«Максим Михайлов: «Настоящий русский бас» кӗнеке «Александр Невский» Пӗтӗм Раҫҫейри историпе литература премийӗн конкурсӗнче диплома тивӗҫнӗ. Вӑл кӑларӑма «Чӑвашсен чаплӑ ҫыннисем» ярӑмпа 2019 ҫулта пичетленнӗ. Кӗнеке авторӗсем – Михаил Кондратьев тата Евгения Андрейко.

Кӑларӑм икӗ пайран тӑрать. Пӗрремӗш пайӗнче вулакана юрӑҫӑн пурнӑҫӗпе паллаштарнӑ, иккӗмӗшӗнче — Максим Дормидонтовичӑн пултарулӑхӗпе. Кӗнекене фотодокументсемпе тата кинофильмсенчи кадрсемпе пуянлатнӑ.

Ҫӗршыври премие илес тесе конкурса 202 кӗнеке тата 57 музей проекчӗ хутшӑннӑ.

bryansk.smolmotor.ru сӑн ӳкерчӗкӗ

Вӑрмар районӗнчи прокуратура вырӑнти ҫынсем ыйтнипе тротуар пуррипе ҫуккине тӗрӗсленӗ.

Вӑрмарсем надзор органне пӗлтернӗ тӑрӑх, «Вӑрмар-Кавал-Нурлат» ҫул хӗррипе тротуар сарман. Ҫавна май ача-пӑчана ҫӳреме хӑрушӑ, вӗсем машина айне ним мар лекме пултараҫҫӗ. Асӑннӑ ҫул хӗррипе ачасене ашшӗ-амӑшӗ ача пахчине илсе каять, ватӑ ҫынсем чиркӗве кайса килеҫҫӗ, район ҫыннисем те унтан иртсе ҫӳреҫҫӗ.

Кӑлтӑка тупса палӑртнӑ хыҫҫӑн прокуратура «Чӑвашупрдор» хысна учрежденийӗн директорӗн тивӗҫне пурнӑҫлакан ячӗпе хут ҫырса панӑ, унта кӑлтӑка пӗтерме хистенӗ. Анчах предприяти ӗҫе тытӑнман. Ҫавна май прокуратура суда тавӑҫпа тухнӑ. Суд тавӑҫпа килӗшнӗ, предприятие ҫулталӑкра тротуар сарма хистекен хушу кӑларнӑ.

Ҫак кунсенче Пушкӑрт Республикинчи Ҫтерлӗ хулинче пурӑнакан хастар чӑвашсем — филологи ӑслӑлӑхӗн кандидачӗсем Л.А.Афанасьева тата Л.В.Коротаева — умлӑ-хыҫлӑ виҫӗ кӗнеке кун ҫути кӑтартнӑ. Виҫҫӗшӗ те асӑннӑ тӑрӑхри чӑвашсен сӑмахлӑхӗпе, йӑли-мешехипе ҫыхӑннӑ тесе пӗлтереҫҫӗ Чӑваш патшалӑх гуманитари ӑслӑлӑхӗсен институтӗнче.

Л.А. Афанасьеван «Этнолингвистический словарь лексики свадебной обрядности чувашей Республики Башкортостан» ятпа кӗнеке кун ҫути курнӑ. Л.А. Афанасьева, Л.В. Коротаева хатӗрленипе «Пушкӑртстан чӑвашӗсен туй мешехин поэзийӗ» икӗ пайпа пичетленнӗ.

Ҫав кӗнекесене калӑплакансем Чӑваш патшалӑх гуманитари ӑслӑлӑхӗсен институчӗн ӑслӑлӑх архивӗнче упранакан пуян материалпа усӑ курнӑ, яваплӑ редактор тата ӑслӑлӑх редакторӗ пулма институт ӗҫченне А.В. Кузнецова шаннӑ.

rg.ru сӑнӳкерчӗкӗ

Ултавҫӑсем темле май тупса та улталаҫҫӗ. Банкра сирӗн ятпа такамсем кредит илесшӗн, эпир ҫавӑнтан сире сыхлӑпӑр тесе калаҫҫӗ, тавар сутакансемпе туянакансене те шӑнман пӑр ҫине лартса яраҫҫӗ. Халӗ тата ҫула тухас тесе улталаннӑ тӗслӗхсем те пур.

Шупашкар хулинче 20 ҫулти хӗр Хусана кайма ҫула май машина тупас тенӗ. Кӑштахран пикепе палламан арҫын ҫыхӑннӑ, вӑл хӑйӗнпе машина водителӗ тесе палаштарнӑ. Хӗрӗ ҫул укҫине куҫарса памалла каҫӑ ярса панӑ. Унта банк карттин номерне те, ыттине те кӑтартма тивнӗ. Хӗр банк картти ҫинчи 17 пин ытла тенкӗсӗр тӑрса юлнӑ.

Ҫавӑн пек меслетпе Шупашкарти 22 тата 43 ҫулсенчи хӗрарӑмсем улталаннӑ. Ултавҫӑсене пӗри 3 пин тенкӗ куҫарса панӑ, тепри — 7 200 тенкӗ.

www.trend.az сайтри сӑн

11 ҫын вилнӗ, 123 ҫын инфекциленнӗ, 124 ҫын сывалнӑ. Ку – паянхи статистика.

