Шупашкарта агрегат савучӗ текех ҫук. Тӗрӗссипе хупӑнман-ха вӑл. Анчах вӑл урӑх ятпа ӗҫлеме пуҫланӑ. Кун пирки «Трактор савучӗсем» концернӑн пресс-служби хыпарланӑ.

«Шупашкарти агрегат савучӗ» производство компанийӗ малашне те малтанхиллех ӗҫлӗ. Унӑн ячӗ ҫеҫ улшӑнӗ. «ШАС» ПК» тулли мар яваплӑ общество малашне «ЧЕТРА» тулли мар яваплӑ общество ятлӑ пулӗ.

Савутӑн ятне ылмаштарма «Трактор савучӗсем» концерн» машинӑпа индустри ушкӑнӗ йышӑннӑ. Сӑмах май каласан, асӑннӑ компани савутӑн капиталӗн 100 проценчӗпе хуҫаланать.

Концернта ӗнентернӗ тӑрӑх, предприятин юридици ятне ылмаштарни реорганизаци ирттернине пӗлтермест. Унтисем хӑйсен контрагенчӗсемпе, клиенчӗсемпе, партнерӗсемпе тата дилер сечӗсемпе малтанхиллех ӗҫлӗҫ.

Чӑваш Ен Элтеперӗ Михаил Игнатьев журналистсене, полиграфи предприятийӗсемпе издательствӑсенче ӗҫлекенсене, пичетпе массӑллӑ информаци хатӗрӗсен ветеранӗсене професси уявӗсемпе – Раҫҫей тата Чӑваш пичечӗн кунӗсемпе — «чун-чӗререн» саламланӑ.

Вӗсене Элтепер «чи хӑватлӑ вӑйсенчен пӗринпе – сӑмах вӑйӗпе» хуҫаланнине палӑртнӑ.

Чӑваш халӑх поэчӗ Петӗр Хусанкай: «Эп сӑмах хӑватне ӗненетӗп», – тесе каланине аса илнӗ. Сӑмахпа вара амантма та, сиплеме те, ытти ҫын туйӑмӗпе шухӑшлавне витӗм кӳме те пулнине каланӑ. Халӑх-шухӑш кӑмӑлӗ журналистсем ӗҫе «мӗнлерех ӑсталӑхпа тата яваплӑхпа пур­нӑҫланинчен» килнине палӑртнӑ. Республика ертӳҫи Чӑваш Енри журналистсем тӳрӗ кӑмӑлпа ӗҫлессе шанать.

Пӗлтӗр Чӑваш Енри ҫул-йӗр ӗҫченӗсем строительство тата юсав валли уйӑрнӑ укҫа-тенке хута яма ӗлкӗреймен. ЧР Транспорт министерстви пӗлтернӗ тӑрӑх, хальлӗхе ҫул-йӗр фончӗ уйӑрнӑ 5 млрд тенкӗрен 4,6 млрд тенкине ҫеҫ тӑкакланӑ. Ку 92,2 процентпа танлашать. Пӗтӗмпе 394 миллион тенкӗ юлнӑ.

Ведомство палӑртнӑ тӑрӑх, укҫан пӗр пайне тӑкаклама ӗлкӗрме май та пулман, мӗншӗн тесен вӑл республикӑна ҫулталӑк вӗҫӗнче кӑна килнӗ. Сӑмах 96,9 миллион тенкӗ пирки пырать.

Тепӗр 51,3 миллион тенке аукционра перекетлеме май килнӗ. 245,9 миллион тенки вара ҫул ҫинчи хӑш-пӗр ӗҫе пурнӑҫламаннипе тӑрса юлнӑ, вӗсене кӑҫал ирттерме палӑртнӑ.

Роспотребнадзор ачасене килтен апат илсе пыма чарӗ. Анчах ку пур ҫимеҫе те пырса тивмест. Тӗслӗхрен, малашне ачасен улма-ҫырла, типӗтнӗ улма-ҫырла, мӑйӑр килтен илсе килме юрать. Вӗсене тӑхтӑв вӑхӑтӗнче ҫийӗҫ.

Ҫавӑн пекех шкулти тата ача-пӑча уйлӑхӗсенчи менюна витаминсемпе тата микроэлементсемпе, бифидобактерисемпе пуян ҫимӗҫсем кӗртмеллине палӑртнӑ. Кунсӑр пуҫне апат пӗҫернӗ чухне йодлӑ тӑварпа кӑна усӑ курӗҫ.

