krasnoyarsk.bezformata.com сайтри сӑн

Чӑваш Енри аслӑ шкулти преподаватель студентсемпе ултавҫӑсем пирки профилактика калаҫӑвӗ ирттернӗ Анчах хӑй вӗсен серепине ҫакланнӑ.

31 ҫулти хӗрарӑм преподаватель ют ҫӗршывра кӑларнӑ машина туянма шухӑшланӑ. Тӗнче тетелӗнче Беларуҫре «БМВ Х3» сутни пирки пӗлтерӳ вуланӑ. Сутуҫӑпа ҫыхӑннӑ, лешӗ суту-илӳ килӗшӗвне те ярса панӑ. Хӗрарӑм ӑна алӑ пуснӑ та сканерласа каялла ярса панӑ, кайран таможня пошлинине тӳленӗ. Укҫана вӑл ахаль ҫын счечӗ ҫине куҫарнӑ. Анчах ку ӑна пӗрре те иккӗлентермен.

Каярахпа тӳлемелли тепӗр счет ярса парсан тин иккӗленме тытӑннӑ вӑл. Кун хыҫҫӑн хӗрарӑм официаллӑ сайт урлӑ таможньӑна ыйту янӑ. Ҫапла ҫав вин-номерпе нимӗнлое автомобиль те чикӗ урлӑ каҫманнине пӗлнӗ.

Ҫапла хӗрарӑм ултавҫӑсене 3,3 миллион тенкӗ куҫарса ҫурӑк валашка умӗнче тӑрса юлнӑ.

«Контактра» халӑх тетелӗнчи сӑн

Чӑваш Енри технолог Олеся Васина сыр пӗҫерекенсен Пӗтӗм Раҫҫейри конкурсне хутшӑнӗ. Вӑл «Профессире чи лайӑххи» конкурсӑн регионти тапхӑрӗнче сыр пӗҫерес енӗпе мала тухнӑ. Конкурс Чӑваш патшалӑх аграри университетӗнче иртнӗ.

Республикӑри чи лайӑх виҫӗ сыр пӗҫерекен икӗ кун теори тата практика тӗлӗшпе тупӑшнӑ. Виҫҫӗшӗ те вӑйлӑ, пурте пӗр пекрех балсем пухнӑ. Ку виҫҫӗшӗн те ӑсталӑх пысӑккине кӑтартать.

Ҫапах конкурсра ҫӗнтерӳҫӗ пурах. Олеся Васинан кӑтартӑвӗ чи лайӑххи пулнӑ. Иккӗмӗш вырӑна – Алексей Андреев, виҫҫӗмӗшне Татьяна Юркина тухнӑ.

Палӑртса хӑварар: Олеся сыр пӗҫерекенре виҫӗ ҫул кӑна ӗҫлет, анчах пысӑк профессионал пулса тӑма ӗлкӗрнӗ. Вӑл ҫӗнӗ рецептсем шухӑшласа кӑларать, кӑвассемпе ферментсем суйлать, ҫамрӑк специалистсене вӗрентет.

Паян, ҫӗртме уйӑхӗн 29-мӗшӗнче, Шупашкар аэропорчӗ Минска пӗрремӗш самолета янӑ.

Беларуҫри Минск хулинчи Наци аэропорчӗ ӑна, Шупашкарти пӗрремӗш рейса, паян ирхине кӗтсе илнӗ. Рейссене «Аэрофолот» авиакомпани пурнӑҫлать. Самолетсем Шупашкартан эрнере икӗ хутчен вӗҫеҫҫӗ – тунтикун тата кӗҫнерникун ирхи 6 сехет те 15 минутра.

Самолет Минска 8:35 сехетре ҫитет. Минскран 02:24 сехетре тухса самолет Шупашкарта ирхи 4 сехет те 55 минутра анса ларать. Икӗ хула хушшинче Airbus A320 лайнерсем вӗҫеҫҫӗ. Билет хакӗ – 9 пин тенкӗ ытларах.

Сӑмах май, икӗ ҫӗршыв калаҫса килӗшнипе Раҫҫей ҫыннисем Беларуҫе визӑсӑр тата ют ҫӗршыв паспорчӗсӗр кайма пултараҫҫӗ.

«Контактра» халӑх тетелӗнчи сӑн

Вӗсем пӗрлешнӗ те 65 ҫул пӗрле алла-аллӑн тытӑнса утаҫҫӗ.

