Ҫӗрпӳ район ертӳҫисем хӑйсем патӗнче туризма аталантарасшӑн, агропромышленность паркӗ йӗркелесшӗн тата тимӗр-бетон изделийӗсене ҫӗнӗлле меслетпе кӑларакан производство уҫасшӑн. Ҫакӑн пирки район администрацине нумаях пулмасть ертсе пыма тытӑннӑ Сергей Беккер ӗнер Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаевпа тӗл пулсан каланӑ. Асӑннӑ тӑрӑхра «Уй кунӗ» курав уҫӑлнӑ.

Района аталанма кансӗрлекен ыйтусен шутӗнче Сергей Беккер хальхи вӑхӑтри тасатмалли сооружени ҫуккине тата йӑлари хытӑ каяш вырӑнне рекультивацилессине палӑртнӑ.

Олег Николаев сооружени тӑвассипе муниципалитета хастар пулма чӗнсе каланӑ. Вырӑнтисем проект хатӗрлесен республика та пулӑшӗ.

Аҫтахар Плотников тунӑ сӑн

Ҫӗртме уйӑхӗн 18-мӗшӗнченпе Шупашкар хулин тӗп пульницине ҫӗлен сӑхнӑ 10 ҫын пулӑшу ыйтма пынӑ. Вӗсенчен 5-шӗ сывалнӑ, тепер 5-шӗ сипленеҫҫӗ.

Ҫапла, шӑрӑх ҫанталӑкра ҫӗленсем нумайланнӑ, хӗвел питтине тухма тытӑннӑ. Чӑваш Енре хурӑн пуҫлӑ ҫӗлене, медянкӑна тата хура ҫӗлене тӗл пулма пулать. Хура ҫӗлен – наркӑмӑшлӑ.

Специалистсем асӑрхаттараҫҫӗ: ҫӗленсем хӑйсем пӗрремӗш нихӑҫан та тапӑнмаҫҫӗ. Ӑна курсан майӗпен чакмалла, хӳтӗленсе алла малалла тӑсмалла мар. Ытларах чухне ҫӗленсем ҫынсене утӑ пуҫтарнӑ чухне, вӑрмана, улӑх-ҫарана ҫырлана кайсан сӑхаҫҫӗ.

«Про Город» сайтран илнӗ сӑн

Хальлӗхе кӑшӑлвирус сарӑлнине пула Чӑваш Енре массӑллӑ мероприятисем ирттерме юрамасть. Анчах шупашкарсем Атӑл леш енче ҫакна пӑхмасӑрах электронлӑ кӗвӗ фестивалӗсем, ташӑ каҫӗсем, вип-каҫссем ирттереҫҫӗ. Вӗсене 500 ҫын таранах пухӑнать-мӗн.

Сӗнтӗрвӑрри районӗнче те массӑллӑ мероприяти пулнӑ. Унта тӳлевсӗрех е ыркӑмӑллах валли укҫа парсан кӗртнӗ. Унта чӑваш ди-джейӗсем пулнӑ. Салют та янӑ. Ирхине унта канакансем ҫутҫанталӑкпа киленнӗ, апатланнӑ, кальян туртнӑ. Республикӑра вара пушар хӑрушсӑрлӑхӗн 4-мӗш класӗ пулнине йышӑннӑ.

Массӑллӑ мероприятисене ирттернине «Про Город» тишкернӗ.

Инстаграмри сӑн

Шупашкарти 19-мӗш шкулта вӗренекен Сергей Михайлов ашшӗпе пӗрле Етӗрне районӗнчи пӗвене шыва кӗме кайнӑ. Арҫын ача пӗве варрине ишсе ҫитсен пуҫӗпех шыва путнӑ хӗрачана курнӑ та ӑна пӗр тӑхтамасӑр пулӑшнӑ, ҫыран хӗррине илсе тухнӑ.