Шкул ачин апатланӑвӗнче ҫак ҫимӗҫсем пулмалла: какай, чӑх какайӗ, сӗт, услам тата ӳсен-тӑран ҫӑвӗ, хура, шурӑ ҫӑкӑр. Пулла, ҫӑмартана, тӑпӑрча тата сӗт юр-варне эрнере 2-3 хутчен кӑна менюна кӗртме сӗнеҫҫӗ. Хушма ҫимелли пек ачасене кислородлӑ коктейль пама пултараҫҫӗ.

Роспортебнадзор шкулти шӑпӑрлансене пирожнӑйпе, тортпа, ливер кӑлпассипе, сельдь пулӑран хатӗрленӗ форшмакпа, по-флотски пӗҫернӗ макаронпа, вакланӑ ҫӑмартапа, вӗретмен сӗтрен хатӗрленӗ тӑпӑрчпа, кӑмпапа, консервланӑ пахча ҫимӗҫпе тата улма-ҫырлапа, паштетпа, тапӑрчӑ е аш хурса ҫавӑрнӑ икерчӗпе, ӑшаланӑ ҫӑмартапа, фритюре ӑшаланӑ ҫимӗҫсене ҫитерме чарать. Ку кваса, кумыса, газировкӑна, чӗлхене чӗпӗтекен соуссене, горчицӑна, кетчупа, майонеза, чӑмлака, карамеле те пырса тивет.

Малалла...

Етӗрне районӗнчи Килтӗшри ҫемье валли укҫа пухаҫҫӗ. Наталья Викторовна Баринова ятлӑ хӗрарӑм 8 ача ҫуратнӑ иккен. Анчах ҫак кунсенче ҫемье пысӑк шар курнӑ: вӗсен кил-ҫурчӗ хӗл варринче вутпа кӗлленсе ҫӗрпе танлашнӑ.

Нушана лекнисене хӗрхенме пӗлекен ҫынсене Бариновсене пӳрт туянса пама ыйтса тӗнче тетелӗнчи халӑх ушкӑнӗсенчен пӗринче ҫырнӑ. Пулӑшма килӗшекенсене тав тунине те палӑртнӑ.

Укҫа куҫарса парас кӑмӑллисем валли счет реквизичӗсене кӑтартнӑ:

укҫана илекенӗ Андреева Валентина Никандровна,

укҫа илекенӗн счечӗ 40817810111080012557,

укҫа илекенӗн банкӗ — «Россельхозбанк» учрежденин Чӑваш Енри филиалӗ,

ИНН / КПП 7725114488/ 213002002,

БИК 049706752,

корреспондент счечӗ

30101810600000000752.

Кӗҫех Чӑваш автономийӗ йӗркеленнӗренпе 100 ҫул ҫитет. Ҫавна май «Чӑвашкино» патшалӑх киностудийӗ кӑҫал республика пирки фильмсем ӳкерме палӑртнӑ.

Хальлӗхе пӗлтернӗ тӑрӑх, фильмсене республикӑри паллӑ ҫынсем пирки ӳкерӗҫ: СССР летчик-космонавчӗ, Совет Союзӗн икӗ хут Паттӑрӗ Андриян Николаев, Никита Бичурин востоковед, чӑваш поэзийӗн классикӗ Ҫеҫпӗл Мишши, Пӗрремӗш тӗнче вӑрҫине тата Граждан вӑрҫине хутшӑннӑ Василий Чапаев ҫинчен. Кунсӑр пуҫне списока Шупашкар йӗркеленнӗренпе 550 ҫул ҫитнине халалланӑ фильмсене, чӑваш халӑхӗн историйӗпе культури ҫинчен ӳкернӗ картинӑна кӗртнӗ. Списокра пӗтӗмпе — 17 документлӑ фильм.

Анчах республика ҫыннисен вӗсенчен 10-шне кӑна суйламалла. Сасӑлав киностудин сайтӗнче пырать. Вӑл кӑрлач уйӑхӗн 15-мӗшӗччен пулӗ.

Шупашкарта пурӑнакан 30 ҫулти арҫын 6-ри ачишӗн алимент тӳлемен. Парӑм самаях пухӑннӑ. Халӗ ун тӗлӗшпе пуҫиле ӗҫ пуҫарнӑ.

