Юрӑпа ташӑ ансамблӗ. kulturarb.ru сӑнӳкерчӗкӗ

Чӑваш Енӗн патшалӑх академи юрӑпа ташӑ ансамблӗн директорӗн тивӗҫӗсене пурнӑҫланӑ ҫынна укҫа ытлашши тӑкакланӑ тесе явап тыттарасшӑн. Ун тӗлӗшпе пуҫиле ӗҫ пуҫарнӑ та ӗнтӗ.

Учреждение ертсе пынӑ вӑхӑтра ҫав ҫын хӑй пӗлекен уйрӑм усламҫӑпа тухья ҫӗлеттерме килӗшӳ тунӑ. Документа вӑл учреждени ячӗпе алӑ пусса ҫирӗплетнӗ.

Сцена ҫине тухнӑ чухне тӑхӑнмалли хатӗре хатӗрлесе ҫитерейменнине пӗлсе тӑрсах учреждени укҫине куҫарса панӑ. Сахал та мар, нумай та мар. Пурӗ пурӗ 149,5 пин тенкӗ.

Пӑтӑрмах ҫиеле тухсан пуҫиле ӗҫ пуҫарнӑ.

Челябинскран Минска ҫуран кайма тухнӑ ҫамрӑксем Чӑваш Ене утса ҫитнӗ. Вӗсемпе ӑнсӑртран тӗл пулни ҫинчен Елен Нарпи чӑваш ҫыравҫи тата чӗлхеҫи Фейсбукра пӗлтернӗ.

«Паян, утӑн 7-мӗшӗ, ҫав тери тулли те тӗлӗнмелле кун пулчӗ. Каламалла, кунта куллен темле япала та пулса иртет, анчах паян Сӑрта шыва кӗрсе хӗвелпе хӗртӗннӗ, Виктор Чугаровпа, Владислав Московцевпа, Элтияр Сантӑрпа тӗл пулнӑ хыҫҫӑн тата Челябинскран Минска кайма тухнӑ ҫамрӑксемпе — Сашӑпа тата Никитӑпа тӗл пултӑмӑр. Тӗлпулӑвӗ ӑнсӑртран темелле. Вӗсем 47 кун каялла Челябинскран тухнӑ-мӗн те, шӑпах паян «Сурские зори» таран утса ҫитнӗ, апатланма кунти кафене кӗнӗ. Пач шутламан ҫӗртен прӗннисемпе тӗл пулнӑ. Маттур вырӑс каччисем пӗри 18, тепри 17 ҫулта иккен», — тесе пӗлтернӗ вӑл Фейсбукра.

starsity.ru сайтри сӑн

Шупашкарта общежити чӳречи айӗнче хӗрарӑм виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.

Ку пӑтӑрмах Октябрт: 50 ҫул урамӗнче пулнӑ. 22-мӗш ҫуртӑн чӳречи айӗнче хӗрарӑм вилли выртнӑ. 1974 ҫулта ҫуралнӑскер 5-мӗш хутран ӳкнӗ. Халӗ следовательсем ӗҫ-пуҫа тӗпчеҫҫӗ.

Шупашкарта Калинин кӗперӗ айӗнче 60 ҫулти хӗрарӑм виллине тупнӑ. Вӑл унтан ӳкме пултарнӑ. Кун тӗлӗшпе тӗрӗслев пырать.

chuvashia.sledcom.ru сӑнӳкерчӗкӗ

Ку инкек Шупашкар районӗнчи «Прогресс» хуҫалӑхра кӑҫалхи ака уйӑхӗн 22-мӗшӗнче 10 сехет те 50 минутра пулса иртнӗ. Мӑн Мамӑш ялӗнчи тырӑ складӗнче ӗҫленӗ вӑхӑтра 54 ҫулти хӗрарӑм ҫине погрузчик пырса кӗнӗ.

Тӗпчевҫӗсем палӑртнӑ тӑрӑх, 57 ҫулти тракторист-машинист погрузчикпа каялла чакнӑ. Ҫавӑн чухне вӑл хӗрарӑм ҫине пырса кӗрсе унӑн сывлӑхне самай сиенленӗ. Эпир пӗлнӗ тӑрӑх, хӗрарӑм пульницӑра чылай вӑхӑт сипленнӗ, вӑл халӗ те ура ҫине тӑрса пӗтеймен-ха.

