Шупашкарти «Правопорядок» хула общество фончӗн ертӳҫине, ЧР Общество палатин пайташне Александр Дельмана республика умӗнчи тава тивӗҫлӗ ӗҫсемшӗн, общество ӗҫне хастар хутшӑннӑшӑн ЧР Элтеперӗ Михаил Игнатьев чысласси пирки постановлени кӑларнӑ. Александр Ильича «Чӑваш Республики умӗнчи тава тивӗҫлӗ ӗҫсемшӗн» орденпа наградӑланӑ.

Вӑл 1944 ҫулта Сызраньте ҫуралнӑ, отставкӑри подполковник. 1980 ҫулта салтака граната ҫурӑласран ҫӑлнӑ чухне аманнӑ, куҫ ҫивӗчлӗхӗ енӗпе пӗрремӗш ушкӑн инваличӗ тӑрса юлнӑ.

1995 ҫулта Александр Дельман «Правопорядок» общество фондне йӗркеленӗ, вӑл унта – председатель. Кунсӑр пуҫне ача ҫурчӗсене, интернатсене, общество организацийӗсене ача пахчисене, шкулсене, сусӑрсемпе ветерансене пулӑшать.

Паян, авӑн уйӑхӗн 25-мӗшӗнче, Шӑмӑршӑ районӗнче СССР халӑх артисчӗпе Валерий Яковлевпа тӗлпулу иртӗ. Мероприятие Шӑмӑршӑ ҫӗрӗ ҫинче ҫуралса ӳснӗ пултаруллӑ ҫын 80 ҫул тултарнине (ҫут тӗнчене вӑл сакӑр теҫетке ҫул каялла паян килнӗ) халалланӑ. Валерий Яковлев — К.В. Иванов ячӗллӗ Чӑваш патшалӑх академи драма театрӗн илемлӗх ертӳҫи. Вӑл — Раҫҫей Патшалӑх премийӗн лауреачӗ. Чӑваш Ен Патшалӑх премине вара икӗ хут тивӗҫнӗ. «Ылтӑн маска» театр премийӗпе те чысланӑ.

Театрта ӗҫлесе ӗмӗрленӗ ҫыннӑн юбилейне кӑнтӑрла артистӑн тӑван ялӗнче, Виҫпӳрт Шӑмӑршӑра, уявлӗҫ. Вӑл ашшӗ килне кӗрсе тухӗ. Шӑмӑршӑри вӑтам шкулта вӗренекенсемпе тата учительсемпе тӗл пулӗ. Театр артисчӗсен пӗр ушкӑнӗ «Ялта» спектакль сыпӑкне кӑтартӗҫ.

18 сехетре Шӑмӑршӑри культура ҫуртӗнче савӑнӑҫлӑ мероприяти пуҫланӗ.

Паян, авӑн уйӑхӗн 18-мӗшӗнче, РСФСР халӑх артисчӗн, Чӑваш АССР халӑх артисчӗн, К. Станиславский ячӗллӗ патшалӑх премийӗн лауреачӗн Виктор Родионовӑн асӑну хӑми патне чечек хунӑ.

Артиста хисеп туса театр актерӗсем, журналистсем, актерӑн тӑванӗсем пухӑннӑ. Чӑваш патшалӑх академи драма театрӗн илемлӗх ертӳҫи, СССР халӑх артисчӗ Валерий Яковлев Виктор Родионова аслӑ артист тени сахал тесе хакланӑ. «Сцена хыҫӗнче вӑл пӗр сӑмах каласанах, ура ярса пуссанах ӑна тӑвӑллӑн алӑ ҫупса кӗтсе илетчӗҫ», — тенӗ вӑл. Унӑн уйрӑмах ӑнӑҫлӑ сӑнарӗсем камитсенче палӑрнине каланӑ.

СССР халӑх артисчӗ Вера Кузьмина Виктор Родионовпа пӗрле вӗреннӗ. «Унӑн Левитанла сасси, иниеллигентлӑхӗ, хӑйне епле тытни пурне те тыткӑнланӑ», — тенӗ Вера Кузьмина.

Паян театрта Виктор Родионовӑн астӑвӑм каҫӗ иртӗ.

Тутарстанри Аксу районӗнчи Мюд поселокӗнче пурӑнакан чӑваша район пуҫлӑхӗ Камиль Гилманов саламланӑ.

