21.мвд.рф сайтри видеоран илнӗ скриншот

Шупашкарта пурӑнакан 29 ҫулти хӗрарӑм ултавҫӑсене 3 миллион ытла тенкӗ куҫарса панӑ. Ҫав шутра килти укҫа та пулнӑ, кредит та илнӗ. Ҫавӑн чухлӗ суммӑна хӗрарӑм пӗр эрне хушшинче куҫарса панӑ.

Пӑтӑрмах почта уйрӑмне килмелли документсене йӑнӑша пула урӑх адреспа ярса панине ӗнентернинчен, урӑх ҫӗре ярса пама смспа килнӗ пароле ыйтнинчен пуҫланнӑ. Код мессенджерсенчен пӗринче бот урлӑ килнӗ. Хӗрарӑм ҫав кода ют ҫынсене пӗлтернӗ. Унтан ҫавсем патшалӑх пулӑшӑвӗсен порталӗнчи уйрӑм кабинета кӗме пултарнӑ.

Кайран хӗрарӑма укҫана хӑрушсӑр счет ҫине куҫарса пама ыйтнӑ. Ҫамрӑк хӗрарӑм ют ҫынсем каланине йӑлт пурнӑҫланӑ.

21.мвд.рф сӑнӳкерчӗкӗ

Чӑваш Енри йӗрке хуралҫисем Ҫӗрпӳ тӑрӑхӗнче роза ӳстерекенсене тупса палӑртнӑ. Ҫак ӗҫе вӗсем йӗркене пӑсса пурнӑҫланӑ иккен.

Ҫӗрпӳ тӑрӑхӗнчи пӗр теплицӑра чикӗ леш енчен килнӗ ҫынсем тар тӑкни пирки миграци енӗпе ӗҫлекен специалистсене систерекенсем пулнӑ.

Инспекторсем тӗрӗслеме тухса кайнӑ. Унта, чӑн та, мигрантсем ӗҫленӗ иккен. Узбекистанран хайхисем пирӗн ҫӗршыва миграци саккунӗпе килӗшӳллӗн пурӑнманни палӑрнӑ. Ҫавсем роза калчи ӳстернӗ ҫӗрте тӑрӑшнӑ.

Йӗркене пӑснӑ мигрантсене административлӑ майпа явап тыттарӗҫ, 5 пин тенкӗ таран штраф хурса парӗҫ, пирӗн ҫӗршывран кӑларса яма пултарӗҫ.

Теплицӑра нелегалсене ӗҫлеттернӗ ҫынна та саккун явап тыттарма май парать.

arm-detlib.my1.ru сайтри сӑн

Тӑвайри шкулта 10-мӗш класра вӗренекен Виктория Автономова вырӑс чӗлхипе иртнӗ Пӗтӗм Раҫҫейри олимпиадӑра ҫӗнтернӗ.

Унта тӗрлӗ регионти 450 ытла шкул ачи хутшӑннӑ. Пирӗн ентеш чи лайӑххисен шутне кӗнӗ.

Виктория – тӗрлӗ енлӗн аталаннӑ хӗр. Вӑл вырӑс чӗлхипе кӑна мар, биологипе тата химипе те касӑкланать. Вӑл тухтӑр пулма ӗмӗтленет, ҫавӑнпах ҫак предметсене тӑрӑшса шӗкӗлчет.

chuvdram.ru сӑнӳкерчӗкӗ

Ака уйӑхӗн 25-мӗшӗнче Чӑваш патшалӑх академи драма театрӗнче Валентина Трифонован пултарулӑх каҫӗ иртӗ.

Валентина Ивановна — Чӑваш АССР тава тивӗҫлӗ артистки (1979), чӑваш халӑх артистки (1989), Раҫҫей тава тивӗҫлӗ артистки (1998).

Пулас артистка 1950 ҫулхи ака уйӑхӗн 25-мӗшӗнче Тӑвайӗнче ҫуралнӑ. Ленинградри А.Н. Островский ячӗллӗ патшалӑхӑн театр, музыка, кинематографи институтӗнчен вӗренсе тухнӑ. 1972 ҫултан пуҫласа 2008 ҫулччен Чӑваш патшалӑх академи драма театрӗнче ӗҫленӗ.

Валентина Трифонова ҫинчен тӗплӗнрех РУВИКИн чӑваш уйрӑменче вуласа пӗлме май пур.

donland.ru сайтри сӑн

Нумаях пулмасть республикӑна «Ҫӗнтерӳ пуйӑсӗ» килсе кайнӑччӗ. Ҫӗнтерӳ пулнӑранпа 80 ҫул ҫитнине халалланӑ акципе килӗшӳллӗн, вӑл каллех пирӗн пата ҫитӗ. Пуйӑс Чулхула чукун ҫулӗн 45 станцийӗнче чарӑнӗ. Ҫав шутра — пирӗн республикӑра вырнаҫнисенче те.

Пирӗн республикӑна пуйӑс ака уйӑхӗн 26-мӗшӗнче ҫитӗ. Вӑл «Ҫӗмӗрле», «Вӑрнар», «Канаш1» станцисенче чарӑнӗ. Ака уйӑхӗн 27-мӗшӗнче Улатӑр тата Шупашкар урлӑ иртӗ. Чарӑнура 20 минутран пуҫласа 1 сехет таран пулӗ.

