Чӑваш Ен Правительстви ЧР Элтеперне Михаил Игнатьева уйӑхсерен тӳлекен преми виҫине ӳстерме йышӑннӑ. Ку йышӑнӑва ЧР Министрсен Кабинечӗн пайташӗсем ҫирӗплетнӗ.

Министрсен Кабинечӗ патшалӑх тытӑмӗнче ӗҫлекенсене уйӑхсерен паракан преми виҫине ӳстермелли пирки йышӑннӑ. Оклад пурин те унчченхи пекех юлнӑ.

Элтеперӗн те оклачӗ ӳсмен. Ку 56626 тенкӗпе танлашать. Уйӑхсерен паракна преми коэффициенчӗ вара хӑпарнӑ: 2,25-рен 2,46-а ҫитнӗ. Ҫапла майпа Михаил Игнатьевӑн премийӗ 139 пин тенке ҫитнӗ. Унччен вӑл 127 пин тенкӗ пулнӑ. Ҫапла майпа Элтепере уйӑхсерен 195 пин тенкӗ шалу илет.

Сӑмах май, кӑҫалхи пӗрремӗш ҫур ҫулта тӳре-шаран вӑтам ӗҫ укҫи 33 пин тенкӗпе танлашнӑ.

Шупашкарти Петров урамӗнчи ҫурт 9-мӗш ҫурт ишӗлме пуҫлани, ӑна аварриллисен йышне кӗртсе ун вырӑнне ҫӗннине хӑпартни пирки пӗрре мар хыпарланӑччӗ. Ҫак ҫурт пирки каллех калаҫнӑ.

Ҫынсене хальхинче тата мӗн пӑшӑрхантарать? Унта пурӑнма куҫакансене ҫурт ҫывӑхӗнчи территорие мӗнле хӑтлӑлатни канӑҫсӑрлантарать-мӗн. Унта парковка валли вырӑн пулӗ-и?

«ГУКС» АО директорӗ Юрий Агеев каланӑ тӑрӑх, проект патшалӑх экспертизи витӗр тухнӑ. Вӑл мӗнпур требованипе килӗшсе тӑрать. Ҫав шутра ун ҫывӑхӗнчи лаптӑка хӑтлӑлатас ыйтӑва тата ыттине шута илнӗ.

Ку ҫурта ҫитес ҫулхи 3-мӗш кварталта туса пӗтерме палӑртнӑ. Унта 153 хваттер пулӗ.

Чӑваш Енре ҫӗршыври хӑмла ӗҫне аталантармалли центр туса хурасшӑн. Пирӗн уйсенче ҫак «симӗс ылтӑна» ҫитӗнтересшӗн. Кун пирки ЧР Элтеперӗ Михаил Игнатьев Кремльти ҫынсемпе калаҫнӑ.

Михаил Васильевич юпа уйӑхӗн 20-мӗшӗнче Джамбулат Хатуовпа тӗл пулнӑ. Вӑл — РФ ял хуҫалӑх министрӗн пӗрремӗш ҫумӗ, хӑмла аталантарас енӗпе ӗҫлет.

Икӗ ен Чӑвашра хӑмла ӳстерессине аталантарасси пирки калаҫнӑ. Республикӑра ҫӗнӗ сорт лартасшӑн, Чӑваш Ен хӑмла ӳстерессин центрӗ пулса тӑрӗ.

— Ҫӗрулми туса илес енӗпе эсир малта, хӑмлана аталантармалла. Чӑваш Ене ку енӗпе центр туса хумалла, — тенӗ Петр Чекмарев, асӑннӑ ведомствӑра ӗҫлекенскер.

Михаил Игнатьев хӑнасене пулӑшнӑшӑн тав тунӑ. Палӑртмалла: халӗ Раҫҫейре Китайра ӳстернӗ хӑмлапа ытларах усӑ кураҫҫӗ.

«Россия-1» телеканалпа Паташлӑх Думинчи ҫӗнӗ депутатсем мӗнле пурӑннине кӑтартнӑ. Вӗсен йышне «Тӗрӗслӗхшӗн Раҫҫей» партин депатучӗ Олег Николаев та лекнӗ.

Олег Николаев Мускава куҫса килнӗ хыҫҫӑн вӑхӑтлӑх ӑҫта пурӑннине кӑтартнӑ. Хӑйӗн ӗҫ пӳлӗмӗпе те паллаштарнӑ вӑл. Депутат кашни ир ӗҫе ҫуран утса ҫитет, уҫӑ сывлӑшпа сывлать. Ун валли 18 тӑваткал метрлӑ ӗҫ пӳлӗмӗ уйӑрса панӑ. Унта тата икӗ пулӑшуҫине вырнаҫтармалла.