Суд йышӑнӑвӗ пулсан та ҫак арҫын икӗ уйӑх ытла алимент тӳлемен. Унӑн уйӑхсерен ӗҫлесе илнӗ мӗнпур укҫан 1\4 пайне пӗчӗк хӗрӗшӗн памалла пулнӑ. Пӗлтӗр авӑн уйӑхӗнче алимент тӳлеменшӗн ӑна 20 сехет ӗҫлеттермелле тунӑ.

Анчах кун хыҫҫӑн та арҫын тӳрӗ ҫул ҫине тӑман – пурпӗрех алимент тӳлемен. Ҫакӑншӑн ун тӗлӗшпе пуҫиле ӗҫ пуҫарнӑ. Кун хыҫҫӑн кӑна хӑраса ӳкнӗ пулмалла: тӳрех пухӑннӑ парӑма, 90 пин тенке яхӑн, тата исполнительнӑй сборшӑн 6 пин тенкӗ тӳленӗ.

Станислав Садальскин Инстаграмри страницинчи сӑн

Чӑваш Енре ҫуралнӑ Станислав Садальские, Раҫҫейри театрпа кино актерне, Мускаври пульницӑна вырттарнӑ, ҫак кунсенче ӑна операци тунӑ. Кун пирки актер Инстаграмри хӑйӗн старницинче пӗлтернӗ.

Станислав Садальский – 67 ҫулта. Унӑн чӗрине операци тунӑ. «Манӑн сайра тӗл пулакан хушаматлӑ тухтӑр Иванов (Иванов профессорӗн ывӑлӗ) ӗҫмест, операцие питӗ тӗплӗн ирттернӗ, вара эпӗ кӑкӑр тулли сывласа ятӑм. Тухтӑра сире те сӗнетӗп», — ҫапла ҫырнӑ актер Инстаграмри страницинче.

Унӑн пултарулӑхне кӑмӑллакансем ӑна часрах сывалмашкӑн ӑнӑҫу сунса комментарисем ҫырнӑ.

KazanFirst кӑларӑм пӗлтернӗ тӑрах, ЧР Элтеперӗ Михаил Игнатьев хӑйӗн тӗллевӗсемпе усӑ курма иномарка туянма шутланӑ. Вӑл «тимӗр ута» кредитпа илесшӗн-мӗн.

Автосалона Элтепер мӑшӑрӗпе тата ывӑлӗпе пынӑ. Ҫӳлерех асӑннӑ кӑларӑм палӑртнӑ тӑрӑх, Михаил Васильевича кредит заявкине пӗр банка яма пулӑшнӑ. Банк ӑна ырланӑ-и е ҫук-и – хальлӗхе паллӑ мар. Ҫакна вара ҫирӗплетсех калама пултараҫҫӗ: Элтепер «Тайота» РАВ 4 маркӑллине суйланӑ, шӑпах ӑна туянасшӑн.

Банк кредит пама килӗшсен ҫак иномаркӑпа Михаил Игнатьеван мӑшӑрӗ ҫӳрӗ.

Чӑваш Енӗн Финанс министерстви Шупашкарти аэропорта ҫулсерен субсиди уйӑрнине пӗлтерет. Унта ӗнентернӗ тӑрӑх, пӗлтӗр виҫӗм ҫулхинчен 2,5 хут нумайрах пӑхса хӑварнӑ. Ҫапла майпа ун чух 5,4 миллион тенкӗ уйӑрнӑ. Ҫак кӗмӗл Шупашкартан Ӗпхӗве тата Шупашкартан Питӗре каякан авиарейссен хакне чакарма кайнӑ. Кӑҫал 22,2 миллион тенкӗ уйӑрӗҫ.

Ҫав вӑхӑтрах «Правда ПФО» тӗнче тетелӗнчи хаҫат кӑҫал Шупашкара Росавиаци субсиди уйӑрмассине пӗлтернӗ.

2019 ҫулта Атӑлҫи тӑрӑхӗнчи хуласене ҫӳреме 60 ытла рейспа ҫӳреме субсиди парӗҫ. Списока Атӑлҫи тӑрӑхӗнчи 10 хула лекнӗ: Саранск (5 рейс), Хусан (18 рейс), Бугульма (5 рейс), Ӗпхӳ (9 рейс), Чулхула (6 рейс), Пермь (10 рейс), Ӗрӗнпур (3 рейс), Чӗмпӗр (1 рейс), Киров (1 рейс), Самара (10 рейс).