Паян Росгвардин Чӑваш Енри управленийӗн ҫӗнӗ пуҫлӑхӗпе республика Элтеперне Олег Николаева паллаштарнӑ. Чӑваш Ен Правительство ҫуртӗнчи тӗлпулӑва Раҫей Федерацийӗн наци гвардийӗн пуҫлӑхӗн Атӑлҫи тӑрӑхнчи ҫарӗсен ведомствӑлла мар хурала тата лицензипе ирӗк паракан ӗҫе йӗркелесе пыракан пуҫлӑхӗн ҫумӗ Павел Дегтярёв хутшӑннӑ.

Росгвардин Чӑваш Енре управленине Дмитрий Расчетов ертсе пырӗ. Ӑна ҫак должноҫе Раҫҫей Федерацийӗн Президенчӗн ака уйӑхӗн 12-мӗшӗнчи Хушӑвӗпе ҫирӗплетнӗ.

Дмитрий Расчетов РФ Шалти ӗҫсен министерствин Барнаулти юридици институтӗнчен вӗренсе тухнӑ. Шалти ӗҫсен органӗсенче 2000 ҫулсенче ӗҫлеме тытӑннӑ. 2014 ҫулта Алтай Республикинчи ведомствӑлла мар хурал пайне ертсе пыма тытӑннӑ. 2016 ҫулхи юпа уйӑхӗнченпе Росгвардин Алтай Республикинчи упралвенине ертсе пынӑ.

Ҫу, 19: Н.В. Никольский профессор ҫуралнӑранпа 143 ҫул

1917 ҫулхи ҫӗртме уйӑхӗнче Никольские Хусан кӗпӗрне земство управин председательне суйлаҫҫӗ. «Тап-таса» ученӑй, «тап-таса» педагог, тин кӑна общество ӗҫне лекнӗскер (паллах, хӑйӗн яри кӑмӑлӗпе), нарӑсри демократиллӗ революци идейисемпе хавхаланса кайнӑскер, чи нумай нациллӗ, тӗнчери тӗп тӗнсенчен (конфессисенчен) иккӗшӗ – христианлӑх тата ислам сарӑлнӑ, ҫут ҫанталӑк (язычество) тӗнне сыхласа хӑварнӑ, тахҫан хӑйсен патшалӑхлӑхӗ (тӗнче цивилизацийӗнче хӑй вӑхӑтӗнче паллӑран та паллӑ вырӑн йышӑннӑ Атӑлҫи-Кама Пӑлхар, Хусан ханлӑхӗ) пулнӑ халӑхсемлӗ, пуян традициллӗ, университетлӑ Хусан кӗпӗрне земство управин председателӗ пулса тӑрать.

Пурнӑҫӑн хӑнӑхнӑ йӗркипе утти-чуппипе тӗпрен улӑштарма 39-ти Никольские йывӑр пулнӑ-ши, ҫӑмӑл-ши – пӗлместӗп; чухлама ҫеҫ пулать: паллах, ансат лекмен. Кӗпӗрне земство управин председательне революциччен шалти ӗҫсен министрӗ хӑйӗн хушӑвӗпе ҫирӗплетни те ҫак фигура пӗлтерӗшне аван уҫса парать. Революциччен земствӑсем, аслӑ вӗрентӳсӗр пуҫне, вӗрентӗвӗн пӗтӗм ыйтӑвӗпе, сывлӑх сыхлавӗн (больницӑсем, аптекӑсем, фельдшер-акушер пункчӗсем), ветеринари, ялти страховани, ялти статистика ыйтӑвӗсемпе ӗҫленине, ял тытӑмне кӗрекен ытти вун-вун сферӑна тытса-йӗркелесе пынине шута илсен – Н.

Малалла...

71 ҫулти Алексей Судленков Регионсем хушшинчи компетенци центрне — Шупашкарти электромеханика колледжне ертсе пыма пӑрахӗ. Ку должноҫре вӑл 13 ҫула яхӑн ӗҫленӗ. Кунсӑр пуҫне Чӑваш Республикин виҫҫӗмӗш тата тӑваттӑмӗш созывӗсенчи Общество палатисене ертсе пынӑ.

Алексей Алексеевич 1949 ҫулхи ҫӗртме уйӑхӗн 5-мӗшӗнче Шупашкарта ҫуралнӑ. 1984 ҫулта Пӗтӗм союзри политехника институтне куҫӑнсӑр майпа вӗренсе пӗтернӗ, 1993 ҫулта – Хусанти патшалӑх технологи университетне.

