Ҫӗнӗ кӳлепесенчен пӗри. Автор: Сантӑр Пикл

Ӗнер, ҫӑвӑн 27-мӗшӗнче, йӑлӑм енчи «Сувар» этнокультура паркӗнче 12-мӗш хут иртекен ниме-симпозиума пӗтӗмлетнӗ май 6 ҫӗнӗ сӑнарлӑ кӳлепе вырнаҫтарчӗҫ — пӗтӗмӗшле шутласан паркри шӗпсутсен шучӗ 130-тан та иртрӗ теме пулать.

Хальхинче скульпторсен йышӗ юрату йывӑҫӗ таврашне илемлетрӗ. Сантӑр Пикл, Станислав Еткер, Микуҫ Балтай тӗрлӗ енлӗ юрату сӑнарне йывӑҫран касса кӑларса кӳлепесем хатӗрлерӗҫ. Шӗпсутҫӑсен шутӗнче икӗ студент (диплом ӗҫӗ пек хатӗрленӗ) пурри те симпозиум-ниме ӗҫне самай ӳстерет. Юрату йывӑҫне тупма пулӑшакан кӑтартмӑша ҫул хӗррине, иртсе каякансем курмалла лартрӗҫ.

Паян вара ниме-симпозиума вӗҫлесе унта чӳк иртерӗҫ — ҫӳлти хӑватсене пуҫ тайӗҫ, ӗҫе вӗҫленӗ май така пусса шӳрпе ҫиӗҫ.

Сӑнсем: 1 пай (тулли пай, 179 сӑн), 2 пай (тӗп сӑнсем, 40 сӑн)

К.И.Косачев

Ҫӑвӑн 23-мӗшӗнче Трак енре РФ Патшалӑх Думине Чӑваш Енрен суйланнӑ депутат, Раҫҫей парламенчӗн Ют ҫӗршыв ӗҫӗсен комитечӗн председателӗ Константин Иосифович Косачев пулнӑ. Малтанах Мускав хӑни хӑйӗн пулӑшаканӗпе, ЧР Патшалӑх Канашӗн депутачӗпе А. Разумовпа, республика парламенчӗн депутачӗпе, Шупашкарти коопераци институчӗн ректорӗпе В. Андреевпа пӗрле район администрацийӗн пуҫлӑхӗ В. Александров, район пуҫлӑхӗ В. Григорьев ертсе пынипе «Хӗрлӗ Сурӑм» (Красное Сормово) хуҫалӑхра, «Чулхула Газпромтрансгаз» ТМЯО филиалӗнче — Заволжски ЛПУМГра пулса курнӑ, вӗсенчи ӗҫ-хӗлпе паллашнӑ. Кӑнтӑрла ҫитеспе К. Косачев районти активпа тӗл пулнӑ.

Малтанах хӑнасем Яманак тӑрӑх ҫӳренӗ, «Хӗрлӗ Сурӑм» ТМЯО сӗт-ҫу ферминче пулса курнӑ.

Асӑннӑ хуҫалӑх Трак енри ял хуҫалӑх предприятийӗсем хушшинче ҫирӗп те тӗреклӗ аталанса пыраканнисенчен пӗри. Вӑл 2008 ҫултан Чӑваш Енри чи лайӑх 100 хуҫалӑх шутне кӗрет. Иртнӗ ҫулхи сӗт пахалӑхӗн кӑтартӑвӗсемпе асӑннӑ общество республикӑра виҫҫӗмӗш вырӑн йышӑннӑ. Кунта сухаламан пӗр ҫӗр лаптӑкӗ те ҫук. Ҫулленех ҫӗнӗ техника туянаҫҫӗ, уй-хир тата выльӑх-чӗрлӗх продукчӗсен кӑтартӑвӗсем ҫуллен-ҫул ӳссе пыраҫҫӗ.

Малалла...

Чечек хунӑ самант

Паян, чӑваш литературин классикӗ К.В. Иванов ҫуралнӑ кун, поэтӑн палӑкӗ умне чечексем хучӗҫ. Мероприятие Чӑваш Енӗн культура министерстви ӗҫченӗсем, ҫыравҫӑсем, сӑвӑҫсем, культурӑпа ӳнер ӗҫченӗсем, вӗрентекенсем, шкул ачисем хутшӑнчӗҫ.

Палӑк умӗнчи пухӑва чӑваш халӑх юррисене юрлакан Чӑваш патшалӑх пукане театрӗ актриси уҫрӗ — пушкӑрт чӑвашӗсен халӑх уююрине юрласа пачӗ. Мероприятие ертсе пыракан «Хыпар» хаҫатӑн тӗп редактор ҫумӗ Геннадий Максимов пухӑннисен умӗнче тепӗр хут К.В. Ивановӑн пӗлтерӗшӗ пирки асӑнчӗ. Пухура тухса калаҫакансем шутӗнче культура министерствин пай пуҫлӑхӗ Михаил Краснов, ҫавӑн пекех Порфирий Афанасьев, Валерий Туркай, Анатолий Ефимов, Светлана Асамат, Денис Гордеев, Лидия Сарине, Альбина Юрату сӑвӑҫсемпе ҫыравҫӑсем пулчӗҫ.

