Кӑрлачӑн 18-мӗшӗнче И.Н. Ульянов ячӗллӗ Чӑваш патшалӑх университечӗн журналистика кафедринче ҫак аслӑ шкулӑн профессорӗ, Тӑван ҫӗршывӑн аслӑ вӑрҫин ветеранӗ, Раҫҫей журналистсен тата писательсен союзӗсен пайташӗ Иван Тенюшев (1923—2016 ҫҫ.) ҫуралнӑранпа 95 ҫул ҫитнине халалласа ҫавра сӗтел иртнӗ. Журналистикӑн паллӑ тӗпчевҫи тата педагог пурнӑҫӗпе ӗҫ-хӗлӗ ҫинчен профссорӑн мӑшӑрӗ Ольга Захаровна, ывӑлӗ Александр, тӑванӗн хӗрӗ Валентина аса илсе каласа кӑтартнӑ. Журналистика кафедрин заведующийӗ Анатолий Данилов, Людмила Васильева, Амин Эшкерат доцентсем, Рифат Фаткуллин студент тата ыттисем те Иван Тенюшева аса илнӗ. Студентсемпе ученӑйсем Иван Тенюшевӑн пултарулӑхне, унӑн ӑслӑлӑх ӗҫӗсене тата художество хайлавӗсене тишкересси пирки те калаҫнӑ.

Аслӑ шкулӑн ӑслӑлӑх вулавӑшӗ Иван Тенюшев кӗнекисен куравне йӗркеленӗ. Профессора халалласа университетра ҫывӑх вӑхӑтра фотокурав та уҫасшӑн.

Иван Тенюшев 1923 ҫулхи кӑрлачӑн 19-мӗшӗнче Патӑрьел районӗнчи Алманчӑкра ҫуралнӑ. 1939 ҫулта Патӑрьелти педучилищӗрен вӗренсе тухнӑ. 1942 ҫулччен Тӑвайӗнчи пуҫламӑш шкулта, 1940—1942 ҫулсенче Елчӗк районӗнчи Шӑмалакри шкулта ӗҫленӗ. Тӑван ҫӗршывӑн аслӑ врӑҫи вӑхӑтӗнче виҫӗ хутчен аманнӑ, ҫӗнтерӗве Будапештра кӗтсе илнӗ. 1946 ҫулта вӑл Патӑрьел район хаҫатӗнче ӗҫлеме пуҫланӑ, Йӗпреҫ район хаҫачӗн редакторӗ пулнӑ, каярах республика хаҫатне куҫнӑ, парти обкомӗн пичет секторӗн заведующине ҫитнӗ. Мускавра журналистика ӑсталӑхне алла илнӗ. ЧПУра 1967 ҫулта ӗҫлеме пуҫланӑ. Кӗнеке издательствисенче темиҫе ҫул тӑрӑшнӑ хыҫҫӑн каллех ЧПУна вырнаҫнӑ.

#Елчӗк районӗ, #Тӑвай, #Алманчӑк, #Патӑрьел районӗ, #ЧПУ, #астӑвӑм, #Шӑмалак, #Йӗпреҫ районӗ, #кӗнеке издательстви, #Мускав, #Будапешт, #училищесем