Паян Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрти стационар уйрӑмӗнче пурӑнакан книмемисемпе мучисене сӑн ӳкернӗ.
«Сӑнӳкерчӗк — ҫын кӑмӑлне лайӑхлатма пулӑшакан мелсенчен пӗри. Анчах ватӑсенчен чылайӑшӗ хӑйне хитре мар тесе шухӑшлать, тискер тесе хурлакансем те пур. Пирӗн тӗллевӗмӗр вӗсене урӑхла шухӑшлама пулӑшасси пулчӗ. Кашни ҫынах хӑйне май илемле те илӗртӳллӗ. Ҫитменнине тата хитре ҫын ватӑлсан та хитрипех юлать», — тесе шухӑшлать социалла центрӑн пресс-секретарӗ Вера Иванова.
Ватӑсене портрет жанрӗпе ӳкернӗ. Ҫӑвна май кашни ҫыннӑн шалти кӑмӑл-туйӑмӗ тата аванрах, тарӑннӑнрах курӑнать тесе палӑртать центрӑн пресс-секретарӗ.
85 ҫулти Вениамин Папченкӑна вара чӳрече умӗнче те сӑн ӳкерсе илнӗ. Вӑл нумай вулама юратать, чуна тата ӳт-пӗве лӑплантармалли техникӑсене пӗлет.
Ӗнер, нарӑс уйӑхӗн 18-мӗшӗнче, Шупашкарта пӗр машина икӗ ачана ҫапса хӑварнӑ. 11-12 ҫулсенчи ачасене пульницӑна ӑсатнӑ.
Инкек хулари Трактор тӑвакансен проспектӗнчи 33-мӗш ҫурт тӗлӗнче пулса 16 сехет те 20 минутра иртнӗ.
«Лада Гранта» автомобиль водителӗ ӗнентернӗ тӑрӑх, вӑл светофор мӗнле ҫуннине хӗвел ҫутине пула асӑрхайман иккен. 36 ҫулти водитель хӑй урах пулнӑ.
Шупашкарти аэропортра ҫӗнӗ арт-обьект вырнаҫтарнӑ. Вӑл –телескоп. Ахальтен мар. Аэропорта Андриян Николаев космонавт ятне панӑ.
Халӗ рейс кӗтсе ларакансем оптика приборӗн обьективӗнче Уйӑх пирки видеороликсем курма, ун умӗнче сӑн ӳкерӗнме пултараҫҫӗ.
Аса илтерер: аэропорта 2021 ҫулта ҫӗнетме тытӑннӑ. Юсав ӗҫӗсен пӗрремӗш тата иккӗмӗш тапхӑрӗсем вӗҫленнӗ. Кӑҫал виҫҫӗмӗш тапхӑр пуҫланмалла.
Шупашкарти усламҫӑ 7 вулкан ҫине ҫитсе курнӑ. Вӑл тӗнчери ҫакна тунӑ 66-мӗш ҫын пулса тӑнӑ.
Марат Владимиров – 31-ре. 8 ҫулта вӑл Эльбрусран тытӑнса тӗнчери чи ҫӳллӗ вулкан ҫине ҫитнӗ. Вӑл Африкӑри Килиманджарӑра, Мексикӑри Орисабӑра,Иранри Демавендра, Антарктидӑри Сидлейра, Чилири Охос-дель-Саладӑра пулнӑ. Чи йывӑрри Чилире пулнӑ. 30 градус сивӗ ҫанталӑкпа кӗтсе илнӗ Антаркидӑра та ҫӑмӑлрах пулнӑ.
Марат ҫул ҫӳресе 15 млн тенкӗ пӗтернӗ. Халӗ вӑл Эвереста ҫитесшӗн.
Шупашкар хулинче килсӗр-ҫуртсӑр, пӗр документсӑр-мӗнсӗр ҫынна паспорт туса панӑ, кӗҫех ӑна интерната вырнаҫтарӗҫ.
Килсӗр-ҫуртсӑр, пӗр документсӑр ҫын кӑҫалхи кӑрлач уйӑхӗн вӗҫӗнче Шупашкарти пульницӑсенчен пӗрне лекнӗ. Тухтӑр пулӑшӑвӗ кирлӗ ҫынна урама кӑларса яраймӑн. Унтисем Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра пӗлтернӗ.
Арҫынна халӗ паспорт туса панӑ. Документа туса пама Шалти ӗҫсен министерствин Миграци ыйтӑвӗпе ӗслекен управленийӗ пулӑшнӑ, патшалӑх пошлинине тӳлеме чиркӳ укҫа уйӑрса панӑ.
Ӗнер, нарӑс уйӑхӗн 17-мӗшӗнче, Чӑваш Ен Элтеперӗ Олег Николаев республикӑри вӑрҫӑ вететарнӗсемпе тыл ӗҫченӗсене Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халалланӑ юбилей медалӗпе савӑнӑҫлӑ лару-тӑрура чысланӑ.
