|
Раштавӑн 22-мӗшӗнче Шӑхасанти физкультурӑпа спорт комплексӗнче арҫын ушкӑнӗсен хушшинче Канаш районӗн волейбол кубокӗ иртрӗ. Унта Тӑвай районӗн ушкӑнӗ те хутшӑнчӗ. Хӑйсен ушкӑнӗнче иккӗмӗш вырӑн йышӑннӑ хыҫҫӑн ҫурма финалта вӑл тепӗр ушкӑнта пӗрремӗш вырӑн йышӑннӑ Вӑрнар районӗн ушкӑнӗпе выляма тӳр килчӗ. Чи малтан вӑйӑ Тӑвайсене майлӑ пычӗ — 1-мӗш партинче ҫӗнтерчӗҫ, анчах та вӗҫӗнче Вӑрнар районӗн ушкӑнӗ лайӑхрах выляма пуҫланӑ пирки Тӑвайсем выляса ячӗҫ. 3-мӗш вырӑншӑн Комсомольски районӗн ушкӑнӗпе ӑмӑртма тиврӗ. Йывӑр кӗрешӳре ҫӗнтерсе ҫак волейбол кубокӗнче 3-мӗш вырӑн йышӑнчӗҫ. 1-мӗш вырӑн Вӑрнарсене, 2-мӗш вырӑн Шупашкар районӗн ушкӑнне лекрӗ.
|
|
2008-2010 ҫулсем хушшинче Шупашкарта пысӑк промышленность центрӗ — индустриллӗ техника паркне уҫасшӑн. Кун пирки хула мэрийӗн пресс-служби пӗлтерчӗ.
Хула мэрийӗ пӗлтернӗ тӑрӑх вӑл центр валли пурӗ 10 гектар ҫӗр уйӑрса парасшӑн, производство лаптӑкӗ 25 пин тв. м. ытла пулӗ, ӑна хута ямашкӑн 30 миллион доллар укҫа-тенкӗ тӑкаклама шутланӑ.
Чи малтан бетонпа пуҫтаруллӑ тимӗр-бетон кӑларакан заводсем туса лартма палӑртнӑ. Вӗсен шутне хӑвӑллӑ мачча плитисене кӑларан цехсем те кӗрӗҫ.
Иккӗмӗш хутӗнче вара горизонтальлӗ тата вертикальлӗ май хӑпартмалли элементсене тата металл конструкцийӗсен завочӗсене тума палӑртнӑ.
Технопарка регионти промкомплекса аталантармалли тата "Раҫҫей гражданӗсене ҫителӗклӗ тата хӑтлӑ ҫуртсемпе тивӗҫтересси" патшалӑх проекчӗсене пурнӑҫламашкӑн туса лартӗҫ. Технопарк инвесторӗ тата тӑваканӗ — "Крост" концерн.
|
|
Кӑҫал Президентӑн Ҫӗнӗ Ҫул Ёлкине тӑватӑ хут ирттерӗҫ. Чӑваш Ен президенчӗ хушӑва раштавӑн 14-мӗшӗнче алӑ пусса ҫирӗплетнӗ.
Яланхи пекех Президент Ёлки Чӑваш патшалӑх оперӑпа балет театрӗнче иртӗ. Ачасем тӑватӑ кун савӑнӗҫ — раштавӑн 25, 26, 27 тата 29-мӗшӗнче. Республикӑри районсемпе хулисенчен килнӗ ачасене пурне те парнесем парӗҫ, юрӑ-ташӑпа, конкурссемпе савӑнтарӗҫ.
Шупашкар районӗнчен унта 60 шкул ачи кайӗ. Вӗсем вӗренӳре «пиллӗк» паллӑсемпе вӗренеҫҫӗ, районпа республика шайӗнчи олимпиадӑсенче ҫӗнтереҫҫӗ, пултарулӑх конкурсӗсемпе спорт ӑмӑртӑвӗсенче пӗрремӗш вырӑнсене йышӑнаҫҫӗ — Президент Ёлкине кайма чӑнах та тивӗҫ! Ҫавӑн пекех унта «Тантӑш» хаҫатӑн конкурсӗсене хутшӑннӑ 3 ҫамрӑк журналист кайӗ.
|
|
Шӑрттан ял тӑрӑхӗн администрацийӗ пӗлтернӗ тӑрӑх раштавӑн 22-мӗшӗнче Йӗпреҫ районӗнчи Огонёк посёлокӗнчи ачасем вӑрмана йӗлтӗрпе ярӑнма кайса килнӗ. Ачасене хӗллехи вӑрмана кӑтартма Ирина Семёнова илсе кайнӑ.