Ӗҫри пӑтӑрмах хыҫҫӑн РФ Следстви комитечӗн Чӑваш Енри управленийӗн тӗпчевҫисем пуҫиле ӗҫ пуҫарнӑ. Вӗсем палӑртнӑ тӑрӑх, инкек ӗҫ хӑрушсӑрлӑхӗн правилисене пӑхӑнманран пулса иртнӗ.

Халӗ тӗпчев малалла пырать. Ҫывӑх вӑхӑтра медицинӑпа суд экспертизи ирттерӗҫ, ӗҫ сыхлавӗпе ҫыхӑннӑ документсене тишкерӗҫ, инкек пулса иртнине курнисенчен ыйтса пӗлӗҫ.

"Сувар" хаҫат тунӑ сӑн

Ӗнер, утӑ уйӑхӗн 8-мӗшӗнче, Николай Сорокин 80 ҫул тултармаллаччӗ. Анчах, шел те, унӑн пурнӑҫӗ татӑлнӑ.

Николай Сорокин Тутарстанри Теччӗ районӗнчи Аслӑ Ӑнӑ ялӗнче 1941 ҫулхи утӑ уйӑхӗн 8-мӗшӗнче ҫуралнӑ. Хусан университетне пӗтерсен «Советская Татария» хаҫатра ӗҫленӗ, ТАСС информаци агентствин Тутарстанри пайӗнче корреспондентра 36 ҫул тӑрӑшнӑ.

1992 ҫулта вӑл Хусанта чӑвашла радиокӑларӑмсем, чӑвашсен «Сувар» хаҫатне, «Шурӑмпуҫ» литература журналне йӗркелесе янӑ. Вӑл – «Вера древнего народа» документлӑ фильм, «Вечная Волга» роман-трилоги авторӗ, Тутар АССРӗн тата РФ тава тивӗҫлӗ культура ӗҫченӗ.

Чӑваш Енри тӗпчевҫӗсем республикӑн Сывлӑх сыхлав министерствине пӑхӑнакан учрежденин ӗҫченӗ тата пӗр врач тӗлӗшӗпе пуҫарнӑ пуҫиле ӗҫӗ тӗпчесе пӗтернӗ. Ҫавсем хӑш-пӗр яша хӗсметрен хӑтарма пулӑшнӑ. Ахаль мар. Укҫалла.

Кунта сӑмах министерствӑн «Сывлӑх сыхлавӗн патшалӑх учрежденийӗсене пулӑшас енӗпе ӗҫлекен центрӗ» хысна учрежденийӗн тӗрӗслевпе ревизи пайӗн пуҫлӑхӗн ҫумӗ тата Шупашкарти пульницӑсенчен пӗринче эндоскопистра ӗҫлекен, Ҫӗрпӳ районӗнчи Депутатсен пухӑвӗн депутачӗ пулнӑ ҫын пирки пырать.

Эндоскопист тухтӑр хырӑмра ятарласа суран кӳнӗ, ҫавӑ юхан-суран пек кӑтартма пулӑшнӑ.

Пулӑшупа усӑ куракансем 100 пинрен пуҫласа 200 пин тенкӗ таран сӗтев панӑ. Укҫана 11 ҫынтан илнӗ. Сӗтевӗн пӗтӗмӗшле виҫи 1,5 миллион тенкӗрен иртнӗ.

Ҫав вӑхӑтрах ҫартан пӑрӑнма тӑрӑшнӑ тата сӗтев панӑ каччӑсем тӗлӗшпе те (10 яш пирки) тӗпчевҫӗсем пуҫиле ӗҫсем пуҫарнӑ.

pg21.ru сайтри сӑнӳкерчӗк

Паян ирпе Шупашкарта арҫын виллине тупнӑ. Кун пирки «Про город» кӑларӑм халӑх корреспонденчӗ хыпарлани тӑрӑх пӗлтернӗ. Малтанласа шухӑшланӑ тӑрӑх, арҫын путса вилнӗ.

Вилнӗ арҫын ӳтне паян ирхи 7 сехетре хулари Ҫӗнӗ сала ҫывӑхӗнчи пляжра асӑрханӑ. Вӑл хӑҫан путнине хальлӗхе татса каламан. Сӑнпа пӑхсан, арҫын 40 ҫулсенче.

