Кандинский нейросеть сӑнӳкерчӗкӗ

Ҫитес ҫулхи ута уйӑхӗн 1-мӗшӗнчен пирӗн республикара коммуналлӑ пулӑшу хакӗ ӳсӗ.

Хулара пурӑнакансем электроэнергишӗн 1 кВТ/сехетшӗн 4 тенке те 96 пус тӳлеме пуҫлӗҫ е хак 12,5 процент хӑпарӗ. Ку вал электроплита ҫуккисен ҫавӑн пек пулӗ. Электроплиталлисен 3 тенкӗ те 47 пус (хальхинчен 12,3 процент нумайрах) тӳлеме тивӗ.

Ҫутанҫанталак газӗшӗн хак 10 процент ӳсӗ.

Нумай хваттерлӗ ҫуртсенче пурӑнакансем йӑлари хытӑ каяшшӑн

62 тенкӗ те 73 пус (5,0 процент нумайрах) тӳлеме тытӑнӗҫ, ялтисем — 73 тенке те 16 пус.

ставрополь.рф сайтри сӑн

2022 ҫулхи ҫу уйӑхӗнче Шӑмӑршӑра пурӑнакан хӗрарӑм бизнес-план хатӗрлесе ӑна хӳтӗленӗ хыҫҫӑн социаллӑ контракт алӑ пуснӑ. Ҫапла вӑл какайран ҫурмафабрикатсем хатӗрлеме патшалӑхран 250 пин тенкӗ субсиди илнӗ.

Анчах хӑй услам ӗҫне пуҫарман, укҫипе хӑй пӗлнӗ пек усӑ курнӑ. Район прокуратури Патӑрьел районӗн судне тавӑҫ тӑратнӑ. Ҫапла хӗрарӑм патшалӑхран илнӗ укҫана каялла тавӑрса парӗ.

Сӑмах май, Вӑрнар округӗнчи арҫын та автосервис уҫма тесе патшалӑхран 350 пин тенкӗ субсиди илнӗ. Ӑна социаллӑ тӳлеве вӑрланӑ тесе айӑпланӑ.

culture.ru сайтри сӑн

Ҫӗрпӳ округӗнчи арҫын кредит тӳлес мар тесе паспорт ҫухатнӑ тесе суйнӑ. Кун пирки вӑл ҫурла уйӑхӗнче полицие пӗлтернӗ.

Вӑл паспортне ҫухатнӑ хыҫҫӑн такам ун ячӗпе кредит илнӗ имӗш. Тӗрӗслев ирттернӗ те ҫакӑ паллӑ пулнӑ: арҫын 45 пин тенкӗ кредита хӑйех илнӗ, укҫине тӑкакласа пӗтернӗ. Анчах ӳсӗр пулнипе кун пирки маннӑ. Ҫавна пулах паспортне ӑҫта хунине те астуман.

Кайран аса илнӗ-ха. Анчах кредит тӳлес мар тесе паспорт ҫухалнӑ тесе суйма шутланӑ.

steamcommunity.com сайтри сӑн

Юпа уйӑхӗнче Раҫҫейре «Тимӗр укҫа эрни» иртнӗ. Ҫав тапхӑрта банксене 330 пин ытла тимӗр укҫа илсе килнӗ.

Ку пӗтӗмпе – 1,1 миллион тенкӗлӗх. Ҫуркунне иртнӗ акципе танлаштарсан, ку 18 процент нумайрах.

Шупашкарта пурӑнакан арҫын 1,5 пин пус михӗпе илсе килнӗ. Вӑл 20 ҫул каялла хӑйӗн туйӗ валли хӗр илес тесе укҫана 1 пуслӑххисемпе улӑштарнӑ. Пӗр пайӗ хута кайнӑ, тепри вара ҫаплипех выртнӑ.

"Контактра" сайтри сӑн

Эсир ҫавӑн чухлӗ шапа хуранӗ курнӑ-и? Ахӑртнех, ҫук. Кун пек курава Александр Семенов йӗркеленӗ. Вӑл «Орленокра» 10 ҫула яхӑн ӗҫленӗ, ҫав тапхӑрта шапа хуранӗсем пухнӑ.

Унӑн коллекцийӗнче – 450 ытла экспонат. Александр вӗсене килте упрать. Халӗ вара Патӑрьел тӑрӑхӗнчи ачасене те кӑтартма шухӑшланӑ. Ара, кашниех тинӗс хӗрринче пулса кураймасть вӗт. Хӑть куравра шапа хуранӗсене курса киленӗҫҫӗ.

