culture.cap.ru сӑнӳкерчӗкӗ

Чӑваш Республикин культурӑн тава тивӗҫлӗ ӗҫченӗ, музыкант, хор дирижерӗ тата педагог Владимир Мочалов вилнӗ.

Вӑл хӑйӗн ӗмӗрӗнче нумай студента вӗрентсе кӑларнӑ, вӗсем Раҫҫейри тата Чӑваш Енри ятлӑ-сумлӑ музыкантсем пулса тӑнӑ.

Хӑй вӑл Хусанти патшалӑх консерваторийӗнче вӗреннӗ. Унӑн преподавателӗ Хусанти хор дирижёрӗсен шкулӗнче пысӑк тӳпе хӑварнӑ ҫын, Раҫҫей тата Тутарстан Республикин искусствисен тава тивӗҫлӗ ӗҫченӗ, Семён Казачков профессор (1909-2005) пулнӑ. Консерваторире Владимир Дмитриевич ун патӗнче 1961-1966 ҫулсенче вӗреннӗ, кайран ҫав ҫын ертсе пыракан кафедрӑра 5 ҫул ӗҫленӗ, унтан Чӑваш Ене таврӑннӑ.

Кунта вӑл 1987 ҫултанпа «Салют» культура керменӗнче халӑх юррин халӑх хорӗнче тӑрӑшнӑ, Ф.П. Павлов ячӗллӗ музыка училищинче преподаватель пулнӑ.

Шупашкар муниципаллӑ округӗнче хирсене ҫулсеренех пӑхса ҫаврӑнаҫҫӗ.

Тыр-пул ӗҫта епле шӑтса тухнине хаклас ҫак ырӑ йӑлана тахҫанах пуҫарса янӑ. Хуҫалӑхсен ертӳҫисем, тӗп агрономсем пӗр-пӗрин хирӗсемпе паллашаҫҫӗ.

«Россельхозцентр» учрежденин филиалӗн специалисчӗсем районти 10 ял хуҫалӑх предприятийӗнче пулнӑ.

Комисси пайташӗсем тырар мӗн тарӑнӑшне акнине, ҫум курӑк пуррипе ҫуккине, агротехника ыйтнине пӑхӑннине тата ыттине тишкернӗ.

culture.cap.ru сӑнӳкерчӗкӗ

Чӑваш Енре нумай нациллӗ ҫамрӑксен слёчӗ иртӗ.

Чӑваш Республикин Культура институтӗнче пӗлтернӗ тӑрӑх, хальхи вӑхӑтра Нумай нациллӗ ҫамрӑксен регионсем хушшинчи форумне хатӗрленеҫҫӗ. Культурӑпа вӗренӳ слёчӗ ҫӗртме уйӑхӗн 18-22-мӗшӗсенче пулӗ.

Вӗренӳ учрежденийӗсемпе ҫамрӑксен организацийӗсен арт-платформи «Ясна» этноэкологи комплексӗнче ӗҫлӗ. 50-а яхӑн ҫамрӑк чӑваш халӑхӗн йӑли-йӗркипе тата культурипе паллашӗ.

cap.ru сӑнӳкерчӗкӗ

Шупашкар муниципаллӑ округӗнчи Тренккассинче врач амбулаторийӗ тума тытӑннӑ. Халӗ унӑн кирпӗч стенисене хӑпартса пӗтернӗпе пӗрех. Шыв пӑрӑхне тата канализаци пӑрӑхӗсене хурса тухнӑ. Нумаях пулмасть «СКОМ 21» организаци (ӗҫе подрядчик пулса вӑл пурнӑҫлать) ҫивиттие витӗ.

Объекта епле хӑпартнипе паллашма Шупашкар районӗнчи тӗп пульницӑн тӗп врачӗ Владимир Викторов пырса кайнӑ. «Строительство ӗҫӗсем аван пыраҫҫӗ», – ӗҫ хӑвӑртлӑхӗпе кӑмӑллӑ юлнӑ Владимир Николаевич.