Олег Николаев хӑйӗнпе пӗрле арӑмӗн тата 5 ачин сӑнӳкерчӗкне илсе килнӗ. Ҫемйи хальлӗхе Чӑваш Енре юлнӑ. Ара, хваттер уйӑрса паман вӗт хальлӗхе. Тата арӑмӗ ачисене вӗренӳ ҫулӗ варринче урӑх шкула куҫармалла мар тесе шухӑшлать.

Сӑмах май, Мускава тӗрлӗ регионтан 165 депутат килнӗ. Хальлӗхе вӗсем хӑна ҫуртӗнче пурӑнаҫҫӗ. Нумайлӑха мар — ытти депутат ӗҫрен панӑ хваттерсене пушатиччен.

Патшалӑх Думин депутачӗсене доверенноҫпа урӑх ҫыншӑн сасӑлама чарнӑ. Ҫак йышӑнӑва саккун кӑларакансем хӑйсем тунӑ.

Алена Аршинова депутат пӗлтернӗ тӑрӑх, малашне «халӑх тарҫисем» хӑйсем ҫеҫ ларура сасӑлама пултарӗҫ. Унччен парламентарие хӑйсен ӗҫтешӗшӗн шантару хучӗпе сасӑлама ирӗк панӑ. Кунашкал йӗркене иртнӗ ӗмӗрӗн 90-мӗш ҫулӗсенчех йышӑннӑ. Халӗ ӑна пӑрахӑҫланӑ.

Ку кӑна мар, депутат ларуна мӗнле сӑлтавсене пула килейменнине те палӑртнӑ: чирлесен «больничнӑй» илсен, Патшалӑх Думин официаллӑ делегацийӗпе ют ҫӗршыва кайсан, парламентӑн аялти палатин председателӗ региона командировкӑна ярсан, Патшалӑх Думин Канашӗн пайташӗн тивӗҫӗсене пурнӑҫласан.

Анатолий Князев

Елчӗк ҫерӗ ҫинче ҫуралса ӳснӗ, пӗр вӑхӑтра Шупашкар районӗнчи Апаш ял тӑрӑхне, кайран Шупашкар районӗнче ял хуҫалӑх пайне, унтан район администарцине ертсе пынӑ Анатолий Князева Коми Республикин вице-премьерне ҫирӗплетнӗ. Кун пирки асӑннӑ тӑрӑхӑн официаллӑ сайтӗнче паян пӗлтернӗ.

Аса илтеретпӗр, кӑҫалхи ҫуркунне ӑна асӑннӑ Коми Республикин ял хуҫалӑх министрне лартнӑччӗ. Унта ҫул тытиччен Анатолий Князев чӑваш парламенчӗн депутачӗ пулнӑччӗ, маларах вара Патшалӑх Канашӗнче вице-спикер должноҫне йышӑннӑччӗ.

Коми Республикин ҫӗнӗ правительствинче унчченхи министрсенчен хӑшӗсем пукансӑр юлнӑ. Чӑвашран кайнӑ Анатолий Князева вара министр должноҫӗнчех хӑварнӑ, унсӑр пуҫне яваплӑхне те ӳстернӗ.

Сессие уҫнӑ самант

Ӗнер иртнӗ Чӑваш Республикин улттӑмӗш созыври Патшалӑх Канашӗн иккӗмӗш сессине депутатсенчен пӗр пайӗ хутшӑнман. Пынисенчен те хӑшӗсем лару вӗҫлениччен кӗтсе тӑман — тӑхтав вӑхӑтӗнче тухса шӑвӑннӑ.

Йыш сахалли чӑваш парламенчӗн спикерне Валерий Филимонова килӗшмен. «Прогулшӑн Патшалӑх Думинчи пек яваплӑх кӗртесси пирки пирӗн те шухӑшласа пӑхма юрать», — тенӗ вӑл тӑхтав вӑхӑтӗнче «Правда ПФО» журналистне. Ҫапах та хӑш-пӗр депутат вырӑнлӑ сӑлтава пула сессине хутшӑнайман иккен — республикӑна ҫӗршывӑн Ял хуҫалӑх министерствин делегацийӗ килнӗ. Депутатсенчен хӑшӗсем (халӑх тарҫисем хушшинче предприяти пуҫлӑхӗсем пулнине пӗлетпӗр ӗнтӗ) аграри ведомствипе ҫыхӑннӑ мероприятисене хутшӑннӑ-мӗн.

Ӗнерхи сессире депутатсене халӑх тарҫи пулнине ӗнентерекен значоксем тыттарнине эпир кӑшт маларах пӗлтерме ӗлкӗртӗмӗр.

«Чӑваш Ен» чӑваш телевиденийӗпе радиокомпанийӗнче операторта ӗҫленӗ Сергей Мышев оператор вилнӗ.