Хӗллехи вӑрман ачасене питӗ килӗшнӗ — уйра ҫил вӗҫтернӗ пулсан, кунта, вӑрманта — лӑпкӑ. Йывӑҫсемпе тӗмӗсем юр айӗнче лараҫҫӗ, турачӗсем хӗвел ҫинче ялкӑшаҫҫӗ. Чӑн та юмаха лекнӗ евӗр!
Вӑрманта хӗлпе ҫыхӑннӑ тупмалли юмахсене юптарчӗҫ, тупсӑмӗсене тупрӗҫ. Чи матурри Луиза Ильина пулчӗ. Килелле каяс умӗн Хӗл Мучин мастерскойӗ валли чӑрӑш турачӗсемпе йӗкелӗсене пуҫтарчӗҫ. Тепӗр эрнере вара шкулта «Хӗллехи вӑрман» темӑпа ӳкерчӗксен конкурсне ирттерме калаҫса татӑлчӗҫ.
|
|
Раштавӑн 21-мӗшӗнче Патӑрьел тӗл вулавӑшӗнче «Чӑваш поэзийӗн аксакалӗ» ятлӑ литература сехечӗ иртрӗ. Ӑна паллӑ чӑваш сӑвӑҫи В.И. Давыдов-Анатри ҫуралнӑранпа 90 ҫул ҫитнӗ май хатӗрленӗ. Мероприятине вулавӑшӑн директор ҫумӗ Мазякова Н.В. ертсе пычӗ. Нина Васильевна чи малтан хӑнасемпе паллаштарчӗ — чаплӑ сӑвӑҫ кун-ҫулӗпе паллаштарма Шупашкартан Чӑваш Ен халӑх сӑвӑҫи Валерий Владимирович Туркай, чӑваш ҫыравҫи Аркадий Петрович Казанов тата чӑваш сӑвӑҫи Альбина Васильевна Юрату ҫитнӗччӗ. Сӑвӑҫ кун-ҫулӗпе вулавӑшра ӗслекен Наталия Алексеевна Ракова каласа пачӗ, ятарласа хатӗрленӗ буклетпа паллаштарчӗ. Шупашкар хӑнисем мероприятине килнӗ 7-мӗш ПУ-па 2-мӗш Патӑрьел вӑтам шкулӗнчи ачасене В.И. Давыдов-Анатри пирки нумай интереслӗ япала каласа пачӗҫ, хӑйсен сӑввисемпе те паллаштарчӗҫ.
|
|
Раштавӑн 10-мӗшпе 19-мӗшӗ хушшинче Сӗнтӗрвӑрри ача-пӑча пултарулӑхӗн ҫуртӗнче «Ачасем ӑсталанӑ теттесем» ятлӑ район конкурсӗ иртнӗ. Конкурса ачасен ӑсталӑхне, фантазине, ӳнер пултарулӑхне аталантарма йӗркеленӗ. Конкурс иртнӗ май районӑн кашни шкулта «Хӗл мучи мастерскойӗсем» ӗҫлерӗҫ — шкул ачисем тӗрлӗ япала усӑ курса Ҫӗнӗ Ҫул ерешӗсемпе теттесем ӑсталарӗҫ. Ҫапла май ача-пӑча пултарулӑх ҫуртне пурӗ 700 ытла теттепе ереш килчӗ.
Конкурса пӗтемлетнӗ хыҫҫӑн чи ӑҫта ачасем Сӗнтӗрвӑррин 2-мӗш хула шкулӗнче, Октябрьски шкулӗнче, Сӗнтӗрвӑррин пӗтӗмӗшле пӗлӳ паракан тӗп шкулта, Кукашни вӑтам шкулӗнче, Хуракасси вӑтам шкулӗнче тата ача-пӑча пултарулӑхӗн ҫуртӗнче ӗҫлекен «Рукобельница» пӗрлешӳре пулни палӑрчӗ. Конкурса хаклакансем районӑн тӗп чӑрӑшне ерешлемешкӗн 650 теттене районти культура ҫуртне ӑсатрӗҫ. |
|
Аҫӑмҫырми ял клубӗн ӗҫченӗсем Ҫӗнӗ Ҫул уявне хатӗрленеҫҫӗ. Нумай пулмасть вӗсем 6-мӗш клас ачисемпе пӗрле «Ҫӗнӗ ҫул култармӑшӗсем» ятлӑ ӳкерчӗксен конкурсне йӗркелесе ирттерчӗҫ. Ачасемех Ҫӗнӗ Ҫулпа ҫыхӑннӑ ӳкерчӗксемпе клуб чӳречисене ерешлесе тухрӗҫ. Конкурса пӗтӗмлетнӗ хыҫҫӑн пур хутшӑнакана та пылак ҫимӗҫсем парнелерӗҫ.