Унтан хӗрачана пӗрремӗш медпулӑшу панӑ. Ҫак хӗрача яла тӑванӗсем патне хӑнана килнӗ-мӗн, шӑрӑх ҫанталӑкра шыва кӗме шутланӑ. Юрать, вӑл путнине 8-мӗш класс пӗтернӗ Сергей курнӑ. Арҫын ача ҫӑмӑл атлетикӑпа тата йӗлтӗр спорчӗпе кӑсӑкланать. Вӑл программист пуласшӑн.

Хӗрачан тӑванӗсем Сергея тав тӑваҫҫӗ. Арҫын ачан шухӑшӗпе вара, вӑл паттӑрла ӗҫ туман, ҫынна йывӑрлӑхра пулӑшнӑ ҫеҫ.

7ya.ru сайтри сӑн

Утӑ уйӑхӗн 14-мӗшӗнче Вӑрнар районӗнчи Ҫӗпрел ялӗнче 12 ҫулти арҫын ача путнӑ. Вӑл пӗвере вӗрсе хӑпартнӑ матрас ҫинче ишнӗ. Унччен те пулман – вӑл ҫаврӑнса ӳкнӗ, шывран тухайман.

Ачана ҫыран хӗррине илсе тухнӑ, тухтӑрсем ҫитиччен медпулӑшу панӑ. Васкавлӑ медпулӑша фельдшерӗсем тата районти пульницӑн тухтӑрсем арҫын ачана леш тӗнчерен тавӑрнӑ. Кун хыҫҫӑн ӑна Шупашкара Республикӑри ача-пӑча клиникине санавиаципе ӑсатнӑ.

ШӖМ пӗлтернӗ тӑрӑх, ача амӑшӗнчен шыва кӗме ирӗк ыйтнӑ, анчах лешӗ хирӗҫленӗ. Вара вӑл ашшӗнчен ирӗк илсе пӗве хӗррине кайнӑ.

Инкеклӗ лару-тӑру министерстви тунӑ сӑн

Ӗнер Патӑрьел районӗнче ялти лавкка ҫуннӑ. Кун пирки Инкеклӗ лару-тӑру министерстви хыпарлать.

Утӑ уйӑхӗн 14-мӗшӗнче Кивӗ Ахпӳрт ялӗнче ирхине ҫӑра тӗтӗм палкаса тухнӑ. Лавкка ҫунать иккен! Пушарнӑйсем патне хыпар 7 сехет те 13 минутра ҫитнӗ. Кун пирки лавккапа ҫумӑн пурӑнакан хӗрарӑм шӑнкӑравласа пӗлтернӗ.

Пушарнӑйсем ҫулӑма хӑвӑртах сӳнтернӗ. Лавккари холодильник, апат-ҫимӗҫ сиенленнӗ.

Penzavzglyad.ru сайтри сӑн

Утӑ уйӑхӗн 14-мӗшӗнче Чӑваш Енре пурӑнакансем халӑх тетелӗсенче 7 ҫулти арҫын ача ҫухални пирки хыпар сарнӑ. Ача – Ҫӗнӗ Шупашкартан.

Арҫын ача 17 сехетре ҫухалнӑ, амӑшӗ кун пирки тӳрех полицие пӗлтернӗ. Пӗчӗкскере Самарти патрульпе пост служби ӗҫченӗсем вокзалта асӑрханӑ. Мӗнле ҫитнӗ-ха вӑл унта? Ачан автобуспа ярӑнас килнӗ-мӗн. Вӑл транспорта ларса урӑх хулана кайнӑ.

Пӗчӗкскере киле тӗрӗс-тӗкелех илсе ҫитернӗ. Палӑртмалла: ача унччен те килтен тухса кайнӑ.