Ирина Степанова патне пуҫлӑх килнех кайнӑ. Ирина Михайловна тӑван ен историне тӗпченипе паллӑ иккен. «Вӑл районти кашни ял хӑҫан тата мӗнле йӗркеленсе кайнине, вӗсене кам йӗркеленине тата мӗнле аталанса пынине тарӑн тӗпчесе кӗнекесем ҫырса кӑларать», — хыпарланӑ вырӑнти «Ял пурнӑҫӗ» хаҫатра.

Ирина Степанова тӑрӑшнипе 15 кӗнеке пичетленнӗ. Вӑл малашне те тӗпчев ӗҫӗпе тӑрӑшасшӑн. Ҫакӑн пирки хӗрарӑм район пуҫлӑхне пӗлтернӗ.

Пӗлтерӗшлӗ ӗҫшӗн Ирина Степановӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ. Аксу район ертӳҫи Камиль Гилманов вара Ирина Степановӑна Тав ҫырӑвӗпе чысланӑ.

РСФСР халӑх артисчӗ, Чӑваш АССР халӑх артисчӗ, К. Станиславский ячӗллӗ патшалӑх премийӗн лауреачӗ Виктор Родионов (22.07.1924-19.05.1987 ҫҫ.) ҫуралнӑранпа 95 ҫул ҫитнине халалласа астӑвӑм каҫӗ иртӗ. Ӑна авӑн уйӑхӗн 18-мӗшӗнче Чӑваш патшалӑх академи драма театрӗнче ирттерӗҫ.

Астӑвӑм каҫӗнче Виктор Родионов пурнӑҫӗпе пултарулӑхне аса илӗҫ. Унтан «Туя туй пек тӑвар-и?» спектакле кӑтартӗҫ. Спектакле Арсентий Тарасов пьеси тӑрӑх лартнӑ. Астӑвӑм каҫӗ 18 сехетре пуҫланӗ.

Виктор Родионов Сӗнтӗрвӑрри хулинче ҫуралнӑ. 1941 ҫулта Чӑваш музыка училищинчен, виолончелипе композици класӗнчен вӗренсе тухнӑ, 1947 ҫулта — А. Луначарский ячӗллӗ Мускаври театр ӳнерӗн патшалӑх институтӗнчен. Чӑваш театрӗнче музыкант, артист пулса ӗҫленӗ.

cap.ru сайтри сӑн

Паян, авӑн уйӑхӗн 3-мӗшӗнче, Пӑрачкав районӗнче пурӑнакан Мария Тимофеевна Галямина 100 ҫулхи юбилейне паллӑ тунӑ. Уява тӑванӗсем йышлӑ пухӑннӑ, администраци ӗҫченӗсем те саламлама ҫитнӗ. РФ Президенчӗ Владимир Путин юбиляр патне саламлӑ открытка янӑ.

Мария Тимофеевнӑн пурнӑҫӗ ҫӑмӑл килмен. Ашшӗ вилсен килти чылай ӗҫ ун ҫине тиеннӗ, мӗншӗн тесен вӑл йышлӑ ачаран чи аслӑ хӗр пулнӑ. Вӑрҫӑ пуҫлансан хӗр тракториста вӗреннӗ, кайран уй-хирте арҫынсемпе тан ҫак техникӑпа ӗҫленӗ. Вӑл колхозра чылай ҫул вӑй хунӑ.

Мария Галямина ывӑл пӑхса ҫитӗнтернӗ. Юбиляр – ӗҫ ветеранӗ.

Паян, авӑнӑн 2-мӗшӗнче, пирӗнтен ӗмӗрлӗхе Владимир Карсаков режиссёр уйрӑлса кайрӗ. Пире пӗлтернӗ тӑрӑх ӑна ӗнер Канаш пульницине хунӑ, паян ҫӗрле вара Шупашкара ҫитеричченех унӑн пурнӑҫӗ татӑлнӑ. Вар-хырӑм шыҫҫине пула теҫҫӗ.

Сывпуллашу хӑҫан тата ӑҫта иртессине хальлӗхе пӗлтермен.

