Ҫанталӑк кӑшт ӑшӑтсанах ҫынсем юханшывсемпе кӳлӗ-пӗве хӗрне васкаҫҫӗ. Шыва кӗмелли ятарласа палӑртнӑ вырӑнсене ҫеҫ мар, ун пек тума юраман ҫӗре те. Анчах шыв хумханнипе пӑхса киленнипех ҫырлахас килмест, ишес килет.
Шыва кӗме юраман вырӑнсенче ишсен явап тыттараҫҫӗ. Ӗнер, сӑмахран, Шупашкарти Мускав ҫыранӗн хӗрринче рейд ирттернӗ. Йышра Инкеклӗ ӗҫсен министерствин, ҫӑлав службин тата право хуралӗн ӗҫченӗсем пулнӑ. Вӗсем ҫынсене ку вырӑнта шыва кӗме юраманни пирки ӑнлантарса панӑ.
Йӗркене пӑсакан 4 ҫын телӗшпе протокол ҫырнӑ, вӗсене штраф тӳлеттерӗҫ. Унӑн виҫи 1 пин тенкӗпе танлашать.
Кӑҫал республикӑра ҫуллахи вӑхӑтра 9 пляжра шыва кӗме май пулӗ. Аса илтерер: сезон ҫӗртме уйӑхӗн 1-мӗшӗнче уҫӑлнӑ.
Шупашкарта – 5 пляж. Тӑваттӑшӗ Атӑлӑн сылтӑм, хула, енче. Тепри – Атӑлӑн леш енче, «Прометей» кану бази ҫывӑхӗнче.
Ҫавӑн пекех официаллӑ пляжсем Ҫӗнӗ Шупашкар хулинче, Куславкка, Сӗнтӗрвӑрри тата Шупашкар округӗсенче ӗҫлеҫҫӗ. Пуринче те ҫӑлавҫӑсем дежурствӑра тӑраҫҫӗ, медицина ӗҫченӗсем тата полицейскисем ӗҫлеҫҫӗ. Шупашкарти тата Ҫӗнӗ Шупашкарти пляжсене вара «Хӑрушсӑр хула» АПКпа ҫыхӑнтарнӑ. Шупашкарти пляжсенче полицие хӑвӑрт чӗнмелли пускӑчсем те пур.
Палӑртса хӑварар: республикӑра кунсӑр пуҫне шыв патӗнче канмалли 161 вырӑн хатӗрленӗ.
Шупашкарта тепӗр икӗ маршрут хута ярӗҫ. Ҫакна кӑҫал тума палӑртнӑ.
23-мӗш тата 31-мӗш маршрутсем ҫӳреме тытӑнӗҫ. ЧР Транспорт министерстви пӗлтернӗ тӑрӑх, 23-мӗш автобус «Грушевый» микрорайона Энергетиксен поселокӗпе ҫыхӑнтарӗ. Унпа Республикӑри ветерансен госпитальне тата Васкавлӑ медпулӑшу пульницине ҫитме меллӑ пулӗ.
31-мӗш автобус та Энергетиксен поселокне кайӗ, вӑл ӑна Вӑйӑмлӑ агрегатсен савучӗпе ҫыхӑнтарӗ — хула ҫум тата чукун ҫул вокзалӗсем урлӑ кайӗ.
Аса илтерер: ҫӗртме уйӑхӗн 1-мӗшӗнчен Ҫӗнӗ Шупашкарпа Шупашкара ҫыхӑнтаракан 61-мӗш троллейбус тӗп хулана кайнӑ чухне «Ҫӗнӗ хула» микрорайона кӗрсе тухма тытӑннӑ. Ҫынсем ыйтнипе 5-мӗш тата 6-мӗш троллейбуссене пӗрлештернӗ, халӗ 6-мӗш кӑна ҫӳрет, унӑн маршручӗ «Промтрактор – Мега Молл».