Телевиденире Сергей Мышев нумай ҫул тимленӗ. Малтанхи вӑхӑтра телемэтрсем ӑна ытлашши хапӑлласах та йышӑнман теҫҫӗ. Анчах кӗҫех хӑйне вӑл чӑн-чӑн специалист евӗр кӑтартса панӑ. 16 килограмлӑ телекамерӑна тата 4 килограмлӑ аккумулятора йӑтса ҫула тухаканскерӗн кадрне тем те, такам та лекнӗ: РФ юстици министрӗ пулнӑ Николай Федоровӑн парад подъезчӗ патӗнчи монологӗ те, Питӗр мэрне Анатолий Собчак та. Сергей Мышев биографийӗнчи ҫак фактсем пирки, сӑмах май, хӑй вӑхӑтӗнче «Московский комсомолец в Чебоксарах» хаҫат ҫырса кӑтартнӑччӗ.

Сергей Мышев ӗҫӗсене сумлӑ конкурссенче пӗрре кӑна мар хакланӑ. Пултаруллӑскер кино та ӳкернӗ.

Авӑн уйӑхӗн 19-мӗшӗнче вӑл 55 ҫулхине йышпа паллӑ тунӑ. Ӑна ыран юлашки ҫула ӑсатӗҫ.

Редактортан: хыпарҫӑ Мышева хӗнени пирки ҫырнӑччӗ, анчах та ҫӑлкуҫӗ шанчӑклах маррине пула, тата ку сас-хура ҫирӗпленменнине кура эпир ӑна илсе петӗмӗр. Тӗрӗслемен информацие (ӑна сас-хура пек лартнӑччӗ пулин те) вырнаҫтарнӑшӑн каҫару ыйтатпӑр.

Юрий Кислов депутат (сулахайри)

Ӗнер чӑваш парламенчӗн депутачӗсене халӑх тарҫи пулнине ӗнентерекен значоксем тыттарнӑ.

Депутат значокӗсене субординацие пӑхӑнса валеҫнӗ: малтан парламент ертӳҫине, унтан — спикер ҫумӗсене, кайран — комитет ертӳҫисене, юлашкинчен — ахаль депутатсене.

Александр Белов журналист ҫырнӑ тӑрӑх, значоклӑ пулнисем протокол сӑнӳкерчӗкӗ валли ӳкерӗннӗ май кашни хӑйне май тытнӑ. Шупашкарти Ҫӗнӗ Кӑнтӑр микрорайонӗнчен депутата суйланнӑ Роман Каляев Валерий Филимонов спикера тӑванла ыталаса илнӗ, Петр Краснов регалине типпӗн илсе ҫаврӑнса утнӑ, Игорь Моляков сӑмах калама ӑнтӑлнӑ.

Депутата пуҫласа суйланнисем значока тимлӗн сӑнанӑ пулсан, унччен те халӑх тарҫи шутланнисемшӗн вӑл хӑнӑхнӑ япалан туйӑннӑ. Шупашкарти 2-мӗш ҫӑкӑр савучӗн пуҫлӑхӗ Юрий Кислов малтанхи значока кӑмӑлланине палӑртнӑ, мӗншӗн тесен унӑн йӗппи (булавки) меллӗрех пулнӑ, хальхи валли вара пиншака шӑтарма тивет.

Зинаида Аниськина

Тутарстанри Аксу районӗнчи Кивӗ Тимушкелӗнче халӑх театрӗ ӗҫлет. «Сувар» хаҫатра Константин Малышев журналист пӗлтернӗ тӑрӑх, ӑна халӗ Зинаида Аниськина ертсе пырать.

Акӑ епле ҫырса кӑтартнӑ вӑл: «Ачасемпе ҫулталӑкне 2 спектакль хатӗрлет Зинаида Владимировна. 15 ача ун патне актер ӑсталӑхне вӗренме ҫӳрет. Эрнере икӗ хутчен шкул хыҫҫӑн пухӑнаҫҫӗ вӗсем клуба. Денис Аниськин, Ангелина Агапова, Карина Яшмурзина, Полина Григорьева, Роман Чухунов, Вадим Ефремов – чи пултаруллисем.

Ялти театр сезонӗ кӗркунне клуба ӑшӑ парсан пуҫланать. Премьерӑсене ял-йыш та кӗтет.

Декорацисене те ял театралӗсен хӑйсен тума тивет. Клубри хӗрарӑмсене мӑшӑрӗсем пулӑшаҫҫӗ. Костюмсемпе ҫеҫ йывӑр. Уйрӑмах ачасем валли тӗрлӗрен выльӑхсен тумӗсене тума хӗн.

Аслисен репертуарӗ – йӑлтах чӑвашла. Аслӑ ушкӑна шкулта тата ача пахчинче ӗҫлекенсем ҫӳреҫҫӗ, пенсионерсем те сахал мар. Анчах кунта та йывӑрлӑхсӑр мар. Зинаида Аниськина шухӑшӗпе, хальхи драматургсен пьесисемпе хатӗрленӗ спектакльсене ялта лартма йывӑр. Чебановӑн комедийӗсене кӑна сцена ҫине кӑларма ҫӑмӑл.

Малалла...