Людмила Семёнова-Ульянова сӑнӳкерчӗкӗ

Чӑваш чӗлхи кунне халалласа Шӑмӑршӑ вӑтам шкулӗнче 6-мӗш класра вӗренекенсем хушшинче «Чӑваш чӗлхине пӗлетӗр-и?» вӑйӑ урокӗ иртнӗ. Ачасем тӗрлӗ станцире пулса хӑйсем чӗлхене мӗнле пӗлнине тӗрӗсленӗ.

Иван Яковлев аслӑ вӗрентекенӗмӗре сума суса тата Чӑваш чӗлхи кунне халалласа ака уйӑхӗн 24-мӗшӗнче Карапай Шӑмӑршӑ культура ҫуртӗнче муниципалитет шайӗнчи фестиваль пулса иртнӗ.

«Чунтан савӑнса та хӑпартланса таврӑнтӑм ҫак уявран. «Эпир пулнӑ, пур, пулатпӑр!» – тесе калас килет, тӑвансем, — тесе ҫырнӑ халӑх тетелӗнчи хӑйӗн страницинче Людмила Семёнова-Ульянова.

cap.ru сӑнӳкерчӗкӗ

«Промтракторта» айӑпланнӑ ҫынсем валли юсанмалли центр уҫӑлнӑ. Унта суд йышӑнӑвӗпе килӗшӳллӗн ӗҫлеттерме янӑ айӑпланнисем вӑй хурӗҫ.

Унта 110 ҫын ӗҫлеме пултарӗ. Республикӑра унашкал центр пӗрре кӑна мар. Ку - саккӑрмӗшӗ. Унсӑр пуҫне юсанмалли центрсем «Улатӑрти ҫӑкӑр савутӗнче», «Улатӑрти механика савутӗнче», «Вӑрнарти СОМ савутра», «Полимирта», «Мега Юрмара», «Текстильмашра», «ССК-Чебоксарский» предприятире, Етӗрнери ҫӗвӗ фабрикинче пур.

magadanpravda.ru сайтри сӑн

Синоптиксем ыран ҫил вӑйланассине систереҫҫӗ. Республикӑра вырӑнӑн-вырӑнӑн хӑрушлӑх шайӗ «сарӑ» пулӗ.

Ыран ҫил ҫеккунтра 15-16 метр хӑвӑрлӑхпа вӗрӗ. Ҫавна май электролинисем, ҫыхӑну линийӗсем, хавшак конструкцисем, реклама конструкцийӗсем, ытти япала арканма пултараҫҫӗ. Ҫул-йӗр ҫинче авари пулас хӑрушлӑх та пысӑк.

«Асӑрхануллӑ тата тимлӗ пулӑр!» - ҫапла асӑрхаттарать Инкеклӗ лару-тӑру министерстви.

Медаль эскизӗ

Шупашкарӑн 555 ҫулхи юбилейӗ ячӗпе мӗнле медаль пуласси паллӑ. Унӑн эскизӗпе Шупашкар хулин депутатсен пухӑвӗн председателӗ Евгений Кадышев паллаштарнӑ.

Эскиза ӗнер, ака уйӑхӗн 23-мӗшӗнче, иртнӗ ларура ҫирӗплетнӗ. «Шупашкар хули 555 ҫул тултарнине халалласа» медале хулан аталанӑвне тӳпе хывнӑ ҫынсене парӗҫ. Чи малтанах – Тӑван ҫӗршывӑн Аслӑ вӑрҫин ветеранӗсене, тыл ӗҫченӗсене, ятарлӑ ҫар операцине хутшӑнакансене. Кандидатурӑсене общество пӗрлешӗвӗсем те, профсоюзсем те, ӗҫ коллективӗсем те, ахаль ҫынсем те тӑратма пултараҫҫӗ.

Дмитрий Краснов министр телеграм-каналӗнчи сӑн

Чӑваш Енре икӗ чӗлхепе – вырӑсла тата чӑвашла – ҫырнӑ апат-ҫимӗҫ тухнӑ. Кунашкал этикеткӑллӑ пӗрремӗш партие «Чӑвашпотребсоюз» кӑларнӑ.

Ку ӗҫ пирки таҫханах калаҫу пуҫарнӑ. Экономика министрӗ Дмитрий Краснов Тӑван чӗлхе кунӗнче, нарӑсӑн 21-мӗшӗнче, апат-ҫимӗҫ упаковкисене вырӑсла тата чӑвашла ҫырма сӗннӗ. Акӑ паян Чӑваш чӗлхи кунӗ, продукци лавккасен сентри ҫине тухнӑ та.

Этикетка ҫинче продукцие мӗнрен хатӗрленине тата ытти информацие халӗ чӑвашла та вулама пулать. «Чӑвашпотребсоюз» хӑйӗн пӗтӗм ассортименчӗн упаковкисене улӑштарасшӑн.

cap.ru сӑнӳкерчӗкӗ

Чӑваш Ен Элтеперӗ Олег Николаев чӑваш чӗлхи ирӗклӗ янӑранишӗн савӑнать. Кун пирки вӑл Чӑваш чӗлхи кунӗпе саламланӑ май палӑртса хӑварнӑ.

