Чӑваш Ене Театр теплохочӗ килӗ. Вӑл пирӗн патӑмӑрта ҫу уйӑхӗн 31-мӗшӗнче пулӗ.
Атӑлҫи тӑрӑхӗнчи пилӗк хулара «ГИТИСFEST. Театральное Приволжье 2025» фестиваль-лаборатори ӗҫлӗ.
«А.С. Попов» теплоходпа ГИТИС педагогӗсемпе режиссёрӗсем килӗҫ, вӗсем ҫамрӑк актерсене ӑсталӑха тарӑнлатма тата анлӑлатма вӗрентӗҫ. Лабораторие Атӑлҫи тӑрӑхӗнчи 14 регионти театр учрежденийӗсенче ӑс пухакан ҫамрӑксем хутшӑнӗҫ.
Фестиваль-лаборатори Чулхулара, Шупашкарта, Хусанта, Самарӑра тата Сартура иртӗ. Пирӗн патра вӑл Чӑваш академи драма театрӗнче ӗҫлӗ.
Шупашкарти тата Етӗрнери ҫуртсен стени ҫине муралсем ӳкерме палӑртнӑ. Унта ентешсен, Совет Союзӗн Геройӗсен сӑнӗсене ӳкерӗҫ. Ӗҫе Республика кунӗ тӗлне вӗҫлӗҫ. Етӗрнере Федот Орловпа Евсигний Пайгусов сӑнӗсене ӳкерӗҫ. Шупашкарти пӗр ҫурт стенине вара Александр Боголюбовӑн сӑнӗ илемлетӗ.
Ку - Анжелика Ивановӑн проекчӗ. Унӑн ӗҫӗ культура пуҫарӑвӗсен Президент фончӗн грантне ҫӗнсе илнӗ.
Муралсене ҫамрӑк мӑшӑр Ксения Кокель тата Дмитрий Чапай ӳкерӗ.
Шупашкарти арҫын лӑпкӑ кӑна пурӑннӑ. Тӑрук пӗр кунхине ун патне суд приставӗсем килсе 400 пин тенкӗ парӑма татмалли пирки асӑрхаттарнӑ. Арҫын ӑнланман: ара, вӑл нимӗнле кредит та илмен-ҫке-ха.
Ӗҫ-пуҫ вара ҫапла пулса тухнӑ иккен: 2021 ҫулхи кӑрлач уйӑхӗнче ултавҫӑсем суя паспортпа усӑ курса ун ячӗпе икӗ банкра кредитсем илнӗ. Ҫапла парӑм пухӑнса та пухӑнса пынӑ.
Арҫын Ленин районӗн прокуратуринчен пулӑшу ыйтнӑ. Тӗрӗслев ирттернӗ хыҫҫӑн материала полицие панӑ, унта вара пуҫиле ӗҫ пуҫарнӑ.
Шупашкарти Ленин проспектӗнчи 21-мӗш ҫуртра 1967-2002 ҫулсенче общество деятелӗ, финанс министрӗ пулнӑ Аркадий Гладков пурӑннӑ. Ҫак, кунсенче унта астӑвӑм хӑмине ҫакнӑ.
Хӑмана уҫнӑ ҫӗре унӑн тӑванӗсем, ҫывӑх ҫыннисем килнӗ. Хӑйӗн аслӑ ӗҫтешне хисеп тума пӗрремӗ вице-министр – финанс министрӗ Михаил Ноздряков та ҫитнӗ.
Аркадий Михайлович Канаш районӗнчи Пикших ялӗнче ҫуралнӑ. Чӑваш Ен министерствинче ахаль ревизортан министра ҫитнӗ.
Ҫу уйӑхӗн 21-мӗшӗнчен пуҫласа ҫӗртме уйӑхӗн 1-мӗшӗччен Шупашкарти «Атӑл Опера» театрта Пӗтӗм тӗнчери VI оперетта фестивалӗ иртӗ.
Фестиваль А. Петровӑн «Мы хотим танцевать» музыкӑлла камичӗпе уҫӑлӗ. Иваново хулинчи музыка театрӗ Шупашкара «Бесприданница», «Алые паруса», «Три мушкетера» мюзиклсемпе, «Любовь и голуби» музыкӑлла камитпе тата «Принцесса на горошине» музыкӑлла юмахпа килӗ.
Фестиваль гала-концертпа хупӑнӗ.
Шупашкарта васкавлӑ медпулӑшу водителӗ 18 ҫул тултармасӑрах руль умне ларнӑ ҫамрӑка тытса чарма пулӑшнӑ.
