"Контактри" сӑн

Улатӑрти нимеҫӗ Зоя Бусоргина 60 ҫултан иртнӗ пулсан та ҫамрӑксенчен юлмасть. Вӑл вӗсемпе тачӑ ҫыхӑнса ӗҫлет.

Хальхи вӑхӑтра ав Зоя Витальевна Чулхулара иртекен Ҫамрӑксен фестивальне хутшӑнать. Унта 450 яхӑн нимеҫӗ мероприятие ирттерме пулӑшать. Ҫав шутра – пирӗн ӗнтеш те.

Зоя Витальевна унта хӑнасене кӗтсе илет. Вӑл обществӑшӑн питӗ усӑллӑ пуласшӑн.

cap.ru сайтри сӑн

Паян Шупашкар депутачӗсем ларура хула пуҫлӑхне Владимир Доброхотова должноҫрен кӑларас ыйтӑва пӑхса тухассине пӗлтертӗмӗр ӗнтӗ. Лару иртнӗ, йышӑну тунӑ.

Должноҫрен каяссине Владимир Доброхотов хӑй та халӑх тетелӗнче пӗлтернӗ. Ку «ҫӗнӗ тӗллевсем пулнипе» ҫыхӑннине пӗлтернӗ, пӗр командӑра ӗҫленӗ ҫынсене тав тунӑ.

Ҫавӑн пекех вӑл хӑйӗн страницинчи постӗнче Олег Николаева суйлавра ҫӗнтернӗ ятпа тав тунӑ. «Республика управленийӗн структуринче стабильлӗх сыхланса юлни питӗ пӗлтерӗшлӗ», - тенӗ вӑл.

t.me/chuv_prok каналтан илнӗ сӑнӳкерчӗк

Ӗнер, авӑн уйӑхӗн 18-мӗшӗнче, кӑнтӑрла, Элӗк районӗнчи Тавӑт ялӗнче пӗрисен пӳртӗнче пушар тухнӑ.

Колхоз урамӗнчи ҫуртри пушара сӳнтерме 7 специалистпа 2 техника пырса ҫитнӗ. Хӗрлӗ автана лӑплантарнӑ хыҫҫӑн 37 ҫулти арҫын виллине тупнӑ.

Инкек вырӑнне вырӑнти районӑн прокурорӗ те пырса ҫитнӗ. Специалистсем малтанласа палӑртнӑ тӑрӑх, пӳрте ятарласа чӗртсе янине асӑрхаман.

Арҫын пирус туртнӑ чухне асӑрханман тесе шухӑшлаҫҫӗ.

fotokto.ru сайтри сӑн

Синоптиксем пӗлтернӗ тӑрӑх, пӗр эрнере ҫуллахи ҫанталӑк хӗллехине ҫаврӑнӗ.

Паян республикӑра пӗлӗтлӗ ҫанталӑк тӑрӗ. Канмалли кунсенче хушӑран ҫумӑр ҫӑвӗ: термометр 17-22 градус ӑшӑ кӑтартӗ. Вырсарникун ҫил вӑйланӗ.

Ҫитес эрне пуҫламӑшӗнче ҫуллахи пек ӑшӑ та уяр ҫанталӑк савӑнтарӗ: тунтикун - 20-25 градус, ытларикун 24-29 градус ӑшӑ пулӗ.

Кайран вара ҫанталӑк тӑрук сивӗтсе ярӗ. Эрне варринче ҫумӑр ҫума пуҫлӗ, унтан пирӗн пата сивӗ сывлӑш килӗ: кӗҫнерникун кӑнтӑрла 8-13 градус кӑна ӑшӑ пулӗ, ҫӗрле – 2-7. Ҫил ҫурҫӗр енчен вӗрнӗрен тата сивӗрех пек туйӑнӗ.

Синоптиксем пӗлтернӗ тӑрӑх, ӑшӑ текех таврӑнмӗ. Авӑн уйӑхӗн вӗҫӗнче вара пӗрремӗш юр ҫӗр ҫине ӳкме пултарӗ.

«Ҫыхӑнура» порталти сӑн

Паян депутатсем Шупашкар хула администрацийӗн пысӑк залӗнче икӗ ыйтӑва пӑхса тухма пухӑнӗҫ. Пӗри – хула пуҫлӑхне Владимир Доброхотова срок тухичченех должноҫрен хӑтарасси.

Аса илтерер: уйӑха яхӑн ӗнтӗ хула пуҫлӑхӗн тивӗҫӗсене Станислав Трофимов пурнӑҫлать. Сӑмах май, ҫак схемӑпах 2024 ҫулта Владимир Доброхотов Денис Спирин пуканне йышӑннӑ.

«Ҫыхӑнура» портал пӗлтернӗ тӑрӑх, Владимир Доброхотов «Дорэкса» таврӑнма пултарать.

vk.com/chuv_kray пабликран илнӗ сӑнӳкерчӗк

Чӑваш актёрӗсем Андрей Кончаловский сериалӗнче ӳкерӗннӗ.