«Чӑваш чӗлхи килте кӑна мар, хуласемпе муниципаллӑ округсен урамӗсенче те, театрсемпе музейсенче те, шкулсемпе больницӑсенче те ирӗклӗн янӑрани савӑнтарать.

Мӑн асаттемӗрсен ҫепӗҫ те янӑравлӑ чӗлхи яланах пурӑнтӑр тата тивӗҫлӗн аталантӑр тесе пирӗнтен кашниех хӑйӗнчен мӗн килнине йӑлтах тума тӑрӑшасса шанса тӑратӑп», — тесе шухӑшлать республика ертӳҫи.

Чӑваш чӗлхи кунӗпе республикӑн ӗҫ тата социаллӑ хӳтлӗх министрӗ Алёна Елизарова Телеграмри хӑйӗн страницинче саламланӑ.

«Анне чӗлхи илӗртӳллӗ, ҫепӗҫ те илемлӗ, янӑравлӑ та юрӑ пек кӗвӗллӗ. Ҫӗр ҫинчи пин-пин чӗлхе йышӗнче тӑван чӗлхе чи хакли пулӗ. Ака уйахӗн 25-мӗшӗнче пирӗн тӑван халӑхӑмӑр Чӑваш чӗлхи кунне паллӑ тӑвать.

Эпир ӑна чӑваш халӑхне ҫутта кӑларакан Иван Яковлевич Яковлевӑн ҫуралнӑ кунӗнче уявлатпӑр. Вӑл тӑрӑшнипе паян тӑван чӗлхепе калаҫма, ҫырма, вулама пултаратпӑр. Аслӑ вӗрентекенемӗр чӑваш халӑхне чӗлхене упрама пиллесе хӑварнӑ. Ҫак пиле манас марччӗ!

Куллен тӑван чӗлхепе пупленӗ чухне, вӑл чӗрӗ пулӗ! Чӑвашла калаҫасчӗ! Уяв ячӗпе!» — тесе ҫырнӑ министр.

новости.21.инфо.сайтри сӑн

ЧР Ял хуҫалӑх министерстви пӗлтернӗ тӑрӑх, республикӑри ял хуҫалӑх производителӗсем пулӑшнипе ача пахчисенче 100 ытла агролаборатори уҫӑлнӑ. Хальхи вӑхӑтра вӗсенче 4500 ытла ача ял хуҫалӑх вӑрттӑнлӑхӗсене вӗренет. Ку ача пахчине ҫӳрекен шӑпӑрлансен 55 проценчӗпе танлашать.

Агролабораторисенче ачасем аграри профессийӗсен вӑрттӑнлӑхӗсемпе паллашаҫҫӗ - вӑрӑсемпе сӑнавсем ирттереҫҫӗ, микроскоппа тата лупӑпа усӑ курса биологи процесӗсене тӗпчеҫҫӗ, фитолампа айӗнче ӳсекен ӳсен-тӑрана сӑнаҫҫӗ, учебникри сӑнӳкерчӗксене тишкереҫҫӗ.

"На связи" форумри сӑн. Халӗ ку ӳкерчӗк ҫук

Паян ЧР Элтеперӗ Олег Николаев ҫу уйӑхӗнчи уяв кунӗсенче массӑллӑ мероприятисем иртмессине пӗлтернӗ. Ҫакна хӑрушсӑрлӑх тӗллевӗпе тӑваҫҫӗ.

Ҫу уйӑхӗн 1-мӗшӗнчи демонстраци, «Вилӗмсӗр полк» акци (вӑл онлайн-мелпе иртӗ), парад тата салют пулмӗҫ.

«Ҫӗнтерӳ чӳречисем», «Ветеран патне - шӑнкӑрав» тата ытти акцисем иртӗҫ.

Сӑмах май, пуш уйӑхӗнче Элтепер Ҫӗнтерӳ кунне уявлвасси пирки хушу алӑ пуснӑччӗ.

Паян пирӗн республикӑра Пӗтӗм чӑваш диктантне ҫырнӑ.

Акцин тӗп тӗллевӗ — тӑван чӗлхене сыхласа упраса хӑварасси тата аталантарасси.

Кӑҫал Чӑваш Енре экологи ҫулталӑкӗ пулнӑ май диктант темине ҫутҫанталӑкпа ҫыхӑннине суйласа илнӗ. Диктанта Ҫемен Элкерӗн «Чӑваш вӑрманӗ» хайлавӗ тӑрӑх ҫырнӑ.

«Ҫыракансем палӑртнӑ тӑрӑх, текст йывӑр пулман. Ӑна кӗҫӗн ҫулхисем те пиллӗк паллӑ илме пултарнӑ.

«Пӗтӗм чӑваш диктантне» Чӑваш Енри тӗрлӗ учрежденире ҫырчӗҫ. Йӗркелӳҫӗсем Шупашкарта кӑна 4 вырӑн палӑртнӑ», – тесе хыпарланӑ Телеграмри «Чӑваш Ен калаҫать» каналта.