Ҫитес вӑхӑтра Шупашкар хулинче тепӗр ултӑ бетонлӑ хӳтлӗх лартӗҫ. Вӗсенчен виҫҫӗшӗ кӳлмекре пулӗ. Ҫапла пӗлтерет хула администрацийӗ.
Бетонлӑ хӳтлӗхсене ку эрнере вырнаҫтарӗҫ. Тепӗр партие хатӗрлеме тытӑннӑ-мӗн.
Кӳлмекре пӗр хӳтлӗхе Анне-управҫӑ палӑкӗ патне лартӗҫ. Иккӗшӗ кӳлмек акваторийӗнче пулӗ. Кунсӑр пуҫне «Николаев космонавт урамӗ», «Хулаҫум автовокзалӗ» тата «Таможня» общество транспочӗн чарӑнӑвӗсенче вырнаҫтарӗҫ.
Ҫавӑн пекех Шупашкарта халӑха хӑрушлӑх пирки пӗлтермелли 16 система лартӗҫ. Вӗсем халӑх нумай ҫӳрекен вырӑнта пулӗҫ. Тепӗр 14 системӑна урӑх вырӑнсене куҫарӗҫ.
Шупашкара ҫӗршыври чи маттур ҫӑмӑл атлетсем пуҫтарӑнӗҫ. Ҫӗртме уйӑхӗн 18-21-мӗшӗсенче хулари «Олимпийски» стадионта Шупашкара ҫӗршыври ҫӑмӑл атлетсем пуҫтарӑнӗҫ. Унта 72 регионти спортсменсем пуҫтарӑнӗҫ. Вӗсем чупассипе, хӑварт утассипе, сикессипе, ывӑтассипе ӑмӑртӗҫ.
Ҫӑмӑл атлетика енӗпе Раҫҫей кубокӗнче наградӑсен 22 пуххине выляттарӗҫ.
Ӑмӑртӑва ҫӗртме уйӑхӗн 18-мӗшӗнче 16 сехетре уҫӗҫ.
Шупашкарта «Ехрем хуҫа» ресторан умне бетонран тунӑ хӗрарӑм кӳлепине вырнаҫтарнӑ. Вӑл – чӑваш тумӗллӗ.
«Туй арӑмӗ» ят панӑ ӑна. Авторӗ – Андрей Молоков.
Бюст-постамент ресторанӑн картишне илем кӳрет. Унта – этнокартиш: ӗлӗкхи комод, йывӑҫ пичкесем, кавирсем, картинӑсем пур.
Аса илтерер: кӳлмекре те, юханшыв портӗнче, пӗчӗк кӳлепесем вырнаҫтарнӑ.
Паян ирхине 10 сехет те 15 минутра Шупашкарта Эгер бульварӗнче, «Рябинка» общество транспорчӗн чарӑнӑвӗнчен инҫех мар, 45-мӗш маршрутпа ҫӳрекен автобус тӑрук чарӑннипе икӗ пассажир пульницӑна лекнӗ.
Малтанлӑха пӗлтернӗ тӑрӑх, «Лотос» автобус рулӗ умӗнче ларнӑ 52 ҫулти водителӗн хӑвӑрт кӑна чарӑнма тивнӗ. Хӑй ӑнлантарнӑ тӑрӑх, малти вӗренӳ машини тӑрук чарӑннипе вӑл тормоз ҫине вӑйлӑ пуснӑ. Халӗ Патшалӑх автоинспекцийӗн ӗҫченӗсем ӗҫ-пуҫа уҫӑмлатаҫҫӗ.
Ҫав самантра салонра 7 ҫын пулнӑ. Автобус тӑрук чарӑннипе 1954 ҫулта ҫуралнӑ тата 1961 ҫулта кун ҫути курнӑ икӗ хӗрарӑм ӳксе аманнӑ. Вӗсене иккӗшне те Шупашкарти васкавлӑ медпулӑшу пульницине илсе ҫитернӗ. Унти тухтӑрсем вӗсен сывлӑхне тӗрӗслӗҫ тата сиплӗҫ.
