Нарӑс уйӑхӗн 28-мӗшӗнче ирхи 3 сехетре Шупашкарта 19 ҫулти таксист патне икӗ ҫамрӑк пынӑ та хула хӗррине леҫсе яма ыйтнӑ. Унта ҫитсен вара вӗсем водителе багажнике чиксе хунӑ та хӑйсем руль умне ларса Канаша вӗҫтернӗ.
Унта багажникри водитель тарма пултарнӑ. Вӑл кун пирки тӳрех полицие хыпарланӑ.
Машина номерӗсене полици нарячӗсене пӗлтернӗ. Кӗҫех вӗсене асӑрханӑ, чарӑнма ыйтнӑ. Анчах лешсем малалла вӗҫтернӗ, полицейскисем - вӗсем хыҫҫӑн. Каччӑсем тарнӑ чухне ҫул пӑрӑнчӑкӗнче ҫаврӑнса ӳкнӗ. Пӗрне, унччен те судпа айӑпланнӑ 19-ти ҫамрӑка, тытса чарнӑ.
Нарӑсӑн 23-мӗшӗнче Шупашкарти Пролетари урамӗнче ларакан фургонран канфетсем, газлӑ шӗвексем ҫухалнӑ. Водитель машина чӳречи ҫӗмрӗк пулнине, тавар ҫуккине асӑрханӑ та полицие пӗлтернӗ.
Вӑрӑсене Зара ятлӑ йытӑ тупма пулӑшнӑ. Вӑл вӗсен йӗрӗ ҫине ӳксе полицейские ҫав ҫулпа илсе кайнӑ. Вӑрӑсенчен пӗри пурӑнакан ҫурт патне ҫитсен вӑрланӑ тавар урайӗнче выртнине асӑрханӑ. Вӑрӑсем ӳкерсе хӑварнӑ иккен.
Ҫак ӗҫе тума пултарнӑ виҫӗ каччӑна тытса чарнӑ. Вӗсем унччен те полици аллине леккеленӗ. Каччӑсен тӗлӗшпе пуҫиле ӗҫ пуҫарнӑ. Вӗсем айӑпне йышӑннӑ.
Шупашкарти арҫын савнийӗ пулнӑ хӗрӗ хӑйне пӑрахнине ниепле те йышӑнман. Вӗсем арҫыннӑн ҫуралнӑ кунӗ умӗн уйрӑлнӑ. Хайхискер ӑна вӑрлама шутланӑ.
Арҫын хӗре урамра сыхласа тӑнӑ, ӑна хӑйӗн машинине вӑйпах лартнӑ. Вӑл ҫапла тӗлпулу ирттересшӗн пулнӑ иккен. Анчах хӗр тарма пултарнӑ. Кайран вӑл полицие кайса арҫын тӗлӗшпе заявлени ҫырнӑ.
Ун тӗлӗшпе пуҫиле ӗҫ пуҫарнӑ. Арҫын ҫуралнӑ кунне полицире кӗтсе илнӗ. Ӑна кун пек ҫынна вӑрланӑшӑн 5 ҫул таран тӗрмене лартма пултараҫҫӗ.
Шупашкарта пурӑнакан Артем Осипов 7 ҫулта кӑна-ха. Анчах ҫитӗнӗвӗсем унӑн хӑйӗнчен те пысӑк. Артем купӑс каласа юрлама питӗ ӑста.
Нумаях пулмась Артема Пӗрремӗш каналпа пыракан «Лучше всех!» кӑларӑма ӳкерӗнме чӗннӗ. Кун пирки унӑн амӑшӗ Лена Осипова «Контактра» халӑх тетелӗнчи страницинче хыпарланӑ.
Пӗрремӗш канал редакторӗ амӑшӗ патне мессенджерта ҫыру янӑ, ӳкерӳ пуш уйӑхӗнче, 9-14-мӗшӗсенче, пулассине пӗлтернӗ. Ӳкерӳ икӗ кун пулмалла. Хӑш кун пымаллине редактор каярахпа пӗлтерме шантарнӑ.
Паян, нарӑс уйӑхӗн 26-мӗшӗнче, Шупашкарти нумай хваттерлӗ ҫуртсенчен пӗринче пушар алхасма тытӑннӑ. Инкек Мир проспектӗнчи 72-мӗш ҫуртри иккӗмӗш хутра пулнӑ.
Хӗрлӗ автан ирхи 5 сехет те 30 минтура алхасма пуҫланӑ. Ҫӑлавҫӑсем уҫӑ ҫулӑма 40 минут хушшинче лӑплантарнӑ. Пушара пӗтӗмпех вара ирхи 8 сехет те 34 минут тӗлне сӳнтерсе пӗтернӗ.
Ҫунакан ҫуртран 17 ҫынна, ҫав шутра 2 ачана, эвакуациленӗ.
