bizbi.ru сайтри сӑн

ЧР Элтеперӗ Олег Николаев Россия-24 телеканалпа пыракан «Факты» кӑларӑма хутшӑннӑ. Вӑл тӳрӗ эфирта иртнӗ.

Олег Алексеевич Чӑваш Енре кӑшӑлвирусран вакцина тунӑ ҫынсем ӑна мӗнлерех чӑтса ирттерни пирки каласа кӑтартнӑ. Аса илтерер: прививкӑна чи малтан «хӗрлӗ зонӑра» ӗҫлекен тухтӑрсене тунӑ.

«Спутник V» вакцинӑн виҫҫӗмӗш тапхӑрӗнчи тӗрӗслевӗпе килӗшӳллӗн пире вакцинӑн пысӑках мар партине пачӗҫ. Чи малтан кӑшӑлвируслӑ пациентсемпе ӗҫлекен тухтӑрсем вакцинациленнӗ. Вӗсем ҫакна йӗркеллех чӑтса ирттернӗ. Пур тухтӑр та хӑйне лайӑх туять, «хӗрлӗ зонӑра» малалла ӗҫлеҫҫӗ», - каласа кӑтартнӑ Олег Николаев. Вӑл каланӑ тӑрӑх, прививка тӑвас кӑмӑллисене хальлӗхе списока кӗртеҫҫӗ.

Михаил Вансяцкий страницинчи сӑнӳкерчӗксенчен хатӗрленӗ коллаж

Чӑваш Енӗн хальхи вӑхӑтри мухтавлӑ спортсменӗсенчен пӗри, Татьяна Акимова биатлонистка, Раҫҫей кубокӗн пӗрремӗш тапхӑрӗнчи пасьютра ҫӗнтернӗ.

Хальхи вӑхӑтра Тӗмен хулинче хӗрарӑмсен биатлонӗн Раҫҫей кубокӗ иртет. Унта Татьяна Акимова та ӑмӑртать.

Аса илтерер: вӑл пысӑк спортран вӑхӑтлӑха кайнӑччӗ, мӗншӗн тесен ентешӗмӗр ача ҫуратрӗ. Сӑмах май каласан, пъедестал ҫине паян вӑл хӗрӗпе тухса сӑн ӳкерӗннӗ. Татьянӑн сылтӑм аллинче – пӗчӗк хӗр пӗрчӗкӗ, сулахаййинче – чечек ҫыххи.

Татьяна Акимова Раҫҫейӗн хӗрарӑмсен пӗрлештернӗ командинче мар-ха. Вӑл унта татах лекессе тем пекех шанас килет.

Сӑмах май каласан, ентешӗмӗр Тӗмен облаҫӗшӗн ӑмӑртать. Ҫавӑншӑн Дмитрий Губерниев спорт комментаторӗ Чӑваш Ен Элтеперне «Матч» телеканалӑн тӳрӗ эфирӗнче ӳпкелесе каланӑ. Ун пек спортсменсене пулӑшмаллах тенӗ вӑл.

cheboksari.bezformata.com сайтри сӑн

Паянхи кун тӗлне тепӗр 130 ҫын кӑшӑлвируспа чирленӗ. Ку – каллех рекорд.

Шел те, каллех вилекенсем пулнӑ. Хальхинче 3 ҫыннӑн пурнӑҫӗ кӑшӑлвируса пула татӑлнӑ. Ҫапла майпа ку таранччен 268 ҫын каварлӑ вируса пула вилнӗ. Ҫуррине яхӑнӑшӗ, 123 ҫын, чӳк уйӑхӗнче вилнӗ.

Ку таранччен пирӗн республикӑра 12325 ҫын инфекциленнӗ. Вӗсенчен 11206-шӗ сывалнӑ. Юлашки талӑкра 42 ҫын чире парӑнтарнӑ.

Паянхи кун тӗлне 766 ҫын (вӗсен кӑшӑлвирус пурри ҫирӗпленнӗ) пульницӑра е килте амбулатори мелӗпе сипленет.

sportsdaily.ru сӑнӳкерчӗкӗ

Чӑваш Енӗн спортсменки Татьяна Акимова биатлон ӑмӑртӑвӗсенче Тӗмен облаҫӗшӗн тупӑшассине Чӑваш халӑх сайчӗ пӗлтернӗччӗ. «Сезона хатӗрленнӗ чухне пире регион пулӑшасса шаннӑччӗ. Анчах хамӑр шутран хатӗрленме тиврӗ. Чӑваш Енре пирӗн пӗр услови те пулман. Республика ку сезонра пӗр тенкӗ те уйӑрман. Сборсем, экпировка, патронсем, оборудовани – йӑлтах хамӑр шутран пулчӗ», – тенӗччӗ биатлонисткӑн мӑшӑрӗ Вячеслав Акимов.

