Ольга Иванова страницинчен илнӗ сӑнӳкерчӗк

Чӑваш кӗнеке издательствинче «Халӑх ӑс-хакӑлӗн ахах-мерченӗ. Жемчужины народной мудрости» кӑларӑм пичетленсе тухнӑ. Ку хыпара Кӗнеке издательствин ӗҫченӗ Ольга Иванова халӑх тетелӗнчи хӑйӗн страницинче пӗлтернӗ.

Чӑваш халӑх сӑмахлӑхӗ, чӑн та, пуян. Юрри-такмакӗпе, юмахӗ-халапӗпе, шӳтлевӗ-витлевӗпе, ваттисен сӑмахӗсемпе, тупмалли юмахӗсемпе.

Маларах асӑнса хӑварнӑ кӑларӑма кӗнӗ материалсем — Никита Романов (1905–1960) педагог пухса хатӗрленӗскерсем иккен. Кӗнеке редакторӗ – Владимир Степанов. Чӑваш патшалӑх гуманитари ӑслӑлӑхӗсен институчӗ тимленипе кун ҫути кӑтартнӑ. Унта 2500 ытла ваттисен сӑмахӗпе каларӑш тата 1700 ытла тупмалли юмах кӗнӗ.

Алина Петрова сӑнӳкерчӗкӗ

Паян, раштавӑн 7-мӗшӗнче, «Хавал» ушкӑн И.Я. Яковлев ячӗллӗ Чӑваш патшалӑх педагогика университетӗнче шкул ачисен «Хавал» ӑслӑлӑхпа практика 2-мӗш конференцине ирттернӗ. Кун пирки Алина Петрова вӗрентекен халӑх тетелӗнчи хӑйӗн страницинче пӗлтернӗ.

Конференци 4 секципе ӗҫленӗ.

«Тӑван тавралӑх» секцире Элӗк районӗнчи Анастасия Емельянова 9-11-мӗш классенче вӗренекенсем хушшинче 1-мӗш вырӑн ҫӗнсе илме пултарнӑ.

cap.ru сӑнӳкерчӗкӗ

Элӗк округӗнчи Чулкаҫ ялӗнче пурӑнакан Андрей Аркадьев раштавӑн 6-мӗшӗнче 101 ҫул тултарнӑ. Вӑл колхозниксен ҫемйинче ҫуралнӑ, 1942 ҫулхи ака уйӑхӗнче вӑрҫа кайнӑ. Ҫар училищинче вӗреннӗ хыҫҫӑн вӑл фронта лекнӗ. Паттӑрлӑх кӑтартнӑшӑн ӑна I степень Тӑван ҫӗршыв вӑрҫин орденӗпе чысланӑ. Тӑван ялне 1948 ҫулта тӑврӑннӑ. Ҫав ҫулах ҫемье ҫавӑрнӑ. Мӑшӑрӗпе Нонна Семеновнӑпа икӗ хӗр те пӗр ҫуратса ӳстернӗ.

Следстви комитечӗ тунӑ сӑн

Ӗнер каҫхине Шупашкарти Карл Маркс урамӗнче ҫӗкленекен элита ҫуртра инкек пулнӑ. 23 ҫулти рабочи 11 тата, 12-мӗш хушшинчи урая тунӑ хыҫҫӑн картламан лифт шахтине ӳкнӗ. Вӑл суранӗсене пула ҫавӑнтах вилнӗ.

Ҫакӑ паллӑ: арҫынна йӗркене пӑхӑнса илмен, инструктажсем ирттермен. Яваплӑ ҫын лифт шахтине картлассине сӑнаса тӑман. Инкек сӑлтавӗ урӑххи те пулма пултарнӑ: арҫын напарникӗпе ӗҫ вырӑнӗнче эрех ӗҫнӗ.

Кандинский нейросеть сӑнӳкерчӗкӗ

Чӑваш Енри 8 предприятин продукцийӗ Раҫҫейри чи лайӑх 100 тавар шутне кӗнӗ. Вӑл шутра:

– «Промтракторӑн» гусеницӑллӑ «ЧЕТРА Т-9.01» бульдозерӗ,

— «КЕТРА» заводӑн пысӑк форматпа керамика кирпичӗ,

— Промышленность шӑратӑвӗн локомотив колодки,

— Шупашкар элеваторӗн «Чебоксарская» ыраш ҫӑнӑхӗ,

— «МЕГА-ЮРМА» фабрикӑни маринадри чӑххи,

— «Хӗвел» компанин фотоэлектрика модулӗ,

— «Релематика» предприятин хӳтлӗхпе автоматика хатӗрӗ,

— «Электроприбор» заводӑн электроэнерги пахалӑхне тӗрӗслекен хатӗрӗ.

