Чӳк уйӑхӗн 24-мӗшӗнче чӑвашсен паллӑ ҫыравҫи, драматургӗ, тӑлмачӗ тата актерӗ Георгий Васильевич Тал-Мӑрса ҫуралнӑранпа 120 ҫул ҫитнине уявлама филологи енӗн ӗҫтешӗсем, Чӑваш патшалӑх университечӗн тата Чӑваш патшалӑх педагогика университечӗн доценчӗсемпе студенчӗсем, журналистсем пухӑнчӗҫ.

Ирина Кириллова Г.Тал-Мӑрсан пурнӑҫӗпе пултарулӑхӗ ҫинчен кӗскен аса илтерчӗ, В.Г. Родионов Георгий Васильевичӑн чӑваш литература историйӗнчи вырӑнӗ пирки калаҫрӗ, В.В. Никифорова ҫыравҫӑн драматургири пултарулӑхне тишкерчӗ, Ирина Софронова Г.Тал-Мӑрса поэзийӗнчи тухӑҫ лирикин традицийӗсене шырарӗ, Е.Р. Якимова ӑна чӑваш историллӗ трагедине пуҫарса яраканӗ пек хакларӗ.

Георгий Тал-Марса Тутарстана кӗрекен Ҫӗпрел районӗнчи Пасарлӑ Упи ялӗнче чӳк уйӑхӗн 26-мӗшӗнче ҫуралнӑ. Ялти шкулта, Чӗмпӗрти чӑваш шкулӗнче (1909–1915), Хусанти Ҫурҫӗр Хӗвел тухӑҫ халӑхӗсен этнографипе археологи институтӗнче (1917–1920) вӗреннӗ. 1918 ҫулта чӑваш театрне пуҫарса яраканӗсенчен пӗри пулнӑ, актер тата режиссер пулса вӑй хунӑ, спектакльсем лартма вырӑсларан чӑвашла 40 ытла пьеса куҫарнӑ, хӑй те драмӑсем ҫырнӑ. Унӑн паллӑрах хайлавӗсем: «Силпи» (1917) тата «Вӑйлисен айӑпӗ» (1918) сӑвӑлла трагедисем, «Ухатер» камит (1919), «Кам айӑпӗ?» (1919) драма, «Ҫӗнӗ пурнӑҫ шурӑмпуҫӗ» (1919) драма-утопи т.ыт.те. 1921 ҫулта Атӑл тӑрӑхӗнче выҫлӑх ҫулӗсем пуҫлансан мӑшӑрӗпе Ҫӗпӗре тухса кайнӑ, ҫав ҫулах раштав уйӑхӗн 7-мӗшӗнче Красноярск тӑрӑхӗнчи Ачинск хулинче тифпа чирлесе вилнӗ.

#культура, #юбилейсем, #Пасарлӑ Упи, #Ҫӗпрел районӗ, #Тутарстан, #ЧПГӐИ, #литература, #Литература ҫулталӑкӗ