ЧР Патшалӑх Канашӗ ҫумӗнчи Ҫамрӑксен палати Элтепере республикӑра тепӗр уяв йышӑнма сӗннӗ. Вӗсем Нумай ачаллӑ ҫемьесен кунне паллӑ тутарасшӑн.

Сӑмах май, пӗлтӗрхи ҫулла тӗлне Чӑваш Енре 18 пин ытла нумай ачаллӑ ҫемье пулнӑ. Ку 2012 ҫулпа танлаштарсан, икӗ хут нумайрах. Кӑҫалтан нумай ачаллисене пулӑшмалли ҫӗнӗ мерӑсем йышӑннӑ.

Аса илтерер: Олег Николаев Элтеперте ӗҫлеме пуҫланӑранпа виҫӗ уяв паллӑ тума йышӑннӑ: Ашшӗн кунӗ, Чӑваш тӗррин кунӗ, Сӑр тата Хусан хӳтӗлев чиккисен строителӗсене амӑнмалли кун.

culture.cap.ru сӑнӳкерчӗкӗ

Шупашкарти Ф.П. Павлов ячӗллӗ музыка училищинче вӗренекенсем Ҫӗнтерӳ кунне халалласа «Ҫӗнтерӳ юррисем» концерт хатӗрленӗ. Ӑна вӗсем ҫу уйӑхӗн 5-мӗшӗнче, 18 сехет те 30 минутра, кӑтартӗҫ.

Программӑна пирӗн халӑхӑмӑрӑн мухтавлӑхне палӑртса ҫырнӑ хайлавсене кӗртнӗ. Концерта вӗрсе тата ҫапса каламалли инструментсем илем кӳрӗҫ.

Концерта музыка училищин солисчӗсем, ансмблӗсем, оркестрӗ хутшӑнӗ.

Дирижёрӗ — Чӑваш Республикин культурӑн тава тивӗҫлӗ артисчӗ Николай Смирнов. Концерта Чӑваш Республикин культурӑн тава тивӗҫлӗ ӗҫченӗ Элла Леонтьева ертсе пырӗ. Концертмейстерсем: Наталья Тихонова, Ирина Сысоева, Елена Ананьева, Татьяна Асламас, Нина Кульпина.

vk.com/cheboksary пабликран илнӗ сӑнӳкерчӗк

Ӗнер, ака уйӑхӗн 14-мӗшӗнче, каҫхи вунӑ сехетре, Шупашкарти Мускав проспектӗнче 17 ҫулти хӗр 53 ҫулти хӗрарӑм ҫине самокатпа пырса кӗнӗ.

Инкек тротуар ҫинче пулса иртнӗ. Хӗрарӑм ҫулпа утса пынӑ, ҫав вӑхӑтра ун ҫине электричество самокачӗпе ярӑнса пыракан студент пырса кӗнӗ. Суранланнӑ хӗрарӑма пульницӑна ӑсатнӑ. Унта ӑна тухтӑрсем пулӑшнӑ хыҫҫӑн килӗнче сипленме янӑ.

Колледжра иккӗмӗш курсра вӗренекен хӗр ӗнентернӗ тӑрӑх, руле вӑл астумасӑр пӑрса янӑ. Пике тӗлӗшпе халӗ административлӑ ӗҫ пуҫарнӑ.

vk.com/gov_cap_ru ҫӑнӳкерчӗкӗ

Кӑҫалхи пӗрремӗш кварталта пирӗн республикӑра 958 мӑшӑр ҫемье ҫавӑрнӑ. Ку цифра пӗлтӗрхи ҫав тапхӑртинчен 12,7 процент нумайрах. Ун чухнехи виҫӗ уйӑхра 850 мӑшӑр пӗрлешнӗ.

Кӑҫалхи пӗрремӗш кварталта Шупашкарти загсра 264 мӑшӑр ҫырӑннӑ, Ҫӗнӗ Шупашкарта — 118, хулари Калинин тата Ленин районӗсенче — 95 тата 92. Шупашкар тӑрӑхӗнче 46 мӑшӑр ҫемьеленнӗ, Ҫӗрпӳ районӗнче — 26, Патӑрьел районӗнче — 21, Муркаш районӗнче — 20.

Мӑшӑрсенчен ытларахӑшӗ ҫемье ҫавӑрма заявленине патшалӑх пулӑшӑвӗсен порталӗ урлӑ панӑ.

cheb-centr.soc.cap.ru сӑнӳкерчӗкӗ

Ҫамрӑк чухне эпир пӗчченлӗхе туймастпӑр: ялан ҫын ҫинче, ӗҫӗ те нумай, унта-кунта тухса ҫӳретпӗр, ӑна-кӑна вулатпӑр. Ватӑлсан ҫын пӗчченлӗхпе аптӑрать. Телевизор пӑхса йӑлӑхать вӑл, кӗнеке-хаҫат вулама куҫ начар курни кансӗрлет.

Шупашкар хулинчи халӑхӑн социаллӑ ыйтӑвӗсене тивӗҫтеркен комплекслӑ центр психологӗ Лира Саминова каланӑ тӑрӑх, ватӑ ҫынна пурнӑҫ условийӗнчен ытла ҫумра ӑнланакан ҫын пулни паха. Ҫавӑнпа та вӑл асӑннӑ учрежденире пурӑнакан ватӑсемпе тӗлпулусем-калаҫусем ирттерет.

Ватта чунтан хисеплесе калаҫни, ӑна ӑнланнине палӑртни аслӑ ҫулхисене хавхалантарать, пӑлханнине ирттерет, вӗсене хаваслантарать.