Чӑваш Енӗн влаҫ органӗсен порталӗнче паян республикӑн Спорт министерстви Татьяна Акимова пирки ӑнлантарса ҫырнине пичетленӗ. Унта споросменкӑна 2016-2019 ҫулсенче мӗншӗн тата мӗн чухлӗ укҫа панине пӗлтернӗ. Пурӗ 880 пин тенкӗ тенкӗ ытларах тӳленӗ-мӗн. Ҫав шутра Олимп ӑмӑртӑвне хутшӑннӑшӑн панине те кӗртнӗ.

Татьяна Акимова 2018 ҫултанпа ӑмӑртусене хутшӑнманран тата Раҫҫейрен пӗрлештернӗ командине кӗменрен ӑна кӑҫал стипенди пама май ҫук иккен. Аса илтерер: биатлонистка ача амӑшӗ пулса тӑчӗ, ҫав вӑхӑтра вӑл ӑмӑртусене хутшӑнаймарӗ.

canva.com сӑнӳкерчӗкӗ

Чӑваш Ен Элтеперӗ Олег Николаев ӗнер каҫхине «Россия-24» (чӑв. Раҫҫей-24) телеканалпа кӑтартакан «Факты» кӑларӑмӑн ыйтӑвӗсене хуравланӑ.

Кӑшӑлвирус пирки калаҫнӑ май республика ертӳҫи юлашки тӑватӑ кунта кӑшӑлвирусран сипленме тӳлевсӗр эмел илекенсен шучӗ 4 хут ӳснине пӗлтернӗ.

Аса илтерер: ковидран килте сипленекенсене хысна шучӗпе эмелпе тивӗҫтермеллине ҫӗршыв Президенчӗ Владимир Путин каланӑччӗ. Кайран регионсене вкҫа валеҫсе пачӗҫ. Пирӗн региона ҫав тӗллевпе 48,5 миллион тенкӗ уйӑрчӗҫ.

Олег Николаев федераци телеканалне амбулатори ковид-центрӗсене транспортпа тивӗҫтернин, колл-центрсем, нимеҫӗсем ӗҫленине пӗлтернӗ. «Ҫывӑх вӑхӑтра лару-тӑнӑҫланасса шанатпӑр», — тенӗ Олег Николаев.

Кӑҫалхи ҫул чӑвашсемшӗн типӗ кӑсӑклӑ иртсе пырать. Мӗн кӑна пулса иртмерӗ пулӗ хӑлӑхӑмӑр пурнӑҫӗнче. Пӗрре — кӑшӑлвирус алхасать, ӗҫлеме памасть. Тепре — пӗр Элтепере ҫухатса тепӗрне тупрӑмӑр... Виҫҫӗмӗшӗ вара, чӑваш культуринче кӑҫал самай тарӑн йӗр хӑварнӑскер — Чӑваш тӗрӗ кунӗ! Пуҫласа уявлатпӑр. Олег Алексеевич Элтепер пуканне йышӑннӑранпа тунӑ чи палӑрмалла утӑмсенчен пӗри тесен те йӑнӑшмӑпӑр пулӗ (ҫулталӑка пӗтӗмлетсе чылайӑшӗ ӑна палӑртӗҫех ӗнтӗ!).

Чӑн та аван япала! Унашкал уяв кирлӗ мар тесе калама хӑяйман пулӑттӑм. Шел те, шухӑшӗ аван, анчах ӑна епле пурнӑҫланине виҫҫӗ паллӑран ытларах лартма май ҫук.

Кӑшӑлвируса пула хуланалла ытлашшиех тухса ҫӳреместӗп, ҫавна май ӑна епле уявлани пирки тӗнче тетелӗ урлӑ кӑна пӗлсе тӑтӑм. Ҫавӑнпа та хамӑн хаклавра йӑнӑшнисем пулсан каҫару ыйтатӑп.

Борис Чиндыков пӗрре паянхи чӑваш культурине «орнаментализмпа аташни» тесе хак панӑ пек астӑватӑп.

Ку тӗлӗшпе килӗшме те, килӗшмесӗр те пулать. Пӗр енчен, пирӗн культурӑра тӗрӗ ытла нумай вырӑн йышӑнать: чӑваш культура ҫурчӗ — тӗрӗллӗ пулмалла, кӗпи-тумтирӗ, ытти япалисем — тӗрӗпе.