Олег Николаев страницинчи видеоран илнӗ сӑнӳкерчӗк

Чӑваш ёлки Кировра иртекен Пӗтӗм Раҫҫейри ёлка фестивальне хутшӑнать.

Паян, раштав уйӑхӗн 7-мӗшӗнче, «Киров – Новогодняя столица России» (чӑв. Киров – Раҫҫейри Ҫӗнӗ ҫулӑн тӗп хули) фестивале презентациленӗ. Ун вӑхӑтӗнче ҫӗршывӑн тӗрлӗ кӗтесӗнчи 89 ёлкӑпа паллаштарӗҫ. Кашни ёлкӑна халӑх теттисемпе илемлетнӗ. Чӑваш ёлки те вӗсенчен ним те кая мар.

Фестиваль кӑрлач уйӑхӗн 7-мӗшӗччен ӗҫлӗ.

Шупашкарти пӗр водитель машинӑсӑр тӑрса юлнӑ.

Хулари Ленин районӗн сучӗ 36 ҫулти арҫынна РФ Пуҫиле кодексӗн 264.3-мӗш статйин 1-мӗш пайӗпе явап тыттарма йышӑннӑ. Ҫамрӑк арҫыннӑн водитель правине пӗрре туртса илнӗ, вӑл пӗрех каллех руль умне ларнӑ. «Skoda Octavia» автомобильпе вӑл хула тӑрӑх пынӑ, ӑна йӗрке хуралҫисем асӑрханӑ.

Йӗркене пӑсакан водителе суд 280 сехет ӗҫлеттерсе юсантарма, 2 ҫул руль умне ларма чарнӑ. «Skoda Octavia» автомобиле конфискациленӗ.

Синоптиксем пӗлтернӗ тӑрӑх, кӗҫӗр республикӑра 12 градус таран сивӗтӗ. Айлӑмсенче тата сивӗрех пулӗ.

Ыран, шӑматкун, уяр ҫанталӑк тӑрӗ. Анчах ҫил вӑйланма тытӑнӗ. Ҫавна май 13-18 градус сивӗ пек, туйӑнӗ.

Вырсарникун ҫурҫӗр хӗвелтухӑҫ районӗсенче кӑштах юр ӳкӗ. Шупашкара та ҫитӗ. Тунтикун та чарӑнмӗ. Гидрометцентр пӗлӗрнӗ тӑрӑх, хулара 3 кунра 5-10 сантиметр хулӑнӑш юр ҫума пултарӗ. Анчах юрпа пӗрлӗ ӑшӑ ҫанталӑк килӗ.

Малтанлӑха пӗлтернӗ тӑрӑх, раштавӑн 20-мӗшӗсенче 30 градуслӑ сивӗ ҫитӗ.

cap.ru сӑнӳкерчӗкӗ

ЧР Цифра министрӗн виҫҫӗмӗш ҫум тупӑннӑ. Ку пукана Игорь Спиридонов йышӑннӑ.

Игорь Михайлович – 35 ҫулта, вӑл МФЦра ӗҫленӗ. Юпа уйӑхӗн 1-мӗшӗччен директор тивӗҫӗсене пурнӑҫланӑ, унтан директорӑн филиалсемпе ӗҫлекен ҫумӗ пулнӑ.

Палӑртмалла: халӗ ЧР цифра министрӗн Михаил Степановӑн виҫӗ ҫум: Екатерина Грабко, Алексей Гурьянов тата Игорь Спиридонов.

cap.ru сӑнӳкерчӗкӗ

Муркаш округӗнче пурӑнакан Раисӑпа Геннадий Шорниковсем туй тунӑранпа 60 ҫул ҫитнине паллӑ тунӑ. Вӗсем иккӗшӗ те педагог, ку тытӑмра нумай ҫул ӗҫленӗ.

Раиса Александровна – Куйбышев облаҫӗнчен. Геннадий Степанович унта вырӑс чӗлхипе литературине вӗрентме кайнӑ. 1963 ҫулта вӑл пулас арӑмӗпе тӑван тӑрӑхне таврӑннӑ, Шупашкар районӗнчи Чурачӑк ялӗнчи шкулта ӗҫлеме тытӑннӑ. Геннадий Степанович учительтен пуҫласа шкул директорӗ таран ҫитнӗ. Унӑн педагогикӑри стажӗ – 40 ҫул.

Раиса Георгиевна ҫав шкултах химипе биологи предмечӗсене вӗрентнӗ, завуч пулнӑ.

Шорниковсем виҫӗ ачана ура ҫине тӑратнӑ, халӗ 5 мӑнукпа савӑнса пурӑнаҫҫӗ.