Малалла...

Ыран, ҫу уйӑхӗн 27-мӗшӗнче, кӑнтӑрла хыҫҫӑн 14 сехетре «Сувар» этнокультура паркӗнче кӑҫалхи ниме-симпозиума вӗҫлесе 6 сӑнарлӑ кӳлепе лартӗҫ. 12 ҫул ирттернӗ май Атӑлӑн йӑлӑм енчи «Чувашия» санатори ҫумӗнче пурӗ 130 яхӑн шӗпсут (сӑнарлӑ кӳлепе) вырнаҫтарнӑ. Кӑҫал «Юрату» («Анне юратӑвӗ» патӗнче) кӳлепи таврашне илемлетме шутлаҫҫӗ — чӑваш халӑх мифологийӗпе ҫыхӑннӑ ултӑ юпа хутшӑнӗ.

Уралеев пахчи

Ҫапла, иртнӗ шӑматкун Етӗрне районӗнчи Мучар ял тӑрӑхӗнче чи капӑр та илемлӗ пахчана шырарӗҫ. Пурӗ ку тӑрӑха 6 ял кӗрет — Заштранкӑ, Кӗҫӗн Чураш, Тури Мучар, Чаканар, Шоркка тата администраци вырнаҫнӑ Анат Мучар. Шӑп вӑл ял ҫыннисен тупӑшма лекрӗ те ӗнтӗ «Xи капӑр пахча» ятне тивӗҫес тесе.

Ӑмӑртӑва пӗтӗмлетнӗ май чи капӑр пахча ятне Чаканарти Уралеев Владимир Николаевич хуҫалӑхӗ илме тивӗҫ пулчӗ. Чӑн та вӗсен пахчинче йӑрансене тюльпан лартса уйӑрса тухнӑ. Ҫырла тӗммисем те хитрен лараҫҫӗ, шуратнӑ улмуҫҫи вуллисем те илемлӗн курӑнаҫҫӗ, куҫа савӑнтараҫҫӗ.

Сирӗн ялта кам пахчи капӑртарах?

Уявра

Йӑнтӑрчӑри (Тӑвай районӗ) пӗтӗмӗшле вӑтам пӗлӳ паракан шкулти 12 хӗрпе каччӑ ӗнер шӑнкӑрав сассине юлашки хут итлерӗҫ. Ытти хӑнасемпе пӗрле Йӑнтӑрчӑ ял тӑрӑхӗн пуҫлӑхӗ те шкул пӗтерекенсене саламларӗ.

«Тунсӑхлӑ та, савӑнӑҫлӑ та сире, хаклӑ шкул пӗтерекенсем. Итрсе каякан ачалӑхӑн уявӗ ку, пурнӑҫӑн пӗр тапхӑрӗпе сывпуллашса илӗртӳллӗ пуласлӑхпа тӗл пулни. Малашлӑх ҫулӗ ҫинче сирӗн яланах телейпе ӑнӑҫу пултӑр, хаклӑ выпускниксем...» — терӗ вӑл хӑйӗн сӑмахӗнче.

Чӑваш халӑхӗн ӗҫпе наци тата культура йӑли-йӗркине малалла ҫирӗплетсе пырас, Тӑван ҫӗршыв хӳтӗлевҫисен ҫар мухтавне тата паттӑрлӑх историне илемлӗх хатӗрӗсемпе пропагандӑлас, ҫамрӑксене патриотла ӳстерес, тӑван ене хисеплесе юратма вӗрентес тата сывӑ пурнӑҫ йӗркине анлӑрах сарас тӗллевпе кӑҫалхи ҫӗртмен 4-мӗшӗнче, шӑматкун, Краноармейски ялӗнче, вӑрман ҫывӑхӗнчи «Факел» стадионта «Акатуй-2011» ирттереҫҫӗ.

Хальхинче ӑна Раҫҫей космонавтикин ҫулталӑкне тата хамӑр ентеш — Совет Союзӗн Геройӗ В.В. Васильев ҫуралнӑранпа 100 ҫул ҫитнине халаллаҫҫӗ.

«Акатуй» ирттерме район администрацийӗн пуҫлӑхӗн йышӑнӑвӗпе йӗркелӳ комитетне туса хунӑ, унӑн председательне район администрацийӗн пуҫлӑхӗн экономика ыйтӑвӗсемпе ӗҫлекен ҫумне, ял хуҫалӑх, экономика тата обществӑлла инфратытӑм аталанӑвӗн управленийӗн начальникне И.В. Степанова суйланӑ.

