Чӑваш патшалӑх гуманитари ӑслӑлӑхӗсен институтне никӗсленӗрен 75 ҫул ҫитет. Ку института 1930 ҫулта никӗсленӗ. Институтра чӑваш чӗлхине, литературине, халах пултарухӑхне, историне тата ытти пайсене тӗпчеҫҫӗ. Пурӗ халӗ институтра 44 сотрудник ӗҫлет, вӗсен шучӗнче 6 ӑслӑлӑхсен тухтӑрӗ, 22 ӑслӑлахсен кандидачӗ.

Ҫӑлкуҫ: Cap.ru

Улатӑр районӗнчи Ҫӗнӗ Эйпӗҫ вӑтам шкулӗнче Аруй Михаил Филлипович ҫуралнӑранпа 110 ҫул ҫитнине, тата шкула никӗсленин 165 ҫул ҫинтине халалланӑ вулакансен конкурсӗ иртнӗ. Конкурса А.И.Борисов уҫнӑ. Пурӗ вӑтӑрпиллӗкӗн хӑйсен тата М. Аруй сӑввисене вуланӑ. Пӗрремӗш вырӑнсене Раиса Ивановна Долгова (чӑваш чӗлхипе литературине малтан ку шкулта вӗрентнӗ), Катя Романова тата Аня Круглова (1 клас), Александр Петров (5 клас), Наталия Краснова (10 клас) йышӑннӑ. Вӗсене грамотӑсем тата парнесем панӑ.

Литература кӗтесӗ К.В. Ивановӑн тата темиҫе сӑввипе тата "Хальхи самана" поэмипе пуянланчӗ. Ҫӗнӗ сӑвӑсем: "Ешӗл вӑрман айккипе..." , "Ватӑ вӑрман шухӑшӗ", "Кӗркенне", "Килсе ҫитрӗ кӗркунне..."

Чӳкӗн 25 Туҫи Мӑрат вӑтам шкулне туса хунипе 110 ҫул ҫитнине паллӑ тӑваҫҫӗ. Сӑмах май каласан шкула 1895 ҫулта никӗсленӗ.

Уява шкултан вӗренсе тухнисене, вӗрентекенсене, хӑнасене чӗнеҫҫӗ. Юбилей валли "Туҫи Мӑрат шкулӗ: ӗнер, паян, ыран" стенд йӗркеленӗ. Унта хӑнасем малтанхи тата хальхи шкул пурнӑҫӗпе, шкулӑн малашлӑхӗпе паллашма пултараҫҫӗ.

Шупашкарӑн Калинин районӗнчи 177 номерлӗ ача-пӑча сачӗнче кашни ҫул Анне Кунне халаласа халӑх кӗпе-тумӗн уявне иртереҫҫӗ. Кӑҫал та чӳк уйӑхӗн 21-пе 22 хушшинче иртернӗ. Ача-пӑча сачӗнче воспитани илекен ачасен асаннесем ачасене чӑваш, вырӑс тата тутар халӑхӗн кӗпе-тумӗсене кӑтартрӗҫ.

Уяври сӑнӳкерчӗксене кунта курма пулать.

Ҫӑлкуҫ: Cap.ru

Чӑваш патшалӑх ӳнер музейӗнче «Акцыновия – юрату планети» ача-пӑча ӳкерчӗкӗсен конкурсне пӗтӗмлетнӗ. Конкурса пӗтӗмпе 500 ӗҫ патнелле ярса панӑ. Вӗсенчен суйласа илнӗ 100-нe экспозицинче курма май пур.

Хӑш пӗр ӗҫсене эсир кунта курма пултаратӑр.

Ҫӑлкуҫ: Cap.ru

Шупашкарта "Ҫӗнӗ ҫул юмахӗ" хула конкурсне ирттерме йышӑннӑ.

Ҫaкӑн ҫинчен хула пуҫлӑхӗ Николай Емельянов хушу кӑларнӑ. Конкурс 2005 ҫулхи раштавӑн 17-пе 28-мӗш хушшинче иртӗ. Виҫӗ номинаци пулӗ:

1. Социаллӑ сферӑра ӗҫлекен учрежденисен ҫӗнӗ ҫул валли ерешлетнӗ чи капӑр кантӑк е витрина.

2. Социаллӑ сферӑра ӗҫлекен учрежденисен ҫӗнӗ ҫул валли ерешлетнӗ чи капӑр малти алӑк е ҫурт умӗ.

3. Учрежденисем ҫумӗнче вырнаҫнӑ лаптӑксенчен чи тирпейлӗ те чи лайӑх уява хатӗрленнисем.

Конкурса 2006 ҫулхи кӑрлачӑн 15 пӗтӗмлетӗҫ.

Ҫӑлкуҫ: Cap.Ru

Ыран (23.11.05) Вӑрнар районен «Ҫӗнтерӳ ҫулӗ» хаҫачӗн пӗрремӗш кӑларӑмӗ тухнӑранпа 75 ҫул ҫитнине уявлӗҫ. Хаҫатӑн пӗрремӗш кӑларӑмӗ 1930 ҫулхи чӳкӗн 1-мӗшӗнче тухнӑ.

Хаҫат малтан «Социализм ҫулӗпе» ятлӑ пулнӑ. 1962 ҫулта хаҫата хальхи ята панӑ. Xаҫата «Вӑрнар издательство ҫурчӗ» кӑларать.

Ҫӑлкуҫ: Cap.ru

Чӳкӗн 23 Чӑваш патшалӑх филармониӗнче "Марий Эл" патшалӑх ташӑ ансамблӗн концерчӗ иртӗ. Пуҫламӑшӗ 18 сехетре. Пурне те ҫак концерта чӗнетпӗр.

"Марий Эл" патшалӑх ташӑ ансамблӗ мари халӑхӗн ташӑпа кӗвӗ пултарулахне пухса ӑна сарассишӗн тӑрӑшать. Ансамбль "Марий Эл" сюитине кӑтартӗ.

Ҫӑлкуҫ: Cap.ru

Удмуртире иртнӗ «Воткинск – П.И. Чайковскиӗн ҫуралнӑ вырӑнӗ» IV ача-пӑча ӳнер исскуствин регионти фестиваленчи Шупашкарти Ф.П.Павлов ячӗпе хисепленсе тӑракан кӗвӗ училищи студенткисем «композици» номинациӗнче ҫӗнтернӗ.

Конкурсра Пермьри, Кироври, Удмуртири, Аялти Тагилӑн, Тутарстанӑн, Пушкӑрт Республикин тата Чӑваш Енри 38 ҫамрӑк ӑста хӑйӗн пултарулӑхне кӑтартнӑ. Елена Фёдорова тата Ирина Алмазова ҫӳллерех ассӑнӑ номинацире пӗрремӗшпе иккӗмӗш вырӑна йышӑннӑ.

Ҫӑлкуҫ: Culture21.ru