|
Политика
 Люция Сафина Шупашкар хула администрацийӗнче паянтанпа ҫӗнӗ ӗҫ ӗҫе кӳлӗннӗ. Ахаль-махаль вырӑн та йышӑнман вӑл. Хула администрацийӗн сити-менеджерӗн экономика аталанӑвӗпе финанс енӗпе ҫумӗ пулса тӑрӑшӗ. Хула администрацийӗнчи яваплӑ тилхепене Люция Рафаэльевна Сафинӑна тыттарнӑ. Хула администрацийӗн пуҫлӑхӗ Алексей Ладыков Инстаграмра пӗлтернӗ тӑрӑх, Люция Рафаэльевна 20 ҫул ытла аудит, бухгалтер тата налук учёчӗ, бизнес аталанӑвӗ енӗпе тӑрӑшнӑ. Сафина финанспа хуҫалӑх ӗҫ-хӗлне тишкерес енӗпе пысӑк бизнес-проектсене ертсе пынӑ. 2017 ҫултанпа — муниципалитетӑн суйлав комиссийӗн председателӗ. Хыпар ҫӑлкуҫӗ:
|
|
Культура
 hypar.ru сӑнӳкерчӗкӗ «Тӑван Атӑл» литературӑпа ӳнер журналӗнче Василий Кервен поэтпа, прозаикпа, критикпа, куҫаруҫӑпа, журналистпа Владислав Николаев хатӗрленӗ интервью пичетленнӗ. Материал умсӑмахӗнче ҫырнӑ тӑрӑх, Василий Кервен чунне «рифма, ритм мӗнне пӗлмесӗр ҫыркаланӑ сӑвӑ пеккисем» ыраттараҫҫӗ, унта палӑртнӑ тӑрӑх, «тӗрӗссипе, питӗ асапланать вӑл унашкал «пултарулӑх» тӗслӗхӗсене курсан». Хальхи чӑваш поэзийӗ пирки сӑмах хускатсан: «Юлашки вӑхӑтра Чӑваш кӗнеке издательствинче сӑвӑ кӗнекисем ытлах тухсах каймаҫҫӗ. Авторӗсем хӑйсем тӳлесе кӑларнисенчен вара чылайӑшӗ пысӑк шайрах мар. 2017-2020 ҫулсенче «Тӑван Атӑл» журналта хальхи поэзи курӑнсах каймарӗ: поэмисем пачах поэма марччӗ, сӑвӑсем вырӑнне чылай чухне айванла такмаксем, юрӑ сӑмахӗсем тухатчӗҫ. Пирӗн юрӑ сӑмахӗсем мӗн шайрине чылайӑшӗ чухлать-тӗр. Петӗр Хусанкая хӑй вӑхӑтӗнчех вӗсем тарӑхтарнӑ. Ахальтен мар ҫакӑн пек кулӑш анлӑ сарӑлнӑччӗ: — Ӑҫта васкатӑн каплах? — тесе ыйтать тет пӗр сӑвӑҫран тепри. — Сӑвӑсене журнала йышӑнмарӗҫ, композиторсене кайса парасшӑн-ха, — хуравлать тет лешӗ», — тенӗ, сӑмахран, интервьюра Василий Кервен. Хыпар ҫӑлкуҫӗ:
|
|
Сывлӑх
 topnews.ru сайтри сӑн Чӑваш Енре кӑшӑлвирусран прививка тӑвас ӗҫ малалла пырать. Нумаях пулмасть Шупашкарти Тӗп пасарта вакцинаци туни пирки пӗлтернӗччӗ. Тӗп хулара кӑшӑлвирусран прививка тумалли тепӗр пункт уҫнӑ. Вӑл маунтинбайк центрӗнче вырнаҫнӑ. Унта пациентсене ыран йышӑнаҫҫӗ, ирхи 9 сехетрен пуҫласа каҫхи 6 сехетчен пымалла. Ҫумра паспорт, СНИЛС, страхлав полисӗ пулмалла. Унтан Шупашкарти васкавлӑ медпулӑшу пульницин тухтӑрӗсем ӗҫлӗҫ. Аса илтерер: прививка тумашкӑн маларах ҫырӑнма пулать: поликлиникӑна шӑнкӑравламалла, Патшалӑх пулӑшӑвӗсен порталӗнче харпӑр кабинетра ҫырӑнмалла е телефонпа шӑнкӑравламалла - 26-00-28, 59-98-66, 23-54-28. Хыпар ҫӑлкуҫӗ:
|
|
Кӳршӗре
 газетановокосино.рф сайтри сӑн Чӑваш Енри 17 ҫулти каччӑ ҫынсене улталаса пурӑннӑ. Ӑна нумаях пулмасть тытса чарнӑ. Кун пирки Тутарстанри ШӖМ пӗлтерет. Кӳршӗ республикӑра Лениногорск хулинче пурӑнакан 20 ҫулти каччӑ полицие пырса хӑй ултавҫӑсен аллине ҫакланни пирки каласа кӑтартнӑ. Вӑл пӗлтернӗ тӑрӑх, укҫа ӗҫлесе илес тенӗ, мессенджерта ушкӑн та тупнӑ. Ун патне тӳрех «консультант» ҫырнӑ. Хайхискер ӑна питӗ ӑннине, вӑл укҫа выляса илме пултарнине пӗлтернӗ. 20-ри каччӑ сумма пирки илтсен йӑлтах манса кайнӑ тейӗн, ҫав шутра -вӑл нимӗнле лотерейӑна, конкурса хутшӑнманни пирки те. Анчах ӑна 5 пин комисси тӳлемеллине пӗлтернӗ. Тӳлесен вара, паллах, нимӗнле укҫа та выляса илмен вӑл. Ҫак ӗҫе Чӑваш Енри 17 ҫулти каччӑ тунӑ тесе шутлаҫҫӗ, ӑна тытса чарнӑ, ун тӗлӗшпе пуҫиле ӗҫ пуҫарнӑ. Хыпар ҫӑлкуҫӗ:
|
|
Ял хуҫалӑхӗ
 Чӑваш Енре агротехнопарк хута яма палӑртнӑ. Вӑл Ҫӗрпӳ районӗнче пулӗ. Кун пирки Аслӑ экономика канашӑн ларӑвӗнче вице-премьер – экономика министрӗ Дмитрий Краснов пӗлтернӗ. Республикӑра патшалӑх индустри, агропромышленоҫ паркӗсене – пӗтӗмпе виҫҫӗ – тума палӑртнӑ. Ҫав шутра – Ҫӗрпӳ районӗнче, унта агротоехнопарк пулӗ. Министр хальлӗхе ҫак паркра Чӑваш Енре регистрациленнӗ 15 ял хуҫалӑх компанийӗ вырнаҫма кӑмӑл пуррине пӗлтернӗ. Агротехнопарк усӑ курман ҫӗрсене пусӑ ҫаврӑнӑшне кӗртме, инвесторсене илӗртме май парӗ. Паллах, ҫӗнӗ ӗҫ вырӑнӗсем те йӗркеленӗҫ. Хыпар ҫӑлкуҫӗ:
|
|
Сывлӑх
 rt13.ru сайтри сӑн Кӑшӑлвирус статистики мӗнлереххине тишкерер. Паянхи кун тӗлне республикӑра 25340 ҫын ҫак мурпа чирленӗ. Вӗсенчен 23134-шӗ сывалнӑ. Ку 91,3 процентпа танлашать. Юлашки вӑхӑтра ку чире пула вилекенсем самай чакнӑ. Юлашки вӑхӑтра 2 ҫыннӑн пурнӑҫӗ татӑлнӑ. Ку таранччен 1408 ҫын кӑшӑлвируса пула пурнӑҫран уйрӑлнӑ. Ҫапах талӑкра вилекенсен йышӗ кӑшт нумайланнӑ: паян 51 ҫын чирленӗ. Сывалакансем 48-ӑн пулнӑ. Паянхи кун тӗлне стационарта тата килте амбулатори мелӗпе кашӑлвирусран 798 пациент сипленет. Хыпар ҫӑлкуҫӗ:
|
|
Хулара
