Ача ҫуралсан ашшӗ-амӑшӗ ун валли хитре ят суйлама тӑрӑшать. Нумах пулмасть Шупашкарти Калинин районӗн администрацийӗн ЗАГС пайӗн ӗҫченӗсем Мирабелла ята регистрациленӗ.
Хӗрача пуш уйӑхӗн 1-мӗшӗнче ҫут тӗнчене килнӗ. Ашшӗ-амӑшӗ ята Патшалӑх пулӑшӑвӗсен порталӗнчи «Ача ҫурални» суперсервис пулӑшнипе регистрациленӗ. Мирабелла ят латин чӗлхинчен куҫарсан «илемлӗ тӗкӗр» е «илем тӗкӗрӗ» тенине пӗлтерет.
Иртнӗ уйӑх вӗҫӗнче, нарӑс уйӑхӗн 24-мӗшӗнче, Шупашкарта ют ҫӗршыв арҫынни пенсири хӗрарӑма ҫаратнӑ. Ӑна иртен-ҫӳрен тытса чарнӑ.
Вӑтам Азири ҫӗршывсенчен пӗринчен килнӗ 38 ҫулти арҫын 72-ри кинемейӗн сумккине ярса илнӗ. Ватӑ ҫын лавккаран таврӑнать пунӑ. Ют ҫын сумккипе аякка тарайман — хӗрарӑм сумккипе урам тӑрӑх чупакана, ун хыҫӗнче пулӑшу ыйтса кӑшкӑракан ватта курсан Павел Ивашков таркӑна такӑнтарса ӳкернӗ. Вырӑна Лариса Изотова чупса пынӑ, вӑл йӗрке хуралҫисене чӗнсе илнӗ.
Ватта ҫаратма тӑнӑ арҫын тӗлӗшпе пуҫиле ӗс пуҫарнӑ, ҫынна пулӑшнисене вара Тав хучӗсемпе хавхалантарнӑ.
Шупашкарти экспресс-кинемейсем ҫын ачисене пӑхма пулӑшаҫҫӗ. Вӗсем — Шупашкарти халӑха социаллӑ пулӑшу кӳрекен комплекслӑ центра ҫӳрекен хастар ватӑсем.
Татьяна Саверкина, акӑ, икӗ ҫул ӗнтӗ пӗр ҫемьене пулӑшать. Ачасен ашшӗ ятарлӑ ҫар операцине хутшӑнать, амӑшӗ ӗҫе ҫӳрет. Кӗҫӗн классенче вӗренекен ачисене вӑл шкултан пур чухне те кӗтсе илеймест.
«Ҫак икӗ ҫул хушшинче Татьяна Прокофьевна ҫемьешӗн ҫывӑх ҫын пекех пулса тӑчӗ. Ачасене вӑл шкултан кӗтсе илет», — каласа кӑтартнӑ маларах асӑннӑ центрӑн заведующийӗ Марина Васильева.
Ирина Александрова тата Любовь Гуслева та экспресс-кнемейсен ретне тахҫанах тӑнӑ.
Пӗтӗм тӗнчери хӗрарӑмсен кунӗ умӗн центрта экспресс-кнемейсем валли «Чунпа ҫамрӑк пулсан ҫул кайни ним те мар» уяв иртнӗ.
Шупашкарта 33 ҫулти хӗрарӑма шыраҫҫӗ. Вӑл килтен пуш уйӑхӗн 4-мӗшӗнче тухса кайнӑ та таврӑнман.
Парамонова Алиса Михайловнӑна «Лиза Алерт» хастарӗсем шыраҫҫӗ. Вӑл 150 сантиметр ҫӳллӗш, ырханкка, ҫӳҫӗ хура, куҫӗ хӑмӑр. Килтен кайнӑ кун сӑрӑ тӗслӗ куртка, хура кроссовка, хура калпак тӑхӑннӑ пулнӑ.
Ҫак хӗрарӑма куракансене е ун пирки мӗн те пулин пӗлекенсене ҫак номерпе шӑнкӑравлама ыйтаҫҫӗ: 8 800 700-54-52.
Шупашкарти «Садовый» микрорайонти шкул халӗ ачасене йышӑнса вӗренӳ ӗҫне кӳлӗнме пултарать. Нумаях пулмасть вӑл лицензи илнӗ. Кун пирки ЧР Вӗренӳ министерстви пӗлтерет.
Шкул хулари 64-мӗш шкулӑн вӗренӳ корпусӗ пулса тӑнӑ. Санитарипе эпидемиологи пӗтӗмлетӗвӗ те килнӗ. Ҫак кунсенче ведомство ӗҫченӗсем шкул коридорӗпе утса тухнӑ, классене, акт залне, столовӑя пӑхса ҫаврӑннӑ. «Юлашки штрихсем юлнӑ», ҫапла пӗлтернӗ вӗренӳ министрӗ Дмитрий Захаров телеграм-каналӗнче.