Малалла...

Шупашкар хулинчи Эгер бульварӗнче пурӑнакансем 48-мӗш ҫурт ҫумӗнче нумай хваттерлӗ ҫурт хӑпартассине хирӗҫ-мӗн. Хулана ертсе пыракансем ҫынсен шухӑшне пӗлес тесе халӑхпа сӳтсе явнӑ. Кун пирки хула администрацийӗн пуҫлӑхӗ Алексей Ладыков паян Фейсбукра пӗлтернӗ.

«Эпир халӑхпа сӳтсе яврӑмӑр, проектлакансем хӑйсен проекчӗпе паллаштарчӗҫ, строительсем ӗҫ технологийӗ ҫинчен каласа кӑтартрӗҫ», – тесе ҫырнӑ сити-менеджер.

Алексей Ладыков пӗлтернӗ тӑрӑх, сӳтсе явма ҫывӑхри ҫуртсенче пурӑнакансем хастар хутшӑннӑ. Тӗрлӗрен шухӑшлакансем тупӑннӑ, ытларахӑшӗ – хирӗҫ. Апла пулсан хула администрацийӗ ҫынсен шухӑшне тӗпе хурӗ.

Элӗк районӗнче шкул автобусӗ ҫаврӑнса ӳкнине Чӑваш халӑх сайчӗ ӗнер пӗлтернӗччӗ. Аса илтерер: автобус инкеке ӗнер 15 сехет те 50 минутра Пиҫенер ялӗ ҫывӑхӗнче пулнӑччӗ.

Чӑваш Енӗн Шалти ӗҫсен министерствинче паян уҫӑмлатнӑ тӑрӑх, инкекре автобус водителӗ тата 4 пассажир (ҫав шутра 9-16 ҫулсенчи виҫӗ ача пулнӑ) суранланнӑ. Вӗсене тухтӑрсем пулӑшнӑ хыҫҫӑн килӗсене янӑ. Салонта пурӗ 9 ача пулнӑ. Вӗсем – 3-11-мӗш классенче вӗренекенсем. Ачасемпе пӗр педагог ҫула тухнӑ.

Инкек хыҫҫӑн административлӑ ӗҫ пуҫарнӑ. Автобусӑн кайри ураписенчен пӗри кивелнине палӑртнӑ. Кунсӑр пуҫне водитель ҫул-йӗр условине шута илмен тесе шухӑшлаҫҫӗ.

дольщикироссии.рф сайтри сӑн

Канаш хулинче пурӑнакан арҫынна суд кӗтет. Ӑна ачапа киревсӗр хӑтланнӑшан айӑпласшӑн.

Следстви версийӗ тӑрӑх, кӑҫал ҫурла уйӑхӗнче ҫак 29 ҫулти арҫын халӑх тетелӗнче паллакан 13 ҫулти хӗрачапа ҫырӑннӑ. Пӗррехинче вӑл ӑна интимлӑ сӑнӳкерчӗк ярса панӑ. Ку кӑна мар, халӑх тетелӗнче ҫырӑннӑ чухне те вӑл ку темӑпа калаҫу пуҫарнӑ.

Следстви комитечӗн Чӑваш Енри следстви управленийӗ пӗлтернӗ тӑрӑх, ун тӗлӗшпе пуҫарнӑ пуҫиле ӗҫе тишкерсе пӗтернӗ, суда ярса панӑ. Кӗҫех ӑна Канаш районӗн сучӗ пӑхса тухӗ.

Чӳк уйӑхӗн 26-мӗшӗнче ҫуралнисене чӑваш тӗрриллӗ кипке парнелесси пирки унччен хыпарланӑччӗ. Аса илтерер: «Тӗрӗпе ҫуралнисем» акцие чӑваш тӗррин кунне халалланӑ. Ӑна республика Элтеперӗ Олег Николаев пуҫарнӑ.

Ӗнер, чӳк уйӑхӗн 26-мӗшӗнче, Шупашкарти Президент пепкелӗх центрӗнче ҫут тӗнчене килнӗ «ҫӗнӗ кайӑксене» чӑваш тӗрриллӗ кипке парнеленӗ. Унсӑр пуҫне вӗсене теттесем тата асӑнмалӑх кӗнекесем парнеленӗ. Вӗсене пепкелӗх центрӗн тӗп врачӗ Ольга Рябухина ырӑ сунса тыттарнӑ.

«Тӗрӗ – чӑваш халӑхӗн наци мӑнаҫлӑхӗ», – тенӗ центрӑн тӗп врачӗ Ольга Рябухина.