Ҫамрӑка чарас тесе йӗрке хуралҫисем хыҫҫӑн хӑваланӑ. Васкавлӑ медпулӑшу водителӗ Виталий Андреев ҫакна асӑрхасан вӗсене пулӑшас тенӗ – ҫула пӳлнӗ. Ҫапла ВАЗ-2109 машинӑпа пынӑ ҫамрӑкӑн чарӑнма тивнӗ.
Республикӑри катастрофа медицинин тата васкавлӑ пулӑшу центрӗнче Виталий Владимировича куншӑн ырӑ сӑмах каланӑ. Сӑмах май, вӑл экстреннӑй служба водителӗнче 14 ҫул ӗҫлет.
Мускавра Чулхулари скрипка ӑстине Наталья Маурер виллине тупнӑ. Пӑтӑрмах ҫу уйӑхӗн 3-мӗшӗнче пулса иртнӗ.
Икӗ ача амӑшӗ ҫав каҫхине Алексей Паштаев офтальмолог патӗнче пулнӑ.
Асӑннӑ пӑтӑрмахпа ҫыхӑннӑ лару-тӑрӑва Пӗрремӗш каналпа «Пусть говорят» кӑларӑмра сӳтсе яврӗҫ.
Хӗрарӑм скрипка калама пӗлнисӗр пуҫне илем конкурсӗсене хутшӑннӑ. Унӑн упӑшки (иккӗшӗ нумаях пулмасть уйрӑлнӑ) — балет артисчӗ.
Алексей Паштаев — Николай Паштаев профессор ывӑлӗ. Наталья тата Алексей хӑй вӑхӑтӗнче Шупашкарти аслӑ шкулта пӗр вӑхӑтра вӗреннӗ, пӗрне пӗри палланӑ.
Алексей Мускавра ӗҫлесе пурӑннӑ.
Пурнӑҫӑн кирек хӑш тапхӑрӗнче те ҫынсем тӗрлӗ йывӑрлӑхпа тӗл пулаҫҫӗ. Ӗҫре те, килте те, ҫын ҫине тухсан та пӑшӑрханмалли, кулянмалли тупӑнса тӑрать.
Ӗҫре ывӑнса та йӑлӑхса ҫитнине ҫӗнтереме пулӑшас тӗллевпе Шупашкар хулинчи халӑхӑн социаллӑ ыйтӑвӗсене ӗҫтерекен комплеслӑ центрта психологпа та занятисем ирттереҫҫӗ. Марина Назарова психолог маларах ун пеккисене социаллӑ ӗҫченсем валли йӗркеленӗ пулсан паян унти специалистсем валли ирттернӗ.
Шупашкарти кӳлмекре вырнаҫнӑ Раҫҫейӗн тӗрленӗ карттин музейне ҫу уйӑхӗн 23-мешӗнче савӑнӑҫлӑ лару-тӑрура уҫӗҫ. Аса илтерер: нумаях пулмасть, акан 25-мӗшӗнче, вӑл тест режимӗнче ӗҫлеме пуҫланӑ.
Музей лаптӑкӗ – 250 тӑваткал метр. Шалта тӗрленӗ картта – 7 метр тӑршшӗ, 3 метр сарлакшӑскер – пур. Музея тума «Нептун» организаципе 51,9 миллион тенкелӗх контракт тунӑ. Кайран медиаэкрансем валли влаҫ тепӗр 20 миллион тенкӗ уйӑрнӑ.
Музея тӳлевлӗ кӗртеҫҫӗ. 7 ҫул тултарманнисене – тӳлевсӗрех.
Шупашкарти патшалӑхӑн ҫул-йӗр хӑрушсӑрлӑхӗн инспекторӗсем аслӑ ҫул хӗррипе утса пыракан ачана асӑрханӑ.
Тӑхӑр ҫулти арҫын ача Б. Хмельницкий урамӗн хӗррипе «Атӑл» М7ҫул ҫине тухма шухӑшланӑ иккен. Вӑл ҫуран утса Красноармейскинчи кукамӑшӗ кукамӑшӗ (тен, асламӑшӗ-тӗр. Вырӑсла хыпарта «бабушка» тенӗ) патне ҫитес тесе килӗнчен тухса кайнӑ.
Ҫул-йӗр хӑрушсӑрлӑхӗн инспекторӗсем ачана ҫул ҫитменнисемпе ӗҫлекен инспекторсем патне илсе кайса янӑ.
+21.3 °C