Шупашкарти тухтӑрсем 6-мӗш хутран ӳкнӗ 16 ҫулти хӗрӗн пурнӑҫне ҫӑлса хӑварнӑ.
Хальхи вӑхӑтра вӑл Республикӑри ача-пӑча клиника больницинче реабилитаци витӗр тухать. Сиплев вӑраха тӑсӑлӗ, анчах тухтӑрсем лайӑххине кӑна шантараҫҫӗ: реабилитаци витӗ тухсан хӗр утма кӑна мар, ташлама та пултарӗ.
Нумаях пулмасть пульницӑра катастрофа медицинин тата васкавлӑ медпулӑшу центрӗн тӗп тухтӑрӗ Ольга Краузе пулнӑ. Вӑл анестезиологи тата реанимаци уйрӑмӗнче выртакан 16-ри хӗр патне те кӗрсе тухнӑ. Пациентка ун чухне тухтӑр пулма ӗмӗтленнине пӗлтернӗ. Ольга Краузе унпа пӗрле Шупашкарти медицина колледжне экскурсие кайса килме калаҫса татӑлнӑ.
Сӑмах май, кӑҫал Республикӑри ача-пӑча клиника пульницине ҫӳллӗшӗнчен ӳкнӗ 6 ачана илсе ҫитернӗ.
ЧР вӗренӳ министрӗн ҫумӗ кам пуласси паллӑ. Тӳрех аса илтерер: унчченхи министр ҫумне Марина Лежнинана должноҫре ӳстернӗ, вӑл министрӑн пӗрремӗш ҫумӗ пулса тӑнӑ.
Министр ҫумӗн пуканне Александр Кириллов йышӑннӑ. Влаҫ органӗсенче вӑл ҫӗнӗ ҫын мар. Унччен Александр Кириллов Ял хуҫалӑх министерствинче ӗҫленӗ. Унта вӑл 12 ҫул тӑрӑшнӑ. Кайран, 12 ҫул, Шупашкарти транспорт тата строительство технологийӗсен техникумӗн директорӗн ҫумӗ пулнӑ.
Александр Кириллов Вӗренӳ министерствинче професси тата хушма пӗлӗвӗн, ҫул ҫитмен ачасемпе ӗҫлекен комисси, ӑслӑлӑх аталанӑвӗн кураторӗ пулӗ. Ҫавӑн пекех воспитани ӗҫӗн тата ҫуллахи канӑвӑн блокне ертсе пырӗ.
Шупашкарти вӑй агрегачӗн заводне Китай делегацийӗ килнӗ. Енсем ҫул-йӗрпе строительство техникине туса кӑларас ыйтӑва сӳтсе явнӑ май техника валли кӗпер тата турткӑч курупкине туса кӑларасси пирки калаҫса татӑлнӑ.
Асӑннӑ завода ахальтен суйласа илмен. 2024 ҫултан пуҫласа Раҫҫейӗн Промышленность министерстви Чӑваш Енӗн машиностроени кластерӗпе пӗрле пулса ҫул-йӗр строительствин, ял хуҫалӑхӗн тата склад техники валли кирлӗ кӗпере туса кӑларать.
Завод 5 тонна тиекен «СИЛАНТ» погрузчик туса кӑларма пуҫланӑ ӗнтӗ, ӑна ҫӗршыври продукцин реестрне кӗртнӗ. Тепри, 2 тоннӑлли, тӗрӗслев витӗр тухать. Ӑна кӑҫал, ҫулталӑк вӗҫлениччен, туса кӑларма тытӑнасшӑн.
Асӑннӑ завод КамАЗпа «ПО ЕлАЗ» экскаватор-погрзучикӗсем валли те кирлӗ компонент туса кӑларать.
+14.2 °C