Карсаков Владимир Федорович 1961 ҫулхи авӑнӑн 10-мӗшӗнче Патӑрьел районӗнчи Чӑваш Ишекӗнче ҫуралнӑ. Пӗлӗвне Хусанти культура институтӗнче, Мускавра квалификаци ӳстермелли курссенче илнӗ. Чӑваш телекуравӗнче 13 ҫул ӗҫленӗ. Владимир Карсаков — нумай-нумай чӑвашла фильмсен авторӗ. Вӗсен йышӗнче «Сурӑм хӗрӗ», «Арбат», «Аннене анне тееҫҫӗ» тата ыттисем.

Альберт Лустухин архивӗнчи сӑн

Биологи тата экологи облаҫӗнчи хисеплӗ ҫынна Альберт Ластухина РФ Президенчӗ Владимир Путин «Раҫҫей Федерацийӗн тава тивӗҫлӗ экологӗ» ят пама йышӑннӑ, хушу алӑ пуснӑ.

Ҫурла уйӑхӗн 23-мӗшӗнче ЧР Министрсен Кабинечӗн председателӗ Иван Моторин Шупашкар ҫыннисене наградӑсем панӑ. Вӗсен йышӗнче Альберт Ластухин та пулнӑ. «Ахальтен мар эпӗ 50 ҫул билогипе экологие вӗрентӗм», - наградӑшӑн савӑннине палӑртнӑ вӑл.

Альберт Ластухин экологсен темиҫе ӑрӑвне воспитани панӑ.

cap.ru сайтри сӑн

Ҫурла уйӑхӗн 26-мӗшӗнче чӑвашсен паллӑ журналисчӗ, СССР журналисчӗсен пайташӗ, спорт комментаторӗ Юрий Диомидович Плотников пурнӑҫран уйрӑлнӑ.

Юрий Диомидович республикӑра тухса тӑракан хаҫатсенче ӗҫленӗ: «Ҫамрӑк коммунист», «Советская Чувашия», «Чӑваш Ен». Шупашкарти телекурав студийӗнче те вӑй хунӑ, Чӑвашрадиора 20 ытла ҫул спорт кун кӗнекине ертсе пынӑ. Вӑл «Хыпар», «Почтовый экспресс» хаҫатсемпе, «Спортивная панорама Чувашии» журналпа, Ҫӗрпӳ районӗн «Цивильский вестник» хаҫачӗпе ҫыхӑну тытнӑ.

Юрий Плотников ҫичӗ кӗнеке кӑларнӑ, 1 пин ытла сӑвӑ ҫырнӑ. Хӑй вӑл Ҫӗрпӳ районӗнче ҫуралса ӳснӗ, унтах педагогика училищине пӗтернӗ, каярахпа И.Н.Ульянов ячӗллӗ ЧПУра ӑс пухнӑ. Кӑҫал авӑн уйӑхӗн 17-мӗшӗнче Юрий Плотников 85 ҫул тултармаллаччӗ.

Паллӑ журналистпа, спорт комментаторӗпе паян сывпуллашнӑ.

РБК.Стиль шутланӑ тӑрӑх, «Ютубри» Viki Show канал виҫӗ ҫул хушшинче 44 миллион тенкӗрен пуҫласа 54 миллион таран ӗҫлесе илнӗ. Паянхи кун тӗлне канала 5,4 миллион ҫын пӑхса тӑрать.

2016 ҫулта канала Шупашкарта пурӑнакан 5 ҫулти Вика Соловьева уҫнӑ. Халӗ вӑл 9-та. Малтанах хӗрача видеорозыгрышсем пичетленӗ, камера умӗнче хӑйне евӗр апат тутаннӑ, макияж тунӑ тата ҫулҫӳревӗсем пирки каласа кӑтартнӑ.

Халӗ Вика «Ютуб» валли роликсем ӳкернисӗр пуҫне юрлать, Moscow Fashion Week компанире модельте ӗҫлет. Пӗлтӗр ҫу уйӑхӗнче унӑн «Просто» ятлӑ юррине 34 миллион ҫын пӑхнӑ, ҫулла «Лето» юррипе 41 миллион ҫын кӑсӑкланнӑ.

Пӗлтӗр ҫак канал Раҫҫейре ҫиччӗмӗш вырӑнта пулнӑ. Викӑн Инстаграмри страницине 1,7 миллион ҫын пӑхса тӑрать. Ӑна хӗрача амӑшӗпе пӗрле тытса пырать. Сӑмах май, амӑшӗ Роза «Раҫҫей 24» каналпа чӑвашла хыпарсен кӑларӑмне ертсе пырать. Роликсене вара ашшӗ ӳкерме пулӑшать.