fb.ru сайтри сӑн

Кунран-кун кӑшӑлвирусран вилекенсем нумайланса пыраҫҫӗ. Паян 8 ҫын сывлама пӑрахнӑ. Ку таранччен 298 ҫын вируса пула вилнӗ. Палӑртмалла: раштав уйӑхӗн пуҫланнӑранпа 20 ҫын чиртен сывалайман.

Паян лайӑх хыпар пур: сывалакансем нумай пулнӑ. Пӗр талӑкра 332 ҫын сывалнӑ. 125 ҫыннӑн инфекци пуррине палӑртнӑ.

Ку таранччен 12922 ҫын кӑшӑлвируспа чирленӗ. Вӗсенчен 12101-шӗ сывалнӑ. Тухтӑрсем паянхи кун тӗлне кӑшӑлвируспа чирлӗ 523 ҫынна сӑнаса тӑраҫҫӗ.

sm-news.ru сайтри сӑн

Паян ир-ирех Шупашкар районӗнче арҫын виллине тупнӑ. Ҫакна халӑх корреспонденчӗ видео ӳкерсе «Про Город» хаҫата ярса панӑ.

Паян ирхи 7 сехетре Вӑрманкасси ялӗнче, Ҫӗнтерӳ тата Граждан урамӗсем хӗресленнӗ вырӑнта, арҫын виллине тупнӑ. Вал 59 ҫулта пулни паллӑ.

Виле ҫул хӗрринче, харпӑр ҫуртсенчен инҫех мар, выртнӑ. «Вилене хупланӑччӗ. Эпӗ унтан иртсе кайрӑм», - тенӗ халӑх корреспонденчӗ.

Следстви комитечӗ кун тӗлӗшпе тӗрӗслев ирттерет. Арҫын мӗншӗн вилнине уҫӑмлатаҫҫӗ.

Чӑваш Енӗн ШӖМӗн сайтӗнчи видеоран илнӗ скриншотсемпе хатӗрленӗ коллаж

2018 ҫулхи ака уйӑхӗн 19-мӗшӗнче Шупашкарти Университет урамӗнчи суту-илӳ центрӗ умӗнчи стоянкӑра «Ауди-А 4» автомашина ҫунса тытӑннӑ. Унпа юнашар ларнӑ «Мазда-3» тата «Бриллианс» автомобильсем те шар курнӑ. «Ауди» машина хуҫи Шупашкарта пурӑнакан 29 ҫулти арҫын пулнӑ.

Видеокамерӑна икӗ ҫын лекнӗ. Вӗсем автомобиле ҫунтармалли япала сапни унта аван курӑнать. Унтан ӑна чӗртсе янӑ.

Йӗрке хуралҫисем палӑртнӑ тӑрӑх, «Ауди» хыҫҫӑн темиҫе кун машина йӗрлесе ҫӳренӗ. Пакунлисем ҫине тӑнипе, чӗртсе яракансене те, ҫав ӗҫе тума хушнисене те тупса палӑртма май килнӗ.

Шупашкар хулинчи Мускав район сучӗ ҫынна сӑтӑр тӑвакансене суд тунӑ. Машинӑна чӗртекенсене ҫын пурлӑхне сиен кӳнӗшӗн явап тыттарма, саккасҫӑна престпулени тума хистенӗшӗн явап тыттарнӑ. Вӗсене тӗрмене хупса хумасӑр явап тыттарӗҫ. Унсӑр пуҫне машинӑсене шар курнине саплаштарма тивӗ.

sm-news.ru сайтри сӑн

Чӑваш Енри икӗ ялта урнӑ чир тӗлӗшпе карантин йышӑннӑ. Ку йышӑнӑва раштав уйӑхӗн 2-мӗшӗнче тата 3-мӗшӗнче. Хушӑва ЧР Элтеперӗ Олег Николаев алӑ пуснӑ.

Тӑвай районӗнче Ҫӑлпуҫ ялӗнче тата Ҫӗрпӳ районӗнчи Хурӑнуй ялӗнче урнӑ чир тупса палӑртнӑран ҫак тӑрӑхсенче карантин пулнине йышӑннӑ. Ҫавна май карантина пӑрахӑҫличчен ҫак ялсенче йытӑсемпе кушаксен куравне ирттерме, зоопарка илсе кайма чӗрчунсем тытма, килти выльӑх-чӗрлӗхе сутма, ялтан йытӑсемпе кушаксене илсе тухма юрамасть.

forum.na-svyazi.ru сайтран илнӗ сӑн

ЧР Культура министерстви Сӑр тата Хусан хӳтӗлев чиккисене чавнӑ ҫынсене халалласа фильм ӳкермешкӗн 1,2 миллион тенкӗ уйӑрнӑ. Хальлӗхе ӑна «Сӑр тата Хусан чиккисем: халӑх паттӑрлӑхӗ» ят панӑ.

Фильм 25 минута тӑсӑлмалла. Ҫавӑн пекех акӑлчанла титр пулмалла. Фильма историе тӗпе хурса ӳкерӗҫ. Картинӑра экспертсем, окоп чавакансем пулмалла. Кунсӑр пуҫне кино ӳкерекенсем квадрокоптерпа усӑ курмалла, «таймлапс», «слоумо» пулмалла.

Подрядчике суйламалли конкурс раштав уйӑхӗн 21-мӗшӗнче иртет. Ҫӗнтерӳҫӗн ҫитес ҫулхи ака уйӑхӗн 1-мӗшӗ валли фильм ӳкермелле, прокат удостоверенине илмелле.