Ачасем чӑннипех те савӑннӑ! Шапа хуранӗсене кӑсӑкланса сӑнаҫҫӗ, тытса пӑхаҫҫӗ, ыйтусем параҫҫӗ.

"Контактри" сӑн

Ҫӗнӗ ҫул ҫывхарать. Ялсенче, хуласенче урамсем капӑрлансах пыраҫҫӗ. Хӑш-пӗр вырӑнта юмаха лекнӗнех туйӑнать.

Ҫавӑн пек вырӑнсенчен пӗри – Хӗрлӗ Чутайри Ҫамрӑксен урамӗ. Унта пурӑнакансем кил-ҫуртне илемлетнӗ: йӑлтӑр-ялтӑр гирляндӑсем, хитрелетнӗ чӳречесем чӑннипех те Ҫӗнӗ ҫул асамлӑхӗ парнелеҫҫӗ.

Эсир те кил-ҫурта капӑлатнӑ-и?

Улатӑрта Ленин урамне хӑтлӑлатнӑ май йывӑҫ крепоҫ тума тытӑннӑ. Ку хулара истори пӗлтерӗшлӗ вырӑн шутланать.

Крепоҫ Улатӑрта Хаяр Иван вӑхӑтӗнче хута кайнӑ кремль копийӗ пулӗ. Шалта ача-пӑча лапамӗ тума палӑртнӑ.

Каласа хӑварар: Улатӑр 1552 ҫулхи ҫурлан 4-мӗшӗнче Хаяр Иван ҫарӗсем Хусана кайнӑ чухне никӗсленнӗ. Халап тӑрӑх, патшана Сӑр хӗрринчи ҫӳллӗ вырӑн килӗшнӗ, вӑл унта крепоҫ хӑпартма хушнӑ. Крепоҫ 1731 ҫулта пушарта ҫунса кайнӑ, тек ӑна хута яман.

cap.ru сӑнӳкерчӗкӗ

Муркаш округӗнче пурӑнакан Раисӑпа Геннадий Шорниковсем туй тунӑранпа 60 ҫул ҫитнине паллӑ тунӑ. Вӗсем иккӗшӗ те педагог, ку тытӑмра нумай ҫул ӗҫленӗ.

Раиса Александровна – Куйбышев облаҫӗнчен. Геннадий Степанович унта вырӑс чӗлхипе литературине вӗрентме кайнӑ. 1963 ҫулта вӑл пулас арӑмӗпе тӑван тӑрӑхне таврӑннӑ, Шупашкар районӗнчи Чурачӑк ялӗнчи шкулта ӗҫлеме тытӑннӑ. Геннадий Степанович учительтен пуҫласа шкул директорӗ таран ҫитнӗ. Унӑн педагогикӑри стажӗ – 40 ҫул.

Раиса Георгиевна ҫав шкултах химипе биологи предмечӗсене вӗрентнӗ, завуч пулнӑ.

Шорниковсем виҫӗ ачана ура ҫине тӑратнӑ, халӗ 5 мӑнукпа савӑнса пурӑнаҫҫӗ.

Пирӗн Хӗл Мучи Тол-Бабай патне хӑнана кайма хатӗрленет. Вӑл – удмуртсен

Ҫӗнӗ ҫул асамҫи. Кун пирки «Пуринчен малтан» телеграм-канал хыпарлать.

Тол-Бабай пурӑнакан ялта раштав уйӑхӗн 14-15-мӗшӗсенче фестиваль иртӗ. Шӑпах унта кайма хатӗрленет пирӗн Хӗл Мучи. Фестивале тӗрлӗ регионти асамҫӑсем хутшӑнӗҫ: Костромари Юр пике, Пенза облаҫӗнчи Боянпа Сурия, Екатеринбургри Урал-Морозпа Весна-Красна, Карелири Паккайне тата Луминайне, Чӑваш Енри Хӗл Мучи... Паллах, капӑр чӑрӑш та пулӗ.

ria.ru сайтри сӑн

Элӗк округӗнчи Вутлан шкулӗнчи ачасем пульницӑна пулӑшу ыйтма кайнӑ. Вӗсен пурин те апатпа наркӑмӑшланнӑ паллӑсем пулнӑ.

Пурне те медпулӑшу панӑ. Хӑшӗ-пӗрине сипленме вырттарнӑ.

Элӗк районӗн прокуратури ку тӗслӗх тӗлӗшпе тӗрӗслев ирттерет. Унта Роспотребнадзор тата йӗрке хуралӗн ӗҫченӗсем те хутшӑнаҫҫӗ. Кун хыҫҫӑн ачасем мӗншӗн наркӑмӑшланнине палӑртӗҫ.