|
|
Раштавӑн 18-мӗшӗнче «Питӗр чӑвашӗсем» хаҫатӑн черетлӗ кӑларӑмӗ тухрӗ. Кӑларӑмпа эсир хаҫат сайтӗнче паллашма пултаратӑр. Хаҫат кӑларӑмӗнче ҫак темӑсене тупма пултаратӑр: * «Раштав симфонийӗ 2008» — пирӗн ентеш миҫемӗш вырӑн йышӑннине; * «Хыпар» хаҫат турнирӗнче Питӗр чӑвашӗ мӗнле парнепе килни ҫинчен; * Чӑваш академи драма театрӗ Питӗр чӑвашӗсене мӗнпе савӑнтарни ҫинчен, М. Ҫеҫпӗл ячӗллӗ ҫамрӑксен театрӗ Хусан чӑвашӗсем валли мӗн илсе килни ҫинчен; * Шупашкарпа Питӗр маршруткӑсем пӗр-пӗринпе мӗнпе уйрӑлса тӑни пирки; * Петӗр Хусанкай ҫинчен; * К. Турханӑн «Сӗве Атӑла юхса кӗрет» романӑн черетлӗ пайне. |
|
Иртнӗ шӑматкун, раштавӑн 15-мӗшӗнче Ухман вӑтам шкулӗнче савӑнӑҫлӑ уяв иртрӗ — шкула уҫнӑранпа 125 ҫул ҫитнӗ-ҫке! Мероприяти шкул спортзалӗнче иртрӗ. Халӗ шкул директорӗ вырӑнӗнче Борисова Маргарита Андреевна ӗҫлет. Вӑл пухӑннӑ хӑнасене шкул историне каласа пачӗ. Шкула 1872 ҫулта уҫнӑ, вӑл Алексей салтак ҫуртӗнче вырнаҫнӑ пулнӑ. Ачасен пӗрремӗш вӗрентекенӗ Ҫӳрпӳ гимназийенчен вӗренсе тухнӑ Агрепина Андреевна Андреева пулнӑ. Малтанхи ҫулта шкулта 24 ача вӗреннӗ пулнӑ (вӗсенчен 4 — хӗрача). 1899 ҫулта ялта чиркӳ туса лартсан чиркӳ прихучӗн шкулне уҫнӑ. Ачасене кунта вырӑнти тиек вӗрентнӗ пирки вӗренес текенсем сахал пулнӑ — шкула хупма тивнӗ. 1905-1907 ҫулсенче икӗ шкула пӗрлештернӗ. 1934 ҫулта шкулта 7 ҫул вӗрентме пуҫланӑ, 1961 ҫултанпа вара вӑтам шкул шайне хӑпартнӑ. Маргарита Андреевна ҫавӑн пекех шкулӑн юлашки ҫулсенчи ҫитӗнӗвӗсем пирки, вӗренсе тухнӑ паллӑ ҫынсем пирки те каласа пачӗ. Канаш районӗн ӗҫӗсене ертсе пыракан Григорий Петрович Петров та тухса ӑшӑ сӑмахсем каларӗ, шкула интереслӗ кӗнекесем парнелерӗ. Мероприяти шкул ачисемпе вӗрентевҫӗсем тата шкултан вӗренсе тухнӑскерсем хатӗрленӗ концертпа вӗҫленчӗ. |
|
Кунерти ялӗнчи культура ҫуртне ҫенетсе юсанӑ хыҫҫӑн ҫын чунӗ кӗме пуҫланӑ: халӗ кунта тӗрлӗ мероприятисем пуҫсӑр конкурссем те, КВНсем те, чӑваш эстрада ҫӑлтӑрӗсен концерчӗсем те иртеҫҫӗ. Акӑ, нумай пулмасть, иртнӗ шӑматкун, раштавӑн 15-мӗшӗнче, ял ти культура ҫуртӗнче ятарласа Шупашкартан килнӗ Чӑваш патшалӑх академи драма театрӗн «Юратсан юрлас килет» ятлӑ спектаклӗ иртрӗ. Куракансене спектакль питӗ килӗшрӗ, уйрӑмах Надежда Зубковӑпа Виталий Карпов вылянӑ тӗп сӑнарсем ҫынсене килӗшрӗҫ. Ҫавӑн пекех Любовь Фёдорова выляни те Кунер халӑхне кӑмӑла кайрӗ. Спектакль вӗҫленнӗ хыҫҫӑн артистсем хӑйсене ӑшшӑн кӗтсе илнӗшӗн Кунер халӑхне тав турӗҫ, тепӗр хут килме сӑмах пачӗҫ.
Сӑмах май, ку спектакле эсир шӑматкун, раштавӑн 22-мӗшӗнче Шупашкарта курма пултаратӑр. Спектакле Чӑваш академи драма театрӗнче лартӗҫ. Пуҫламӑшӗ 18 сехет ҫурӑра.
|
+16.3 °C