Алексей Судленков 1973 ҫултанпа вӗренӳ сферинче тӑрӑшнӑ. Производство вӗрентӗвӗн мастерӗ те пулнӑ, Шупашкарти 1-мӗш професси училищинче директорӑн ҫумӗ, 1978-2002 ҫулсенче асӑннӑ училищӗн директорӗнче ӗҫленӗ.

Алексей Судленкова «Чӑваш Республики умӗнчи тава тивӗҫлӗ ӗсемшӗн» орден медалӗпе, «Тӑван ҫершыв умӗнчи тава тивӗҫлӗ ӗҫсемшӗн» II степеньлӗ орден медалӗпе тата ыттипе чысланӑ.

Шупашкар хулинче электромобильсем туянма йышӑннӑ. Асӑннӑ транспортпа парксем тата Атӑл хӗрри тӑрӑх патруле тухӗҫ.

Шупашкар хулин администрацийӗ «Voltus LP41B» икӗ гольфкар туянма аукцион ирттерессине патшалӑх закупкисен сайтӗнче пӗлтернӗ. Ют ҫершывра кӑларнӑ техникӑна туянма хула администрацине Раҫҫейӗн Промышленность министерстви ирӗк панӑ.

Пӗр электромобиль 1,9 млн тенкӗ тӑрать. Ҫапла вара контрактӑн пуҫламӑш хакӗ 3,8 млн тенкӗпе танлашӗ. Тӑкака хула бюджетӗнчен саплаштарӗҫ. Аукцион ҫу уйӑхӗн 26-ӗшнче иртӗ. Подрядчикӑн машинӑпа 2,5 уйӑхра тивӗҫтермелле.

Туянма палӑртнӑ машина халӑх йышлӑ вырӑнсене: хулари парксене, Атӑл хӗррине тата ытти ҫавӑн пек ҫӗре — патруле тухӗ.

my-kanash.ru сӑнӳкерчӗкӗ

Федерацин налук службин республикӑри управленийӗ ҫитес вӑхӑтра районсенчи штата чакарассине пӗлтернӗ.

Шӑмӑршӑра, Елчӗкре, Элӗкре, Тӑвайра, Сӗнтӗрвӑрринче, Вӑрмарта, Красноармейскинче, Хӗрлӗ Чутайра, Пӑрачкавра, Етӗрнере тата ытти хӑш-пӗр ҫӗрте территорири ӗҫ вырӑнӗсене пӗтерӗҫ. Ҫапла вара пулӑшу илме малашне Шупашкарти, Ҫӗнӗ Шупашкарти, Ҫӗмӗрлери, Улатӑрти, Канашри, Патӑрьелти, Муркашри тата ытти ҫӗрти районсем хушшинчи инспекцисене кайма тивӗ.

Налукҫӑсем ӑнлантарнӑ тӑрӑх, штата чакарас юхӑм Мускавранах килет. Прогреса чараймӑн, компьютерсем ҫынсене хӗссе кӑлараҫҫӗ. Налук тӳлекенсем чылай ыйтӑва хӑйсен уйрӑм пӳлӗмӗсем урлӑ татса параяҫҫӗ.

ntv.ru сайтри сӑн

Элӗк районӗнчи Мартынкассинчи реабилитаци центрне вӑхӑтлӑха хупса хунӑ. Вӑл – «Ирӗклӗх» реабилитаци центрӗн филиалӗ.

Прокуратура тӗрӗслеме пынӑ чухне унта эрехпе, наркотикпе туслӑ 14 ҫын сипленнӗ. Ведомство палӑртнӑ тӑрӑх, филиала уҫнӑ чухне пурӑнмалли ҫурта пурӑнмалли мар категорие куҫарман. Кунсӑр пуҫне пӗрремӗш хутри коридорта тата унти ӗҫченсен пӳлӗмӗнче электропралуксене изоляци туман. Эвакуаци ҫулӗ ҫинче сӗтел-пукан ларнӑ, картлашка айӗнче ҫунакан метариалсем тата япаласем упраннӑ.