Пушар, малтанласа шухӑшланӑ тӑрӑх, пирус туртнӑ чух асӑрханманран тухма пултарнӑ.
Шупашкарта 3-мӗш класс ачи палламан ҫынсене амӑшӗн банк карттин номерне панӑ. Кун хыҫҫӑн 34 ҫулти хӗрарӑмӑн счечӗ ҫинчен 5 пин тенке яхӑн ҫухалнӑ.
9 ҫулти ача компьютер вӑййисене юратнӑ. Пӗрре мессенджерте ун патне скинсем туянма сӗнӳ килнӗ. Ача ҫав ҫынпа ҫырӑннӑ, малтан амӑшӗн банк карттин номерне панӑ, кайран – телефон ҫине килнӗ кода. Ҫапла счет ҫинчен 4800 тенкӗ ҫухалнӑ. Нарӑсӑн 25-мӗшӗнче хӗрарӑм полицие пырса заявлени ҫырнӑ.
Ку тӗслӗх тӗлӗшпе пуҫиле ӗҫ пуҫарнӑ.
Паяр ирхине, 5 сехет ҫурӑра, Шупашкарти Мир проспектӗнчи 72-мӗш ҫуртра пушар пулнӑ. Инкеклӗ лару-тӑру министерстви пӗлтернӗ тӑрӑх, нумай хваттерлӗ ҫуртран 72 ҫынна урама кӑларнӑ. Ҫав шутра икӗ ача пулнӑ.
Ҫӑлавҫӑсем пушара 40 минутран сӳнтернӗ. Халӗ специалистсем ҫулӑм мӗнрен тухнине тӗпчеҫҫӗ.
Лидия Филиппова чӑваш ҫыравҫи, поэчӗ, журналисчӗ, публицисчӗ нумаях пулмасть шкул ачасемпе тӗл пулнӑ.
Лидия Ивановна халӑх тетелӗнчи хӑйӗн страницинче пӗлтернӗ тӑрӑх, мероприятие нарӑс уйӑхӗн 21-мӗшӗнче уявлакан Тӑван чӗлхен пӗтӗм тӗнчери кунне тата Ҫеҫпӗл Мишши ҫуралнӑранпа 125 ҫул ҫитнине халалласа ирттернӗ.
Литература тӗлпулӑвне Шупашкарти 24-мӗш шкултан пуҫланӑ. Унта, сӑмах май каласан, Лидия Филиппова ывӑлӗ Сентиер те вӗреннӗ.
«Мӗнех калам? Эпӗ кӑмӑллӑ! Шкул аталанать, коллектив анлӑн шухӑшлама пӗлекенскер, шкул ачисем питех те килӗшрӗҫ – ӑслӑ, хитре, ун пеккисем яланах ман кӑмӑла каяҫҫӗ. Флешмоб хатӗрлеме те ӗлкӗрнӗ. Ачасем, тавтапуҫ, эсир – маттурскерсем. Светлана Николаевна, тав сире...» – тесе шӑрҫаланӑ Лидия Филиппова халӑх тетелӗнчи хӑйӗн страницинче.
Гигиена та эпидемиологи центрӗ пӗлтернӗ тӑрӑх, коклюшпа чирлесси 25 процент ӳснӗ. Кӑҫалхи кӑрлач уйӑхӗнче республикӑра 48 ҫын ҫак чирпе аптӑранине палӑртнӑ.
Шупашкарта - 25 ҫын, Ҫӗнӗ Шупашкарта - 18 ҫын, Патӑрьел округӗнче -4 ҫын, Вӑрнар тӑрӑхӗнче, Ҫӗмӗрлере, Канашра 1-ер ҫын чирленӗ. Пӗтӗмпе 43 ача тата аслӑ ӳсӗмри 5 ҫын коклюшпа чирленӗ. 35-шӗ - прививка тутарманнисем.
Шупашкарти 66 ҫулти хӗрарӑм патне мессенджерта пуҫлӑхӗ ҫырнӑ. Ячӗ, сӑнӳкерчӗкӗ пӗрешкелех пулнӑран вӑл ӑна ӗненнӗ.
Хайхискер каланӑ тӑрӑх, ун ячӗпе такам кредит илесшӗн, ҫавӑнпа ун патне йӗрке хуралӗнчен шӑнкӑравлӗҫ-мӗн. Лешсем чӑнах та унпа ҫыхӑннӑ.
Хӗрарӑм виҫӗ кредит илнӗ. Пӗтӗмпе - 2 миллион та 770 пин тенкӗ. Пӗр кредитне хваттерне салук хурса илнӗ.
Хӑйӗн пуҫлӑхӗпе калаҫсан тин 66 ҫулти хӗрарӑм ултавҫӑсен серепине лекнине ӑнланнӑ.
+9.3 °C