Леонид Черкесовӑн Фейсбукри страницинчи сӑнӳкерчӗк

Паян К.В. Иванов ячӗллӗ Чӑваш патшалӑх академи драма театрӗнче РСФСР халӑх артистки, Чӑваш АССР халӑх артистки, Вӑрмар районӗн хисеплӗ ҫынни Нина Яковлева ҫуралнӑранпа 80 ҫул ҫитнине халалласа юбилей каҫӗ иртет.

Унта Чӑваш Ен Элтеперӗ Олег Николаев хутшӑннӑ. Халӑх юратакан ӑстана вӑл Чӑваш Республикин Хисеп грамотипе наградӑланӑ. Халӑх артисткине чыслама РФ Патшалӑх Думин депутачӗсем Анатолий Аксаков, Леонид Черкесов тата ыттисем те хутшӑннӑ. Вӗсем те Нина Михайловнӑн пултарулӑхне капашсӑр пысӑка хурса хакланӑ.

Чӑваш Енӗн Транспорт тата ҫул-йӗр хуҫалӑхӗн министерстви транспортра кӑшӑлвирусран асӑрханас енӗпе хӑрушсӑрлӑх йӗркине епле пӑхӑннине мобильлӗ укшӑнсем пӗрмай тӗрӗсленине пӗлтерет. Пассажирсене турттаракансене мобильлӗ ушкӑнсем 60 протокол ҫырса панӑ. Инкеклӗ лару-тӑру сиксе тухас лару-тӑрура хӑрушсӑрлӑх йӗркине пӑхӑнманнисен тӗлӗшпе шӑрҫаланӑ протоколсене суда ярса параҫҫӗ.

Аса илтерер: уйрӑм ҫынсене 1 пинрен пуҫласа 3 пин тенкӗ таран штрафлама юрать, должноҫри ҫынсене — 10 пинрен пуҫласа 30 пин тенкӗ таран, предпринимательсене — 30 пинрен 50 пин тенкӗ таран, предприятисене — 100 пинрен пуҫласа 300 пин тенкӗ таран штрафлама юрать.

Раштав уйӑхӗн 5-мӗшӗнче Вӑрҫӑ ветеранӗсен республикри клиника госпиталӗ Уҫӑ алӑксен кунне ирттерет. Ӑна Диабетпа кӗрешмелли куна халалланӑ.

Ҫынсене терапевт тата ансӑр специалистсем: невролог, отоларинголог, офтальмолог, кардиолог, гинеколог, эндокринолог — йышӑнӗҫ. Тухтӑр патне кайнӑ чухне медицина тӗрӗслевӗсене тата клиника анализӗсене пӗрле илсен лайӑх.

Уҫӑ алӑксен кунне 8 (8352) 45-05-45, 8(8352) 45-07-70 телефон номерӗсемпе шӑнкӑравласа ҫырӑнма пулать.

Госпиталь ҫак адреспа вырнаҫнӑ: Шупашкар хули, Мускав проспекчӗ, 49-мӗш ҫурт.

advokat-sankt-peterburg.ru сӑнӳкерчӗкӗ

Чӑваш Ен Элтеперӗ Олег Николаев Юрист кунӗпе саламлать.

«Эсир яланах ыттисенчен принциплӑ пулнипе тата саккуна ҫирӗп пӑхӑнса тӑнипе уйрӑлса тӑнӑ та, тӑратӑр та.

Чӑваш Ен юридици пӗрлӗхӗ республикӑн социаллӑ пурнӑҫӗпе экономикине аталантармалли, патшалӑх влаҫӗпе вырӑнти хӑй тытӑмлӑх органӗсен ӗҫ-хӗлне уҫӑмлӑрах тумалли, управлени йышӑнӑвӗсен тухӑҫлӑхне ӳстермелли майсем тӑвас ӗҫе хывакан тӳпене пысӑка хурса хаклатӑп.

Регионти юристсем хӑйсен служба тивӗҫӗсене малашне те чыслӑн пурнӑҫласа пырасса, гражданла обществӑна аталантарма, республикӑра пурӑнакансен право культурине ӳстерсе пыма пулӑшасса шанса тӑратӑп», — тенӗ Элтепер саламра.

Шупашкарти Ф.П.Павлов ячӗллӗ музыка училищин чӑвашла ҫырнӑ патриотизм юррисен фестивальне ирттерме хатӗрленет. Тӳрех палӑртар: вӑл онлайн-мелпе пулӗ.

Музыка училищи юлашки темиҫе уйӑхра капашсӑр пысӑк ӗҫ туса ирттернӗ. «Тӗнчери салтаксем» проекта пурнӑҫа кӗртме республика Элтеперӗн грантне тивӗҫнӗ. Проект авторӗ – Чӑваш Енӗн культурӑн тава тивӗҫлӗ ӗҫченӗ Светлана Ткаленко.

Тӑван ҫӗршывӑн Аслӑ вӑрҫинче ҫӗнтернӗренпе 75 ҫул ҫитнине халалланӑ проекта пурнӑҫласа вӑрҫӑ вӑхӑтӗнче чӑваш композиторӗсем хайланӑ юрӑ-ҫемме электрон коллекцие пухнӑ. Платформӑра нота материалӗсемпе пӗрлех архив докуменчӗсем те вырӑн тупӗҫ.