Ку сӑмахсем – Канаш округӗнчи Муллавар ялӗнче пурӑнакан Петровсем ҫинчен.

Геннадий Петровичпа Нина Маркеловнӑн ҫак кунсенче хӑна-вӗрле пухма харӑсах икӗ сӑлтав пулнӑ. Пӗрремӗшӗнчен, вӗсем ҫемье ҫавӑрнӑранпа 65 ҫул ҫитнӗ. Иккӗмӗшӗнчен, ҫемье пуҫӗ Геннадий Петрович 90 ҫул тултарнӑ.

Петровсем – ялти хисеплӗ ҫемье, вӗсем ялта пуриншӗн те тӗслӗх. Мӑшӑр 6 ача ҫуратса вӗсене ура ҫине тӑратнӑ. Паянхи кун вара сумлӑ ватӑсене 13 мӑнукӗ тата 6 кӗҫӗн мӑнукӗ савӑнтараҫҫӗ.

Ҫакна та палӑртмалла: петровсем иккӗшӗ те – ӗҫ ветеранӗсем. Нина Маркеловна вара «Амӑшӗн мухтавӗ» ордена та тивӗҫнӗ.

Туй тунӑранпа 65 ҫул ҫитнӗ май Петровсене округри ЗАГС пайне чыслама чӗннӗ.

cap.ru сайтри сӑн

Шупашкар хулинче Пӗтӗм Раҫҫейри професси ӑсталӑхӗн «Профессире чи лайӑххи» конкурсӑн регионти тапхӑрӗ иртнӗ. Унта 15 специалист кӗрешнӗ.

Ирхи 10 сехетре старта тӑхӑр бульдозер машинисчӗ тухнӑ. Жюри пайташӗсем малти вырӑнсене ҫаксене пама йышӑннӑ. «Бульдозер машинисчӗ» номинацире пӗрремӗш вырӑна тата 100 пин тенке «КЕТРА» савут филиалӗнче ӗҫлекен Сергей Степанов тивӗҫнӗ. «Экскаватор машинисчӗ» номинацире те ҫав организацирех вӑй хуракан Эдуард Петров мала тухнӑ.

Вӗсен республика чысне Раҫҫей шайӗнче хӳтӗлеме тивӗ. Вӑл вара авӑн уйӑхӗнче иртӗ. Хальхинче те пирӗн патра – Шупашар хулинче. Мала тухнӑ специалистсем конкурса хатӗрленме тытӑнӗҫ.

«Контактри» сӑн

Чӑваш Енри чи лайӑх повара палӑртнӑ. Вӑл – Алексей Шугуров. Алексей Етӗрне хулинчи «Вишенка» кафере бренд-шефра 20 ҫул ӗнтӗ вӑй хурать. Ӑна республика шайӗнчи конкурсра пӗрремӗш вырӑна тухнӑшӑн 100 пин тенкӗ панӑ. Алексей Чӑваш Республикин чысне федераци тапхӑрӗнче хӳтӗлӗ. Вӑл Вологда хулинче иртӗ. Унта пирӗн ентеш 1 миллион тенкӗшӗн кӗрешӗ.

Республика конкурсӗнче иккӗмӗш вырӑна тата 60 пин тенке «Сушистик» суши-кафере ӗҫлекен повар Евгений Николаев тивӗҫнӗ. Виҫҫӗмӗш вырӑнта вара – Шупашкар хулинчи «Багратиони» ресторанта ӗҫлекен Антон Захаров. Ӑна куншӑн 40 пин тенкӗпе хавхалантарнӑ.

«Чӑваш Ен яланах кулинари пултарулӑхӗпе палӑрнӑ. Республикӑра Раҫҫей шайӗнче хӳтӗлес тивӗҫе мӑнаҫланса йышӑнатӑп», — тенӗ Алексей Шугуров.

«Контактра» халӑх тетелӗнчи сӑн

Маршрутка водителӗнче ӗҫлекен Надежда Тихонова «Автоледи» республика конкурсӗнче ҫӗнтернӗ. Конкурс иртесси пирки сайтра унччен хыпарланӑччӗ.

Ку конкурс Республика кунӗнче, ҫӗртме уйӑхӗн 24-мӗшӗнче, Шупашкар хулинче иртнӗ. Жюри пайташӗсем хӗрсемпе хӗрарӑмсем машинӑпа мӗнле ҫӳренине, ҫул-йӗр правилисене мӗнле пӑхӑннине хакланӑ.