Арҫын виллине тупнӑ вырӑна следствипе оперативлӑ ушкӑн пырса ҫитнӗ. Вӗсем инкек сӑлтавне ҫеҫ мар, ҫамрӑкла сарӑмсӑр вилнӗ ҫын кам иккенне те палӑртӗҫ.

чувашинформ.ру сӑнӳкерчӗкӗ

Чӑваш Енӗн Правительствинче ертӳҫӗ-кадрсенчен пӗринпе, министр ҫумӗпе, ҫыхӑннӑ черетлӗ йышӑну тунӑ. Хальхинче Промышленноҫпа энергетика министрӗн ҫумӗсенчен пӗрне ӗҫрен хӑтарнӑ. Ведомствӑри сумлӑ вырӑнсӑр Сергей Лекарева хӑварнӑ.

Йышӑнӑва ӗнер, утӑ уйӑхӗн 8-мӗшӗнче, алӑ пусса ҫирӗплетнӗ.

Ҫапла вара Евгений Герасимов министр паянхи куна пӗр ҫумпа, Александр Кондратьевпа, тӑрса юлнӑ. Унсӑр пуҫне министрӑн пулӑшуҫи пур. Вӑл — Светлана Кузьмина.

Сергей Лекарев 2002-2004 ҫулсенче республикӑн энергетика тата ҫурт-йӗрпе коммуналлӑ хуҫалӑх министрӗн ҫумӗнче тӑрӑшнӑ. «Чӑвашавтодор» предприятие панкрута кӑлариччен гендиректорӑн пӗтӗмӗшле ыйтӑвӗсемпе ӗҫлекен ҫумӗ пулса та тимленӗ.

Кадр улшӑнӑвӗ пирки каласан, аса илтерер: утӑ уйӑхӗн 6-мӗшӗнче Чӑваш Енӗн Ҫутҫанталӑк ресурсӗсен тата экологи министрӗн ҫумӗ пулса ӗҫленӗ Марина Трофимовӑна ӗҫрен хӑтарнӑччӗ.

culture.cap.ru сӑнӳкерчӗкӗ

Раҫҫейри паллӑ композитор чӑваш театрӗ валли кӗвӗ ҫырӗ. Республикӑн Культура, национальноҫсен ӗҫӗсен тата архив ӗҫӗн министерствинче пӗлтернӗ тӑрӑх, утӑ уйӑхӗн 7-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче Григорий Гладков композиторпа (сӑнӳкерчӗкре — сылтӑмран иккӗмӗшӗ) тӗл пулнӑ.

Раҫҫей Федерацийӗн искусствӑсен тава тивӗҫлӗ ӗҫченӗ театрта лартакан «Золушка» спектакль валли кӗвӗ ҫырӗ. Спектакле Мари Элӑн искусствӑсен тава тивӗҫлӗ ӗҫченӗ Василий Пектеев режиссёр лартӗ.

Григорий Гладков Хабаровскра 1953 ҫулта ҫуралнӑ, Брянскра пурӑннӑ тата вӗреннӗ. Инженер-электромеханика вӗренсе тухнӑскер юрӑ-кӗвӗ ҫырма тытӑннӑ. Мультфильмсем валли те нумай кӗвӗленӗ. Вӑл, сӑмах май, «Спокойной ночи, малыши» кӑларӑма 5 ҫул ертсе пынӑ.

minec.cap.ru сӑнӳкерчӗкӗ

Чӑваш Ен юлашки ҫулсенче хӑйӗн продукцине чикӗ леш енне ӑсатассине самай анлӑлатнӑ. Ҫак енӗпе патшалӑх пулӑшнине те палӑртмалла.

Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, пирӗн тӑрӑхран ытти регионтан ӑсанман тавар та чикӗ леш енне каять. Сӑмахран, Ҫӗнӗ Шупашкарти «Хӗвел» предприятин гетероструктурӑллӑ хӗвел модулӗсем (сӑнӳкерчӗкре). «ЧЕТРА» предприятин промышленность тракторӗсене, чӑваш хӑмлине, Чапаев ячӗллӗ производство пӗрлешӗвӗнче туса кӑларакан пӑра хирӗҫле ракетӑсене те асӑнса хӑварнӑ. Пластик турбодефлекторсене те Чӑваш Енре кӑна кӑлараҫҫӗ.