«Ҫӗнӗ здани пӗр хутлӑ пулӗ. Унта ватӑ ҫынсене тата сусӑрсене кӗрсе тухма меллӗ пулӗ», – тенӗ Зоя Ефимова тата Наталия Оливанова медсестрасем.

«Пирӗн ялта врач амбулаторине тунишӗн питӗ савӑнатпӑр. Пирӗн посёлок ҫамрӑк, ачасем ялта нумай», – хавхаланса калаҫнӑ ҫав ялта пурӑнакан Галина Вылегжанина.

cap.ru сӑнӳкерчӗкӗ

Ҫӗртмен 3-мӗшӗнче Улатӑр пульницинчен санавиаципе икӗ пациента Шупашкара илсе килнӗ. Иккӗшӗн те миокард инфаркчӗ пулнӑ.

64-ри арҫын пахчара ӗҫленӗ хыҫҫӑн кӑкӑр тӗлӗнчен ыратнине туйнӑ. 70 ҫулти хӗрарӑм вара хайне япӑх туйсан терапевт патне кайнӑ. Тухтӑр ӑна васкавлӑ медпулӑшу чӗнсе панӑ.

Александр Степанов анестезиолог-реаниматолог тата Дмитрий Воробьев медбрат-анестезист пациентсене санавиаципе Республикӑри клиника пульницине чиперех илсе ҫитернӗ.

t.me/chuvashenkalasat каналтан илнӗ сӑнӳкерчӗк

Шупашкар хулинче транспортпа йӳнӗрех хакпа ҫӳреме май килӗ.

Хула тӑрӑх ҫула тухакансене ырантан, ҫӗртме уйӑхӗн 5-мӗшӗнчен, перекетлеме сӗнеҫҫӗ.

Телеграмри «Чӑваш Ен калаҫать» каналта пӗлтернӗ тӑрӑх, транспорт карттине хӑвӑрт тӳлевсен системи урлӑ укҫа хурсан пассажира 5 проценчӗ таврӑнать.

«Карттӑна ЕТК хушӑм урлӑ миҫе тенкӗ хурас тенине палӑртса, «СБП» текен тӳлев меслетне усӑ курса «тултармалла». Ҫакӑ Чӑваш Енре пурӑнакансен ҫемье хыснине перекетлеме май парать. Хушӑм урлӑ, е сайтра хурсан та тӳлев хӑварт ҫитет, проценчӗ укҫан таврӑнать. Ку меслет авӑн уйӑхӗн 30-мӗшӗччен ӗҫлет.», — хыпарланӑ асӑннӑ ҫӑлкуҫра.

culture.cap.ru сӑнӳкерчӗкӗ

Паян, ҫӗтме уйӑхӗн 4-мӗшӗнче, чӑваш ӳнерӗн аталанӑвӗнче хӑйӗн тӳпине палӑрмаллах хывнӑ Фаина Романова театровед ҫуралнӑранпа 100 ҫул ҫитнӗ.

Чӑваш Енӗн Культура министерствинче пӗлтернӗ тӑрӑх, Фаина Александровна ҫак енӗпе чи авторитетлӑ специалистсенчен пӗри пулса тӑрать. Унӑн «Театр, любимый народом» кӗнекине чӑваш театрӗн историйӗн учебникӗ тесе хаклаҫҫӗ.