Кӑшӑлвирусран кашни кунах ҫынсем вилеҫҫӗ. Паянхи кун тӗлне республикӑра ку хисеп 463-пе танлашнӑ. Ку таранччен 15697 ҫын инфекциленнӗ, вӗсенчен 14038-шӗ сывалнӑ. Хальхи вӑхӑтра республикӑра кӑшӑлвирус диагнозӗ ҫирӗпленнӗ 1196 ҫынна тухтӑрсем сӑнаса тӑраҫҫӗ. Пациентсем килте амбулатори мелӗпе е стационарта сипленеҫҫӗ. Паянхи куна 642 пациент – йывӑр, 68-шӗ – питӗ йывӑр. Ӳпкене искуственнӑй майпа сывлаттармалли аппарат айӗнче 57 ҫын выртать.

Чӑваш Енри йӗрке хуралҫисем кӗрӗк вӑрланӑ хӗрсене шыраҫҫӗ.

Пӑтӑрмах раштав уйӑхн 21-мӗшӗнче пулса иртнӗ. Пикесен куҫӗ тӗлне лекнӗ, вӗсене килӗшнӗ тумтир искусствӑлла материалтан ҫӗленӗскер пулнӑ. Вӑл Ленинград урамӗнчи лавккасенчен пӗринче манекен ҫинче ҫакӑнса тӑнӑ.

Чӑваш Енри йӗрке хуралҫисем шухӑшланӑ тӑрӑх, кӗрӗке фидеокамерӑна лекнӗ икӗ хӗр вӑрлама пултарнӑ. Вӗсене пӗлекен-паллакансене 8-953-010-92-70 е 102 телефон номерӗсемпе шӑнкӑравлама ыйтаҫҫӗ.

Паян Чӑваш Республикин культурӑн тава тивӗҫлӗ ӗҫченӗпе Зиновий Сергеевпа сывпуллашнӑ. Вӑл 85 ҫула кайнӑ.

Зиновий Михайлович 1935 ҫулхи кӑрлачӑн 25-мӗшӗнче Йӗпреҫ районӗнчи Кӗлӗмкассинче ҫуралнӑ. Чӑваш патшалӑх педагогика институтӗнче, кайран Ленинградри партин аслӑ шкулӗнче вӗреннӗ.

Йӗпреҫ районӗнчи ентешлӗх ертӳҫи Антонина Краснова пӗлтернӗ тӑрӑх, Зиновий Сергеев тӗрлӗ ҫулсенче ВЛКСМ райкомӗн пӗрремӗш секретарӗ, Йӗпреҫ ӗҫтӑвкомӗн секретарӗ, КПСС райкомӗн аппаратӗнче, Ҫӗнӗ Шупашкарти культура, вӗренӳ, физкультурӑпа спортшӑн яваплӑ вырӑнта, Шупашкарти хула комитетӗнче ӗҫленӗ.

"Про Город" сайтран илнӗ сӑн

Паян 17 сехет те 15 минутра Шупашкарта Трактор тӑвакансен проспектӗнче, Пульница комплексӗнчен инҫех мар, васкавлӑ медпулӑшу машинипе автобус ҫапӑннӑ.

33 маршрутпа ҫӳрекен автобус мигалкӑпа пыракан васкавлӑ медпулӑшу машинине ирттерсе яман, ун ҫине пырса кӗнӗ.

Ҫав вӑхӑтра васкавлӑ медпулӑшу машини шӑпӑрлана Ача-пӑча медицина центрне илсе кайма тухнӑ. Юрать-ха, салонри ача суранланман. Фельдшера вара тухтӑрсен пулӑшӑвӗ кирлӗ пулнӑ, ӑна пульницӑна илсе кайнӑ.

Ачана вара урӑх васкавлӑ медицина машинипе илсе ҫитернӗ.

samara.doctorbormental.ru сайтри сӑн

Раштав уйӑхӗн 22-мӗшӗнче Шупашкарта пурӑнакан 29 ҫулти арҫын полицие пынӑ. Вӑл ултавҫӑсен аллине лекнӗ.

Арҫын каласа кӑтартнӑ тӑрӑх, ун патне палламан ҫын шӑнкӑравланӑ. Хайхискер банк ӗҫченӗ имӗш. Палламан ҫын юптарма тытӑннӑ: такам ун ячӗпе кредит илесшӗн-мӗн, счета упраса хӑварма сӗннӗ. Шупашкар арҫынни вӑл мӗн каланине пурнӑҫласа пынӑ. Вӑл счечӗ ҫинчи 400 пин тенкине илнӗ те 24 номерпе куҫарса панӑ.

Канашра пурӑнакан 71 ҫулти кинемей те ултавҫӑсен аллине ҫакланнӑ. Вӑл 135 пин тенкӗ куҫарса панӑ.

Халь ултавҫӑсем кам пулнине тупса палӑртас тӗллевпе ӗҫлеҫҫӗ.

olegmakarenko.ru сайтри сӑн

Ҫитес ҫултан Раҫҫейре амӑшӗн капиталӗ ӳсӗ. Кун пирки ӗнер РФ премьер-министрӗ Татьяна Голикова пӗлтернӗ. Вӑл каланӑ тӑрӑх, 2021 ҫулта капитала 1 миллион ытла ҫемье илӗ.

Кӑҫалхи кӑрлач уйӑхӗн 1-мӗшӗ хыҫҫӑн ҫуралнӑ пӗрремӗш ачашӑн 466 пин тенкӗ параҫҫӗ. Иккӗмӗш ача ҫуралсан ун ҫумне 150 пин тенкӗ хушӑнать.

Ҫитес ҫултан пӗрремӗш ачашӑн паракан амӑшӗн капиталӗ 483 пин тенкӗ пулӗ, иккӗмӗш ача ҫуралсан 639 пин тенкӗ парӗҫ.