Чӑваш тӑрӑхӗнчи шкулсенче ҫулсерен ҫу вӗҫӗнче «Юлашки шӑнкӑрав» уяв иртет. Кӑҫал та тӑван шкулти шӑнкӑрав юлашки хутччен 11-мӗш класра вӗренекен 5 500 ачашӑн, 13 пин 9-мӗш класрисемшӗн (пӗлтӗрхи кӑтартусем: 11 кл. — 7,7 пин; 9 кл. — 14,1 пин) янӑрарӗ.

Кашни шкулта тенӗ пекех паян чаплӑ уявсем иртрӗҫ — шкул ачисемпе ашшӗ-амӑшӗсем, вӗрентекенсем тата ыттисем пухӑнчӗҫ, вӗренсе тухакансене саламларӗҫ. Ӗнер кунашкал уяв Элӗк, Канаш, Вӑрмар районӗсенче тата Канашра вӗренекенсен пулчӗ.

Малашнехи ҫула ҫамрӑксен хӑйсен суйламалла пулӗ — кам малалла вӗренес тейӗ, кам пурнӑҫа урӑхла йӗркелес тейӗ.

Вӗренсе тухакансене патшалӑх экзаменӗсене ӑнӑҫлӑ тытма, ӳлӗмхи пурнӑҫа тӗрӗс суйлама сунатпӑр!

Ухсай Яккӑвӗ ячӗллӗ культура керменӗнче Чӑваш халӑх поэчӗ Валери Туркай 50 ҫул тултарнине халалланӑ литературӑпа юрӑ-кӗвӗ каҫӗ иртнӗ.

Юбиляра ЧР культура министрӗ Роза Лизакова саламланӑ, ЧР Президенчӗн Михаил Игнатьевӑн Тав хучӗпе чысланӑ. Поэтӑн вӗрентекенӗ Виталий Станьял ӑсчах Валери Туркай хӑйне евӗрлӗ, пултаруллӑ сӑвӑҫ пулнине палӑртнӑ.

Тутарстан культура министрӗн ҫумӗ Ираида Аюпова, Тутар Республикин Писательсен союзӗн правленийӗн председателӗ Илфак Ибрагимов тата Тутар халӑх поэчӗ, ЧР культурӑн тава тивӗҫлӗ ӗҫченӗ Ренат Харис юбиляра тутар наци культурине аталантарас тӗлӗшпе вӑй хунӑшӑн «Тутар Республикин культурӑн тава тивӗҫлӗ ӗҫченӗ» патшалӑх наградипе чысланӑ.

Чӑваш Ен, Тутарстан, Чӗмпӗр облаҫӗн культурӑпа ӳнер ӗҫченӗсем, Комсомольски район администрацийӗн тата ентешлӗхӗн представителӗсем поэта малашне те пултарулӑхра ӑнӑҫу суннӑ.

Малалла...

Упи ял тӑрӑхӗнче

Ҫу уйӑхӗн 18-мӗшӗнче Трак енре те черетлӗ Пӗрлӗхлӗ информаци кунӗ пулчӗ. Ун вӑхӑтӗнче тӑван тавралӑха сыхлас, йывӑҫсем лартас, пушартан асӑрханас, ачасемпе ҫамрӑксен ҫуллахи канӑвне йӗркелес тата ытти ыйтусене тишкерчӗҫ. Информаци кунне хутшӑнма района Чӑваш Республикин юстици министрӗ Н. В. Прокопьева ертсе пыракан информаци ушкӑнӗ килчӗ.

Пирӗн ушкӑн вара (унта РФ Пенси фончӗн районти управленийӗн ертӳҫин ҫумӗ Г.Ф. Петрова, район администрацийӗн право тата кадрсен ӗҫӗн пайӗн начальникӗ А.А. Павлов тата ку йӗркесен авторӗ кӗчӗҫ) Упи ял тӑрӑхне ҫитрӗ. Ял тӑрӑхӗн ертсе пыракан специалист эксперчӗ А.А. Алексеева тата специалисчӗ И.И. Егорова тарават йышӑнчӗҫ. Ираида Ивановна каланӑ тӑрӑх, кулленхи ӗҫре ял-урама тирпей-илем кӗртессипе ҫыхӑннӑ ыйтусем тӗпре тӑраҫҫӗ. Кашни эрне кунах ял ҫыннисем санитари кунне тухаҫҫӗ. Ҫӗнтерӳ кунӗ умӗн Тӑван ҫӗр-шывӑн Аслӑ вӑрҫинче вилнӗ ентешсене асӑнса Упире, Тусайра, Пайсупинра тата Янмурҫинра лартнӑ палӑксене сӑрланӑ, тавралла тытнӑ картасене ҫӗнетнӗ.

Малалла...