Палӑртма кӑмӑллӑ: пӗрремӗш вырӑна Надежда Тихонова тухнӑ. Надежда – икӗ ача амӑшӗ. Вӑл пултарулӑх енчен те маттур: гитара калать, сӑвӑсем ҫырать. Вӗсене маршрутка салонне те ҫыпӑҫтарать – пассажирсем киленсе вулаҫҫӗ. Ӗҫӗ унӑн ҫӑмӑлах мар: кашни кун тенӗ пек маршруткӑпа ҫынсене илсе ҫӳрет.

Сӑмах май, Надежда Тихонова конкурса иккӗмӗш хут хутшӑннӑ. 2023 ҫулта вӑл 2-мӗш вырӑна тухма пултарнӑ. Кӑҫал та вӑл хӑйӗн вӑйне тӗрӗслесе пӑхас тенӗ.

cap.ru сайтри сӑн

Куславкка округӗнче М-7 ҫул ҫинче индустри паркӗ тума палӑртнӑ. Кун валли инвестор 225 миллион тенкӗ уйӑрма хатӗр.

Инвестор Тутарстанри предприниматель, «М-7 Козловский» тулли мар яваплӑ общество ертӳҫи, пулӗ. Килӗшӗве Шупашкарти экономика форумӗнче алӑ пуснӑ.

Индустри паркӗ М-7 ҫул хӗрринче вырнаҫӗ. Резидентсем валли производство цехӗсемсӗр пуҫне ҫул хӗрринче ҫынсене пулӑшу паракан сервис та пулӗ.

cap.ru сайтри сӑн

Республикӑра ҫӗнӗ уяв пулӗ. Малашне Ял хӗрарӑмӗн уявне паллӑ тума тытӑнӑпӑр. Хушӑва ЧР Элтеперӗ Олег Николаев ҫӗртме уйӑхӗн 22-мӗшӗнче алӑ пуснӑ.

Уява юпа уйӑхӗн 16-мӗшӗнче паллӑ тума йышӑннӑ. «Ялта пурӑнакан хӗрарӑмсен общество пурнӑҫӗнчи рольне ӳстерес, агропромышленноҫе, ялти социаллӑ сферӑна тата предпринимательлӗхе аталантарас тӗллевпе Чӑваш Республикинче Ял хӗрарӑмӗн уявне ҫирӗплетес» тенӗ документра. Уява йышӑнас пуҫарупа республикӑри Хӗрарӑмсен пӗрлӗхӗ тухнӑ. Ӑна Элтеперӗн мӑшӑрӗ Наталья Николаева ертсе пырать.

Аса илтерер: Олег Николаев Элтепер пулнӑ чухне Ашшӗн кунне (юпа уйӑхӗнчи юлашки вырсарникун паллӑ тӑваҫҫӗ), Чӑваш тӗррин кунне (чӳк уйӑхӗн 26-мӗшӗ), Сӑр тата Хусан хӳтӗлев чиккисен строителӗсен кунне (юпа уйӑхӗн 28-мӗшӗнче паллӑ тӑваҫҫӗ) паллӑ тума йышӑннӑ.

«Контактри» сӑн

Ҫӗнӗ Шупашкар хулинче пурӑнакан нумай ача амӑшӗ Вера Майорова «Анне» амӑшӗн мухтавӗн паллине тивӗҫнӗ.

Верӑпа Сергей 4 хӗрпе 1 ывӑл ҫуратнӑ, вӗсене пурнӑҫӑн анлӑ ҫулӗ ҫине кӑлараҫҫӗ. Майоровсем тӗрлӗ конкурса хутшӑнса палӑрнӑ: «Ҫемьепе» фестиваль лауреачӗ пулнӑ, «Ҫулталӑкри ҫемье» конкурсӑн муниципалитет тапхӑрӗнче «Пултарулӑх ҫемйи» номинацире тата «Чӑваш Енри ҫемье» Пӗтӗм Раҫҫейри ҫемье туризмӗн фестивалӗнче ҫӗнтернӗ.

Ачисем те маттур. Асли Виктория колледжра вӗренет. Лайӑх паллӑсемпе ӑс пухнашӑн вӑл пысӑк стипенди илсе тӑрать.

Вера хӑй те ахаль ларма юратмасть, пултарулӑхпа аппаланма та вӑхӑт тупать: чӑвашла сӑвӑсем тата юрӑсем ҫырать, «Теветкел» фольклор ансамбльне юрлама ҫӳрет.