А.В. Кочетов ячӗллӗ Чӑваш Енри кадет корпусӗнчи мероприятие 17 ватта чӗннӗ. Пӗтӗмпе вара ун пек медальпе республикӑри 2574 ҫынна чыслӗҫ.
Медале тивӗҫнисенчен пӗри, Тамара Даниловская, Олег Николаева сӑвӑ вуласа панӑ. Тверь облаҫӗнчи ялта ҫуралнӑ хӗрарӑм колхозра лашапа ӗҫленӗ, уйсене сӳреленӗ. Кайран Шупашкарти 5-мӗш стройтрестра аслӑ экономистра ӗҫленӗ.
Шупашкарпа Ҫӗнӗ Шупашкар хушшинче тепӗр троллейбус кӗҫех ярасси пирки пӗлтернӗччӗ. Ун чухне ку хӑҫан пуласси паллӑ марччӗ.
Халӗ паллӑ: 61-мӗш маршрута нарӑсӑн 21-мӗшӗнче ҫула ярӗҫ. Вӑл Шупашкарти Гладков урамӗнчен Трактор тӑвакансен проспекчӗпе Ҫӗнӗ Шупашкарти «Иваново» микрорайона ҫитӗ.
Аса илтерер: икӗ хула хушшинче 2024 ҫулхи ҫулларанпа 62-мӗш троллейбус ҫӳрет.
Шупашкарта пурӑнакан ветеран Василий Акулов 101 ҫул тултарнӑ.
Василий Дмитриевич Пенза облаҫӗнче 1924 ҫулта ҫуралнӑ. 1941 ҫултанпа вӑл Мускаври кирпӗч савутӗнче ӗҫленӗ. Утпнах ӑна фронта илсе кайнӑ. Вӑл танк полкне лекнӗ, оруди командирӗ пулнӑ.
Василий Дмитриевич Харьков ҫывӑхӗнче ҫапӑҫнӑ, Курск пӗккинче пулнӑ. Аманнӑ, госпитальте сипленсен каллех строя тӑнӑ.
Вӑрҫӑ хыҫҫӑн ветеран Шупашкара куҫнӑ. Мӑшӑрӗпе 4 ачана ура ҫине тӑратнӑ.
Василий Дмитриевича II степень Тӑван ҫӗршыв вӑрҫин орденӗпе, «Германие ҫӗнтернӗшӗн» медальпе тата ытти наградӑпа чысланӑ.____
Шупашкарта пурӑнакан пӗр учитель ултавҫӑҫене ӗнӗнсе хӑйӗн пӗртен-пер хваттерне сутса янӑ, укҫана вӑл вӗсене куҫарса панӑ. Пилӗк миллиона яхӗн тенкӗ.
67 ҫулти хӗрарам патне пӗр уйӑх каярах мессенджерсенчен пӗринче шкул директорӗн ячӗпе шӑнкӑравланӑ. «Директор» хӗрарӑмран юлашки виҫӗ уйӑхри расчёт хучӗсен сӑнӳкерчӗкне ыйтнӑ, вӑл Украинӑна укҫа куҫарса панине, унпа Федерацин хӑрушсӑрлӑх службин ӗҫчене кӗҫӗх ҫыхӑнассине систернӗ.
Хӑйсемпе право хуралӗн тытӑмӗн тата Росфинмониторинг ӗҫченӗсем тесе паллаштаракансене ӗненнипе хӗрарӑм банкра банкра кредит илнӗ, 20 ҫул пурӑннӑ пӗртен-пӗр хваттерне сутса янӑ.
Банкра вӑл укҫа сипленме кирлӗ тесе каланӑ, хваттер сутнине чирлӗ пӗлӗшне пӑхма Мускава тухса каяссипе сӑлтавланӑ. Кун пек суйма ӑна ултавҫӑсем вӗрентнӗ. Мӗнпур укҫана банк приложенийӗ урлӑ ултавҫӑсене куҫарса панӑ.
Ултавҫӑсем кайран та шӑнкаравлама пӑрахманнине кура хӗрарӑм хӑй улталаннине ӑнланса илнӗ те йӗрке хуралҫисенчен пулӑшу ыйтнӑ.
Чӑваш Енре пурӑнакан пӗр хӗрарӑмӑн кӑкӑр ракӗ тупӑннӑ. Ӑна васкавлӑн операци тумалла пулнӑ. Пӗр амакӗ ҫитмен, тепри тупӑннӑ. Хӗрарӑм чӗре чирӗпе нушаланать иккен.
Республикӑри онкологи диспансерӗн тата Республикӑри кардиологи дсипансерен врачӗсем пӗр-пӗринпе тӗплӗн канашласа пӑхнӑ хыҫҫӑн икӗ операцие пӗр харӑс тума йышӑннӑ.
Операци тӑватӑ сехете яхӑн тӑсӑлнӑ. Малтан митраль клапанне ылмаштарнӑ, унтан мастэктоми текен операцие туса ирттернӗ.
+7.3 °C