 ҪҪХПИ тунӑ сӑн Юлашки ҫулсенче ҫынсем электросамокатпа ҫӳрме хӑнӑхса кайрӗҫ. Анчах унпа ҫӳреме те пӗлмелле. ҪҪХПи пӗлтернӗ тӑрӑх, ҫу уйӑхӗн 21-мӗшӗнче Ҫӗнӗ Шупашкарта Коммунистсен урамӗнче йӗрке хуралҫисем электросамокат водительне чарнӑ. Транспортӑн хӑвачӗ 0,5 кВт пулнӑ. Водителӗн вара ку транспортпа ҫӳреме ирӗк паракан права пулман. Ведомство Инстаграмри страницинче пӗлтернӗ тӑрӑх, ҫав арҫын тӗлӗшпе административлӑ йӗркене пӑснӑ тесе протокол ҫырнӑ. Хыпар ҫӑлкуҫӗ:
|
|
Пӑтӑрмахсем
 Следстви комитечӗ тунӑ сӑн Канаш районӗнчи Сиккассинче хӗрарӑмӑн виллине тупнӑ. Ӑна вакласа пенӗ. Ҫак тискер ӗҫе тума пултарнӑ ҫынна тытса чарнӑ. Хӗрарӑм 59 ҫулта пулнӑ. Унӑн виллине юханшыв хӗрринче тупнӑ. Ывӑлӗ каланӑ тӑрӑх, вӑл пӗлтӗр раштавӑн 11-мӗшӗнче килтен тухса кайнӑ та таврӑнман. Следстви версийӗ тӑрӑх, ӑна тӑванӗ вӗлернӗ. Ҫав кун хӗрарӑм Сиккассинче тӑванӗ патӗнче хӑнара пулнӑ. Вӗсем эрех ӗҫнӗ те хирӗҫсе каҫнӑ. Арҫын хӗрарӑма пуҫӗнчен пуртӑпа икӗ хутчен ҫапса вӗлернӗ. Унтан вилене пахчана илсе тухнӑ, вакланӑ та 3 миххе чикнӗ. Вӗсене юханшывра вак касса пенӗ. Хыпар ҫӑлкуҫӗ:
|
|
Ял хуҫалӑхӗ
 cheb.ru сайтри сӑн Ҫӗрпӳ районӗнчи Метикасси ялӗнче ферма уҫӑлнӑ. Унта 500 ӗне вырнаҫать. Ферма тумашкӑн 200 миллион тенке яхӑн тӑкакланнӑ. Фермӑна тӳре-шара та ҫитсе курнӑ. Вӗсем палӑртнӑ тӑрӑх, аграрисем тӑкаксен пӗр пайне саплаштарма пултараҫҫӗ, РФ Ял хуҫалӑх министерствин конкурсне хутшӑнмалла ҫеҫ. Комисси витӗр тухнисем федераци хыснинчен – тӑкакӑн 25 процентне, регион хыснинчен 16 процентне илме пултараҫҫӗ. Конкурс суйлавӗ витӗр тухманнисен регион хыснинчен тӑкакӑн 30 процентне саплаштарас шанчӑк пур. Аса илтерер: Ҫӗрпӳ районӗнче тислӗкпе пӗрле пӑру виллисене уя кӑларса ывӑтни пирки пӗлтернӗччӗ. Хыпар ҫӑлкуҫӗ:
|
|
Хулара
 bessarabiainform.com сайтри сӑн ШӖМ пӗлтернӗ тӑрӑх, тепӗр хӗрарӑм ултавҫӑсен аллине ҫакланса вӗсене самаях пысӑк укҫа куҫарса панӑ Ҫу уйӑхӗн 19-мӗшӗнче тивӗҫлӗ канури хӗрарӑм полицие пырса пулӑшу ыйтнӑ. Вӑл каланӑ тӑрӑх, ун патне палламан ҫын шӑнкӑравланӑ та хӑйӗнпе полицейски тесе паллаштарнӑ. Вӑл хӗрарӑмӑн пухӑннӑ укҫине хурахсенчен хӳтӗлемелли пирки каланӑ. Ку вара ӑна ӗненнӗ. Ватӑ хӗрарӑм ҫав ҫынна 700 пин ытла тенкӗ куҫарса панӑ. Кун тӗлӗшпе пуҫиле ӗҫ пуҫарнӑ. Халӗ ултавҫӑ кам пулнине палӑртаҫҫӗ. Хыпар ҫӑлкуҫӗ:
|
+16.3 °C