӗ ӑна пысӑк укҫа ӗҫлесе илме сӗннӗ. Унӑн иккӗмӗш сыпӑкри пиччӗшӗ, Лев ятлӑскер, Австрире криптовалюта аналитикӗ-мӗн. Хайхискер пулӑшӗ имӗш.

Ҫав палламан ҫынна 35-ри хӗрарӑм кӑна мар, амӑшӗ те ӗненнӗ. Вӑл хӗрне 4 миллион тенкӗ панӑ. Чӳк уйӑхӗнче хӗрарӑм тӗрлӗ счет ҫине 900 пин тенкӗ куҫарнӑ, раштавра – тепӗр 3 миллион та 250 пин тенкӗ. Ҫӗнӗ ҫул умӗн кӑна хӑй ултавҫӑсене серепине лекнине ӑнланнӑ.

Кун тӗслӗх тӗлӗшпе пуҫиле ӗҫ пуҫарнӑ.

oren.mk.ru сайтри сӑн

Кӑрлачӑн 25-мӗшӗнче ирхи 5 сехетре Шупашкарти «Керосинка» каҫхи клубра бомба хуни пирки полицие шӑнкӑрааласа каланӑ. Экстреннӑй службӑсем вырӑна ҫитсе ҫынсене эвакуациленӗ те тӗрӗслев пуҫарнӑ.

Хыпар суя пулни палӑрнӑ. Полицие хулара пурӑнакан 22-ри хӗр шӑнкӑравланӑ иккен. Кӑшт маларах вӑл хуралҫӑпа хирӗҫнӗ, лешӗ ӑна хӑйне килпетсӗр тытнӑран урама кӑларса янӑ. Хӗр тарӑхнипе ӑна ҫапла майпа тавӑрас тенӗ иккен.