Тепӗр хутчен тӗрӗслеме килсен прокуратурӑна каллех тивӗҫтермен: пушар хӑрушсӑрлӑхӗн йӗркине пӑснӑ тӗслӗхсем пулнӑ. Ҫавна май ведомство филиала вӑхӑтлӑха хупма суда тавӑҫ тӑратнӑ. Суд килӗшнӗ.

Тутарстанри Халӑхсен туслӑхӗн ҫуртӗнче чӑваш спектакльне кӑтартӗҫ. Хусана К.В. Иванов ячӗллӗ Чӑваш патшалӑх академи драма театрӗ «Хӑвӑрт укҫа ҫавӑрать пуҫа» спектакльпе тухса кайӗ. Ӑна Александр Пӑртта драматург пьеси тӑрӑх лартнӑ.

Чӑваш спектакльне Хусанта кӑтартма пулӑшассишӗн асӑннӑ тӑрӑхри чӑваш хастарӗ Константин Малышев тӑрӑшать.

Спектакле синхронлӑ мелпе вырӑслана куҫарӗҫ. Апла пулсан ӑна чӑвашсем ҫеҫ мар мар, ытти халӑх ҫыннисем те пырса курайӗҫ.

Спектакль ыран, ҫу уйӑхӗн 19-мӗшӗнче, 19.00 сехетре пуҫланӗ.

Инкеклӗ лару-тӑру министерстви тунӑ сӑн

Етӗрне районӗнчи Атликасси ялӗнче пурӑнакан арҫын пушарта сӗрӗмпе наркӑмӑшланнӑ та пульницӑна лекнӗ. Кун пирки Инкеклӗ лару-тӑру министерстви пӗлтерет.

Пушар ҫу уйӑхӗн 17-мӗшӗнче, ӗнер, ирхи 3 сехет ҫурӑра пулнӑ. Атликассинче пурӑнакан 88 ҫулти арҫыннӑн килӗнче пушар тухнӑ. Унӑн холодильникӗ ҫунса кайнӑ. Ҫавӑн пекех кухньӑри отделка сиенленнӗ.

Кил хуҫи сӗрӗмпе наркӑмашланнӑ. Ӑна пульницӑна илсе кайнӑ.

Следстви комитечӗ тунӑ сӑн

Нумаях пулмасть Шупашкарта харпӑр ҫурт путвалӗнче ҫын виллине тупнӑ. 59 ҫулти арҫынна пусмӑрласа вӗлерни паллӑ пулнӑран Следстви комитечӗ пуҫиле ӗҫ пуҫарнӑ.

Ҫакна тума пултарнӑ 66-ри арҫынна тытса чарнӑ. Следстви версийӗ ҫапларах: вӑл, вӗлернӗ арҫыннӑн пиччӗшӗ, ҫу уйӑхӗн 16-мӗшӗнче ӳсӗр пулнӑ, шӑллӗ патне кайнӑ. Пӗртӑвансем хирӗҫсе кайнӑ. Пиччӗшӗ шӑллӗне кӗлеткин тӗрлӗ пайӗнчен 80 хут ҫӗҫӗпе чикнӗ. Лешӗ ҫавӑнтах вилсе кайнӑ.

Арҫын вилене путвала пенӗ те хӑй тухса кайнӑ. Йӗрке хуралҫисем ӑна часах тытса чарнӑ.

Муркашри фельдшер Алевтина Павлова

Ҫанталӑк шӑрӑх тӑрать. Хӗвел ҫинче ҫынсем анранӑ тӗслӗхсем те нумайланнӑ. Юрать, унашкаллисене вӑхӑтра пулӑшу парса пурнӑҫне ҫӑлса хӑварнӑ.

Ҫу уйӑхӗн 14-мӗшӗнче Муркашра 64 ҫулти хӗрарӑм хӗвел ҫинче чылай вӑхӑт пулнӑ та ӑна япӑх пулса кайнӑ, тӑнне ҫухатнӑ. Иртен-ҫӳрен ҫакна курсан васкавлӑ медпулӑшу чӗннӗ. Тухтӑрсем пӗрремӗш пулӑшу парсан пульницӑна илсе ҫитернӗ.

Ҫу уйӑхӗн 14-мӗшӗнченпе республикӑра хӗвел ҫинче шар курнӑ тӑватӑ ҫын тухтӑрсенчен пулӑшу ыйтнӑ. Астӑвӑр: ҫынна хӗвел ҫинче япӑх пулса кайсан ӑна сулхӑна илсе каймалла, шыв нумай ӗҫтермелле.