Шупашкара 47 ҫӗнӗ автобус илсе килнӗ. Хальлӗхе вӗсене Чӑваш транспорт управленийӗн балансӗ ҫине куҫарас ӗҫ пырать.
ЧР Транспорт министерстви пӗлтернӗ тӑрӑх, ҫӗнӗ автобуссем Шупашкарти тата Ҫӗнӗ Шупашкарти маршрутсем ҫинче ӗҫлӗҫ. Вӗсем ҫулталӑк вӗҫлениччен ҫула тухӗҫ.
Палӑртмалла: ҫӗнӗ автобуссем пӗлтӗр раштав уйӑхӗнче килме тытӑннӑ. Хальхинче 27 ПАЗ тата 20 НефАЗ килнӗ. Транспорт пӗтӗмпе 499,2 миллион тенке кайса ларнӑ.
Шупашкарта хӑлхи начар илтекен хӗрарӑм ҫухалнӑ. Ӑна «Лиза Алерт» шырав отрячӗ шырама тытӑннӑ.
35 ҫулти Наталья Игнатьева ӑҫтине ҫывӑх ҫыннисем нарӑс уйӑхӗн 27-мӗшӗнченпе пӗлмен.
Хӗрарӑм 176 сантиметр ҫӳллӗш, вӑтам пӳ-силлӗ, хӑмӑр куҫлӑ, ҫутӑ ҫырӑ тӗслӗ ҫӳҫлӗ. Хӑй хура курткӑпа, кӑвак джинс шӑлаварпа пулнӑ.
УҪӐМЛАТНИ
Шырав отрячӗн ушкӑнӗнче вырнаҫтарнӑ хыпар айӗнчи комментарисене ӗненсен, хӗрарӑм тупӑннӑ. Вӑл никампа та калаҫасшӑн мар. Хӗрӗ ӑҫтине амӑшне пӗлтернӗ имӗш.
Чӑваш патшалӑх юрӑпа ташӑ ансамблӗ «Подвиг и слава едины» (чӑв. Паттӑрлӑхпа мухтав пӗрле) ҫӗнӗ программа хатӗрленӗ. Концерта республикӑра иртекен хӳтлӗхпе массӑллӑ, спорт тата патриот ӗҫӗн уйӑхлӑхне халалласа кӑтартаҫҫӗ. Концерта пӗрремӗш курнисем – Шупашкарти электромеханика колледжӗн ӗҫченӗсем.
Ансамбль солисчӗсем чӑвашла тата вырӑсла юрӑсене шӑрантарнӑ. Ҫав шутра «От героев былых времен», «Дорога на Берлин», «Катюша», «А мы войны не знали», «Телейлӗ туслӑх» юрӑсем; «Пирӗн Аслӑ Ҫӗнтерӳ», «Мелодии военных лет» сюитӑсем; хореографи номерӗсем пулнӑ.
Шупашкарта 55 ҫулти хӗрарӑм банкомат урлӑ карточки ҫине укҫа хума тӑнӑ та операцие вӗҫлемесӗрех пӑрӑнса утнӑ. Кӗҫех ун патне счечӗ ҫинчен 14 пин тенкӗ илни пирки смс килнӗ.
Хӗрарӑмӑн полицие кайса пулӑшу ыйтма тивнӗ. Йӗрке хуралҫисем укҫана кам илнине часах палӑртнӑ. Хӗрарӑм хыҫҫӑнах банкомат патне 42 ҫулти арҫын пынӑ иккен. Вӑл хӗрарӑм пуҫланӑ операцие вӗҫлесе укҫана, 14 пин тенке, илнӗ. Арҫын хӑйӗн айӑпне йышӑннӑ, тӑкака саплаштарнӑ. Ун тӗлӗшпе пуҫиле ӗҫ пуҫарнӑ.
Шупашкарта пурӑнакан 36 ҫулти арҫынна тытса чарнӑ. Вӑл хӑйӗн 12-ри хӗрне мӑшкӑлласа пурӑннӑ тесе шутлаҫҫӗ.
Рен ТВ пӗлтернӗ тӑрӑх, арҫын савутра стропальщикре ӗҫлет. Ун тӗлӗшпе икӗ пуҫиле ӗҫ пуҫарнӑ. Следстви шухӑшӗпе, вӑл 12-ри хӗрне 2022 ҫулхи ҫулларанпа 2023 ҫулхи раштавччен мӑшкӑлласа пурӑннӑ. Вӗсен ҫемйи учетра тӑмасть, арӑмӗ пур. Ҫак арҫын унччен судпа ҫыхланманни паллӑ.
+10.3 °C