Чӑвашсен паллӑ композиторне Геннадий Воробьева хӑй пурӑннӑ чухнех «хӗвеллӗ гени» тесе хисеплени пулнӑ. Шӳтлесе каламан ҫав сӑмахсене. Геннадий музыкӑна аван чухлакан специалистсене сасӑсемпе кӗвӗсене тӗлӗнмелле ҫивӗччӗн илтме пултарнипе тӗлӗнтернӗ. Вӑл кӗвӗленӗ юрӑ-кӗвве халӑх хапӑлласа итленӗ. Питӗ сахал пурӑннӑ пулин те (1939 ҫулта вилнӗ) пултарулӑх еткерлӗхӗ ун ашшӗнни чухлех. Унпа пӗр вӑхӑтра Мускав консерваторинче камсем вӗреннӗ-ха? Серафим Туликов, Арам Хачатурян, Назиб Жаганов тата ыттисем. Вӗсем каярахпа Социализмлӑ Ӗҫ Геройӗсем, СССР халӑх артисчӗсемпе Патшалӑх премийӗн лауреачӗсем пулса тӑнӑ. Пирӗн Геннадий вӗреннӗ чухне вӗсенчен чылай малта пынӑ. Вӗренме кӗнӗ чухнех вӑл паллӑ педагогсене тӗлӗнтернӗ. Композици кафедрин ертӳҫи Григорий Литинский профессор, сӑмахран, ТАСС корреспондентне 1935 ҫулта панӑ интервьюра ҫакна палӑртнӑ: «Товарищ Воробьев произвел сильное впечатление на членов испытательной комиссии. Какой-то особой свежестью, непосредственностью веет от его первых произведений. Кафедра убеждена в том, что Чувашия приобретет в лице товарища Воробьева весьма ценную музыкальную силу».

Малалла...

Раҫҫей тата Турци президенчӗсем Владимир Путин тата Реджеп Тайип Эрдоган икӗ ҫӗршыв хушшинче самолетсем ҫӳретме тытӑнас ыйтӑва телефонпа сӳтсе явнӑ. Ҫак ыйтӑва тишкерме яваплӑ ведомствӑсене хушнӑ. Кун пирки РФ ертӳҫин пресс-секретарӗ Дмитрий Песков «Новости» информаци агентствине пӗлтернӗ.

Маларах «Андолу» агентство Турцин Транспорт министерстви самолетсене утӑ уйӑхӗн 15-мӗшӗ хыҫҫӑн вӗҫтерме пуҫласси ҫинчен Раҫҫейпе калаҫса татӑлни пирки хыпарланӑ. Ҫапах та самолетсем хальлӗхе вӗҫмеҫҫӗ-ха.

Путинпа Эрдоган телефонпа утӑ уйӑхӗн 13-мӗшӗнче калаҫни пирки «Парламентская газета» хаҫат паян пӗлтернӗ.

Сӑмах май, иртнӗ эрнере Татьяна Голикова вице-премьер ҫӗршывсем хушшинче самолетсене утӑ уйӑхӗн 15-мӗшӗнчен ҫӳретме пуҫлама май пуррине пӗлтернӗ.

«На.связи» порталти сӑнӳкерчӗкрен тата «ZaRulem.ws» ушкӑнри комментарисенчен хатӗрленӗ коллаж

Балтийскри хурал карапне Шупашкара илсе килессине Чӑваш халӑх сайчӗ унччен пӗлтернӗччӗ. Паян ӑна оркестрпа, МИХсенче ӗҫлекенсене пухса тата тӳре-шара сӑмах каласа кӗтсе илнӗ.

Аса илтерер: карап 26 ҫул ӗҫленӗ. Ҫак вӑхӑтра тӑван ҫӗршывӑмӑрӑн чиккипе 65 пин миль тӑршшӗ хутланӑ. Экипаж 1,5 пин ытла Раҫҫей тата ют ҫӗршыв карапӗсене тӗрӗсленӗ, патшалӑх чиккин режимне пӑсма хӑтланнӑ 150 ытла тӗслӗхе сирнӗ. Ун ҫинче Чӑваш Енри 100-е яхӑн пограничник службӑра тӑнӑ.

Карапа 1988 ҫулта Ярославль хулинче туса кӑларнӑ. 1997 ҫулччен вӑл «Соболь» ятпа ҫӳренӗ, кайран ӑна «Чебоксары» (чӑв. Шупашкар) тесе ылмаштарнӑ.

Шупашкарта карапран музей тӑвӗҫ.

Карапа илсе килнине хурлакансем те пур.