Чӑваш Енри театр тӗнчин тӗпчевҫи, театровед, искусствоведени кандидачӗ, Чӑваш АССРӗн тата РСФСРӑн искусствӑсен тава тивӗҫлӗ ӗҫченӗ Фаина Романова 1924 ҫулхи ҫӗртме уйӑхӗн 4-мӗшӗнче Тӑвайӗнче ҫуралнӑ. 1943 ҫулта Фаина Александровна ГИТИСӑн театроведени факультечӗн студентки пулса тӑнӑ. 1948 ҫулта Шупашкара таврӑннӑ. Ӳнерпе тата литературӑпа ҫыхӑннӑ статьясемпе рецензисем ҫырма пуҫланӑ.

chfila.ru сӑнӳкерчӗкӗ

Ҫу уйӑхӗн 29-мӗшӗнче Чӑваш Республикин тава тивӗҫлӗ ӗҫченӗ, Чӑваш патшалӑх филармонийӗн «Ҫеҫпӗл» ансамблӗн солистки Ольга Прокопьева 55 ҫул тултарнӑ.

Патӑрьел районӗнчи (халӗ муниципаллӑ округ) Ишлӗ ялӗнче ҫуралнӑскер тӳрех артист пулман. Малтан вӑл васкавлӑ медицина пулӑшӑвӗн службинче медсестрара тӑрӑшнӑ.

Артист пулас ӗмӗт ӑна Ф.П. Павлов музыка училищине илсе ҫитернӗ.

1993-1998 ҫулсенче Чӑваш патшалӑх академи симфони капеллинче, 1998-2005 ҫулсенче Чӑваш патшалӑх юрӑпа ташӑ ансамблӗнче ӗҫленӗ. 2005 ҫултанпа «Ҫеспӗл» ансамбльте юрлать.

«Юрлама эпӗ ачаранах юратнӑ», — тет паян артистка. Ӗҫе вӑл халӗ хавхаланса ҫӳрет. Унта утса мар, чупса ҫитнине пӗлтерет.

ШӖМ сайтӗнчи сӑнӳкерчӗк

Утӑ уйӑхӗн 2-мӗшӗнче, йӗрке хуралҫисене аптекӑран вӑрлани пирки йӗрке хуралҫисене хыпарланӑ.

Шупашкарти Мускав проспектӗнчи апеткӑсенчен пӗрне арҫын кӗнӗ, вӑл ӳте сӗрмелли крем, пурӗ 10 пин тенке яхӑнлӑх, вӑрланӑ. Видеосӑнав кмерисем ҫав арҫынна ӳкерсе илнӗ.

Вӑрӑ сӑнлӑ ҫынна тепӗр 20 минутран «Республика пульници» чарӑнура патшалӑхӑн ҫул-йӗр хӑрушсӑрлӑхӗн автоинспекцийӗн ӗҫченӗсем асӑрханӑ.

Свердлов облаҫӗнчи 48 ҫулти арҫын вӑрланине йышӑннӑ. Чӑваш Енре вӑл Чулхуларан Хусана кайнӑ чухне вӑхӑтлӑха чарӑннӑ. Каҫхине эрех ӗҫсе минренӗ хыҫҫӑн унӑн пуҫне вӑрӑ шухӑшӗ пырса кӗнӗ.

Юрӑпа ташӑ ансамблӗн сӑнӳкерчӗкӗсем

Чӑваш патшалӑх юрӑпа ташӑ ансамблӗн артисчӗсем патшалӑх стипендине тивӗҫнӗ. Вӑл укҫана ӑслӑлӑхри, литературӑри тата ӳнерти тава тивӗҫлӗ ӗҫсемшӗн параҫҫӗ.

Стипендие тивӗҫнисен йышӗнче – юрӑпа ташӑ ансамблӗн икӗ артистки: Наталия Алимова тата Юлия Константинова.

Вӗсем — балет артисчӗсем. Маттурскерсем ача-пӑчан вокалпа хореографи студине те ертсе пыраҫҫӗ. Ҫав студие Чӑваш патшалӑх юрӑпа ташӑ ансамблӗ ҫумӗнче 2021 ҫулта уҫнӑ. Унӑн воспитанникӗсем – Пӗтӗм Раҫҫейри, регионсем хушшинчи тата республикӑри конкурссен лауреачӗсем.