Кӑҫалхи юпа уйӑхӗнче «Раҫҫей 1» телеканалпа Андрей Кончаловскийӗн «Хроники русской революции» сериалне кӑтартӗҫ. Унта пирӗн икӗ ентешӗмӗр Дмитрий Матвеев тата Даниил Иванов ӳкерӗннӗ.

Дмитрия куракансем «Чернобыль», «Империи: Александр I», Даниила – «Слово пацана. Кровь на асфальте», «СашаТаня» тӑрӑх пӗлеҫҫӗ.

II Николай патша сӑнарне Никита Ефремов калӑплать. Вӑл — чӑваш букварӗн авторӗн Иван Яковлевӑн тӑванӗ.

cap.ru сӑнӳкерчӗкӗ

Ку шӑматкун, авӑнӑн 20-мӗшӗнче, «Нацисен кросӗ» пулӗ. Кӑҫал ӑна Ҫӗнтерӳ пулнӑранпа 80 ҫул ҫитнине тата Тӑван ҫӗршыв хӳтӗлевҫин ҫулталӑкне халалланӑ.

Йӑлана кӗнӗ тӑрӑх, Шупашкарта спорта юратакансем Мускав ҫыран хӗррине пухӑнӗҫ. Спорт уявӗ кашни муниципалитетрах иртӗ. Чи пӗчӗккисем 1 ҫухрӑм чупӗҫ, шкул ачисемпе студентсем – 4 ҫухрӑм. Спортсменсем вара 6, 8 е 12 ҫухрӑм суйлама пултарӗҫ.

Ку таранччен республикӑра «Нацисен кросне» 14 пин ҫын хутшӑнма заявка панӑ.

cap.ru сӑнӳкерчӗкӗ

Суйлав иртсе кайрӗ, ЧР Элтеперӗ малашне те Олег Николаев пулӗ. Инаугураци аванӑн 26-мӗшӗнче пулӗ.

Вӑл Чӑваш патшалӑх оперӑпа балет театрӗнче иртӗ. Ҫавна май ҫав кун кӑтартма палӑртнӑ спектакле аванӑн 30-мӗшӗ ҫине куҫарӗҫ. Ун чухне вӑл 15 сехетре пуҫланӗ.

Аса илтерер: суйлавра Олег Николаевшӑн суйлава пынисен 67,06 проценчӗ сасӑланӑ.

vk.com/chuvashvk ушкӑнран илнӗ скриншот

Муркаш районӗнчи Юнкӑри культура ҫуртӗнче купӑсҫӑ кирлӗ. Кун пирки халӑх тетелӗсенчен пӗринче Надежда Шандимирова пӗлтернӗ.

Чӑваш Енре «Земство культура ӗҫченӗ» программӑна хутшӑнакансем ӗҫе пуҫӑннӑ тесе хыпарланине курсан ҫав хӗрарӑм Юнкӑри культура ҫуртне ҫамрӑк культура ӗҫченне ярса парӗҫ-ши тесе ҫырнӑ.

«Ку ыйтӑва эп иртнӗ ҫулах хускатнӑччӗ. Пӗлтӗр те смотр вӑхӑтӗнче пирӗн купӑсҫӑна япӑх пулса кайрӗ. Ҫулӗ те пур, хӑлхи те, куҫӗ те витӗрех мар», — хыпарланӑ хӗрарӑм.

chrio.rchuv.ru сӑнӳкерчӗкӗ

Геннадий Волкова асӑнса регионсен шайӗнчи «Хавхалану» фестиваль-конкурс иртет. Вӑл Чӑваш Енӗн Вӗренӳ институчӗ пӗлтернӗ тӑрӑх, авӑн уйӑхӗн 16-мӗшӗнче пуҫланнӑ, вӑл юпа уйӑхӗн 31-мӗшӗнче вӗҫленӗ.

Ӑна И.Я. Яковлев ячӗллӗ Чӑваш патшалӑх педагогика университечӗпе, Чӑваш наци конгресӗпе, Шупашкар хулин мониторингпа вӗренӳ аталанӑвӗ центрӗпе тата Шупашкар хулин Г.Н. Волков Раҫҫей вӗренӳ академийӗн академикӗ ячӗллӗ уйрӑм предметсене тарӑннӑн вӗрентекен 62-мӗш пӗтӗмӗшле пӗлӳ паракан вӑтам шкулӗпе пӗрле йӗркеленӗ.

Фестиваль-конкурс тӗллевӗ – вӗренекенсене Раҫҫей вӗренӳ академийӗн сумлӑ академикӗн, публицист писателӗн, этнопедагогика никӗслевҫин Г.Н. Волковӑн пултарулӑх эткерне тӗпчесе сарасси, вӗренекенсемпе педагогсен пӗлӳпе ӑс-хакӑл пултарулӑхне вӑйлатасси, вӗсене пултарулӑхпа тӗпчев ӗҫне явӑҫтарасси, наци культурипе литературине тӗпе хурса вӗренекенсен этнокультура компетентлӑхне йӗркелесси, вӗренекенсемпе педагогсене хӑйсене аталантарма майсем туса парасси, ҫавӑн пекех халӑхсен хушшинчи хутшӑну культурине йӗркелесси.